Pita na Jon i bihainim tok bilong Jisas na ol i go kamap pinis long Jerusalem bilong redim Pasova. Bihain, Jisas na ol arapela aposel i go long Jerusalem. Em apinun pinis, na san i go daun long hap wes taim Jisas na ol aposel bilong em i wokabaut i go daun long maunten Oliv. Dispela em laspela taim Jisas bai wokabaut long rot long taim san i stap yet, em i no inap mekim olsem gen inap long taim em i kirap bek.

I no longtaim, Jisas na ol aposel bilong em i kamap long taun na ol i wokabaut i go long haus em ol bai mekim Pasova long en. Ol i bihainim lata bilong i go long bikpela rum antap, na ol i lukim olsem olgeta samting i redi pinis long ol bai mekim bung. Jisas i amamas tru long dispela bung, long wanem, em i tok: “Mi bin i gat laik tru long kaikai dispela Pasova wantaim yupela paslain long mi karim pen na hevi.”—Luk 22:15.

Planti yia i go pinis, ol i bin kirapim pasin bilong tilim ol kap wain long ol man i bung long kaikai bilong Pasova. Jisas i kisim wanpela kap wain, na em i tok tenkyu olsem: “Yupela olgeta kisim dispela kap na dring long en. Mi tokim yupela: Kirap long nau na i go, bai mi no dring wain gen i go inap long Kingdom bilong God i kamap.” (Luk 22:17, 18) Dispela tok i kamapim klia olsem taim bilong em long dai i klostu nau.

Taim ol i bung i stap, Jisas i mekim wok em ol wokboi tasol i save mekim. Em i sanap na rausim longpela saket bilong em, na em i kisim wanpela taul. Bihain, em i pulimapim wara long wanpela baket i stap klostu. Pasin bilong dispela hap em olsem, papa bilong haus i save tokim wokboi long wasim lek bilong ol man i kam long haus bilong em. (Luk 7:44) Long dispela bung, i no gat papa bilong haus, olsem na Jisas yet i wasim lek bilong ol aposel. Ol aposel inap long mekim olsem, tasol i no gat wanpela i kirap na mekim. Yumi no save sapos pasin resis i stap namel long ol, o i gat narapela risen na ol i no kirap long wasim lek bilong ol narapela. Tasol ol i sem taim Jisas i mekim olsem.

Taim Jisas i kam long Pita na i laik wasim lek bilong em, Pita i tok: “Yu no ken wasim lek bilong mi.” Jisas i bekim tok olsem: “Sapos mi no wasim lek bilong yu, yu no inap stap wantaim mi.” Pita i pilim tru samting Jisas i mekim na em i tok: “Bikpela, no ken wasim lek tasol, nogat, wasim han na het bilong mi tu.” Ating em i kirap nogut long tok Jisas i bekim, olsem: “Man i waswas pinis em i klin olgeta, em i gat wok long wasim lek tasol. Yupela i klin, tasol mi no tok long yupela olgeta.”—Jon 13:8-10.

Jisas i wasim lek bilong 12-pela aposel bilong em. Na bihain em i werim longpela saket bilong em na em i sindaun long tebol. Em i tok: “Yupela i kliagut long samting mi mekim long yupela? Yupela i kolim mi, ‘Tisa,’ na ‘Bikpela,’ na i stret yupela i kolim mi olsem, long wanem, mi Tisa na Bikpela bilong yupela. Mi Bikpela na Tisa na mi wasim lek bilong yupela, olsem na yupela tu i mas wasim lek bilong ol arapela. Mi soim pasin long yupela, samting mi mekim long yupela, yupela tu i mas mekim. Tru tumas mi tokim yupela, Wokboi i no winim bosman bilong en, na tu, man i kam, em i no winim man i salim em i kam. Yupela save long ol dispela samting, olsem na yupela bai amamas sapos yupela i mekim ol dispela samting.”—Jon 13:12-17.

Taim Jisas i wasim lek bilong ol aposel, em i skulim ol long pasin daun! Ol disaipel bilong em i no ken tingting long stap nambawan, na ting olsem ol narapela i mas givim biknem long ol na mekim wok bilong ol, nogat. Ol i mas bihainim pasin bilong Jisas long redi long daunim ol yet na mekim wok bilong helpim olgeta kain man.

Long apinun taim ol i bung i stap, Jisas i wasim lek bilong ol aposel bilong skulim ol long kisim pasin daun. Nau, bihain long ol i mekim Pasova, em i kolim tok profet bilong Devit olsem: “Man i bin kisim bret bilong mi na kaikai, em i apim lek bilong en bilong krungutim mi.” Na em i tok moa: “Wanpela bilong yupela bai putim mi long han bilong ol birua.”—Song 41:9; Jon 13:18, 21.

Ol aposel i lukluk namel long ol yet na ol i askim: “Bikpela, ating em mi, a?” Judas Iskariot tu i mekim olsem. Jon i sindaun klostu long Jisas long tebol, olsem na Pita i tokim Jon long askim Jisas na painimaut husat tru bai mekim olsem. Jon i surik i go klostu long Jisas na i askim em: “Bikpela, em husat?”—Matyu 26:22; Jon 13:25.

Jisas i tok: “Em dispela man mi bai givim em hap bret mi putim long dis.” Jisas i putim sampela bret long dis i stap long tebol na em i givim long Judas, na i tok: “Pikinini bilong man bai i go. Tasol sori tumas long dispela man i putim Pikinini bilong man long han bilong ol birua! Mobeta sapos mama i no bin karim em.” (Jon 13:26; Matyu 26:24) Taim Jisas i mekim dispela tok, Satan i bosim pinis Judas bilong mekim ol samting olsem em i bin ting long en. Long dispela pasin, Judas i kamap “man bilong bagarap.”—Jon 6:64, 70; 12:4; 17:12.

Jisas i tokim Judas: “Samting yu wok long mekim, yu mas mekim hariap.” Judas em man bilong bosim bokis mani, olsem na ol arapela aposel i ting Jisas i tok: “‘Baim ol samting bilong yumi long dispela bikpela bung,’ o long em i mas givim ol samting long ol rabisman.” (Jon 13:27-30) Tasol Judas i go bilong putim Jisas long han bilong ol birua.

Long dispela apinun long kaikai bilong Pasova, Jisas i kirapim wanpela nupela bung. Em i kisim bret na i beten, na em i brukim na givim long ol aposel bilong en long kaikai. Em i tok: “Dispela i makim bodi bilong mi em mi bai givim bilong helpim yupela. Yupela i mas mekim olsem yet bilong tingim mi.” (Luk 22:19) Jisas i salim dispela wanpela bret i go long ol aposel na olgeta i kaikai.

Nau Jisas i kisim wanpela kap wain, em i beten na tok tenkyu long en, na em i salim i go long ol aposel. Olgeta i dring long dispela kap, na Jisas i tok: “Dispela kap i makim nupela kontrak mi mekim long rot bilong blut bilong mi. Dispela blut bai kapsait bilong helpim yupela.”—Luk 22:20.

Long dispela rot, Jisas i mekim bung bilong tingim dai bilong em, na ol disaipel bilong em i mas mekim dispela bung long Nisan 14 long olgeta yia. Dispela bai helpim ol man long tingim samting Jisas na Papa bilong em i bin mekim bilong helpim ol man i bilip long lusim kalabus bilong sin na dai, na bai ol i ken kisim laip oltaim. Tru tumas, dispela bung i winim samting em Pasova i mekim long ol Juda.

