Ol Referens Bilong Laip na Wok Autim Tok Miting Wok Buk
© 2023 Watch Tower Bible and Tract Society of Pennsylvania
JULAI 3-9
GUTPELA SAVE I KAM LONG BAIBEL | ESRA 4-6
‘Yupela i No Ken Pasim Ol Long Wok’
Yu Lukim Samting Sekaraia i Bin Lukim?
13 Gavman i tambuim wok bilong wokim gen tempel. Maski i olsem, ol man em ol i makim ol long go pas long dispela wok—em Hetpris Jesuar (Josua) na Gavana Serubabel—“i kirapim wok bilong sanapim gen haus bilong God.” (Esr. 5:1, 2) Sampela Juda inap pilim olsem em i no gutpela tingting long bihainim dispela disisen. Wok bilong wokim gen tempel i no stap hait long ai bilong ol birua, na ol inap mekim olgeta samting ol inap mekim bilong stopim dispela wok. Dispela tupela man i go pas, Josua na Serubabel, i mas kisim ol tok bilong strongim ol na bai ol i ken save olsem Jehova i sapotim wok ol i mekim. Ol i bin kisim dispela tok. Hau ol i kisim?
w86 2/1 29, blok par. 2-3
Jehova i “Lukautim Ol Hetman”
Bihain long hap lain bilong Juda i lusim Babilon na go bek long Israel, inap 16 yia ol i stap nating na ol i no mekim wok. Profet Hagai na Sekaraia i kirapim ol Juda long no ken les, na ol i kirapim gen wok bilong sanapim tempel bilong Jehova. Tasol bihain ol ofisa bilong Persia i laik stopim dispela wok. Ol i tok: “Husat i givim tok orait long yupela long wokim dispela haus na banis bilong en?”—Esr. 5:1-3.
I hatwok long bekim dispela tok. Sapos ol hetman i larim tok bilong ol dispela man i pretim ol, ol bai hariap long stopim wok bilong stretim gen tempel. Na sapos ol i mekim nogut long ol dispela ofisa, ol inap putim tambu long dispela wok. Olsem na ol hetman (i klia tru olsem Gavana Serubabel na Hetpris Josua i go pas long ol) i tingting gut na givim gutpela bekim. Ol i kirapim ol ofisa long tingim bek lo Sairus i bin mekim inap longpela taim i go pinis olsem em i givim tok orait long ol Juda long mekim dispela wok. Ol dispela ofisa i save long lo bilong Persia olsem i no gat man i mas senisim lo, so ol i no laik sakim lo em king i bin putim. Em risen na wok bilong stretim tempel i go het yet inap King Darius i givim tok orait long mekim wok bilong tempel!—Esr. 5:11-17; 6:6-12.
Yu Lukim Samting Sekaraia i Bin Lukim?
7 Wanpela senis i kamap na i mekim gut bel bilong ol man bilong wokim gen tempel. Wanem dispela senis? Long 520 B.C.E., nupela King Darius Namba 1 i kirap mekim wok king long Persia. Long namba 2 yia bilong em long mekim wok king, em i painimaut olsem gavman Persia i brukim lo taim ol i tambuim wok bilong wokim gen tempel. Darius i givim tok orait long ol i pinisim dispela wok. (Esr. 6:1-3) Dispela nius i mekim na ol manmeri i kirap nogut tru, tasol i gat sampela samting moa. King i tokaut olsem ol manmeri i stap klostu, ol i no ken pasim dispela wok bilong wokim gen tempel na em i tokim ol long givim mani na ol samting bilong sapotim dispela wok! (Esr. 6:7-12) Dispela i mekim na ol Juda i pinisim wok bilong wokim gen tempel inap 4-pela yia samting bihain, long 515 B.C.E.—Esr. 6:15.
Yu Lukim Samting Sekaraia i Bin Lukim?
16 Narapela rot Jehova i givim daireksen em long rot bilong “gutpela wokboi i gat savetingting.” (Mat. 24:45) Sampela taim dispela wokboi inap givim yumi ol daireksen we yumi yet i no kliagut long en. Olsem, ating yumi inap kisim daireksen bilong helpim yumi long abrusim wanpela disasta we yumi ting em i no inap kamap long hap bilong yumi. O yumi inap pilim olsem wokboi i wari tumas long taim bilong wanpela pendemik. Yumi ken mekim wanem sapos yumi pilim olsem em i no savetingting long bihainim ol instraksen ol i givim? Yumi ken tingim olsem ol Israel i kisim gutpela helpim taim ol i bihainim tok bilong God em Josua na Serubabel i givim long ol. Yumi ken tingim tu ol narapela stori bilong Baibel em yumi bin ritim. Sampela taim lain bilong God i kisim ol daireksen we i luk olsem longlong pasin long ai bilong ol man, tasol taim ol i bihainim, dispela i lukautim laip bilong ol.—Het. 7:7; 8:10.
