Ol Referens Bilong Laip na Wok Autim Tok Miting Wok Buk
© 2023 Watch Tower Bible and Tract Society of Pennsylvania
SEPTEMBA 4-10
GUTPELA SAVE I KAM LONG BAIBEL | ESTA 1-2
“Wok Strong Long Bihainim Pasin Daun Olsem Esta”
Yu Inap Bihainim Pasin Daun Long Taim Bilong Traim
11 Taim ol man i givim biknem long yumi long olgeta samting yumi mekim, dispela inap traim pasin daun bilong yumi. Skelim pasin Esta i mekim taim ol senis i kamap long laip bilong em. Esta i luk nais tru, na ol i welim bodi bilong em wantaim ol naispela wel inap 1-pela yia olgeta. Em i stap wantaim planti yangpela meri husat i kam long olgeta hap em gavman bilong Persia i bosim, na king bai skelim ol na makim wanpela long kamap meri bilong em. Esta i soim pasin rispek na em i stap isi. Taim king i makim Esta long kamap kwin, Esta i bihainim yet pasin daun na em i no hambak.—Est. 2:9, 12, 15, 17.
Em i Sambai Long Lain Bilong God
15 Taim i kamap bilong ol i bringim Esta i go long king, ol i larim em yet i makim ol bilas samting we em bai nidim, ating bilong mekim em i luk nais moa. Long pasin daun, em i bihainim tok bilong Hegai na putim ol bilas samting em Hegai yet i makim. (Est. 2:15) Ating em i luksave olsem naispela lukluk tasol i no inap kirapim king long laikim em, nogat; gutpela pasin daun i gat bikpela strong moa. Yu ting tingting bilong em i stret
Yu Inap Bihainim Pasin Daun Long Taim Bilong Traim
12 Pasin daun i helpim yumi long bilas gut long ol klos i stret na i soim olsem yumi bihainim gutpela tingting na rispektim ol narapela. Ol manmeri i no inap laikim yumi sapos yumi litimapim nem bilong yumi yet o yumi mekim ol samting bilong pulim ai bilong ol narapela. Ol bai laikim yumi sapos yumi bihainim “pasin isi” na stap “bel isi.” (Ritim 1 Peta 3:3, 4; Jer. 9:23, 24) Sapos tingting nogut i stap long bel bilong yumi, dispela bai kamap ples klia long pasin yumi mekim. Ating yumi mekim sampela tok bilong kirapim ol narapela long tingim olsem yumi holim wanpela bikpela wok, o yumi save long ol samting ol narapela i no save long en, o yumi pas gut wantaim ol brata i holim bikpela wok. Ating yumi stori gut tru long wanpela samting na ol manmeri bai ting olsem yumi tasol i mekim dispela wok na ol bai litimapim nem bilong yumi, tasol tru tru ol narapela tu i bin mekim dispela wok. Jisas i soim gutpela pasin yumi ken bihainim. Taim em i skulim ol man, em i save kolim stret o mekim stori bilong stiaim tingting bilong ol man i go long Ol Skripsa Hibru. Em i laik bai ol man i save olsem tok bilong em i kam long Jehova, na i no kamap long tingting na save bilong em yet.—Jon 8:28.
Mekim Wok Painimaut
Yu Save Long Dispela?
Ol saveman i painim wanpela olpela rait bilong Persia we i stori long wanpela man em nem bilong em Marduka, long tok Inglis em Mordekai. Em i bin mekim wok olsem wanpela edministreta, ating em i wanpela akaunten long Susan. Arthur Ungnad, em wanpela saveman long histori bilong Esia, em i tok dispela em festaim “wanpela olpela rait we i no rait bilong Baibel i stori long Mordekai.”
Stat long taim Ungnad i mekim dispela tok, ol saveman i trensletim planti tausen olpela rait bilong ol Persia. Namel long ol dispela rait, ol i painim ol hap ston bilong Pesepolis i gat rait long en namel long ol hip pipia ston bilong bakstua bilong ol gutpela samting, klostu long banis bilong biktaun. Ol dispela hap ston i gat rait long en i bilong haptaim em Serksis Namba 1 i mekim wok king. Ol dispela rait i stap long tokples Elam na ol i stori long sampela nem i bin stap long Buk Esta.
