Ol meri i go long matmat na ol i kirap nogut long lukim olsem bodi bilong Jisas i no stap! Maria Makdala i ran i go long “Saimon Pita na dispela arapela disaipel em Jisas i bin laikim tumas,” em aposel Jon. (Jon 20:2) Tasol ol narapela meri i wet i stap long matmat na ol i lukim wanpela ensel. Na insait long matmat, narapela ensel i stap na em “i werim longpela waitpela klos.”—Mak 16:5.

Wanpela ensel i tokim ol: “Yupela i no ken pret, mi save olsem yupela i wok long painim Jisas em ol i bin nilim em long pos. Em i no stap long hia, long wanem, em i kirap bek pinis olsem em i bin tok. Kam, lukim ples we em i bin slip long en. Na go hariap na tokim ol disaipel bilong en olsem em i kirap bek pinis long dai. Na tokim ol, ‘Em i go long Galili paslain long yupela.’” (Matyu 28:5-7) Ol dispela meri “i guria na bel na tingting bilong ol i kirap tru” na ol i ran i go long toksave long ol disaipel.—Mak 16:8.

Maria i painim pinis Pita na Jon. Em i sotwin wantaim na i tok: “Ol i rausim Bikpela pinis long matmat, na mipela i no save ol i putim em long wanem hap.” (Jon 20:2) Pita na Jon i ran i go long matmat. Jon i ron spit moa, olsem na em i go kamap long matmat paslain long Pita. Em i sanap ausait na lukluk i go insait long matmat, na em i lukim ol hap laplap ol i bin yusim long pasim bodi bilong Jisas.

Taim Pita i go kamap, em i go insait stret long matmat. Em i lukim ol naispela hap laplap ol i bin pasim long bodi bilong Jisas na laplap ol i yusim long pasim het bilong em. Jon tu i go insait long matmat, na nau em i bilipim stori bilong Maria. Maski Jisas i bin tokim ol olsem em bai kirap bek, dispela 2-pela aposel i no kisim tingting olsem em i kirap bek pinis. (Matyu 16:21) Tupela i tingting planti na i go bek long haus. Tasol Maria i kam bek na em i stap long matmat.

Ol narapela meri i go bilong toksave long ol disaipel olsem Jisas i kirap bek pinis. Ol i wok long ran i go, na Jisas i bungim ol na i tok: “Gude!” Ol i pundaun klostu long lek bilong Jisas na “brukim skru long em.” Na Jisas i tok: “Yupela i no ken pret! Go na tokim ol brata bilong mi long i go long Galili, na ol bai lukim mi long dispela hap.”—Matyu 28:9, 10.

Paslain liklik, taim graun i guria na ol ensel i kamap, ol soldia husat i was long matmat i pret na “kamap olsem ol man i dai pinis.” Taim tingting bilong ol i klia, “ol i go long taun na tokim ol bikpris long olgeta samting i bin kamap.” Na ol bikpris i go toktok wantaim ol hetman bilong lain Juda. Tasol ol i mekim disisen long baim ol soldia long tok giaman olsem: “Ol disaipel bilong en i kam long nait na stilim bodi bilong en taim mipela i slip i stap.”—Matyu 28:4, 11, 13.

Ol Rom inap kilim ol soldia bilong ol sapos ol i slip na i no mekim wok bilong ol, olsem na ol bikpris i tok promis long ol olsem: “Sapos dispela tok [tok giaman olsem ol i bin slip] i kamap long yau bilong gavana, orait mipela bai stretim tok wantaim em na bai yupela i no ken tingting planti.” (Matyu 28:14) Ol soldia i kisim mani na bihainim tok bilong ol bikpris. Olsem na planti manmeri bilong lain Juda i harim giaman stori olsem ol disaipel i bin stilim bodi bilong Jisas.

Maria Makdala i stap yet long matmat na em i krai i stap. Taim em i lukluk i go insait long matmat, em i lukim 2-pela ensel i stap, ol i werim waitpela klos! Wanpela ensel i sindaun long hap we het bilong Jisas i bin stap long en, na narapela i sindaun long hap we lek bilong Jisas i bin i stap long en. Ol i askim Maria olsem: “Meri, bilong wanem yu krai?” Maria i tok: “Ol i bin rausim Bikpela bilong mi, na mi no save ol i putim em long wanem hap.” Taim Maria i tanim, em i lukim narapela man. Em i mekim wankain askim olsem ol ensel i bin mekim, na em i tok moa olsem: “Yu painim husat?” Maria i ting em man bilong lukautim gaden, olsem na em i tok: “Bikman, sapos yu bin karim bodi bilong em i go, tokim mi long yu bin putim em long wanem hap na bai mi go kisim em.”—Jon 20:13-15.

