Ol Referens Bilong Laip na Wok Autim Tok Miting Wok Buk
NOVEMBA 7-13
GUTPELA SAVE I KAM LONG BAIBEL | 2 KING 5-6
“I Gat Bikpela Lain Moa i Stap Wantaim Yumi Winim Ol”
it-1 716 par. 4
Elisa
God i Kisim Bek Israel Long Han Bilong Ol Siria. Long taim King Jehoram i bosim Israel, ol Siria i hait na wokim plen long go pait long Israel. Inap planti taim ol plen bilong Ben-hadat Namba 2 i no kamap gut bikos Elisa i save long ol dispela plen, olsem na em i save tokim King Jehoram long olgeta samting ol Siria i laik mekim. Pastaim Ben-hadat i ting olsem i gat wanpela man long kem bilong em yet i wok long hait na go tokim ol Israel long samting em i laik mekim. Tasol taim em i save long husat man stret i mekim dispela samting, em i salim ami i go long Dotan, na ol i raunim taun wantaim ol hos na karis bilong ol na bai ol i ken kisim Elisa. Wokman bilong Elisa i pret, tasol Elisa i beten long God long opim ai bilong em, “na lukim! ples maunten i pulap long ol hos na ol karis bilong pait i lait olsem paia, na olgeta i raunim Elisa.” Taim ol hos bilong ol Siria i kam klostu, Elisa i beten na askim long em i ken mekim samting we i narapela kain long samting pastaim em i askim long en, “Plis, mekim ai bilong ol dispela lain i kamap tudak.” Elisa i tokim ol Siria, “Bihainim mi,” tasol em i no holim han bilong ol na bringim ol i go, olsem na dispela i makim olsem tru tru ai bilong ol i no pas, nogat, tingting bilong ol i paul. Ol i no luksave long Elisa, em man ol i kam bilong kisim, na ol i no save long hap em bai kisim ol i go long en.—2Ki 6:8-19.
Elisa i Lukim Ol Karis i Gat Paia Long En—Yu Inap Lukim?
Taim ol birua i banisim Elisa long taun Dotan, bel bilong em i stap isi na em i no pret. Bilong wanem? Long wanem, em i gat strongpela bilip long Jehova. Yumi tu i mas i gat strongpela bilip. Yumi mas beten askim God long givim holi spirit na bai yumi inap soim pasin bilong bilip na ol arapela gutpela pasin em holi spirit i save kamapim.—Luk 11:13; Gal. 5:22, 23.
it-1 343 par. 1
Aipas
Long dispela taim we Elisa i beten na ami bilong Siria i kamap aipas, i klia tru olsem ai bilong ol i no pas, nogat, tingting bilong ol i paul. Sapos olgeta ami i kamap aipas, orait em inap long holim han bilong ol na kisim ol i go. Tasol stori i kamapim olsem Elisa i tokim ol: “Yupela i no ken go olsem, em i no dispela taun. Yupela kam bihainim mi.” William James i stori long dispela kain samting long buk bilong em Principles of Psychology (1981, Vol. 1, p. 59), na em i tok: “Wanpela narakain samting we inap kamap taim namba 1 hap bilong kru i no wok gut em olsem kru i no inap luksave long ol samting. Dispela i makim olsem ai i lukim, tasol kru i no save long samting ai i lukim. Taim yumi skelim hau kru i save wok, i klia tru olsem kru i no inap toksave long samting ai i lukim na samting em i makim; na i gat sampela samting i mekim na samting ai i lukim em kru i no inap long tokaut em wanem samting stret.” I luk olsem Jehova i mekim kain samting taim ami bilong Siria i kamap long Samaria. (2Ki 6:18-20) Ating wankain samting i bin painim tu ol man long Sodom, long wanem, stori i kamapim olsem ol i bel hevi bikos ol i bin wok strong long painim dua long haus bilong Lot, na i no bikos ai bilong ol i pas na ol i no inap lukluk.—St 19:11.