Jisas i tok blut bilong em bai “kapsait bilong lusim sin bilong planti manmeri.” God bai lusim sin bilong ol gutpela aposel bilong em na ol man i gat wankain bilip olsem ol. Na ol bai stap wantaim Jisas insait long Kingdom bilong Papa bilong em.—Matyu 26:28, 29.

Long laspela nait bilong Jisas wantaim ol aposel, em i wasim lek bilong ol na bai ol i kisim skul long mekim pasin daun. Bilong wanem Jisas i mekim olsem? Long wanem, ol i givim bel tru long God, tasol ol i mas daunim pasin bilong resis long i stap nambawan. (Mak 9:33, 34; 10:35-37) Dispela pasin i kamap ples klia gen long dispela nait.

“Bikpela kros i kamap namel long ol [aposel] long husat bilong ol i winim ol arapela.” (Luk 22:24) Ating Jisas i bel hevi long lukim ol i tok pait namel long ol yet. Olsem na em i mekim wanem?

Jisas i no krosim ol aposel long pasin na tingting ol i gat, nogat. Long pasin isi Jisas i stretim tingting bilong ol, na em i tok: “Ol king i bosim ol kantri, ol i save strong tumas long bosim ol manmeri, na ol lain i gat namba long bosim ol manmeri, ol manmeri i save givim biknem long ol. Tasol dispela i no ken i stap olsem pasin bilong yupela. . . . Husat i winim narapela, man i sindaun long tebol o wokman i mekim wok?” Jisas i tok olsem bilong helpim ol long bihainim pasin bilong em, em i tok: “Tasol mi stap namel long yupela olsem wokman i mekim wok.”—Luk 22:25-27.

Em tru olsem ol aposel i bin mekim planti popaia, tasol oltaim ol i stap wantaim Jisas long taim bilong hevi. Olsem na Jisas i tokim ol: “Mi mekim kontrak wantaim yupela long wanpela Kingdom, olsem Papa i bin mekim wanpela kontrak wantaim mi long wanpela Kingdom.” (Luk 22:29) Ol i stap ol gutpela disaipel bilong Jisas. Long rot bilong dispela kontrak, Jisas i mekim gut bel bilong ol. Ol bai stap long Kingdom na mekim wok king wantaim em.

Ol aposel i wet long kisim dispela gutpela blesing, tasol nau yet ol i gat sin na ol i save mekim ol popaia. Jisas i tokim ol: “Satan i tok em i laik kisim yupela bilong seksekim yupela olsem wit,” i olsem em i laik mekim ol i lusim bilip. (Luk 22:31) Olsem na Jisas i givim narapela tok lukaut, em i tok: “Samting i kamap long mi long dispela nait bai mekim yupela olgeta i pundaun, long wanem, Rait Holi i tok: ‘Mi bai kilim i dai wasman bilong sipsip, na ol sipsip bai ranawe i go nabaut.’”—Matyu 26:31; Sekaraia 13:7.

Pita i strongim bel na i tok: “Maski olgeta arapela i pundaun long samting i kamap long yu, bai mi no inap tru long pundaun!” (Matyu 26:33) Jisas i tokim Pita olsem, paslain long kakaruk i krai 2-pela taim long dispela nait, em bai tokaut olsem em i no save long Jisas. Tasol Jisas i tok: “Mi beten strong bilong helpim yu bai bilip bilong yu i no ken pundaun. Na yu, taim yu kam bek, strongim ol brata bilong yu.” (Luk 22:32) Tasol Pita i tokaut strong olsem: “Maski sapos mi mas i dai wantaim yu, bai mi no inap tru long tok mi no save long yu.” (Matyu 26:35) Ol arapela aposel i mekim wankain tok.

Jisas i tokim ol disaipel bilong em: “Bai mi stap liklik taim moa wantaim yupela. Bai yupela i painim mi, na olsem mi bin tokim ol Juda, nau mi tokim yupela tu, ‘Hap mi go long en yupela i no inap kam.’” Na em i tok moa olsem: “Mi givim nupela lo long yupela, olsem narapela i mas laikim narapela. Yupela i mas laikim narapela narapela olsem mi bin laikim yupela. Sapos pasin laikim i stap namel long yupela, orait olgeta bai save olsem yupela i disaipel bilong mi.”—Jon 13:33-35.

Pita i harim Jisas i tok em bai stap wantaim ol liklik taim, na em i askim Jisas: “Bikpela, yu bai go we?” Na Jisas i tok: “Hap mi go long en, nau yu no inap bihainim mi i go, tasol bihain bai yu bihainim mi i kam.” Pita i no kisimgut tok bilong Jisas, na em i tok: “Bikpela, bilong wanem na nau mi no inap bihainim yu? Bai mi lusim laip bilong mi bilong helpim yu.”—Jon 13:36, 37.

Orait nau Jisas i stori long taim em i bin salim ol aposel i go autim tok long Galili, na em i no givim paus mani na beg kaikai long ol. (Matyu 10:5, 9, 10) Em i askim ol: “Yupela i bin sot long wanpela samting o nogat?” Ol i tok: “Nogat!” Tasol kirap long nau na i go ol i mas mekim wanem? Jisas i tok: “Nau man i gat paus mani, em i mas kisim i go, na wankain long beg kaikai. Na man i no gat bainat, em i mas salim saket bilong en na baim wanpela bainat. Mi tokim yupela, tok i stap long Rait Holi i mas kamap tru long mi, olsem, ‘Ol i tingim em olsem man bilong brukim lo.’ Samting ol i raitim na i makim mi i wok long kamap.”—Luk 22:35-37.

Jisas i tok long taim we ol bai nilim em long diwai pos wantaim ol man nogut, em ol man bilong brukim lo. Na bihain long dispela, ol man bai birua nogut tru long ol disaipel bilong em. Ol i pilim olsem ol i redi, olsem na ol i tok: “Bikpela, lukim! tupela bainat i stap.” Na em i tok: “Em inap.” (Luk 22:38) Ol i gat tupela bainat i stap wantaim ol, na dispela bai opim rot long Jisas i skulim ol long narapela bikpela samting.

Bihain long kaikai bilong memorial, Jisas i mekim tok bilong strongim ol aposel, em i tok: “Yupela i no ken tingting planti. Yupela i mas bilip long God, na bilip long mi tu.”—Jon 13:36; 14:1.

Jisas i no laik bai ol aposel i wari long em bai lusim ol, olsem na em i tokim ol long risen na em i mas go, em i tok: “Long haus bilong Papa bilong mi i gat planti hap bilong stap long en. . . . Mi bai go na redim hap bilong yupela, na bai mi kam bek na kisim yupela i go wantaim mi, na hap mi stap long en yupela tu bai i stap.” Tok bilong Jisas i makim olsem em bai go long heven, tasol ol aposel i no kliagut long dispela. Olsem na Tomas i tok: “Bikpela, mipela i no save long hap yu laik i go long en. Olsem wanem bai mipela i save long rot bilong i go long dispela hap?”—Jon 14:2-5.