Sampela ol hap ston bilong Pesepolis i gat rait long en i stori long dispela nem Marduka, em i mekim wok olsem sekreteri bilong king long haus king long Susan taim Serksis Namba 1 i mekim wok king. Wanpela hap ston i gat rait i tok Marduka i mekim wok olsem trensleta. Dispela tok i stret wantaim tok Baibel i mekim long Mordekai. Em i bin stap wokman bilong King Ahasuerus (Serksis Namba 1) na em i mekim tupela tokples. Oltaim Mordekai i save sindaun long geit bilong haus king long Susan. (Esta 2:19, 21; 3:3) Dispela geit bilong haus king em wanpela bikpela bilding we ol wokman bilong haus king i save wok long en.
I gat planti samting i wankain long Marduka em stori bilong em i stap long ol hap ston i gat rait na Mordekai em Baibel i stori long em. Tupela i bin stap laip long wankain haptaim na long wankain ples na ol i mekim ol bikpela wok long wankain ples wok. Olgeta dispela samting i wankain long tupela na dispela i soim olsem evidens em lain akioloji i painim inap makim Mordekai em Buk Esta long Baibel i stori long em.
SEPTEMBA 11-17
GUTPELA SAVE I KAM LONG BAIBEL | ESTA 3-5
“Helpim Ol Narapela Long Givim Bes Bilong Ol”
it-2 431 par. 7
Mordekai
I no laik brukim skru long Haman. Paslain long dispela, Ahasuerus i makim Haman em man bilong lain Agak long kamap praim minista, na em i tok olgeta i stap long geit bilong haus king i mas brukim skru long Haman na putim pes i go daun long graun bilong soim olsem em i gat namba. Tasol Mordekai i no laik mekim olsem, em i tok em wanpela Juda. (Est 3:1-4) Risen Mordekai i givim i soim olsem em i tingim pasin pren bilong em, olsem wanpela Juda, wantaim God bilong em Jehova. Modekai i luksave olsem sapos em i brukim skru long Haman na putim pes i go daun long graun, olsem ol Israel i bin mekim long bipo, i klia tru olsem em i tokaut long namba Haman i gat bilong mekim wok bos. (2Sm 14:4; 18:28; 1Ki 1:16) I gat risen na Modekai i no laik brukim skru long Haman. Ating Haman i bilong lain Amalek, na Jehova i bin tokaut olsem em bai pait long lain Amalek “i kamap bihain bihain.” (Ki 17:16) I klia tru olsem samting Modekai i mekim i soim pasin bilong em long stap gut long God na em i no samting bilong wok politik.
it-2 431 par. 9
Mordekai
God i yusim em long kisim bek lain Israel. Long taim i gat lo bilong bagarapim olgeta Juda long dispela kantri, Mordekai i kamapim olsem em i bilip olsem God i bringim Esta i kam long dispela taim long helpim lain Juda. Mordekai i soim Esta olsem em i gat bikpela wok na em i tokim em long go long king na askim king long helpim em. Maski hevi inap painim Esta, em i bihainim tok bilong Mordekai.—Est 4:7–5:2.
Em i Sambai Long Lain Bilong God
22 Ating bel bilong Esta i bagarap stret taim em i harim dispela tok. Dispela i traim tru bilip bilong em. Tok em i mekim long Mordekai i soim olsem em i pret. Em i kirapim Mordekai long tingim gen lo bilong king. Man inap lusim laip bilong em sapos long laik bilong em yet em i go long lukim king. Tasol sapos man i go na king i apim stik gol bilong em na i makim em, orait dispela man i no inap i dai. Yu ting Esta inap ting kain samting i no inap painim em? Moa yet taim em i save long samting i bin painim Vasti taim em i sakim tok bilong king na i no go lukim em. Esta i tokim Mordekai olsem inap 30 de king i no bin singautim em long i go lukim em! Dispela i mekim na Esta i tingting planti nogut king i no laikim em moa.—Est. 4:9-11.
23 Mordekai i strongim bel na strongim bilip bilong Esta. Em i tokim Esta olsem sapos em i no go lukim king, lain Juda bai kisim helpim long sampela narapela rot. Tasol Esta bai i no gat rot bilong abrusim bagarap taim ol birua i stat long kilim i dai ol Juda. Mordekai i kamapim bilip bilong em long Jehova, em Man i no inap larim wanpela samting i pinisim lain bilong Em na ol tok promis bilong Em i no inap lus nating. (Jos. 23:14) Bihain Mordekai i tokim Esta: “Yumi no save, ating yu kamap kwin bilong helpim yumi long dispela taim nogut.” (Est. 4:12-14) Yu ting Mordekai i stap gutpela eksampel long yumi ken bihainim? Em i trastim tru God bilong em, Jehova. Yumi tu i mekim olsem?—Prov. 3:5, 6.