Mekim Wok Painimaut
Sampela Bikpela Tok Bilong Buk Namba 2 King
5:15, 16—Bilong wanem Elisa i no kisim presen Naman i givim em? Elisa i no laik kisim presen, em i save em i bin wokim mirakel long strong bilong Jehova na i no long strong bilong em yet. Em i save i no stret long kisim mani samting long wok God i makim em long mekim. Ol man i lotu tru long God long nau, ol i no save tingting long kisim mani samting long wok bilong Jehova ol i save mekim. Ol i bihainim tok bilong Jisas, em i tok: “Samting yupela i bin kisim, em yupela i kisim nating, na i no gat pe bilong en. Olsem na yupela i mas givim nating long ol manmeri.”—Matyu 10:8.
NOVEMBA 14-20
GUTPELA SAVE I KAM LONG BAIBEL | 2 KING 7-8
“Jehova i Mekim Samting Ol Man i No Ting Bai Kamap”
it-1 716-717
Elisa
Tasol bihain Ben-hadat Namba 2 i kam insait long Samaria, em i no mekim long pasin hait olsem stilman, nogat, em wantaim planti lain i kam na banisim taun. Dispela i kamapim bikpela hevi, wanpela em meri i kaikai pikinini man bilong em yet na ol i ripotim king. Olsem pikinini bilong Ahap, em “dispela pikinini man bilong kilman,” King Jehoram i promis long kilim i dai Elisa. Tasol em i no mekim olsem em i tok promis. Taim Jehoram na ofisa bilong em i go kamap long haus bilong profet, Jehoram i tok em i no bilip olsem Jehova bai helpim em. Elisa i tokim king olsem neks de bai i gat planti kaikai. Ofisa bilong king i tok bilas long dispela tok, olsem na Elisa i tokim em: “Long ai bilong yu yet yu bai lukim dispela samting, tasol yu no inap kaikai.” Jehova i mekim na bikpela nois i kamap long kem bilong ol Siria, ol i ting olsem bikpela lain ami bilong ol kantri i bung wantaim bilong kam pait long ol, na ol i ranawe na lusim kem bilong ol wantaim olgeta kaikai. Taim king i harim olsem ol Siria i ranawe, em i tokim ofisa bilong em long was long geit bilong Samaria, na long dispela hap em i dai taim bikpela lain manmeri bilong Israel i ron i go bilong go long kem bilong Siria. Em i lukim kaikai tasol em i no kaikai.—2Ki 6:24–7:20.
Mekim Wok Painimaut
it-2 195 par. 7
Lam
Ol King Long Famili Bilong Devit. Jehova God i makim King Devit long stap king long Israel, na ol samting Devit i mekim i soim olsem em i gat savetingting na em i lidim dispela lain, God i stiaim em. Olsem na ol i kolim em “lam bilong Israel.” (2Sm 21:17) Long dispela kontrak bilong kingdom em Jehova i mekim wantaim Devit, em i tok promis: “Wok king bilong yu bai i no gat pinis bilong en. Wok king bilong yu bai i stap oltaim.” (2Sm 7:11-16) Ol samting i kamap olsem dispela promis, lain i mekim wok king i stap long dispela famili, Devit i mekim wok king na bihain pikinini man bilong em Solomon i stap olsem “lam” bilong Israel.—1Ki 11:36; 15:4; 2Ki 8:19; 2St 21:7.
NOVEMBA 21-27
GUTPELA SAVE I KAM LONG BAIBEL | 2 KING 9-10
“Em i Strongim Bel, Tingting Strong, na Givim Bel Tru”
Jehu i Givim Bel Long Sapotim Lotu i Tru
Jehu i kisim wok taim sindaun bilong lain Israel i stap nogut tru. Kwin nogut Jesebel, em man bilong em Ahap i dai pinis, na mama bilong King Joram, i wok long kirapim ol manmeri long mekim pasin nogut. Em i kirapim ol manmeri long lotuim Bal na i no Jehova, em i kilim i dai ol profet bilong God, na em i kirapim ol man long “bihainim ol giaman god” na “mekim posin.” (2 Kin. 9:22; 1 Kin. 18:4, 13) Jehova i tokaut olsem olgeta lain bilong Ahap wantaim Joram na Jesebel i mas dai. Jehu i mas go pas long mekim dispela samting.