Jisas i tok: “Mi yet mi rot na tok i tru na laip.” Sapos ol man i bilip long Jisas na ol tok em i skulim ol long en na ol i bihainim pasin bilong em, dispela bai opim rot long ol inap i go insait long haus bilong Papa bilong em long heven. Jisas i tok: “I no gat man inap kam long Papa long narapela rot, nogat, long rot bilong mi tasol.”—Jon 14:6.

Filip i putim gut yau long tok bilong Jisas na em i tok: “Bikpela, soim Papa long mipela, na dispela em inap long mipela.” Ating Filip i laik lukim sampela samting na bai em i ken save olsem God i stap, kain olsem visen Moses, Elaija, na Aisaia i bin lukim. Tasol ol aposel i kisim gutpela samting moa winim ol visen. Jisas i kamapim klia dispela na em i tok: “Filip, longpela taim pinis mi stap wantaim yupela, na yu no save yet long mi, a? Man i lukim mi, em i lukim Papa tu.” Jisas i kamapim ol pasin bilong Papa, olsem na ol aposel i stap wantaim Jisas na lukim ol pasin em i mekim, na i olsem ol i lukim Papa. Tasol Papa i winim Pikinini, olsem na Jisas i tok: “Ol tok mi givim long yupela, mi no kamapim long tingting bilong mi yet, nogat.” (Jon 14:8-10) Ol aposel inap lukim olsem Jisas i givim biknem long Papa long olgeta tok em i skulim ol man long en.

Ol aposel i lukim Jisas i mekim ol gutpela wok na ol i harim em i autim gutnius long Kingdom Bilong God. Jisas i tok: “Man i bilip long mi, dispela man tu bai mekim ol wok mi mekim. Na em bai mekim ol wok i winim ol wok mi bin mekim.” (Jon 14:12) Tok bilong Jisas i makim olsem ol bai autim tok long ol manmeri bilong planti hap, na insait long longpela haptaim. Na i no olsem ol bai mekim ol bikpela mirakel winim em, nogat.

Jisas bai go long heven, tasol dispela i no makim olsem em i givim baksait long ol, nogat. Em i tokim ol: “Olgeta samting yupela i askim long nem bilong mi, bai mi mekim.” Em i tok moa olsem: “Mi bai askim Papa na em bai givim narapela helpim long yupela, na dispela helpim bai stap wantaim yupela inap oltaim oltaim. Em holi spirit bilong tok i tru.” (Jon 14:14, 16, 17) Jisas i promisim ol olsem em bai givim holi spirit bilong helpim ol. Dispela samting i kamap long de Pentikos.

Jisas i tok: “Liklik taim moa na ol manmeri bilong graun bai i no lukim mi moa, tasol yupela bai lukim mi, long wanem, mi stap laip na yupela bai stap laip.” (Jon 14:19) Jisas bai kirap bek na ol disaipel bilong em bai lukim em paslain long em i go long heven, na bihain ol tu bai kirap bek na stap wantaim em long heven olsem ol spirit.

Jisas i tok: “Man i kisim ol lo bilong mi na i bihainim, dispela man i laikim mi tru. Na man i laikim mi, Papa bilong mi bai laikim em, na mi bai laikim em na long ples klia mi bai soim mi yet long em.” Aposel Judas em narapela nem bilong em Tadius, i harim dispela tok na em i askim olsem: “Bikpela, wanem samting i mekim na yu laik soim yu yet long mipela long ples klia, na i no long ol manmeri bilong graun?” Jisas i bekim tok olsem: “Sapos man i laikim mi, em bai bihainim tok bilong mi, na Papa bilong mi bai laikim em. . . . Man i no laikim mi, em i no save bihainim ol tok bilong mi.” (Jon 14:21-24) Ol disaipel i luksave olsem Jisas em i rot, tok i tru, na laip, tasol ol manmeri bilong dispela graun i no luksave long dispela samting.

Jisas bai lusim ol disaipel na i go, olsem na hau bai ol inap tingim bek olgeta tok em i bin skulim ol? Jisas i tok: “Dispela helpim, em holi spirit, em bai skulim yupela long olgeta samting na kirapim yupela long tingim bek ol samting mi bin tokim yupela long en. Na long nem bilong mi Papa bai salim dispela helpim i kam.” Dispela tok i strongim bel bilong ol aposel, long wanem, ol i bin lukim ol strongpela wok em holi spirit i kamapim. Jisas i tok moa: “Mi larim bel isi i stap wantaim yupela, na mi givim bel isi bilong mi long yupela. . . . Yupela i no ken tingting planti na pret.” (Jon 14:26, 27) Ol disaipel i no ken tingting planti, long wanem, God bai lukautim ol na soim rot long ol.

Liklik taim na ol samting bai kamap bilong soim olsem God i save lukautim ol wokman bilong em. Jisas i tok: “Hetman bilong dispela graun i kam nau. Na em i no gat strong long bosim mi.” (Jon 14:30) Satan i bin kontrolim Judas long mekim sampela samting. Tasol Jisas i no gat sin, olsem na Satan i no inap mekim wanpela samting bilong kirapim Jisas long givim baksait long God. Na tu, taim Jisas i dai, Satan i no gat rot bilong pasim em long kirap bek. Bilong wanem? Jisas i tok: “Mi bihainim tok Papa i bin givim mi.” Em i bilip tru olsem Papa bilong em bai kirapim em bek.—Jon 14:31.

Em biknait pinis, na Jisas i toktok wantaim ol aposel bilong strongim ol. Em i mekim wanpela tok piksa olsem:

“Mi yet mi trupela rop wain, na Papa bilong mi em i man bilong lukautim gaden wain.” (Jon 15:1) Tok piksa bilong Jisas i wankain long ol tok profet ol i mekim long lain Israel inap planti handret yia paslain, ol i kolim lain Israel olsem diwai wain bilong Jehova. (Jeremaia 2:21; Hosea 10:1, 2) Tasol Jehova bai givim baksait long dispela lain. (Matyu 23:37, 38) Olsem na Jisas i skulim ol long wanpela nupela samting. Long 29 C.E., Papa i kapsaitim holi spirit long Jisas, na kirap long dispela taim Jisas i stap olsem rop wain em Papa i lukautim. Tasol Jisas i kamapim klia olsem dispela tok piksa i makim tu ol disaipel bilong em, em i tok:

“Olgeta han bilong mi i no karim kaikai, [Papa bilong mi] i save rausim. Na olgeta han i karim kaikai, em i save klinim na bai em i ken karim planti kaikai moa. . . . Han bilong rop wain i no inap karim kaikai long em yet, nogat, em i mas pas yet long rop. Olsem tasol yupela tu i no inap karim kaikai sapos yupela i no pas long mi. Mi rop wain, na yupela ol han bilong en.”—Jon 15:2-5.

Jisas i tok promis long ol disaipel bilong em olsem bihain long em i go, em bai salim holi spirit bilong helpim ol. Inap 51 de bihain, ol aposel na ol narapela disaipel i kisim holi spirit, na i olsem ol i kamap ol han bilong rop wain. Bilong wanem olgeta “han bilong rop wain” i mas pas gut wantaim Jisas?