Mekim Wok Painimaut
kr 160 par. 14
Laik Tru Long Stap Fri Long Mekim Lotu
14 Olsem Esta na Mordekai long bipo, lain bilong Jehova long nau i laik tru long stap fri long mekim lotu long Jehova olsem lo Em i givim long ol. (Esta 4:13-16) Olsem wanem? Yu tu inap helpim ol? Yes. Yu inap beten oltaim long ol bratasista bilong yu em nau ol i bungim hevi long ol disisen bilong kot. Ol dispela kain beten inap helpim tru ol bratasista bilong yumi husat i bungim ol hevi na hevi bilong pasin birua. (Ritim Jems 5:16.) Yu ting Jehova i save harim ol dispela kain beten? Ol kot yumi winim i soim olsem em i save harim ol dispela beten!—Hib. 13:18, 19.
SEPTEMBA 18-24
GUTPELA SAVE I KAM LONG BAIBEL | ESTA 6-8
“Skul Yumi Kisim Long Pasin Bilong Toktok Gut”
Em i Bihainim Savetingting na Strongim Bel
15 Esta i no les kwik, em i wetim wanpela de moa bilong kamapim askim bilong em long king, dispela i opim rot long Haman long mekim ol samting bilong daunim em yet. Na ating Jehova God yet i mekim na king i no inap slip, laka? (Prov. 21:1) Olsem na yumi no kirap nogut olsem Tok Bilong God i kirapim yumi long kisim pasin bilong “wet i stap”! (Ritim Maika 7:7.) Taim yumi wet long God, bai yumi luksave olsem ol rot em i makim bilong stretim hevi bilong yumi i winim samting yumi yet inap mekim.
Em i Strongim Bel na Tokaut
16 Esta i no laik mekim king i wet longpela taim moa; long namba 2 bikpela kaikai, em i laik tokaut long olgeta samting. Tasol hau bai em i mekim? King i givim rot long Esta, na i askim em gen long kamapim tingting bilong em. (Est. 7:2) Esta i pilim olsem nau em “taim bilong toktok.”
Em i Bihainim Savetingting na Strongim Bel
17 Yumi ken piksaim Esta i beten long tingting long God paslain long em i mekim dispela tok: “King, sapos i orait long yu na yu belgut long mi, orait mi laik bai yu no ken larim laip bilong mi i lus na no ken kilim i dai ol manmeri bilong mi.” (Est. 7:3) Tingim, Esta i kamapim klia long king olsem em bai rispektim wanem wanem disisen king i ting i gutpela long mekim. Man! Pasin bilong Esta i narapela kain tru long pasin bilong Vasti, em meri bilong king long pastaim, em i min long semim tru man bilong em! (Est. 1:10-12) Na tu, Esta i no sutim tok long king olsem em i bin popaia long trastim Haman, nogat. Em i askim king long protektim em long ol man i laik kilim em i dai.
Em i Bihainim Savetingting na Strongim Bel
18 Askim bilong Esta i mekim king i kirap nogut na em i laik save moa. Husat tru i laik kilim i dai kwin bilong em? Esta i tok moa: “Ol i salim mipela, mi na ol manmeri bilong mi, bilong bagarapim na kilim mipela i dai. Sapos ol i salim mipela bilong mekim mipela i kamap ol wokboi na ol wokmeri nating, orait bai mi no mekim wanpela tok. Tasol sapos dispela hevi i kamap, em bai i no helpim king, nogat, em bai putim hevi long king tu.” (Est. 7:4) Yumi inap luksave olsem Esta i tokaut stret long hevi, tasol em i tok sapos ol i laik mekim lain bilong em i kamap wokboi na wokmeri nating, orait em bai no gat tok long dispela. Tasol sapos ol i kilim i dai lain olgeta, dispela bai putim bikpela hevi long king yet na em i no inap stap isi.
19 Eksampel bilong Esta i skulim yumi long pasin bilong mekim tok we i kirapim man long mekim samting. Sapos yu mas autim wanpela bikpela hevi long wanpela yu laikim o man i gat bikpela namba, gutpela samting inap kamap sapos yu no les kwik, soim rispek, na tokaut stret long ol samting.—Prov. 16:21, 23.