Mekim Wok Painimaut
Yu Inap Bilip Long Baibel?
Ol i bin wokim dispela mani long taun Tarsus, long kantri nau ol i kolim Turki. Ol i wokim long 300 yia samting paslain long Krais, taim Masaeus bilong Persia i stap namba wan gavman. Rait long dispela mani i tok, em i bosim provins long “hapsait bilong wara,” em Wara Yufretis. Bilong wanem yumi skelim dispela tok long mani?
Long wanem, yu inap painim dispela tok “hapsait bilong wara” long Baibel. Esra 5:3 i kolim sampela tok long pas em King Darius bilong Persia i raitim long Tatenai, em wanpela gavman. Pas i toktok long ol Juda i laik sanapim gen haus lotu long Jerusalem. Esra i gat wok long lukim Lo bilong God na raitim gen long buk samting, na yumi save, em bai skelim gut ol rait bilong em na bai olgeta tok i stret. Long Esra 5:3 em i kolim Tatenai olsem “namba wan gavman bilong dispela provins long hapsait bilong wara Yufretis.”
Esra i raitim dispela tok long yia 460 samting paslain long Krais, olsem 100 yia paslain long taim ol i bin wokim dispela mani. Tru, sampela man bai ting dispela tok ‘namba wan gavman long hapsait bilong wara’ em i liklik samting tasol. Tasol sapos yu save ol liklik tok bilong Baibel i stret olgeta, orait yu inap bilip tru olsem ol narapela tok bilong Baibel i stret, a?
JULAI 10-16
GUTPELA SAVE I KAM LONG BAIBEL | ESRA 7-8
“Pasin Bilong Esra i Givim Ona Long Jehova”
Stadi—Yumi Kisim Amamas na Gutpela Samting Long En
8 Em nau, yumi mas laikim tumas Tok bilong Jehova long bel bilong yumi. Yumi mas amamas long tingim ol tok yumi kaunim pinis—yumi no ken lusim kwik. Yumi mas tingim tingim long bel ol strongpela tok bilong spirit. Bilong mekim olsem, yumi mas tingting tingting long ol dispela samting na beten. Olsem Esra i bin mekim, yumi mas redim bel bilong yumi long kaunim na stadi long Tok Bilong God. Baibel i stori long Esra olsem: “Esra i man bilong wok strong [olsem redim bel bilong em] long kisim save long lo bilong Bikpela na long bihainim gut dispela lo. Na tu em i wok long skulim gut ol Israel long olgeta tok bilong lo bai ol tu i ken bihainim.” (Esra 7:10) Tingim 3-pela samting i olsem as na Esra i redim bel bilong em: em i laik stadi, bihainim ol tok em i bin lainim, na skulim ol man. Yumi mas bihainim pasin bilong em.
Buk Bilong Baibel Namba 13—1 Stori
5 Esra em inap tru long mekim dispela wok bilong raitim stret stori bilong ol Israel na raitim ol tok i tru tasol—i no gat narapela man i winim em long mekim dispela wok. Long wanem, “Esra i man bilong wok strong long kisim save long lo bilong Bikpela na long bihainim gut dispela lo. Na tu em i wok long skulim gut ol Israel long olgeta tok bilong lo bai ol tu i ken bihainim.” (Esr 7:10) Jehova i bin helpim em long rot bilong spirit holi. King bilong Persia, em i bin bosim olgeta hap bilong graun, em i luksave olsem gutpela tingting bilong God i stap long Esra, olsem na king i givim namba long em long bosim planti samting insait long distrik Juda. (Esr 7:12-26) Em nau, Esra i kisim namba long God na long king, olsem na em i gat rot long lukim ol buk na pepa bilong gavman na ol narapela buk na raitim ol tok bilong Buk Stori.