Jisas i tok: “Man i pas yet long mi na mi pas long em, dispela man i save karim planti kaikai. Sapos yupela i no pas long mi, yupela i no inap mekim wanpela samting.” Ol “han bilong rop wain” em ol gutpela disaipel bilong Jisas na ol i mas karim planti kaikai. Ol i mas bihainim ol pasin bilong Jisas, givim bel tru long autim tok bilong Kingdom Bilong God, na helpim planti manmeri moa long kamap disaipel. Olsem wanem sapos wanpela disaipel i no pas gut wantaim Jisas na em i no karim kaikai? Jisas i tok: “Sapos man i no pas yet long mi, em bai kamap olsem han bilong rop wain ol i rausim.” Na em i tok moa: “Sapos yupela i pas yet long mi na tok bilong mi i stap insait yet long yupela, orait wanem wanem samting yupela i askim long en, em bai kamap olsem yupela i tok.”—Jon 15:5-7.

Orait nau Jisas i kolim gen tok em i mekim 2-pela taim pinis, em i tok ol disaipel bilong em i mas bihainim ol lo bilong em. (Jon 14:15, 21) Em i stori long wanpela samting ol disaipel bilong em i mas mekim bilong soim olsem ol i bihainim ol lo bilong em, em i tok: “Sapos yupela i bihainim ol lo bilong mi, orait yupela bai stap insait yet long pasin laikim bilong mi, olsem mi bin bihainim ol lo bilong Papa na stap insait yet long pasin laikim bilong en.” Tasol i gat sampela samting moa ol i mas mekim bilong soim olsem ol i laikim God Jehova na Pikinini bilong em. Jisas i tok: “Lo bilong mi i olsem, yupela i mas laikim narapela narapela olsem mi bin laikim yupela. Sapos man i lusim laip bilong en bilong helpim ol pren bilong en, dispela pasin laikim i bikpela moa winim ol arapela pasin laikim. Sapos yupela i bihainim ol lo mi givim long yupela, orait yupela i pren bilong mi.”—Jon 15:10-14.

Bihain long sampela aua, Jisas bai givim laip bilong em bilong helpim olgeta manmeri i bilip long em, dispela i kamapim pasin laikim bilong em long yumi. Ol disaipel i mas bihainim gutpela eksampel bilong Jisas na daunim laik bilong ol yet bilong helpim ol narapela. Taim ol i mekim olsem, dispela bai truim tok bilong Jisas olsem: “Sapos pasin laikim i stap namel long yupela, orait olgeta bai save olsem yupela i disaipel bilong mi.”—Jon 13:35.

Jisas i kolim ol aposel olsem ol “pren,” olsem na ol i mas tingim gut mining bilong dispela hap tok. Jisas i tokim ol long risen na ol i pren bilong en, em i tok: “Mi kolim yupela pren, long wanem, olgeta samting mi bin harim long Papa bilong mi, mi kamapim long yupela.” Em gutpela blesing tru, ol aposel i stap pren bilong Jisas na pas gut wantaim em na ol i kisim save long ol samting Papa i bin tokim em! Tasol sapos ol i laik i stap yet olsem ol pren bilong Jisas, orait ol i mas “karim yet kaikai.” Sapos ol i mekim olsem, Jisas i tok: “Wanem wanem samting yupela i askim Papa long en long nem bilong mi, em bai givim long yupela.”—Jon 15:15, 16.

Ol disaipel bilong Jisas i mas i gat pasin laikim na dispela bai helpim ol long sanap strong na karim hevi. Jisas i tokim ol disaipel olsem ol man bai heitim ol, tasol em i strongim ol na i tok: “Sapos ol manmeri husat i stap longwe long God i heitim yupela, orait yupela i save olsem ol i bin heitim mi paslain long ol i heitim yupela. Sapos yupela i insait long ol samting bilong dispela graun, orait ol manmeri bai laikim yupela, long wanem, yupela i bilong ol. . . . Yupela i no insait long ol samting bilong dispela graun olsem na ol i heitim yupela.”—Jon 15:18, 19.

Jisas i stori moa long risen na ol man bai heitim ol disaipel, em i tok: “Nem bilong mi i stap long yupela, olsem na ol bai mekim ol dispela samting nogut long yupela. Ol i mekim olsem, long wanem, ol i no save long man i bin salim mi i kam.” Jisas i tok, ol mirakel em i wokim i kamapim long ples klia olsem ol man husat i heitim em, ol i gat bikpela asua. Em i tok: “Sapos mi no bin stap namel long ol na mekim ol dispela wok em narapela man i no bin mekim bipo, orait ol bai i no gat sin. Tasol ol i lukim pinis ol wok bilong mi, na ol i heitim mi na Papa bilong mi tu.” Pasin ol i mekim long Jisas i truim tok profet bilong Baibel.—Jon 15:21, 24, 25; Song 35:19; 69:4.

Jisas i tok promis gen olsem em bai salim helpim i kam, em holi spirit. Holi spirit bai helpim olgeta disaipel bilong Jisas long “autim tok,” na dispela i kain olsem ol i karim kaikai.—Jon 15:27.

Jisas na ol aposel i redi long lusim rum antap we ol i bin mekim bung bilong Pasova. Jisas i givim planti skultok long ol, na em i tok moa olsem: “Mi tokim yupela long ol dispela samting na bai yupela i no ken pundaun.” Bilong wanem dispela tok lukaut i stret? Jisas i tok: “Ol man bai rausim yupela long sinagog. Na bihain bai taim i kamap na ol man i kilim yupela i dai, ol bai ting ol i mekim wok bilong God.”—Jon 16:1, 2.

Ating ol aposel i tingting planti long tok bilong Jisas. Em i bin tokim ol olsem ol manmeri bai heitim ol. Tasol bilong wanem em i no tokaut stret olsem ol birua inap kilim ol i dai? Jisas i tok: “Pastaim mi no bin tokim yupela long ol dispela samting, long wanem, mi stap wantaim yupela.” (Jon 16:4) Tasol klostu nau em bai lusim ol, olsem na em i givim ol tok bilong redim ol. Ol tok lukaut bilong Jisas bai helpim ol long sanap strong long bilip.

Jisas i tok moa: “Mi bai go long man i bin salim mi i kam, na i no gat wanpela bilong yupela i askim mi, ‘Yu go we?’” Long dispela nait yet, ol aposel i bin askim em long em bai i go long we. (Jon 13:36; 14:5; 16:5) Tasol nau ol i tingting planti na bel hevi, long wanem, Jisas i tok ol birua bai mekim nogut long ol. Olsem na ol i no askim em long wanem kain glori em bai kisim na wanem samting bai kamap long ol Kristen tru. Jisas i luksave long dispela na em i tok: “Mi bin tokim yupela long ol dispela samting na nau bel bilong yupela i hevi tru.”—Jon 16:6.

Jisas i tok moa: “Mi go bilong helpim yupela. Sapos mi no go, dispela helpim bai i no inap kam long yupela. Tasol sapos mi go, mi bai salim em i kam long yupela.” (Jon 16:7) Taim Jisas i dai na i go bek long heven, dispela bai opim rot long em i salim holi spirit i kam long ol lain bilong em long olgeta hap bilong graun bilong helpim na strongim ol.