Tru tru, Maria i toktok wantaim Jisas, tasol em i no luksave long Jisas. Orait Jisas i tok: “Maria!” Taim Maria i harim dispela tok, em i luksave long pasin bilong Jisas long kolim nem bilong em. Maria i amamas tru na i tok: “‘Rabonai!’ (mining bilong en, “Tisa!”). Tasol Maria i pret olsem nogut Jisas bai i go antap long heven, olsem na em i holimpasim lek bilong Jisas. Orait, Jisas i tokim em: “Lusim mi, no ken holimpasim mi, long wanem, mi no go antap yet long Papa. Yu go long ol brata bilong mi na tokim ol, ‘Mi bai go antap long Papa bilong mi na Papa bilong yupela na God bilong mi na God bilong yupela.’”—Jon 20:16, 17.

Maria i ran i go long haus we ol aposel na ol narapela disaipel i bung long en. Em i tokim ol: “Mi lukim pinis Bikpela!” Nau tok bilong Maria i strongim tok bilong ol narapela meri. (Jon 20:18) “Tasol ol aposel na ol arapela disaipel i ting ol meri i toktok nating.”—Luk 24:11.

Long Sande, Nisan 16, ol disaipel i bel hevi stret. Ol i no kliagut long risen na bodi bilong Jisas i no stap moa long matmat. (Matyu 28:9, 10; Luk 24:11) Long dispela de yet, Kliopas na narapela disaipel i lusim Jerusalem, na ol bai wokabaut inap 11 kilomita bilong i go long Emeus.

Taim tupela i wokabaut i go, tupela i stori long ol samting i bin kamap. Bihain, wanpela man i kam wokabaut wantaim tupela. Dispela man i askim tupela olsem: “Yutupela i wok long toktok long wanem samting taim yutupela i wokabaut i go?” Kliopas i tok: “Ating yu man bilong narapela ples na yu stap yu yet long Jerusalem na yu no save long ol samting i bin kamap long en long dispela taim, a?” Dispela man i tok: “Wanem ol samting?”—Luk 24:17-19.

Tupela i tokim em: “Ol samting i kamap long Jisas bilong Nasaret. . . . Mipela i bin ting olsem dispela man em man bilong kisim bek Israel.”—Luk 24:19-21.

Kliopas na poroman bilong em i tokim dispela man long olgeta samting i bin kamap long dispela de. Tupela i tok sampela meri i go long matmat na ol i lukim olsem bodi bilong Jisas i no stap, tasol ol ensel i kamap long ol dispela meri na tokim ol olsem Jisas i stap laip. Tupela i stori moa olsem sampela narapela disaipel tu i go long matmat “na ol i lukim ol samting olsem ol meri i tok.”—Luk 24:24.

Tupela disaipel i tingting planti na ol i no kliagut long risen na ol dispela samting i kamap. Tasol dispela man i stretim tingting bilong tupela, na em i tok: “Yutupela i no laik wokim gut tingting na bel bilong yutupela i no kirap kwik long bilipim olgeta tok ol profet i kamapim! Olsem wanem? Ating yutupela i no save olsem Krais i mas karim pen long ol dispela samting na bai em inap kisim glori, a?” (Luk 24:25, 26) Em i kamapim klia mining bilong planti tok i stap long Rait Holi na em i stori long ol samting bai kamap long Krais.

I no longtaim na 3-pela i kamap klostu long Emeus. Tupela disaipel i laik harim sampela stori moa, olsem na tupela i tokim dispela man: “Stap wantaim mipela, em apinun na de i laik pinis.” Em i orait long stap wantaim tupela, olsem na ol i redi long kaikai wantaim. Na dispela man i beten, brukim bret, na givim long tupela, na long dispela taim stret tupela i luksave long em, tasol em i no stap moa. (Luk 24:29-31) Nau ol i bilip olsem Jisas i stap laip!