it-1 1158 par. 4
Pasin Daun
Givim Stretpela Tok Bilong Stiaim Man. Man i daunim em yet long ai bilong God, em inap bilip olsem God bai stiaim em. Esra i gat bikpela wok long lidim 1 tausen 5 handret man long lusim Babilon na go bek long Jerusalem. Ol pris, Netinim, na ol meri na pikinini i no insait long dispela namba. Na tu, ol i kisim planti gol na silva i go wantaim ol bilong bilasim tempel long Jerusalem. Ol i nidim ol man bilong was long ol long rot, tasol Esra i no laik askim king bilong Persia long salim ol soldia long eskotim ol bikos dispela bai soim olsem ol i nidim ol man bilong graun long sambai long ol. Na tu, pastaim Esra i bin tokim king olsem: “God bilong mipela i save helpim ol man i save bihainim em.” Olsem na em i tokim ol manmeri long ol i mas tambu long kaikai, na bai ol i daunim ol yet long ai bilong Jehova. Ol i askim God, na em i harim beten bilong ol na em i lukautim ol na bai ol birua i no bagarapim ol na ol stilman i no hait na stilim ol samting long taim ol i wokabaut long dispela longpela rot. (Esr 8:1-14, 21-32) Taim Daniel i stap kalabus long Babilon, God i laikim em tru na salim wanpela ensel i go long em na givim em visen, long wanem, Daniel i bin daunim em yet long ai bilong God taim em i askim God long stiaim em na helpim em long kliagut long ol samting.—Da 10:12.
Mekim Wok Painimaut
Sampela Bikpela Tok Bilong Buk Esra
7:28–8:20—Bilong wanem planti Juda long Babilon i no laik go wantaim Esra long Jerusalem? Winim 60 yia i go pinis, namba wan lain bilong Juda i bin go bek long as ples bilong ol, tasol i no gat planti man i sindaun long Jerusalem. Man i go bek long Jerusalem i mas mekim bikpela hatwok na em inap kisim bagarap tu taim em i wok long stretim ol samting long nupela sindaun bilong em. Ating sampela Juda i bin i gat gutpela sindaun long Babilon, tasol long dispela taim Jerusalem i no gat planti ol gutpela samting bilong skin ol dispela Juda i save laikim. Na tu, ol man inap kisim bagarap long rot. Ol lain i go bek long Jerusalem, ol i mas bilip strong long Jehova, givim bel long lotu i tru, na ol i mas i gat strongpela bel. Esra tu i bin kisim strong long Jehova. Esra i strongim ol manmeri na 1,500 famili—ating inap 6,000 manmeri—ol i go wantaim em. Taim Esra i mekim sampela narapela samting, inap 38 Livai na 220 wokman bilong tempel i go wantaim em.
JULAI 17-23
GUTPELA SAVE I KAM LONG BAIBEL | ESRA 9-10
“Ol Hevi Pasin Bilong Sakim Tok i Kamapim”
Sampela Bikpela Tok Bilong Buk Esra
9:1, 2—Pasin bilong marit long ol narapela lain inap nogutim tru ol Israel olsem wanem? Lain Israel i mas lukautim lotu bilong Jehova i go inap long taim Mesaia i kamap. Pasin bilong marit long ol narapela lain inap bagarapim tru lotu i tru. Sampela i bin marit long ol lain i lotuim ol god giaman, na dispela inap mekim na lain Israel olgeta i kisim pasin bilong ol lain haiden. Na lotu i tru inap pinis olgeta. Sapos olsem, Mesaia bai kamap long wanem lain? Yumi ken save long as na Esra i kirap nogut tru taim em i lukim ol samting ol Israel i mekim!
Jehova i Laik Bai Yumi Mekim Wanem?
Pasin bilong yumi long amamas long bihainim tok bai kamapim ol gutpela samting. Moses i tok: “Yupela i mas bihainim olgeta lo . . . nau mi givim long yupela. Sapos yupela i bihainim, bai yupela i ken stap gut.” (Ves 13) Tru tumas, olgeta lo bilong Jehova—olgeta samting em i laik yumi mekim—ol i bilong helpim yumi long i stap gut. Ol dispela lo inap helpim yumi, long wanem, Baibel i tok: ‘God yet em i as bilong pasin laikim.’ (1 Jon 4:8) God i givim ol lo em ol i bilong helpim yumi long stap gut inap oltaim oltaim. (Aisaia 48:17) Taim yumi mekim olgeta samting Jehova i tokim yumi long mekim, bai yumi no bungim planti hevi long nau, na dispela bai opim rot long yumi kisim planti blesing tru aninit long Kingdom bilong em.
Mekim Wok Painimaut
Sampela Bikpela Tok Bilong Buk Esra
10:3, 44—Bilong wanem ol i rausim ol meri wantaim ol pikinini? Sapos ol i bin larim ol pikinini i stap, ating planti meri moa bai kam bek, long wanem, ol tingim pikinini bilong ol. Na tu, ol liklik pikinini i mas kisim helpim bilong mama.