Mekim Wok Painimaut
Sampela Bikpela Tok Bilong Buk Esta
7:4—Olsem wanem wok bilong kilim i dai ol Juda bai ‘givim hevi long king’? Esta i tok ol inap salim ol Juda olsem wokboi nating na long dispela rot em i kamapim klia olsem hevi bai painim king sapos ol i kilim i dai ol Juda. Haman i bin tok promis long putim 50 milion kina long haus mani bilong king, tasol sapos Haman i bin salim ol Juda olsem wokboi nating, king bai kisim bikpela mani moa. Na sapos laik bilong Haman long kilim i dai ol Juda i bin kamap, dispela i makim olsem kwin tu i mas i dai.
SEPTEMBA 25–OKTOBA 1
GUTPELA SAVE I KAM LONG BAIBEL | ESTA 9-10
“Em i Yusim Namba Bilong Em Long Helpim Lain Bilong Em”
it-2 432 par. 2
Mordekai
Nau Mordekai i kisim ples bilong Haman olsem praim minista na kisim ring bilong king we i gat mak, ol i save putim ol dispela mak long ol pepa bilong kantri. Esta i givim haus bilong Haman long Mordekai, em haus king i bin givim long em. Bihain Mordekai i kisim tok orait long king na raitim wanpela lo we i givim rait long ol Juda long lukautim ol yet. Long ol Juda dispela em samting we i mekim ol i stap fri na amamas. Planti manmeri i stap long ol kantri em Persia i bosim i joinim lain Juda, na long Adar 13, em de we ol man i mas kirap long bihainim dispela lo i kamap, ol i redi long pait. Olgeta man i holim wok bos i sapotim ol bikos Mordekai i kisim bikpela namba. Long Susan dispela pait i stap i go inap long neks de. Winim 75,000 birua bilong ol Juda i stap long ol kantri em Persia i bosim i bin bagarap, dispela i makim tu 10-pela pikinini man bilong Haman. (Est 8:1–9:18) Esta i tok orait na Mordekai i putim lo long olgeta yia long ol i mas mekim ol bung bilong amamas long 14 na 15 de bilong Adar, em de bilong “bung bilong Purim,” em taim bilong amamas na kaikai na givim presen long narapela narapela na long ol man i sot long ol samting. Ol Juda i wanbel na tokim ol tumbuna pikinini bilong ol na olgeta manmeri i joinim lain bilong ol long ol i mas mekim dispela bung. Modekai i stap namba 2 bilong king, olsem na lain Juda husat i dediket long God i rispektim em na em i wok yet long mekim ol samting bilong helpim ol.—Est 9:19-22, 27-32; 10:2, 3.
it-2 716 par. 5
Purim
Wok bilong en. Sampela man i tok long nau sampela Juda i tingim Bung Bilong Purim olsem wanpela bung tasol we i gat planti kaikai na dring na em i no bung bilong lotu, tasol em i no risen na oI i bin kamapim dispela bung long bipo. Mordekai na Esta i save lotuim God tru em Jehova, na dispela bung i bilong onarim Em. Yumi ken tok long dispela taim Jehova God i kisim bek lain Juda, bikos tok i kamap long pasin bilong Mordekai long lotuim Jehova wanpela tasol. Ating Haman i bilong lain Amalek, em kantri we Jehova i tok em bai bagarapim. Mordekai i bihainim lo bilong God na em i no laik brukim skru long Haman. (Est 3:2, 5; Kis 17:14-16) Na tu, tok Mordekai i mekim long Esta (Est 4:14) i soim olsem em i lukluk long wanpela i gat bikpela strong long kisim bek lain Juda, na taim Esta i laik go lukim king na givim fes askim bilong em, em invatesen bilong kaikai, em i tambu long kaikai paslain long em i go na dispela i soim olsem em i askim God long helpim em.—Est 4:16.
‘Bihainim Pasin Bilong God’ Long Yusim Strong Bilong Yu
12 Jehova i bin givim ol wasman bilong i go pas long lukautim kongrigesen Kristen. (Hibru 13:17) Ol dispela man i winim mak ol i mas mekim wok long namba God i givim ol bilong helpim ol sipsip na mekim ol samting na bai ol sipsip i ken stap gut long spirit. Olsem wanem? Namba bilong ol elda i mekim na ol i ken bosim ol wanbilip? Nogat tru! Ol elda i mas i gat pasin daun na stretpela tingting long wok bilong ol insait long kongrigesen. (1 Peta 5:2, 3) Baibel i tokim ol wasman long lukautim gut “olgeta manmeri bilong sios bilong God, em ol dispela manmeri em i bin baim long blut bilong Pikinini bilong em yet.” (Aposel 20:28) Dispela i kamapim olsem i gat as tru long mekim gutpela pasin sori long olgeta wan wan man insait long kongrigesen.