Orait tupela i amamas wantaim na tok: “Taim em i toktok long yumi long rot na kamapim gut ol tok bilong Rait Holi long yumi, bel bilong yumi i bin kirap tru, a?” (Luk 24:32) Kwiktaim tupela i go bek long Jerusalem na bungim ol aposel na ol narapela manmeri i stap wantaim ol. Paslain long Kliopas na poroman bilong em i stori long samting i bin kamap long tupela, ol narapela i tok: “Tru tumas, Bikpela i kirap bek pinis na em i kamap long Saimon!” (Luk 24:34) Bihain tupela i stori long olsem wanem Jisas i kamap long ol. Yes, ol tu i lukim Jisas bihain long em i kirap bek.

Tasol nau olgeta i kirap nogut olsem Jisas i stap insait long rum! Ating ol i tingting planti, long wanem, ol i pret long ol Juda na ol i bin lokim ol dua. Jisas i sanap namel stret long ol. Em i tok isi long ol: “Bel isi i ken i stap wantaim yupela.” Tasol ol i pret, wankain olsem ol i mekim long bipo, “ol i ting ol i lukim wanpela spirit.”—Matyu 14:25-27; Luk 24:36, 37.

Jisas i laik bai ol i save olsem em i no wanpela spirit o wanpela driman nating, olsem na em i soim ol tupela han na lek bilong em long ol, na em i tok: “Bilong wanem yupela i tingting planti na kisim tupela tingting long bel bilong yupela? Lukim han na lek bilong mi, em mi tasol. Holim mi na lukim, long wanem, spirit i no gat mit na ol bun olsem yupela i lukim i stap long mi.” (Luk 24:36-39) Ol i kirap nogut na amamas, tasol ol i hatwok yet long bilip olsem Jisas i kirap bek pinis.

Jisas i laik bai ol i save olsem em i man tru, olsem na em i tok: “Yupela i gat sampela kaikai i stap?” Em i kisim hap pis ol i bin kukim na em i kaikai. Bihain em i tok: “Tingim, taim mi stap yet wantaim yupela [paslain long mi dai] mi bin kamapim olsem olgeta tok i makim mi long Lo bilong Moses na long ol rait bilong ol Profet na ol Song, ol i mas kamap tru.”—Luk 24:41-44.

Jisas i bin helpim Kliopas na poroman bilong em long kliagut long ol tok i stap long Rait Holi, na nau em i helpim olgeta lain i bung. Em i tok: “Rait Holi i tok olsem Krais bai karim pen na long namba 3 de em bai kirap bek long dai. Na long rot bilong nem bilong em ol bai autim tok long olgeta lain man olsem ol man i mas tanim bel na bai God i ken lusim ol sin bilong ol. Kirap long Jerusalem na i go long ol arapela hap, yupela bai stap olsem ol witnes bilong ol dispela samting.”—Luk 24:46-48.

Tasol aposel Tomas i no bin stap long dispela taim. Long ol de bihain, ol narapela disaipel i amamas na tokim em olsem: “Mipela i lukim pinis Bikpela!” Tasol Tomas i tok: “Sapos mi no lukim mak bilong ol nil long tupela han bilong em, na putim pinga bilong mi long mak bilong ol nil na putim han bilong mi long sait bilong en, orait bai mi no bilip.”—Jon 20:25.

Long 8-pela de bihain, ol aposel i lokim dua na bung gen insait long haus, na long dispela taim Tomas i stap wantaim ol. Jisas i kisim bodi bilong graun na em i kamap long ol na tok: “Bel isi i ken i stap wantaim yupela.” Orait Jisas i tanim na lukluk long Tomas na em i tok: “Putim pinga bilong yu long hia, na lukim han bilong mi, na kisim han bilong yu na putim long sait bilong mi na maski long holim tupela tingting, nau yu mas bilip.” Tomas i tok: “Bikpela bilong mi, na God bilong mi!” (Jon 20:26-28) Kirap long dispela taim, Tomas i bilip tru olsem Jisas i stap laip na em i mausman bilong God Jehova.

Jisas i tokim Tomas: “Yu lukim mi, olsem na yu bilip, a? Ol man husat i no lukim mi na ol i bilip, ol i ken amamas.”—Jon 20:29.