Jehu i Givim Bel Long Sapotim Lotu i Tru
Jehu i no bekim tok long tupela soldia em king i salim i go long em. Na bihain King Joram na king bilong Juda, Ahasia, ol i sindaun long karis bilong ol yet na i go bungim Jehu. Joram i askim Jehu olsem: “Olgeta samting i stap i orait, o nogat?” Jehu i bekim tok olsem: “Bai i orait olsem wanem, sapos mama bilong yu Jesebel, i wok yet long bihainim ol giaman god na i mekim ol pasin nogut na ol pasin bilong mekim posin.” Joram i kirap nogut long dispela bekim na em i laik ranawe. Tasol kwiktaim Jehu i taitim strong banara bilong em na sutim i go na spia i kisim lewa bilong Joram na em i pundaun na dai insait long karis bilong em. Ahasia i ranawe, tasol bihain Jehu i painim em na tokim ol soldia long kilim em tu i dai.—2 Kin. 9:22-24, 27.
Narapela long lain bilong Ahap husat i mas dai em kwin nogut Jesebel. I stret Jehu i kolim em “dispela meri nogut.” Taim Jehu i kam insait long Jesril, em i lukim Jesebel i stap long haus king na i lukluk long windo i kam daun. Kwiktaim Jehu i tokim ol wokman bilong haus king long tromoi Jesebel i kam daun. Nau Jehu i mekim ol hos na karis bilong em i krungutim bodi bilong dispela meri husat i bin paulim olgeta Israel. Bihain, Jehu i kilim i dai planti man long lain bilong man nogut Ahap.—2 Kin. 9:30-34; 10:1-14.
Jehu i Givim Bel Long Sapotim Lotu i Tru
Tru, Jehu i bin kapsaitim planti blut. Tasol stori bilong Baibel i kamapim olsem em i gat strongpela bel na em i bin helpim lain Israel na ol i no stap aninit moa long hatpela wok bos bilong Jesebel na famili bilong em. Bilong man i go pas long Israel i ken mekim ol dispela samting, em i mas stap olsem man i gat strongpela bel, na i tingting strong long samting em i laik mekim, na em i mas givim bel tru long samting em i mekim. Wanpela Baibel dikseneri i tok: “Dispela wok i hatwok long mekim, tasol em i no givap, em i inapim gut dispela wok. Sapos em i bin sori na marimari long ol, orait ating em bai no inap pinisim pasin bilong lotuim Bal long lain Israel.”
Ating yu luksave olsem i gat sampela samting i kamap long ol Kristen long nau na ol i mas bihainim sampela pasin bilong Jehu. Olsem, yumi bai mekim wanem taim traim i kamap bilong pulim yumi long insait long samting Jehova i no laikim? Yumi mas i gat strongpela bel na strong long sakim hariap dispela samting. Pasin bilong yumi long givim bel tru long God i mekim na yumi bihainim Jehova wanpela tasol.
Mekim Wok Painimaut
Jehu i Givim Bel Long Sapotim Lotu i Tru
Ating Jehu i ting olsem bilong kingdom bilong Israel na kingdom bilong Juda i ken i stap narapela narapela, ol i mas i gat lotu bilong ol yet. Olsem na bilong tupela lain i no ken kamap wanpela lain gen, Jehu i mekim wankain samting olsem ol arapela king bilong Israel i bin mekim. Em i laik kirapim ol long lotuim ol bulmakau gol. Tasol dispela bai soim olsem em i no bilip moa long Jehova, husat i bin mekim em i kamap king.
