Yu Inap Bilip Long Baibel?
SAPOS yu kisim wanpela Baibel na opim, yu ting bai yu inap painim wanpela mani long en? Olsem wanem long dispela mani silva bilong bipo yet?
Planti man i ting, Baibel em i wanpela buk bilong bipo i gat ol gutpela stori long en na i toktok long stretpela pasin. Tasol ol i no bilip olsem tok bilong Baibel long ol samting i bin kamap bipo i stret tru. Olsem na ol i tok, Baibel em i no Tok Bilong God. Tasol i gat planti samting i makim klia olsem ol dispela stori bilong Baibel i stret. Dispela mani yu lukim long bikpela piksa i kamapim gut dispela samting. Rait bilong en i tok wanem?
Ol i bin wokim dispela mani long taun Tarsus, long kantri nau ol i kolim Turki. Ol i wokim long 300 yia samting paslain long Krais, taim Masaeus bilong Persia i stap namba wan gavman. Rait long dispela mani i tok, em i bosim provins long “hapsait bilong wara,” em Wara Yufretis. Bilong wanem yumi skelim dispela tok long mani?
Long wanem, yu inap painim dispela tok “hapsait bilong wara” long Baibel. Esra 5:3 i kolim sampela tok long pas em King Darius bilong Persia i raitim long Tatenai, em wanpela gavman. Pas i toktok long ol Juda i laik sanapim gen haus lotu long Jerusalem. Esra i gat wok long lukim Lo bilong God na raitim gen long buk samting, na yumi save, em bai skelim gut ol rait bilong em na bai olgeta tok i stret. Long Esra 5:3 em i kolim Tatenai olsem “namba wan gavman bilong dispela provins long hapsait bilong wara Yufretis.”
Esra i raitim dispela tok long yia 460 samting paslain long Krais, olsem 100 yia paslain long taim ol i bin wokim dispela mani. Tru, sampela man bai ting dispela tok ‘namba wan gavman long hapsait bilong wara’ em i liklik samting tasol. Tasol sapos yu save ol liklik tok bilong Baibel i stret olgeta, orait yu inap bilip tru olsem ol narapela tok bilong Baibel i stret, a?
Namba wan na namba tu stori long dispela Wastaua i kamapim sampela as moa na yu inap bilip tru long ol tok bilong Baibel.
[Piksa Kredit Lain long pes 32]
Collection of Israel Dept. of Antiquities Exhibited & photographed Israel Museum