13 Yumi ken mekim tok piksa long dispela. Wanpela gutpela pren i askim yu long lukautim wanpela samting em i laikim tru. Yu save olsem pren bilong yu i bin baim dispela samting long bikpela mani. Bai yu lukautim gut dispela samting na bai em i no ken bagarap, a? Na olsem tasol, God i bin givim wok long ol elda long lukautim wanpela gutpela samting tru—kongrigesen, em Baibel i tok ol manmeri bilong en i olsem ol sipsip. (Jon 21:16, 17) Jehova i laikim tru ol sipsip bilong em, olsem na em i bin baim ol long blut bilong dispela wanpela Pikinini bilong em, Jisas Krais. Jehova i bin givim nambawan bikpela pe bilong baim ol sipsip bilong em. Ol elda i gat pasin daun ol i tingim dispela na ol i mekim gutpela pasin long ol sipsip bilong Jehova.
Mekim Wok Painimaut
Sampela Bikpela Tok Bilong Buk Esta
9:10, 15, 16—Maski ol Juda inap kisim ol gutpela samting bilong ol birua, bilong wanem ol i no kisim? Pasin bilong ol i kamapim klia olsem ol i laik mekim ol samting bambai ol i no ken bagarap, ol i no tingting long kisim mani kago.
OKTOBA 2-8
GUTPELA SAVE I KAM LONG BAIBEL | JOP 1-3
“Wok Yet Long Soim Olsem Yu Laikim Tru Jehova”
Bihainim Pasin Bilong Noa, Daniel na Jop Long Bilip na Bihainim Tok
16 Ol hevi Jop i bungim. Jop i gat gutpela sindaun tru, tasol bihain em i bungim planti hevi long laip bilong em. Paslain long hevi i painim Jop, “em i gat biknem i winim biknem bilong ol arapela man long ol kantri bilong hap sankamap.” (Jop 1:3) Em i gat planti mani kago na biknem, na ol manmeri i save rispektim em. (Jop 29:7-16) Maski i olsem, Jop i no givim baksait long God na mekim pasin antap, nogat. Jehova i kolim Jop olsem “wokboi bilong mi,” na em i tok moa olsem: “Em i save lotu na aninit long mi, na i save bihainim olgeta tok bilong mi. Em i no save mekim wanpela pasin nogut.”—Jop 1:8.
17 Laip bilong Jop i senis wantu, olgeta mani kago bilong em i lus, na bel hevi i daunim em tru. Satan i giaman na sutim tok long Jop olsem em i lotuim God bikos em i laik kisim ol gutpela samting. (Ritim Jop 1:9, 10.) Jehova i no lusim tingting long dispela tok giaman! Em i larim Jop long soim olsem em bai stap gut long God na lotuim em bikos em i laikim tru God long bel olgeta.
Stap Gut Yet Long God!
10 Satan i sutim wankain tok long yumi olgeta wan wan. Hau na yu tu i insait long dispela tok? Em i tok yu no laikim God Jehova, na yu bai tingim yu yet na givim baksait long em, na yu no givim bel olgeta long stap gut long em! (Jop 2:4, 5; Rev. 12:10) Yu pilim olsem wanem long dispela tok? Ating dispela tok i bagarapim tru bel bilong yu, a? Tasol tingim: Jehova i trastim yu, olsem na em i larim Satan i traim pasin bilong yu long i stap gut long God. Em i save tru olsem yu inap stap gut long Em na soim klia olsem Satan em man bilong giaman. God i tok promis olsem em bai strongim yu. (Hib. 13:6) King bilong heven na graun i trastim yu—dispela em gutpela blesing tru! Ating yu luksave nau olsem em i bikpela samting tru long yumi mas i stap gut long God! Dispela bai daunim ol tok giaman bilong Satan, na sapotim gutnem na stretpela wok bos bilong God. Yumi ken mekim wanem na bai yumi inap stap gut yet long God?