JULAI 24-30
GUTPELA SAVE I KAM LONG BAIBEL | NEHEMIA 1-2
“Kwiktaim Mi Prea”
Long Olgeta Taim Stap Klostu Long Jehova
5 Ating sampela taim yumi mas mekim kwik wanpela beten bilong God i ken helpim yumi. Wanpela taim, King Artaserksis bilong Persia i lukim olsem Nehemia, man bilong bringim wain i go long em, i bel hevi i stap. King i askim em: “Yu laik bai mi mekim wanpela samting, a?” Orait, Nehemia i “prea kwik long God bilong heven.” Ating Nehemia i mekim sotpela beten long tingting. Tasol God i harim beten bilong em, long wanem, king i helpim Nehemia long wokim gen banis bilong Jerusalem. (Ritim Nehemia 2:1-8.) Tru tumas, maski beten i sotpela na yumi mekim long tingting em inap helpim yumi.
Kamapim Tok i Stap Long Tingting
Taim ol man i laik save long ol bilip bilong yu na yu mas bekim tok wantu long tok i stap long tingting, wanem samting inap helpim yu long kamapim gutpela tok? Bihainim pasin bilong Nehemia, em i bin beten paslain long em i bekim askim bilong King Artaserksis. (Neh. 2:4) Bihain, kwiktaim wokim wanpela autlain long tingting. I gutpela long bihainim dispela lista: (1) Kisim wanpela o tupela bikpela tok i save bekim gut dispela askim (ating yu inap kisim sampela tok i stap long buk Toktok Gut Wantaim Ol Man Long Baibel). (2) Makim ol skripsa yu bai kamapim bilong strongim dispela tok. (3) Skelim gut olsem wanem yu ken kirapim tok na bekim askim long gutpela pasin bambai man i givim askim bai i gat laik long harim. Orait nau kirap na toktok.
Mekim Wok Painimaut
w86 2/15 25
Lotu i Tru i Go Bikpela
Nehemia i tingim tempel i bagarap i stap olsem na em samting we em i save beten long en long “san na nait.” (1:4, 6) Taim rot i op long em inap tokim King Artaserksis long laik bilong em long wokim gen banis bilong Jerusalem, Nehemia i beten gen, so em i mekim gen samting em i save mekim long olgeta taim. Jehova i bekim beten bilong em taim king i givim tok orait long wokim gen ol banis bilong taun.
Skul Yumi Kisim: Nehemia i larim Jehova i stiaim em. Taim yumi laik mekim ol bikpela disisen, “oltaim holim strong pasin bilong beten” na bihainim ol tok Jehova i givim bilong stiaim yumi.—Rom 12:12.
JULAI 31–OGAS 6
GUTPELA SAVE I KAM LONG BAIBEL | NEHEMIA 3-4
“Yu Ting Ol Wok i Gat Hatwok Bilong En i No Wok Bilong Yu?”
Sampela Bikpela Tok Bilong Buk Nehemia
3:5, 27. Yumi no ken ting ol wok yumi mekim long han bilong helpim trupela lotu i samting nating na i daunim yumi, olsem ol “hetman” bilong Tekoa i bin ting. Mobeta yumi bihainim pasin bilong ol man nating bilong Tekoa, em ol i bin amamas long wok strong.
Jehova Bai Inapim Yu Long Mekim Wanem Wok?
11 Planti handret yia bihain, Jehova i yusim ol pikinini meri bilong Salum long insait long wok bilong sanapim gen banis bilong Jerusalem. (Neh. 2:20; 3:12) Maski Salum em wanpela hetman, ol pikinini bilong em i redi long mekim dispela bikpela wok we inap putim hevi long ol. (Neh. 4:15-18) Pasin bilong ol dispela pikinini meri i narapela kain tru long pasin bilong ol man long taun Tekoa, em “ol i no laik daunim ol yet na mekim ol wok”! (Neh. 3:5) Ol pikinini meri bilong Salum i amamas tru taim wok i pinis insait long 52 de tasol! (Neh. 6:15) Long taim bilong yumi, ol sista i amamas na redi long mekim wok holi—kain olsem wok konstraksen na meintenens long ol bilding em yumi dediketim long Jehova. Ol inap mekim gut ol dispela wok bikos ol i yusim gut save ol i gat, na ol i gat laik tru long mekim wok, na ol i stap gut long God.