Jehova i mekim gutpela tok long Jehu, long wanem, em i bin bihainim laik bilong God. Tasol Jehu “i no strong long bihainim gut olgeta lo bilong God, Bikpela bilong Israel.” (2 Kin. 10:29-31) Taim yumi tingim ol samting Jehu i bin mekim long pastaim, ating yumi bai kirap nogut na pilim sori long em i no strong moa long bihainim ol lo bilong God. Tasol dispela inap givim skul long yumi. Yumi no ken ting pasin bilong yumi long pas gut wantaim Jehova em i samting nating. Long olgeta de yumi mas wok long kamapim olsem yumi stap gut long God long rot bilong stadi long Baibel, tingim tingim long bel ol dispela tok, na beten long Papa bilong yumi long heven. Em nau, yumi mas lukautim gut pasin bilong yumi long givim bel olgeta long bihainim ol lo bilong Jehova.—1 Kor. 10:12.
NOVEMBA 28–DISEMBA 4
GUTPELA SAVE I KAM LONG BAIBEL | 2 KING 11-12
“Bikhet Meri i Gat Pasin Antap i Kisim Strafe”
it-1 209
Atalia
Olsem mama bilong em Jesebel, Atalia i kirapim man bilong em, Jehoram, long mekim ol samting we Jehova i no orait long en long dispela 8-pela yia em i mekim wok king. (1Ki 21:25; 2St 21:4-6) Na olsem mama bilong em, Atalia i kapsaitim blut bilong ol man i no gat asua. Taim bikhet pikinini bilong em Ahasia i dai bihain long em i mekim wok king inap 1-pela yia, Atalia i kilim i dai olgeta narapela long dispela lain famili husat bai mekim wok king, bebi Jehoas tasol em i no kilim, bikos hetpris na meri bilong em i haitim em, em anti bilong Jehoas. Olsem na Atalia i putim em yet i stap olsem kwin inap 6-pela yia, k. 905-899 B.C.E. (2St 22:11, 12) Ol pikinini man bilong em i bin stilim ol samting holi long tempel bilong Jehova na mekim ofa long Bal.—2St 24:7.
it-1 209
Atalia
Taim Jehoas i gat 7-pela krismas, hetpris i save lotuim God em Jehoiada i kisim em i kam long pasin hait na makim em olsem king, em wok i stret long em i kisim. Atalia i harim na kwiktaim em i ron i go long tempel na taim em i lukim dispela samting, em i krai na tok, “Yupela i laik daunim mi! Yupela i laik daunim mi!” Hetpris Jehoiada i tokim ol long kisim em i go ausait long banis bilong tempel na kilim em i dai long dua we ol hos i save go insait long banis bilong haus king, ating em laspela long lain famili bilong bikhet man Ahap. (2Ki 11:1-20; 2St 22:1–23:21) Samting i kamap i truim dispela tok: “I no gat wanpela tok bilong Jehova em Jehova i bin mekim long samting bai painim lain famili bilong Ahap bai lus nating, nogat”!—2Ki 10:10, 11; 1Ki 21:20-24.
Mekim Wok Painimaut
it-1 1265-1266
Joas
Kirap long dispela taim, long ol yia we Hetpris Jehoiada i stap laip em i stap olsem papa na edvaisa bilong Joas, na dispela yangpela king i mekim gut wok. Joas i marit taim em i gat 21 krismas, em i gat 2-pela meri, wanpela em nem bilong em Jehoadan, so em i kamap papa long ol pikinini man na meri. Long dispela rot lain tumbuna bilong Devit i stap yet i go inap long taim Mesaia i kamap, klostu dispela lain i laik pinis, tasol ol i kamap strong gen.—2Ki 12:1-3; 2St 24:1-3; 25:1.
DISEMBA 5-11
GUTPELA SAVE I KAM LONG BAIBEL | 2 KING 13-15
“Pasin Bilong Givim Bel Olgeta i Save Kamapim Planti Blesing”
Yu Save Bihainim Tru Krais?