Mekim Wok Painimaut
Skul Yumi Ken Kisim Long Ol Laspela Tok Bilong Jisas
9 Jisas i tok wanem? Paslain tasol long Jisas i dai, em i singaut olsem: “God bilong mi, God bilong mi, bilong wanem yu lusim mi?” (Mat. 27:46) Baibel i no stori long as na Jisas i tok olsem. Tasol yumi inap kisim sampela skul long ol dispela tok em i mekim. Wanpela samting yumi save long en em olsem, taim Jisas i mekim dispela tok em i truim tok profet i stap long Song 22:1. Na tu, ol tok bilong Jisas i soim olsem Jehova i no lukautim gut pikinini bilong em “olsem banis i raunim em.” (Jop 1:10) Jisas i save olsem Papa bilong em i larim ol man i mekim nogut long em bilong traim bilip bilong em inap long em i dai—kain traim olsem i no bin painim wanpela man. Na tu, dispela tok i soim olsem Jisas i no bin mekim wanpela rong we ol i ken kilim em i dai long en.
OKTOBA 9-15
GUTPELA SAVE I KAM LONG BAIBEL | JOP 4-5
“Sakim Ol Giaman Infomesen”
it-1 713 par. 11
Elifas
2. Wanpela bilong tripela pren bilong Jop. (Jop 2:11) Em bilong lain Teman, em i pikinini bilong Iso, olsem na em bilong lain bilong Abraham na em hap famili bilong Jop. Em na lain tumbuna bilong em i save litimapim ol yet bikos long savetingting bilong ol. (Jer 49:7) Namel long dispela 3-pela lain husat i tok ol i laik mekim isi bel bilong Jop, Elifas i winim 2-pela pren bilong em bikos em i gat bikpela krismas winim ol, na tu, em i gat biknem na em inap kirapim ol narapela long bihainim laik bilong em. Em i toktok long dispela 3-pela taim we ol i paitim tok i go i kam, na ol tok bilong em i longpela moa.
Sakim Ol Tingting Kranki!
Elifas i tingim wanpela narakain samting i bin painim em, na em i tok: “Wanpela liklik win i kam na winim pes bilong mi. Na mi pret moa yet na gras long bodi bilong mi i sanap. Mi lukim wanpela samting i sanap, na mi lukluk strong, tasol mi no inap save em i wanem samting. Na tu, mi no harim wanpela nois o pairap. Tasol bihain mi harim wanpela maus i tok.” (Jop 4:15, 16) Wanem kain win o spirit i bin stiaim tingting bilong Elifas? Tok em i mekim bihain long dispela i soim olsem dispela spirit i no wanpela bilong ol stretpela ensel bilong God. (Jop 4:17,18) Em i wanpela spirit nogut. Yumi ken save long dispela, long wanem, Jehova i bin stretim Elifas na tupela pren bilong em long ol i bin tok giaman. (Jop 42:7) Yes, wanpela spirit nogut i stiaim Elifas. Tok bilong em i kamapim olsem em i no gat stretpela tingting.
Sakim Ol Tok Bilong Satan Long Giamanim Yu
Satan i yusim Elifas, em wanpela bilong 3-pela poroman bilong Jop i bin kam lukim em na tok pait long em olsem ol man i no gat strong long sakim Satan. Elifas i tokim Jop olsem “ol man i samting bilong graun tasol,” na “God i bin kisim graun na wokim bodi bilong ol man, na ol i save dai kwiktaim tru olsem ol bataplai man i krungutim. Wanpela man inap i stap gut long moning, na long apinun em inap i dai na ol arapela manmeri i no tingim em moa.”—Jop 4:19, 20.
Sampela narapela ves bilong Baibel i tok yumi i olsem “ol sospen graun”—em ol sospen i save bruk hariap. (2 Ko. 4:7) Yumi no gat strong, long wanem, yumi bin kisim sin long papamama. (Ro. 5:12) Sapos yumi no gat helpim, bai ol spia bilong Satan inap sutim yumi. Tasol yumi ol Kristen i gat helpim i stap. Maski yumi no gat strong, God i laikim tru yumi. (Ais. 43:4) Na Jehova i save givim holi spirit long ol man i askim em. (Lu. 11:13) Spirit bilong em inap givim yumi “bikpela strong . . . em i strong bilong God,” bambai yumi inap karim olgeta kain hevi Satan i givim long yumi. (2 Ko. 4:7; Fl. 4:13) Sapos yumi sakim Satan na “stap strong long bilip,” God bai mekim yumi i sanap strong. (1 Pe. 5:8-10) Olsem na yumi no ken pret long Satan.