Holi spirit “bai soim ol manmeri bilong graun long sin em i wanem samting na stretpela pasin em i wanem samting na kot bilong God em i wanem samting.” (Jon 16:8) Tru tumas, holi spirit bai kamapim long ples klia husat ol manmeri i no bilip long Pikinini Bilong God. Taim Jisas i go bek long heven, dispela bai kamapim klia stretpela pasin bilong em. Na tu, em bai mekim wok jas na kotim Satan em “hetman bilong dispela graun.”—Jon 16:11.

Jisas i tok: “Mi gat planti samting moa bilong tokim yupela, tasol long nau yupela i no inap kisimgut.” Taim Jisas i salim holi spirit i kam long ol aposel, nau holi spirit bai stiaim ol long kliagut long “tok i tru,” na ol bai bihainim ol pasin i stret wantaim tok i tru.—Jon 16:12, 13.

Jisas i tok moa olsem: “Liklik taim na yupela bai i no lukim mi moa, na liklik taim gen na yupela bai lukim mi.” Ol aposel i no klia long tok bilong Jisas. Olsem na ol i toktok namel long ol yet long mining bilong tok bilong em. Jisas i luksave long dispela, na em i tok: “Tru tumas mi tokim yupela, Yupela bai krai bikpela na krai sori, tasol ol manmeri i stap longwe long God ol bai amamas. Yupela bai bel hevi, tasol bel hevi bilong yupela bai senis na kamap amamas.” (Jon 16:16, 20) Long neks de long apinun, ol birua i kilim Jisas i dai na ol hetman bilong lotu i amamas, tasol ol disaipel i bel hevi tru. Tasol bihain taim Jisas i kirap bek long matmat, ol i amamas tru! Na amamas bilong ol i go bikpela taim Jisas i kapsaitim holi spirit bilong God long ol.

Jisas i tok, samting i painim ol aposel i kain olsem meri i pilim pen taim em i laik karim pikinini. Em i tok: “Taim meri i laik karim pikinini, em i pilim pen, long wanem, taim bilong en i kamap pinis. Tasol taim em i karim pikinini pinis, em i no tingim moa dispela pen na hevi, long wanem, em i amamas long pikinini i kamap pinis long graun.” Jisas i strongim bel bilong ol aposel na i tok: “Yupela tu, nau yupela i stap bel hevi. Tasol mi bai lukim yupela gen na bel bilong yupela bai i amamas, na i no gat man bai tekewe dispela amamas bilong yupela.”—Jon 16:21, 22.

Ol aposel i save beten long God, tasol ol i no save beten long nem bilong Jisas. Orait nau Jisas i tokim ol: “Long dispela taim bai yupela i mekim askim long Papa long nem bilong mi.” Bilong wanem ol i mas mekim olsem? I no olsem Papa i les long putim yau long beten bilong ol, nogat. Jisas i tok: “Papa yet i laikim yupela tumas, long wanem, yupela i bin laikim mi tumas . . . olsem mausman bilong Papa.”—Jon 16:26, 27.

Tok bilong Jisas i strongim ol, olsem na ol i tok: “Long dispela rot mipela i bilip olsem yu lusim God na i kam.” Tasol klostu nau, hevi bai kamap bilong traim bilip bilong ol. Jisas i tokim ol long samting bai kamap liklik taim bihain, em i tok: “Harim! Taim i laik kamap, na tru tumas, nau em i kamap pinis we yupela bai ranawe i go long haus bilong yupela wan wan na lusim mi i stap wanpis.” Tasol em i strongim ol na i tok: “Mi tokim yupela long ol dispela samting bai yupela i ken stap bel isi long rot bilong mi. Long graun yupela i karim pen na hevi, tasol strongim bel! Mi winim pinis strong bilong dispela graun.” (Jon 16:30-33) Jisas i no inap long givim baksait long ol, nogat tru. Em i save olsem Satan na lain bilong em bai mekim ol samting bilong kirapim ol disaipel long givim baksait long God. Tasol olsem Jisas, sapos ol disaipel i stap gut long God na givim bel tru long inapim laik bilong Em, ol tu bai winim strong bilong dispela graun.

Jisas i laikim tru ol aposel, olsem na em i redim ol paslain long em i lusim ol. Em i lukluk i go antap long heven na beten long Papa bilong em na i tok: “Givim glori long pikinini bilong yu na bai pikinini bilong yu i ken givim glori long yu. Long wanem, yu bin givim em namba long bosim olgeta manmeri. Olsem na em inap givim laip oltaim long ol lain em yu bin givim long em.”—Jon 17:1, 2.

Jisas i luksave olsem em i bikpela samting long givim glori long God. Na tu, tok bilong Jisas inap mekim gut bel bilong yumi, olsem yumi inap kisim laip oltaim long bihain! Jisas i kisim “namba long bosim olgeta manmeri,” olsem na ofa bilong em inap helpim olgeta lain man. Tasol sampela manmeri tasol bai kisim dispela blesing. Bilong wanem? Long rot bilong ofa bilong Jisas, em bai helpim ol manmeri husat i bihainim tok bilong em. Em i tok: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.”—Jon 17:3.

Dispela i makim olsem man i mas save gut long Papa na Pikinini na pas gut wantaim tupela. Tingting bilong em i mas wankain long tingting bilong ol. Na em i mas wok strong long kamapim ol gutpela pasin bilong tupela long taim em i bung wantaim ol narapela. Tasol nambawan samting em olsem, em i mas givim glori long God. Na em i mas tenkyu olsem rot i op long em inap kisim laip oltaim. Nau Jisas i stori gen long dispela bikpela astok:

“Long graun, mi bin givim glori long yu, na mi pinisim dispela wok yu bin givim mi long mekim. Orait nau Papa, givim glori long mi. Larim mi stap wantaim yu na kisim dispela glori mi bin i gat taim mi bin stap wantaim yu paslain long ol manmeri i kamap long graun.” (Jon 17:4, 5) Yes, Jisas i askim Papa long kirapim em bek na bai em i ken kisim gen glori long heven.

Tasol Jisas i no lusim tingting long ol bikpela wok em i mekim long wok autim tok. Em i beten olsem: “Mi bin kamapim nem bilong yu long dispela lain yu bin kisim namel long ol manmeri na givim long mi. Ol i bilong yu, na yu givim ol long mi, na ol i bin bihainim tok bilong yu.” (Jon 17:6) Jisas i autim tok long ol manmeri na em i skulim ol long nem bilong God, em Jehova. Na tu, em i helpim ol aposel bilong em long kliagut long insait bilong dispela nem, dispela i makim ol pasin bilong God na ol samting em i bin mekim bilong helpim ol man.

Ol aposel i kisim save long Jehova, wok Pikinini bilong Em bai mekim, na ol samting Jisas i skulim ol long en. Long pasin daun, Jisas i tok: “Ol tok yu bin givim long mi, mi givim long ol. Na ol i kisim ol dispela tok na ol i save olsem mi kam olsem mausman bilong yu, na ol i bilip olsem yu bin salim mi i kam.”—Jon 17:8.

Orait nau Jisas i kamapim klia olsem ol disaipel bilong em i stap narapela kain long ol manmeri bilong graun, em i tok: “Mi askim yu long helpim ol. Mi no askim yu long helpim ol manmeri bilong graun, nogat, mi askim yu long helpim ol lain yu bin givim long mi. Long wanem, ol i bilong yu, . . . Papa Holi, tingim nem bilong yu, em yu bin givim long mi, na lukautim ol na bai ol i ken i stap wanpela olsem mitupela i stap wanpela. . . . Mi bin was long ol, na i no gat wanpela bilong ol i lus, nogat. Dispela man bilong bagarap, em tasol i lus.” Em Judas Iskariot, man i putim Jisas long han bilong ol birua.—Jon 17:9-12.