11 Bilong kamapim klia olsem em i bikpela samting long givim bel long mekim wok bilong God, tingim wanpela samting i kamap long laip bilong King Jehoas bilong Israel. Em i tingting planti long samting bai painim ol Israel long han bilong ol Siria, olsem na Jehoas i go krai long Elisa. Profet i tokim em long opim windo na sutim wanpela banara i go long hap bilong Siria, na dispela i makim olsem Jehova bai helpim ol long daunim dispela lain. Man! Dispela i mas strongim tru bel bilong king, a? Orait nau Elisa i tokim Jehoas long kisim ol banara na paitim graun long en. Jehoas i paitim graun tripela taim tasol. Elisa i kros long dispela, long wanem, sapos em i paitim graun 5-pela o 6-pela taim, dispela bai makim olsem ol bai “pinisim tru ol Siria.” Nau Jehoas bai winim ol tripela taim tasol. Jehoas i no givim bel long paitim graun, olsem na em i no winim tru ol Siria. (2 Ki. 13:14-19) Yumi inap kisim wanem skul long dispela stori? Jehova bai blesim tru yumi sapos yumi givim bel olgeta na wok strong tru long mekim wok bilong em.
“God i Save Givim Gutpela Pe Long Ol Man i Wok Strong Long Painim Em”
Jehova i save givim gutpela pe long husat? Pol i tok, long “ol man i wok strong long painim em.” Wanpela dikseneri bilong Baibel i tok, dispela tok Grik “wok strong long painim” i no makim pasin bilong painim o kisim save long God, nogat, em i makim pasin bilong “lotuim God.” Narapela dikseneri i tok dispela tok Grik i makim pasin bilong givim bel na tingting olgeta long lotuim God. Tru tumas, Jehova i save givim gutpela pe long ol man em bilip bilong ol i kirapim ol long laikim tru na givim bel long lotuim em.—Matyu 22:37.
Olsem wanem Jehova i save givim gutpela pe long ol man i lotuim em? Em i promis long givim ol wanpela gutpela presen tru long bihain, em laip oltaim long Paradais long graun. Dispela presen i kamapim klia pasin bilong em long redi long givim samting na pasin laikim bilong em. (Revelesen 21:3, 4) Long nau tu, ol man i wok strong long painim Jehova, ol i save kisim ol gutpela blesing tru. Ol i kisim helpim i kam long holi spirit, na gutpela savetingting bilong Baibel i helpim ol long stap amamas.—Song 144:15; Matyu 5:3.
Mekim Wok Painimaut
Sampela Bikpela Tok Bilong Buk Namba 2 King
13:20, 21—Olsem wanem? Mirakel dispela ves i stori long en i helpim dispela bilip olsem ol bun bilong ol santu i holi? Nogat. Baibel i no stori liklik long ol man i givim biknem long ol bun bilong Elisa. Em strong bilong God tasol inap kamapim dispela mirakel, na i wankain tu long ol mirakel em Elisa i bin mekim taim em i bin stap laip yet.
DISEMBA 12-18
GUTPELA SAVE I KAM LONG BAIBEL | 2 KING 16-17
“Pasin Bilong Jehova Long i No Les Kwik i Gat mak Bilong En”
it-2 908 par. 5
Salmaneser
Lain i Bosim Israel. Long taim King Hosia i bosim Israel (k. 758-740 B.C.E.), Salmaneser Namba 5 i go olsem long Palestain na Hosia i kamap wokman bilong em na olgeta yia em i save givim takis long em. (2Ki 17:1-3) Tasol sampela taim bihain Hosia i no baim takis na ol i harim olsem em i pasim tok hait wantaim King So bilong Isip. Em risen na Salmaneser i putim Hosia long kalabus na bihain em i banisim Samaria inap 3-pela yia, bihain dispela biktaun i gat strongpela banis i bagarap, na ol i kisim ol Israel i go kalabus.—2Ki 17:4-6; 18:9-12; skelim Ho 7:11; Ese 23:4-10.
