STADI 15

Mekim Tok Olsem Yu Bilipim Tru

1 Tesalonaika 1:5

OL BIKPELA TOK: Mekim tok i soim olsem yu bilipim tru ol tok yu mekim na ol dispela tok i bikpela samting.

Redi Gut. Stadi gut long ol tok yu laik mekim inap yu kliagut long ol bikpela tok bilong en na olsem wanem tok bilong Baibel i kamapim klia olsem ol dispela tok i tru. Kamapim ol bikpela poin bilong tok bilong yu long ol tok i isi long kliagut long en. Tingim olsem wanem dispela tok bai helpim ol man i harim tok bilong yu. Beten askim God long givim holi spirit long helpim yu.

Mekim traim planti taim na kolim long maus tok bilong yu bilong helpim yu long tingim tok bilong yu na wok long stretim stretim pasin bilong yu long givim dispela tok.
Yusim ol tok we i kamapim olsem yu bilip tru. Pasin bilong kolim ol tok long toktok bilong yu yet i gutpela moa winim pasin bilong ritim tasol olgeta wan wan tok i stap long buk o nius yu kisim tok long en. Makim ol tok we i soim olsem yu save tok yu kamapim em i stret.
Givim bel na pilim tru tok yu mekim. Taim yu toktok, krai bilong nek bilong yu i mas klia. Lukluk long ai bilong ol man i harim tok bilong yu taim yu mekim tok, sapos i stret long mekim olsem.

Pasin bilong kamapim olsem yu bilipim tru tok yu mekim i no wankain olsem yu autim tingting bilong yu yet, o yu strong long tok wanpela samting i tru tasol yu no save em i tru o nogat, o yu ting tok bilong yu tasol i tru. Na taim yu givim bel na mekim tok, mekim tok long pasin laikim na ol man i harim tok bilong yu bai pilim long bel.