Jisas i tok: “Ol manmeri i stap longwe long God ol i heitim ol . . . Mi no askim yu long tekewe ol long dispela graun, nogat, mi ting long dispela man nogut na mi askim yu long lukautim ol. Ol i no bilong dispela graun, olsem mi tu mi no bilong dispela graun.” (Jon 17:14-16) Ol aposel na ol narapela disaipel i stap namel long ol man bilong dispela graun em Satan i bosim. Tasol ol i mas stap narapela kain na sakim ol pasin nogut bilong dispela graun. Hau bai ol inap mekim olsem?

Ol i mas bihainim ol tok i tru long Ol Skripsa Hibru na ol tok i tru em Jisas i skulim ol long en, long dispela rot ol bai stap holi na mekim wok bilong God. Jisas i beten na i tok: “Mekim ol i kamap holi long rot bilong tok i tru. Tok bilong yu em i tok i tru.” (Jon 17:17) Bihain, God bai stiaim sampela aposel long raitim ol buk, na ol dispela buk bai kamapim “tok i tru” bilong helpim ol man long i stap holi long ai bilong God.

Na bihain ol narapela man tu bai kisim “tok i tru.” Olsem na taim Jisas i beten, em i no tingim “dispela lain tasol [ol man i stap long dispela taim], nogat, [em i] askim tu long ol lain husat bai bilip long [em] long rot bilong tok bilong ol.” Jisas i laik bai olgeta i mekim wanem? Em i tok: “Olgeta i ken i stap wanpela, olsem yu, Papa, i pas wantaim mi na mi pas wantaim yu. Na ol tu i ken pas wantaim mitupela.” (Jon 17:20, 21) Dispela tok i makim olsem Jisas na Papa i wanbel long olgeta samting, na long dispela rot tupela i pas wantaim. Na i no olsem tupela i gat wanpela bodi, nogat. Em risen na Jisas i beten long God i ken helpim ol disaipel bilong em long stap wanbel.

Paslain liklik, Jisas i bin tokim Pita na ol narapela olsem em bai go redim hap bilong ol long heven. (Jon 14:2, 3) Nau Jisas i mekim wankain tok long beten bilong em, olsem: “Papa, mi laik bai dispela lain yu bin givim long mi, ol tu i ken stap wantaim mi long hap mi stap long en. Na ol i ken lukim dispela glori bilong mi, em yu bin givim long mi, long wanem, yu bin laikim mi paslain long ol manmeri i bin bon long graun.” (Jon 17:24) Tok bilong Jisas i kamapim klia olsem God i laikim em tumas paslain long ol manmeri i kamap long graun.

Long pinis bilong beten bilong Jisas, em i tokaut gen olsem em i tingim tru nem bilong Papa bilong em, na tu, em i kamapim olsem God i laikim tru ol aposel na ol narapela husat bai kisim “tok i tru” long bihain. Jisas i tok: “Mi bin kamapim nem bilong yu long ol na mi bai kamapim moa yet. Bai ol i ken kamapim pasin bilong laikim ol arapela olsem yu bin laikim mi, na bai mi ken pas wantaim ol.”—Jon 17:26.

Jisas i beten wantaim ol aposel bilong em. Na “ol i mekim pinis singsing bilong litimapim nem bilong God na ol i go long maunten Oliv.” (Mak 14:26) Ol i wokabaut i go long hap is long wanpela gaden ol i kolim Getsemani, em ples Jisas i save go long en.

Taim ol i kamap long wanpela naispela hap bilong gaden we ol diwai oliv i gro, Jisas i lusim 8-pela aposel na i go. Ating ol i stap long kirap bilong gaden, long wanem, em i tokim ol: “Yupela sindaun long hia na bai mi go long hap na beten.” Orait em i kisim 3-pela aposel, em Pita, Jems, na Jon na ol i wokabaut i go insait tru long gaden. Jisas i bel hevi tru na em i tokim ol: “Bel bilong mi i hevi nogut tru na mi laik i dai. Yupela stap hia na was i stap wantaim mi.”—Matyu 26:36-38.

Jisas i lusim ol na i go longwe liklik na “pundaun long graun na stat long beten.” Em i askim God long wanem samting? Em i beten olsem: “Papa, yu inap mekim olgeta samting, rausim dispela kap long mi. Tasol yu no ken mekim samting mi laikim, nogat, mekim samting yu laikim.” (Mak 14:35, 36) Tok bilong Jisas i no makim olsem em i surik long givim laip bilong em olsem Man Bilong Baim Bek yumi, nogat!

Taim Jisas i stap long heven, em i lukim ol Rom i givim bikpela pen tru long ol man na kilim ol i dai. Tasol nau em i stap olsem wanpela man bilong graun na em i tingting planti na pret, long wanem, klostu nau em bai karim pen. Na em i bel hevi tru, long wanem, em i ting dai bilong em olsem man nogut inap bagarapim nem bilong Papa bilong em. Sampela aua bihain na ol bai hangamapim em long pos olsem man bilong tok bilas long God.

Jisas i beten inap longpela taim na em i go bek na i lukim 3-pela aposel i slip. Em i tokim Pita: “Olsem wanem? Yupela i no inap was wantaim mi inap long wanpela aua, a? Yupela i mas was i stap na beten oltaim bai yupela i no ken pundaun long traim.” Jisas i luksave olsem em biknait pinis na ol aposel bilong em i taiet. Jisas i tok moa: “Tru tumas, bel bilong man i redi long mekim olgeta samting, tasol bodi i no gat strong.”—Matyu 26:40, 41.

Jisas i go bek namba 2 taim na beten askim God long rausim “dispela kap” long em. Taim em i kam bek, em i lukim gen olsem 3-pela aposel i slip, na ol i no beten long God i ken helpim ol long sakim ol traim. Taim Jisas i toktok long ol, “ol i no save ol bai tok wanem long em.” (Mak 14:40) Jisas i go namba 3 taim, na em i brukim skru i go daun long graun na em i beten.

Jisas i wari tru olsem dai bilong em olsem man nogut inap bagarapim gutnem bilong Papa bilong em. Jehova i harim ol beten bilong Pikinini bilong em na em i salim wanpela ensel i kam bilong strongim em. Tasol Jisas i bel hevi tru na em i “beten strong” yet na askim Papa long helpim em! Em i save olsem em bai karim bikpela pen na dai, tasol em bai kirap bek na kisim laip oltaim long heven. Na tu, dai bilong em bai opim rot long ol man i bilip long em i ken kisim laip oltaim. Em i tingting planti long ol dispela samting, olsem na “tuhat bilong en i kamap olsem blut na i pundaun long graun.”—Luk 22:44.

Jisas i go bek long ol aposel long namba 3 taim na em i lukim olsem ol i slip i stap. Jisas i tokim ol: “Long kain taim olsem yupela i slip na kisim malolo, a? Harim! Taim bilong putim Pikinini bilong man long han bilong ol sinman i kamap klostu pinis. Kirap na yumi go. Lukim! Man i laik putim mi long han bilong ol birua em i kam klostu pinis.”—Matyu 26:45, 46.