Kisim Tingting Bilong Krais Long Samting i Makim Olsem Man i Gat Biknem
16 Olgeta Kristen, ol yangpela na lapun tu, ol i mas wok long kisim tingting bilong Krais long samting i makim olsem man i gat biknem. Long kongrigesen, i gat kain kain wok bilong mekim. No ken bel nogut taim narapela i askim yu long mekim ol samting i olsem wanpela wok i no gat nem. (1 Samuel 25:41; 2 King 3:11) Yupela papamama, yupela i save strongim ol pikinini bilong yupela, maski ol i liklik o bikpela, long amamas long mekim wok em narapela i givim long ol long Haus Kingdom o ples kibung? Ol i lukim yupela yet i mekim ol wok i no gat nem? Wanpela brata, nau em i mekim wok long hetkota bilong ol Witnes Bilong Jehova, em i tingim yet gutpela pasin bilong papamama bilong em. Em i tok: “Pasin na tingting ol i kamapim taim ol i klinim Haus Kingdom o haus kibung, i tokaut olsem ol i tingim dispela wok em i bikpela samting. Planti taim ol i volantia long mekim ol wok bilong helpim kongrigesen o lain brata, maski em wok i no gat nem. Dispela tingting i bin helpim mi long amamas long kisim ol wok hia long Betel, maski em wanem wok.”
Mekim Wok Painimaut
Sampela Bikpela Tok Bilong Buk Nehemia
4:17, 18—Olsem wanem ol man inap mekim wok bilong sanapim banis long wanpela han tasol? Long ol man i karim ol samting dispela i no hatwok. Taim ol i putim pinis ol samting long het o long sol, ol inap holim dispela long wanpela han na “long narapela han ol i holim samting bilong pait.” Ol man i mekim wok bilong sanapim banis, ol i mas mekim wok long tupela han na ol “i hangamapim bainat long let bilong ol.” Ol i redi long pait sapos ol birua i kam pait long ol.
OGAS 7-13
GUTPELA SAVE I KAM LONG BAIBEL | NEHEMIA 5-7
“Nehemia i Laik Helpim Ol Narapela, i No Ol Narapela i Helpim Em”
Ol i Helpim Lotu i Tru—Long Bipo na Long Nau
Nehemia i givim taim na save bilong em. Na tu, em i givim mani samting bilong helpim lotu i tru. Em i mekim wok long mani bilong em yet bilong baim bek ol brata Juda bilong em ol i bin stap wokboi nating. Em i givim dinau long ol man na i no singaut long winmani. Em i no bin “givim bikpela hevi” long ol Juda na askim ol long givim mani long em olsem namba wan gavman i save kisim, em samting i stret em i ken kisim. Tasol long olgeta taim ol man i ken kam long haus bilong em, na em i givim kaikai long “150 manmeri . . . na ol manmeri bilong ol arapela kantri.” Long olgeta de em i givim “wanpela bulmakau na 6-pela gutpela sipsip na planti kakaruk” long ol dispela manmeri. Na tu, long olgeta 10-pela 10-pela de em i givim ol kain kain gutpela “wain” long ol—na olgeta dispela samting em i givim long mani bilong em yet.—Nehemia 5:8, 10, 14-18.
“Yupela i No Ken Seksek Nating”
16 Jehova i strongim Nehemia na ol wanwok bilong em long sanapim banis. Ol i pinisim banis bilong Jerusalem insait long 52 de tasol! (Neh. 2:18; 6:15, 16) Nehemia i no bosim tasol ol man i mekim wok, nogat. Em yet i insait tu long wok bilong sanapim banis bilong Jerusalem. (Neh. 5:16) Olsem tasol, planti elda i soim pasin laikim na ol i bihainim pasin bilong Nehemia na ol yet i mekim wok bilong klinim na mekim meintenens long Haus Kingdom. Taim ol i autim tok wantaim ol narapela pablisa, na mekim sepeding visit, dispela tu bai strongim ol arapela husat i stap bel hevi.—Ritim Aisaia 35:3, 4.
Jehova Bai Tingim Yu Olsem Wanem?
Planti taim Baibel i save kamapim olsem taim God i “tingting” long man, dispela i makim olsem em i save mekim sampela samting bilong helpim em. Olsem: Taim tait wara i karamapim pinis graun inap 150 de, “God i tingting long Noa. . . . na God i mekim win i ran antap long wara, na wara i go daun.” (Stat 8:1) Sampela handet yia bihain, ol Filistia i bagarapim ai bilong Samson na pasim hanlek bilong em, na em i beten olsem: “God, Bikpela, yu ken tingim mi nau. God, givim mi strong long dispela wanpela taim moa.” God i tingim Samson na givim em bikpela strong tru na bai em i ken bekim rong bilong ol birua bilong God. (Hetman 16:28-30) Na Jehova i bin blesim hatwok bilong Nehemia na em i kamapim bek lotu i tru long Jerusalem.