it-1 414-415
Kalabus
Long tenpela traib bilong Israel long hap not na tupela traib bilong Juda long hap saut, as tru na ol birua i kam kisim taun i wankain: lusim lotu i tru bilong Jehova na lotuim ol giaman god. (Lo 28:15, 62-68; 2Ki 17:7-18; 21:10-15) Jehova i wok yet long salim ol profet long givim tok lukaut long ol, tasol ol i sakim. (2Ki 17:13) I no gat wanpela bilong ol king bilong tenpela traib bilong Israel i rausim olgeta pasin bilong lotuim ol giaman god em fes king bilong dispela kantri, Jeroboam, i bin kamapim. Juda, em hap lain long saut, i no bihainim tok lukaut bilong Jehova na ol i no kisim skul long samting i painim ol Israel olsem ol i kisim ol i go kalabus. (Jer 3:6-10) Ol i kisim ol manmeri long dispela tupela lain wantaim i go kalabus, ol i mekim olsem long ol inap planti taim.
Mekim Wok Painimaut
it-2 847
Ol Samaria
Dispela tok “ol Samaria” i kamap namba wan taim long ol Skripsa bihain long ol birua i daunim tenpela traib bilong Samaria long 740 B.C.E.; dispela nem i makim lain i stap long hap not paslain long pait i kamap na ol i kisim ol narapela lain tu i kam long ol kantri Asiria i bosim. (2Ki 17:29) I klia tru olsem ol Asiria i no rausim olgeta lain Israel, bikos stori i stap long 2 Stori 34:6-9 (skelim 2Ki 23:19, 20) i soim olsem long taim King Josaia i stap king i gat lain Israel i stap yet long dispela kantri. Bihain, dispela tok “ol Samaria” i makim lain i stap long Samaria na lain em ol Asiria i bringim i kam. Olsem na sampela em ol pikinini bilong ol papamama bilong narapela narapela lain. Bihain, dispela nem i makim lotu, na i no makim wanpela lain o wok politik. “Ol Samaria” i makim lain i bilong wanpela lotu we i kirap long hap bilong Sekem na Samaria, na bilip bilong ol i no wankain long ol man bilong lotu Juda.—Jon 4:9.
DISEMBA 19-25
GUTPELA SAVE I KAM LONG BAIBEL | 2 KING 18-19
“Hau na Ol Birua i Laik Pinisim Strong Bilong Yumi”
Sampela Bikpela Tok Bilong Buk Namba 2 King
18:19-21, 25—Olsem wanem? Tru tru Hesekia i bin wokim kontrak wantaim kantri Isip? Nogat. Tok dispela ofisa bilong ami bilong Asiria i mekim i no tru, na tok em i mekim olsem “Bikpela yet i bin tokim [em] long kam bagarapim” Juda, dispela tu i no tru. Gutpela King Hesekia i bilip strong olsem Jehova bai helpim em.
“Yupela i No Ken Pret. Bai Mi Helpim Yupela”
Rabsake i mekim tok giaman na bai ol man i kisim tupela tingting. Em i tok: “Hesekia, yu bin bagarapim ol ples lotu bilong [Jehova] na ol alta i stap nabaut . . . Bikpela yet i bin tokim mi long kam bagarapim dispela kantri.” (2 Kin. 18:22, 25) Olsem na Rabsake i strong olsem Jehova bai i no pait bilong helpim ol lain bilong Em, long wanem, Em i no amamas long ol. Tasol dispela tok i no tru. Jehova i amamas long Hesekia na ol Juda em ol i bin kirapim gen lotu i tru.—2 Kin. 18:3-7.
Ol Strongpela Lida Tru—Ol i Makim Husat Long Nau?