Em biknait pinis. Ol pris i baim Judas long 30 silva koin na bai em i putim Jisas long han bilong ol. Olsem na Judas i kisim ol bikpris na ol Farisi na ol i go painim Jisas. Wanpela lain soldia bilong Rom wantaim komanda bilong ol i go wantaim ol.

Long bung bilong Pasova taim Jisas i tokim Judas long lusim ol, em i go na lukim ol bikpris. (Jon 13:27) Ol bikpris i bungim ol ofisa na lain soldia bilong ol. Ating pastaim Judas i bringim ol i go long rum we Jisas na ol aposel i mekim bung bilong Pasova. Tasol nau dispela lain i brukim ples daun bilong Kidron na wokabaut i go long gaden. Ol i tingting strong long painim Jisas, olsem na ol i karim ol samting bilong pait na ol bombom na ol lam.

Judas i bringim ol birua i go antap long maunten Oliv, em i bilip tru olsem em i save long wanem hap Jisas bai stap long en. Long wik i go pinis, Jisas na ol aposel i raun long Betani na Jerusalem na planti taim ol i malolo long gaden Getsemani. Tasol nau em nait pinis, na ating Jisas i stap aninit long ol diwai oliv long gaden. Olsem wanem ol soldia bai luksave long Jisas? Bilong helpim ol, Judas i tok: “Man mi givim kis long em, em dispela man tasol. Yupela i mas arestim em na ol soldia i mas kisim em i go.”—Mak 14:44.

Taim Judas na ol birua i kamap long gaden, ol i lukim Jisas na ol aposel. Na Judas i go long Jisas na i tok: “Gutnait Rabai!” na em i givim kis long Jisas. Jisas i tokim em: “Yu kam long mekim wanem?” (Matyu 26:49, 50) Na em i bekim askim bilong em yet olsem: “Judas, yu putim Pikinini bilong man long han bilong ol birua long rot bilong wanpela kis, a?” (Luk 22:48) Orait nau Jisas i lusim Judas na em i go sanap long ples klia!

Jisas i kam sanap long lait bilong ol bombom na ol lam na i askim ol: “Yupela i painim husat?” Ol birua i bekim tok bilong em olsem: “Jisas bilong Nasaret.” Jisas i tokaut stret olsem: “Mi dispela man.” (Jon 18:4, 5) Ol i kirap nogut na ol i pundaun nating long graun.

Jisas i no tingting long ranawe, nogat, em i askim ol gen long ol i painim husat. Na ol i tok, “Jisas bilong Nasaret.” Orait em i stap isi na i tok: “Mi tokim yupela pinis olsem mi dispela man. Sapos em mi yupela i wok long painim, orait larim ol dispela man i go.” Long dispela taim bilong hevi, Jisas i tingim tok bilong em olsem em i no inap larim wanpela disaipel bilong em i lus. (Jon 6:39; 17:12) Jisas i lukautim olgeta aposel husat i stap gut long em na i no gat wanpela bilong ol i lus. Judas em “dispela man bilong bagarap, em tasol i lus.” (Jon 18:7-9) Olsem na Jisas i askim ol birua long larim ol aposel i go.

Ol soldia i sanap na ol i wokabaut i go klostu long Jisas, na nau ol aposel i luksave long samting i kamap. Ol i askim Jisas olsem: “Bikpela, yu laik bai mipela i katim ol long bainat, a?” (Luk 22:49) Paslain long Jisas i bekim tok, Pita i yusim wanpela bilong 2-pela bainat em ol aposel i holim na em i katim rait sait yau bilong Malkus, em wanpela wokboi bilong hetpris.

Tasol Jisas i tatsim yau bilong Malkus na i oraitim em. Na Jisas i kamapim wanpela bikpela skultok, em i tokim Pita olsem: “Putim bainat bilong yu i go bek long ples bilong en, long wanem, ol man i yusim bainat, ol bai dai long rot bilong bainat.” Jisas i redi long ol birua i arestim em, na em i tok: “Olsem wanem bai i gat truim bilong tok i stap long Rait Holi long ol samting i mas kamap olsem?” (Matyu 26:52, 54) Jisas i tok moa: “Dispela kap Papa i bin givim long mi, yu ting mi no ken dring long en, a?” (Jon 18:11) Jisas i mekim laik bilong God, maski ol birua inap kilim em i dai.

Jisas i askim ol birua olsem: “Yupela i kam wantaim ol bainat na ol hap diwai bilong arestim mi, olsem yupela i kam bilong kisim wanpela raskol, a? Long olgeta de mi bin sindaun long tempel na skulim ol man, na yupela i no arestim mi. Tasol olgeta dispela samting i bin kamap bilong truim ol tok ol profet i bin raitim.”—Matyu 26:55, 56.

Ol soldia wantaim komanda bilong ami, na ol ofisa bilong Juda i holim Jisas na arestim em. Taim ol aposel i lukim dispela, ol i ranawe. Tasol “wanpela yangpela man,” ating em disaipel Mak, i stap namel long ol manmeri bambai em inap bihainim Jisas. (Mak 14:51) Ol manmeri i luksave long dispela yangpela man na ol i laik holimpasim em, olsem na em i lusim naispela saket bilong em na i ranawe.

Ol i pasim han bilong Jisas olsem wanpela man nogut, na ol i bringim em i go long Anas. Anas i mekim wok olsem hetpris taim Jisas i liklik na ol tisa long tempel i kirap nogut long save bilong em. (Luk 2:42, 47) Bihain, sampela pikinini man bilong Anas i mekim wok olsem hetpris. Na nau Kaiafas, em tambu pikinini man bilong Anas i mekim dispela wok.

Taim Anas i wok long kwestenim Jisas, Kaiafas i bungim ol memba bilong Sanhedrin. I gat 71 memba bilong Sanhedrin, em ol hetpris na ol man husat i mekim wok olsem hetpris long pastaim.

Anas i ‘askim Jisas long ol disaipel bilong en na long tok em i skulim ol manmeri long en.’ Jisas i tok: “Mi bin toktok long ol manmeri long ples klia. Oltaim mi bin skulim ol manmeri long sinagog na long tempel, long ol ples ol Juda i save bung. Na mi no mekim wanpela tok long ples hait. Bilong wanem yu askim mi? Askim ol man husat i bin harim ol tok mi autim long ol.”—Jon 18:19-21.

Wanpela ofisa i solapim pes bilong Jisas na i tok strong olsem: “Yu save bekim tok long bikpris long dispela kain pasin, a?” Jisas i save olsem em i no mekim wanpela rong, olsem na em i tok: “Sapos mi mekim tok i no stret, orait tokaut long dispela tok kranki mi bin mekim. Tasol sapos mi bin mekim tok i stret, orait bilong wanem yu paitim mi?” (Jon 18:22, 23) Orait Anas i tok na ol i bringim Jisas i go long Kaiafas, tambu pikinini man bilong em.

Nau ol memba bilong Sanhedrin i kam bung, em hetpris i mekim wok long dispela taim, ol hetman, na ol saveman bilong lo. Ol i bung long haus bilong Kaiafas. Lo i tok ol i no ken bung bilong mekim kot long nait bilong Pasova, tasol ol i brukim dispela Lo.