Mekim Wok Painimaut
“Mekim Gutpela Pasin na Bai Yu Daunim Pasin Nogut”
15 Namba tri, ol birua bilong Nehemia i yusim wanpela man Israel husat i birua long lain bilong em yet bilong kirapim Nehemia long brukim Lo Bilong God. Nem bilong dispela man em Semaia. Em i tokim Nehemia olsem: “Mitupela i mas i go hait insait long Rum Tambu bilong haus bilong God. Na yumi mas pasim ol dua, long wanem, ol birua i laik i kam long wanpela nait na kilim yu.” Semaia i tokim Nehemia olsem ol birua i laik kilim em i dai, tasol em inap abrusim bagarap sapos em i hait insait long tempel. Tasol Nehemia i no wanpela pris. Sapos em i hait insait long haus bilong God em bai mekim sin. Yu ting em bai brukim Lo Bilong God bilong lukautim laip bilong em? Nehemia i tok: “Mi no inap ranawe i go hait insait long haus bilong God. Nogat tru.” Bilong wanem Nehemia i no pundaun long dispela trap ol birua i kamapim? Long wanem, em i save maski Semaia i wanpela wantok Israel, “God i no bin givim dispela tok long Semaia.” Wanpela trupela profet bai i no tokim em long brukim Lo Bilong God. Em nau, long dispela taim tu, Nehemia i no larim ol man nogut i winim em. Bihain liklik em inap tok: “Mipela i wokim banis bilong Jerusalem inap 52 de na long de namba 25 bilong mun Elul, wok bilong banis i pinis.”—Nehemia 6:10-15; Namba 1:51; 18:7.
OGAS 14-20
GUTPELA SAVE I KAM LONG BAIBEL | NEHEMIA 8-9
“Amamas Long Jehova, Em i Ples Hait Bilong Yupela”
Ol Skul Yumi Kisim Long Beten Ol i Redim Gut
2 Inap 1-pela mun paslain long dispela spesel kibung, ol Juda i bin pinisim wok bilong sanapim gen banis bilong Jerusalem. (Neh. 6:15) Ol i pinisim dispela wok insait long 52 de tasol. Orait mun bihain em mun Tisri, na long namba 1 de bilong dispela mun, olgeta manmeri i kam long ples bung long harim Esra na ol narapela Livai i ritim Lo Bilong God na stori gut long en. (Piksa 1) Ol famili olgeta, na ol pikinini tu, olgeta i sanap na harim ol tok kirap long moningtaim i go inap long belo. Dispela lain i soim gutpela pasin tru em yumi ken bihainim long nau. Maski yumi gat ol gutpela Haus Kingdom we yumi save go miting long en, sampela taim yumi inap tingting long ol narapela samting long taim bilong miting. Tasol lain Israel i bin putim gut yau, na ol i tingting gut long ol samting ol i harim, na ol i krai tu taim ol i luksave olsem ol i no bin bihainim Lo Bilong God.—Neh. 8:1-9.
Bai Yu ‘Larim Holi Spirit i Bosim Wokabaut Bilong Yu’?
9 Amamas yumi stori long en em kain amamas yumi pilim tru long bel. Jehova em i “as bilong pasin tru bilong amamas.” (1 Timoti 1:11; Song 104:31) Pikinini i save laikim tumas long bihainim laik bilong Papa. (Song 40:8; Hibru 10:7-9) Na yumi “mas amamas long Bikpela na bai em i strongim [yumi].”—Nehemia 8:10.
10 Amamas God i givim i mekim na bel bilong yumi bai gutpela tru taim yumi mekim laik bilong em, maski yumi bungim taim nogut, bel hevi, o ol man i mekim nogut long yumi. Yumi kisim bikpela amamas taim yumi “save gut long God.” (Sindaun 2:1-5) Yumi amamas long pas gut wantaim God. As bilong dispela em stretpela save yumi kisim na bilip yumi gat long em na long ofa bilong Jisas bilong baim bek ol man. (1 Jon 2:1, 2) Narapela as na yumi amamas em yumi stap insait long dispela wanpela bikpela lain brata i stap long olgeta hap. (Sefanaia 3:9; Hagai 2:7, NW ) Yumi bilip na wetim Kingdom na yumi mekim gutpela wok bilong autim gutnius, na dispela i mekim yumi amamas. (Matyu 6:9, 10; 24:14) Na tu, yumi amamas long yumi gat rot long kisim laip oltaim. (Jon 17:3) Yumi wetim samting i gutpela tru, olsem na yumi mas “amamas.”—Lo 16:15.