14 King bilong Asiria na ami bilong em i sanapim kem long Lakis, em ples i stap long saut-wes bilong Jerusalem. Long dispela hap, em i salim 3-pela ofisa bilong em i go long Jerusalem na tokim ol manmeri long givim ol yet long han bilong ol Asiria. Nambawan ofisa, ol i kolim em Rabsake, em i toktok long ol manmeri bilong Jerusalem long tokples bilong ol yet. Pastaim, em i traim long kirapim ol na bai ol i no ken harim tok bilong Hesekia, na ol i mas bihainim tok bilong lain Asiria. Bihain em i giaman na tok promis olsem em bai kisim ol i go long graun we ol inap kisim gutpela sindaun. (Ritim 2 King 18:31, 32.) Na tu, Rabsake i tok ol god bilong ol narapela lain i no bin lukautim lain bilong ol, olsem na Jehova tu i no inap lukautim lain Juda. Tasol ol manmeri i bihainim savetingting na ol i no putim yau long ol dispela tok giaman. Long nau, ol wokman bilong Jehova i save bihainim gutpela pasin bilong ol manmeri bilong Juda.—Ritim 2 King 18:35, 36.
yb74 177 par. 1
Hap 2—Jemani
Em narapela kain tru olsem SS, em planti taim ol i save mekim ol tok giaman tru i laik bai wanpela i sainim dispela tokaut pepa, planti taim ol i mekim nogut moa long ol bihain long ol i sainim dispela tokaut winim long taim ol i no bin sainim yet. Karl Kirscht i tok: “Planti taim long ol kalabus nogut, ol i save mekim ol tok bilong giamanim ol Witnes Bilong Jehova. Ol SS i ting long dispela rot bai ol inap long kirapim ol long sainim ol tokaut pepa. Planti taim ol i tokim mipela long mekim olsem. Sampela i sainim, tasol planti taim, ol i mas wet winim 1-pela yia na bihain bai ol i go fri. Insait long dispela haptaim, long ai bilong ol narapela lain SS i save mekim nogut long ol na tok ol i giaman na lain bilong tupela maus, na ol i fosim ol long wokabaut long hap we ol brata bilong ol i stap long en paslain long ol i lusim kalabus. Ol i kolim dispela olsem, wokabaut i givim ona.”
Mekim Wok Painimaut
it-1 155 par. 4
Akioloji
Tingim dispela, Baibel i stori olsem tupela pikinini man bilong King Senakerip bilong Asiria i bin kilim em i dai, em Adramelek na Sareser, na narapela pikinini man bilong em, Esar-hadon i kisim ples bilong em na kamap king. (2Ki 19:36, 37) Tasol histori bilong lain Babilon i stori olsem, long 20 de bilong Tibet, wanpela pikinini man bilong Senakerip i kilim em i dai long taim tupela i kros. Tupela man bilong raitim stori bilong Babilon, em pris bilong Babilon long 200 B.C.E., na Nabonaidas, em king bilong Babilon long 500 B.C.E., i mekim wankain stori olsem wanpela pikinini bilong Senakerip i bin kilim em i dai. Tasol i no longtaim i go pinis ol i painim hap rait bilong Prism of Esar-haddon, we i gat rait olsem, pikinini man husat i kisim ples bilong Senakerip, em Esar-hadon i tokaut klia olsem ol brata bilong em (planti) i kros na kilim i dai papa na bihain ol i ranawe. Philip Biberfeld, long Universal Jewish History (1948, Vol. I, p. 27), i stori long dispela na tok: “Long rait i stori long ol samting i kamap long Babilon, Nabonid, na Berossus i bin popaia, stori bilong Baibel tasol i tru. I gat planti liklik samting long rait bilong Esarhaddon i soim olsem ol stori bilong en i tru taim em i stori long ol samting i kamap long histori bilong Babilon-Asiria na i no ol rait bilong Babilon. Dispela i soim olsem em i bikpela samting long skelim gut ol rait i stap long dispela taim we ol tok bilong en i no wanbel wantaim tingting Baibel i kamapim.”