Lukautim Yu Yet Long Ol Giaman Infomesen
● Skelim lain i kamapim ol infomesen na ol tok bilong en
Baibel i tok: “Skelim olgeta samting.”—1 Tesalonaika 5:21.
Paslain long bilip o salim wanpela stori, maski planti i save o nius i kamapim planti taim, painimaut sapos em i tru. Hau?
Skelim sapos yu inap trastim lain i kamapim dispela nius. Ol nius kampani na ol narapela oganaisesen inap senisim liklik stori bikos ol i tingim mani o sapotim wanpela lain politik. Skelim nius yu lukim wantaim nius bilong ol narapela niuslain o oganaisesen. Sampela taim, ol pren inap salim ol giaman infomesen long rot bilong e-mail o sosel midia. Olsem na, yu no ken hariap long bilipim wanpela nius, nogat, pastaim yu mas sekim wanem lain i raitim dispela nius.
Painimaut gut olsem ol tok ol i kamapim i tru na em samting i kamap nau tasol. Sekim ol det, ol samting i soim olsem infomesen i tru, na ol evidens bilong sapotim dispela infomesen. Was gut sapos pasin ol i yusim bilong kamapim ol bikpela infomesen i mekim na em i luk olsem liklik samting o sapos ol i kamapim ripot long pasin we bai kirapim man long mekim sampela samting.
Mekim Wok Painimaut
Sanap Strong, na Winim Resis Bilong Kisim Laip
Yumi insait long wanpela oganaisesen i stap long olgeta hap em ol man insait long en ol i lotu tru long God, na dispela samting inap strongim tru yumi. Em i wanpela bikpela blesing tru long stap wantaim dispela lain brata i stap long olgeta hap em narapela i laikim tru narapela! (1 Peta 2:17) Na yumi inap helpim ol wanbilip bilong yumi long stap strong.
Tingim ol samting stretpela man Jop i mekim bilong helpim ol narapela. Elifas i sutim tok long Jop, tasol em i mas tokaut tu olsem: “Taim ol man i gat bikpela hevi na i pundaun pinis, yu bin givim gutpela tok long ol, na tok bilong yu i bin kirapim ol gen. Na yu bin helpim ol na ol i sanap strong.” (Jop 4:4) Olsem wanem? Yumi save helpim ol narapela? Yumi olgeta wan wan i gat wok long helpim ol brata na sista spirit bilong yumi long sanap strong long wok bilong God. Taim yumi stap wantaim ol, yumi ken bihainim dispela tok: “Yupela i mas strongim ol man i no gat strong na strongim tu bel bilong ol man i pret na guria.” (Aisaia 35:3) Olsem na gutpela sapos yu putim mak olsem yu laik strongim wanpela o tupela wanbilip Kristen long olgeta taim yu bung wantaim ol. (Hibru 10:24, 25) Ol gutpela tok amamas na tok tenkyu long ol samting ol i wok long mekim bilong amamasim Jehova inap helpim ol tru long sanap strong bilong winim resis bilong kisim laip.
OKTOBA 16-22
GUTPELA SAVE I KAM LONG BAIBEL | JOP 6-7
“Taim i Hatwok Long Karim Hevi”
Sampela Bikpela Tok Bilong Buk Jop
7:1—Wanem mining bilong dispela tok “pulim i go mekim wok soldia”? Jop i pilim nogut tru, olsem na em i ting sindaun bilong em i hatwok tru, olsem man ol i pulim i go bilong mekim wok soldia.—Jop 10:17.
“Jehova . . . i Save Kisim Bek Ol Manmeri Bel Bilong Ol i Bagarap”
SAMPELA taim yumi inap tingting olsem yumi save stap sotpela taim tasol na laip bilong yumi i “pulap long kain kain hevi.” (Jop 14:1) Na dispela inap daunim tru yumi. Planti wokman na wokmeri bilong Jehova long pastaim ol i bin pilim olsem tu. Sampela bilong ol i askim God long tekewe laip bilong ol. (1 Kin. 19:2-4; Jop 3:1-3, 11; 7:15, 16) Tasol inap planti taim, Jehova em God ol i trastim, em i mekim isi bel bilong ol na strongim ol. Ol stori bilong ol i stap long Baibel bilong mekim isi bel bilong yumi na skulim yumi.—Rom 15:4.