Mekim Wok Painimaut
it-1 145 par. 2
Arameik
Sampela yia bihain long ol Juda i lusim kalabus long Babilon na go bek, pris Esra i ritim buk bilong Lo long ol Juda i bung long Jerusalem, na ol Livai i eksplenim long ol manmeri, Nehemia 8:8 i tok: “Ol i wok long ritim strong dispela buk, em Lo bilong God tru, na ol i kamapim klia ol tok bilong en na mining bilong en; long dispela rot ol i helpim ol manmeri long kliagut long ol tok em ol i ritim.” Ating ol Livai i mekim olsem long rot bilong kolim ol tok Arameik i gat wankain mining olsem tok Hibru, ating ol i save long tok Arameik long taim ol i stap long Babilon. Na tu, ating ol i diskraibim na eksplenim gut ol samting na bai ol Juda i kliagut, maski ol i save long tokples Hibru, na dispela bai helpim ol long kliagut na pilim tru tok ol i harim.
OGAS 21-27
GUTPELA SAVE I KAM LONG BAIBEL | NEHEMIA 10-11
“Ol i Daunim Laik Bilong Ol Yet Bilong Mekim Laik Bilong Jehova”
Wanpela Jerusalem i Bihainim Tru Nem Bilong En
13 Dispela “kontrak” ol i bin wokim long taim bilong Nehemia, em i redim lain bilong God long mekim bung bilong makim banis bilong Jerusalem i bilong God. Tasol i gat wanpela bikpela samting ol i no stretim yet. Nau i gat wanpela bikpela banis tru i banisim Jerusalem na banis i gat 12-pela dua bilong en, olsem na i mas i gat planti manmeri moa i sindaun long Jerusalem. Tru, i gat sampela Israel i sindaun long en, tasol “Jerusalem i bikpela taun tru” na “i no gat planti manmeri i stap long en.” (Nehemia 7:4) Bilong stretim dispela hevi, ol man i “pilai satu bilong makim wanpela wanpela famili namel long olgeta 10-pela famili bilong ol long i go stap long Jerusalem, dispela taun bilong God yet.” Long laik bilong ol yet sampela lain i go sindaun long Jerusalem, olsem na ol Israel i amamas tru long ol. (Nehemia 11:1, 2) Ol i stap olsem gutpela piksa tru bilong ol manmeri i lotuim Jehova long nau em ol inap i go sindaun long ol hap i no gat planti strongpela Kristen bilong helpim ol!
w86 2/15 26
Lotu i Tru i Go Bikpela
Sapos wanpela i laik lusim graun na haus samting bilong em na go bek long Jerusalem, dispela i makim olsem em bai lusim sampela samting na em inap bungim sampela hatwok. Ol lain i stap long dispela taun, ating i gat planti samting inap bagarapim ol. Long kain taim olsem, ol narapela i tingim lain i volantia long go olsem ol i dia tumas na ol i beten olsem Jehova i ken blesim ol.
God Bai Orait Long Man i Stap Gut Long Em
15 Taim yumi dediketim laip bilong yumi long Jehova, yumi bin tok promis olsem yumi bai yusim laip olgeta bilong yumi long mekim laik bilong em. Yumi save olsem yumi mas daunim laik bilong yumi yet bambai yumi inap truim tok promis bilong yumi. Tasol taim yumi kisim wanpela asainmen we yumi no amamas long en, dispela inap traim pasin bilong yumi long redi long mekim wok. Taim yumi daunim laik bilong yumi yet na yumi mekim wok bilong God, dispela i soim klia olsem yumi stap gut long God. Olsem na God i save givim yumi ol blesing we i winim tru ol samting yumi bin lusim. (Mal. 3:10) Tasol olsem wanem long pikinini meri bilong Jepta?
Mekim Wok Painimaut
Sampela Bikpela Tok Bilong Buk Nehemia
10:34—Bilong wanem ol man i mas bringim paiawut? Lo Bilong Moses i no tokaut olsem ol man i mas bringim paiawut olsem ofa. Ol i kamapim dispela lo, long wanem, ol i sot long paiawut. Ol i mas kisim planti paiawut bilong kukim ol ofa long alta. I luk olsem i no gat inap Netinim, em ol man i no bilong lain Israel na i mekim wok olsem wokboi nating long tempel. Olsem na ol i pilai satu bilong makim ol man long bringim paiawut na ol i no ken sot long en.
OGAS 28–SEPTEMBA 3
GUTPELA SAVE I KAM LONG BAIBEL | NEHEMIA 12-13
“Stap Gut Long Jehova Taim Yu Makim Ol Pren”
it-1 95 par. 5
Lain Amon
Bihain long ol i rausim Tobia long banis bilong tempel, ol i ritim na bihainim lo bilong God long Lo 23:3-6 we i tok long ol Amon na ol Moap i no ken bung wantaim ol Israel. (Ne 13:1-3) Dispela lo i stap pastaim yet klostu 1 tausen yia bikos lain Amon na lain Moap i no laik helpim ol Israel taim ol i go klostu long Graun Bilong Promis. Dispela i makim olsem lain Amon na lain Moap i no inap stap olsem wanpela Israel na i gat wankain raits na kisim ol wok we lain Israel tasol inap kisim. Tasol em i no makim olsem i tambu long wanpela man o meri long lain Amon o Moap i ken bung wantaim o stap wantaim lain Israel na kisim helpim long blesing God i givim long lain bilong em. Dispela kain samting i kamap long Selek, em Baibel i kolim olsem wanpela bilong ol strongpela soldia bilong Devit, na tu, long stori bilong Rut em wanpela meri Moap.—Ru 1:4, 16-18.