DISEMBA 26–JANUERI 1
GUTPELA SAVE I KAM LONG BAIBEL | 2 KING 20-21
“Beten i Kirapim Jehova Long Mekim Samting”
ip-1 394 par. 23
Wanpela King i Bilip na God i Blesim Em
23 Long namba wan taim Senakerip i go bilong pait long Juda, Hesekia i kisim bikpela sik. Aisaia i tokim em olsem em bai dai. (Aisaia 38:1) Dispela king i gat 39-krismas i bel hevi tru. Em i no tingim em yet tasol, em i tingim tu samting bai painim ol manmeri. Ol Asiria i laik kam kisim Jerusalem na Juda, olsem na bikpela hevi inap painim ol. Sapos Hesekia i dai, husat bai go pas long pait? Long dispela taim, Hesekia i no gat pikinini man long kisim ples bilong em long mekim wok king. Hesekia i beten strong long Jehova na tokim em long marimari long em.—Aisaia 38:2, 3.
Givim Bel Olgeta Long Mekim Wok Bilong Jehova!
16 Hesekia i kisim bikpela sik na em i stap long mak bilong dai. Em i beten askim Jehova long tingim bek ol gutpela wok em i bin mekim. (Ritim 2 King 20:1-3.) Yumi kisim save long Baibel olsem, long nau yumi no ken holim kain tingting olsem God bai wokim mirakel na oraitim sik bilong yumi o surikim laip bilong yumi i go longpela moa. Tasol olsem Hesekia i bin mekim, yumi olgeta wan wan inap beten long Jehova na tok: “Mi bin bihainim yu tru na mi mekim wok bilong yu.” Olsem wanem? Yu bilip olsem Jehova i gat strong na em inap oraitim yu taim yu sik?—Sng. 41:3.
g01 7/22 13 par. 4
Hau Bai Beten i Helpim Mi?
Long taim bilong ol man i raitim Baibel ol i bin kisim bekim stret—sampela em mirakel—bilong ol beten bilong ol. Olsem, taim King Hesekia, i save olsem em i kisim bikpela sik tru, em i askim God long helpim em. Na God i tok: “Mi harim prea bilong yu. Na mi lukim aiwara bilong yu. Nau bai mi mekim yu i kamap orait gen.” (2 King 20:1-6) Wankain samting i bin painim ol narapela gutpela wokman bilong God tu.—1 Samuel 1:1-20; Daniel 10:2-12; Aposel 4:24-31; 10:1-7.
Mekim Wok Painimaut
it-2 240 par. 1
Tul Bilong Levelim Ol Samting
Tul bilong levelim ol samting i bilong wokim gut wanpela bilding o bilong sekim sapos bilding i ken stap longpela taim. Jehova i tok profet olsem em bai mekim kain samting long ol bikhet manmeri bilong Jerusalem, em i tok: “Bai mi pulim rop bilong mesarim samting long Jerusalem olsem mi bin mekim long Samaria na bai mi yusim tul bilong levelim ol samting long Jerusalem olsem mi bin mekim long lain famili bilong Ahap.” God i mesarim Samaria na lain famili bilong King Ahap na lukim olsem ol i bihainim ol pasin i doti, em risen na bagarap i bin painim ol. Long wankain pasin, God bai skelim Jerusalem na ol king bilong em, em bai kamapim pasin bikhet bilong ol na bagarapim dispela biktaun. Ol dispela samting i bin kamap tru long 607 B.C.E. (2Ki 21:10-13; 10:11) Long rot bilong Aisaia, ol bikhetman bilong apim nem bilong ol yet na ol man i bosim ol manmeri long Jerusalem i harim tok long bagarap we klostu bai painim ol, Jehova i tok: “Bai mi mekim stretpela kot i kamap olsem rop bilong mesarim ol samting na stretpela pasin i kamap olsem tul bilong levelim ol samting.” Stretpela wok jas bai tokaut long wanem man i wokman tru bilong God na wanem man em nogat, dispela bai stap ples klia long taim ol i abrusim bagarap o long taim bagarap i painim ol.—Ai 28:14-19.