Olgeta memba bilong Sanhedrin i heitim Jisas. Bihain long Jisas i kirapim bek Lasarus, ol i pasim tok long kilim em i dai. (Jon 11:47-53) Na sampela de i go pinis, long pasin hait ol hetman bilong lotu i bung na ol i wokim plen long holim Jisas na kilim em i dai. (Matyu 26:3, 4) Tru tumas, ol i pasim tok pinis long kilim Jisas i dai maski ol i no mekim yet kot!

Ol hetpris na ol narapela memba bilong Sanhedrin i sakim Lo, na tu, ol i traim long painim ol witnes bilong kamapim ol tok giaman bilong kotim Jisas. Ol i kisim planti witnes, tasol tok bilong ol i no wankain. Bihain 2-pela witnes i tok: “Mipela i harim em i tok olsem, ‘Dispela tempel ol man i wokim long han, bai mi tromoi i go daun na insait long 3-pela de bai mi sanapim narapela tempel em ol man i no wokim long han.’” (Mak 14:58) Tasol tok bilong tupela i narapela narapela.

Kaiafas i askim Jisas: “Yu no gat bekim, a? Olsem wanem long ol dispela tok ol i sutim long yu?” (Mak 14:60) Ol witnes i sutim tok giaman long Jisas, tasol em i no bekim wanpela tok. Olsem na Hetpris Kaiafas i traim narapela rot.

Kaiafas i save olsem ol Juda i save kros taim wanpela man i tok em i Pikinini Bilong God. I no longtaim i go pinis, Jisas i kolim God olsem Papa bilong em, na ol Juda i laik kilim em i dai, long wanem, ol i tok em i “mekim olsem em i wankain olsem God.” (Jon 5:17, 18; 10:31-39) Kaiafas i save long tingting bilong ol Juda, olsem na em i askim Jisas olsem: “Long nem bilong God i stap laip, yu mas tok tru antap na tokim mipela olsem yu dispela Krais, Pikinini bilong God, o nogat?” (Matyu 26:63) Jisas i bin tokaut pinis olsem em i Pikinini Bilong God. (Jon 3:18; 5:25; 11:4) Sapos em i no tokaut olsem em i Pikinini Bilong God na Krais, i olsem em i giamanim ol. Olsem na Jisas i tok: “Mi dispela man. Na yupela bai lukim Pikinini bilong man i sindaun long han sut bilong bikpela pawa na kam wantaim ol klaut bilong skai.”—Mak 14:62.

Kaiafas i harim dispela tok, na em i brukim klos bilong em na i tok: “Em i tok bilas long God! I no gat wok moa long kisim narapela witnes. Lukim! Nau tasol yupela i harim em i tok bilas long God. Yupela i ting wanem?” Sanhedrin i no mekim stretpela kot, na ol i pasim tok olsem: “Em i gat rong na em i mas i dai.”—Matyu 26:65, 66.

Orait ol i tok bilas long Jisas na paitim em long han bilong ol yet. Sampela i solapim pes bilong em na spetim em. Bihain ol i karamapim pes bilong Jisas na solapim em, na tok bilas olsem: “Yu mekim tok profet! Husat i paitim yu?” (Luk 22:64) Ol i mekim nogut tru long Pikinini Bilong God, na ol i brukim lo long kotim em long nait bilong Pasova!

Taim ol birua i arestim Jisas long gaden Getsemani, ol aposel i pret na ranawe. Tasol 2-pela aposel i tanim na i go bek. Em Pita na “narapela disaipel,” em aposel Jon. (Jon 18:15; 19:35; 21:24) Ating ol inap bungim Jisas taim ol i kisim em i go long Anas. Taim Anas i salim Jisas i go long Hetpris Kaiafas, Pita na Jon i wokabaut longwe liklik na bihainim ol. Ating tupela i pret olsem nogut ol birua i kilim tupela i dai, na tu, ol i tingting planti long samting bai painim Bosman bilong ol.

Hetpris i save long Jon, olsem na Jon inap i go insait long ples bung long banis bilong Kaiafas. Tasol Pita i sanap ausait long banis na wet i stap. Na bihain Jon i kam bek na tokim wanpela wokmeri long opim geit na bai Pita i ken i go insait.

Em biknait na ples i kol, olsem na ol manmeri i stap long ples bung i wokim paia. Pita i sindaun wantaim ol na hatim skin bilong em na em i laik “lukim wanem samting bai kamap” long Jisas taim ol i mekim kot. (Matyu 26:58) Nau paia i lait na wokmeri i was long dua inap lukim gut Pita. Olsem na em i askim Pita: “Ating yu wanpela disaipel bilong dispela man, a?” (Jon 18:17) Ol narapela tu i luksave long Pita na ol i sutim tok olsem em i wanpela bilong ol lain i bin stap wantaim Jisas.—Matyu 26:69, 71-73; Mak 14:70.

Dispela tok i mekim Pita i bel hevi. Em i no laik bai ol man i luksave long em, olsem na em i lusim ol na i go sanap klostu long dua. Pita i giaman olsem em i no bin stap wantaim Jisas, na em i tok: “Mi no save long em na mi no kliagut long tok bilong yu.” (Mak 14:67, 68) Na em i “tok tru antap,” i olsem em i promis olsem tok bilong em i tru na em i redi long karim hevi long dispela tok em i mekim.—Matyu 26:74.

Long dispela taim ol i kotim Jisas long wanpela rum long haus bilong Kaiafas, em rum i stap antap long ples bung. Ating Pita, Jon, na ol narapela husat i wet long ples bung inap lukim ol witnes i kam bilong sutim tok long Jisas.

Taim Pita i toktok, krai bilong toktok i soim olsem em i bilong Galili, olsem na ol man inap luksave olsem em i giaman. Wanpela man i stap namel long ol manmeri em i wanblut bilong Malkus, em man Pita i katim yau bilong em. Dispela man i askim Pita olsem: “Mi bin lukim yu i stap wantaim em long gaden, a?” Long namba 3 taim Pita i tok em i no save long Jisas, na kakaruk i krai olsem Jisas i bin tok.—Jon 13:38; 18:26, 27.

Orait Jisas i sanap long veranda bilong haus na lukluk i go daun long ples bung. Bikpela i tanim na i lukluk stret long Pita. Nau em i tingim tok Jisas i bin mekim inap sampela aua i go pinis long bung bilong Pasova long rum antap. Ating Pita i bel hevi long rong em i mekim, olsem na em i go ausait na em i krai nogut tru!—Luk 22:61, 62.

Pita i bilip tru olsem em inap sanap strong na stap gut long Jisas. Olsem wanem em i tok em i no save long Bosman bilong em? Ol man i paulim tok i tru na sutim tok long Jisas olsem em i man nogut tru. Pita inap sambai na helpim Jisas, tasol em i givim baksait long Man husat i gat tok bilong “bringim man i go long laip oltaim.”—Jon 6:68.

Samting i painim Pita i soim olsem maski man i gat bilip na i stap gut long God, em inap lusim bilip sapos em i no redi long bungim ol hevi na traim long taim em i no ting long en. Stori bilong Pita i stap olsem tok lukaut long olgeta wokman bilong God!