God i Mekim Yupela i Kamap Holi
5 Ritim Nehemia 13:4-9. Yumi stap namel long ol manmeri husat i mekim planti pasin nogut, olsem na i hatwok long yumi inap i stap holi. Skelim stori bilong Eliasip na Tobia. Eliasip em hetpris, na Tobia em man Amon na ating em i wanpela bikman long gavman Persia. Tobia na ol poroman bilong em i bin birua taim Nehemia i laik wokim gen banis bilong Jerusalem. (Neh. 2:10) I tambu long lain Amon i go insait long banis bilong tempel. (Lo 23:3) Olsem na bilong wanem hetpris i larim kain man olsem Tobia i stap insait long tempel?
6 Tobia i kamap gutpela pren bilong Eliasip. Tobia na pikinini man bilong em Jehohanan i bin maritim ol meri Juda, na planti manmeri bilong lain Juda i save stori long ol gutpela pasin bilong Tobia. (Neh. 6:17-19) Wanpela tumbuna pikinini bilong Eliasip i bin maritim pikinini meri bilong Senbalat, em gavana bilong Samaria na gutpela pren bilong Tobia. (Neh. 13:28) Ating ol dispela samting i mekim na Hetpris Eliasip i larim Tobia long stiaim tingting bilong em—Tobia i no lotuim God na em i birua long wok em lain bilong God i mekim. Tasol Nehemia i soim olsem em i stap gut long Jehova taim em i kisim olgeta sia na tebol bilong Tobia na tromoi i go ausait long tempel.
Winim Hatwok Bilong i Stap Gut Long God
6 Sapos yumi stap gut long God Jehova, bai yumi no prenim ol man i birua long em. Long dispela as disaipel Jems i tok: “Yupela i lusim God, olsem meri i lusim man bilong en na i go pamuk nabaut. Harim. Sapos man i laikim pasin bilong graun, em i mekim pasin birua long God. Ating yupela i no save long dispela, a? Olsem na sapos man i laik pren wantaim ol pasin bilong graun, em bai i kamap birua bilong God.” (Jems 4:4) Wanpela tok bilong King Devit i kamapim klia olsem em i stap gut long God, na yumi tu i laik mekim olsem. Devit i tok: “Bikpela, mi no laikim tru ol man i no laikim yu. Na mi bel nogut tru long ol man i save bikhet long yu. . . . Mi lukim ol i olsem ol birua bilong mi yet.” (Song 139:21, 22) Yumi no laik bung wantaim ol man bilong mekim rong, long wanem, yumi stap narapela kain long ol. Sapos yumi stap gut long God, bai yumi no bung wantaim ol dispela kain birua bilong Jehova, maski yumi bung tru wantaim ol o yumi mekim long rot bilong televisen.
Mekim Wok Painimaut
it-2 452 par. 9
Musik
Ol i tingim singsing i olsem wanpela bikpela samting long tempel. Baibel i stori planti long ol singa, na tu, “ol i no larim ol i mekim ol narapela wok” em ol narapela Livai i save mekim bikos ol i mas givim bel na tingting olgeta long mekim wok bilong singsing. (1St 9:33) Ol i stap yet olsem ol spesel grup bilong lain Livai bikos taim Baibel i kolim lista bilong lain i lusim Babilon na go bek, em i kolim tu ol singa. (Esr 2:40, 41) Na tu, king bilong Persia em Artaserksis (Longimanus) i yusim namba bilong em long tokaut olsem ol singa na ol narapela spesel grup i no gat wok long ol i baim kain kain takis. (Esr 7:24) Bihain, king i tok long ol i mas “givim ol samting em ol singa i nidim long olgeta de.” Tru Baibel i tok Artaserksis i givim dispela oda, tasol i luk olsem Esra i yusim namba Artaserksis i givim em long mekim olsem. (Ne 11:23; Esr 7:18-26) Olsem na em tru olsem olgeta singa em ol Livai na Baibel i kolim ol olsem wanpela spesel grup taim em i stori long “ol Livai na ol singa.”—Ne 7:1; 13:10.