Taim Yu Pilim Olsem Yu No Laik Stap Laip Moa
Maski yu pilim olsem hevi bilong yu i bikpela tru, gutpela yu tingim olsem olgeta man i wok long karim sampela hevi long nau. Baibel i tok: “Yumi save olsem olgeta samting God i wokim, ol i wok long krai na pilim pen wantaim.” (Rom 8:22) Ating long nau yu pilim olsem ol hevi bilong yu i no inap pinis, tasol planti taim ol samting bai kamap orait long bihain. Tasol long nau, wanem samting inap helpim yu?
Kamapim tingting bilong yu long wanpela pren i gat gutpela tingting na yu trastim em. Baibel i tok: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.” (Sindaun 17:17) Stretpela man Jop em Baibel i stori long em, i kamapim tingting bilong em long ol narapela taim bikpela hevi tru i bin painim em. Taim Jop i pilim olsem em i “les pinis long i stap laip,” em i tok: “Mi mas tokaut long dispela bikpela hevi bilong mi.” (Jop 10:1) Taim yu kamapim tingting bilong yu long narapela, dispela inap daunim bel hevi bilong yu, na senisim tingting yu gat long ol hevi yu karim.
Autim olgeta hevi bilong yu long God. Sampela i ting olsem prea em i wanpela samting bilong mekim gut bel bilong man long taim bilong hevi na em tasol. Tasol Baibel i no tok olsem. Song 65:2 i tok, God Jehova i “save harim beten” bilong yumi, na 1 Peta 5:7 i tok: “God i save wari long yupela.” Planti taim Baibel i tok em i bikpela samting long bilip olsem God bai helpim yumi. Olsem:
“Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”—SINDAUN 3:5, 6.
“ Wanem ol manmeri i save pret long [God], em i save givim ol samting long ol. Na em i save harim krai bilong ol na kisim bek ol.”—SONG 145:19
“Bilip yumi gat long em i olsem, maski wanem wanem samting yumi askim em long en na i stret wantaim laik bilong em, em bai harim yumi.”—1 JON 5:14.
“Bikpela i save stap longwe long ol man i save mekim pasin nogut. Tasol em i putim yau long beten bilong ol stretpela man.”—SINDAUN 15:29.
Sapos yu tokim God long ol hevi yu karim, em bai helpim yu. Olsem na i gat as na Baibel i kirapim yu long ‘bilip oltaim long God. Na autim olgeta hevi na olgeta tingting bilong yu long em.’—Song 62:8.
Mekim Wok Painimaut
Putim Yau, Kliagut, na Soim Pasin Sori
10 Yumi inap bihainim pasin bilong Jehova taim yumi kliagut long tingting na filings bilong ol wanbilip. Save gut moa long ol bratasista. Toktok wantaim ol paslain long miting i kirap na bihain long miting i pinis, autim tok wantaim ol, na sapos inap, invaitim ol long kaikai wantaim yu. Taim yu mekim olsem, yu inap luksave olsem sista yu tingim olsem meri bilong pes drai, tru tru em i save pilim sem. O brata yu tingim olsem man bilong bungim mani kago, tru tru em i gat pasin helpim. O famili i save kam leit oltaim long miting, ol i karim hevi long han bilong ol wanfamili. (Jop 6:29) Em tru olsem yumi no ken ‘subim nus long ol samting ol arapela i mekim.’ (1 Tim. 5:13) Tasol i gutpela long save long sampela samting long laip bilong ol wanbilip na bai yumi inap kliagut long tingting na pasin bilong ol.
OKTOBA 23-29
GUTPELA SAVE I KAM LONG BAIBEL | JOP 8-10
“Gutpela Pasin Laikim Bilong God i Banisim Yumi Long Ol Tok Giaman Bilong Satan”
Yu Ting Yumi Inap Mekim God i Amamas?
Jop i bin karim planti hevi, olsem na em i ting God i no tingim gutpela pasin bilong em long bilip na stap gut long Em. (Jop 9:20-22) Jop i bilip olsem em i bihainim stretpela pasin na em i nogat rong, olsem na ol pren bilong Jop i ting em i tokaut olsem em i mekim stretpela pasin na pasin bilong God i no stret.—Jop 32:1, 2; 35:1, 2.
Gutpela Pasin Laikim Bilong Jehova i Mekim Wanem Long Yu?
14 Gutpela pasin laikim bilong God i save lukautim yumi long sait bilong bilip. Devit i beten long Jehova, na em i tok: “Yu ples hait bilong mi; yu bai lukautim mi na ol pen na hevi i no ken daunim mi. Yu raunim mi long singaut bilong amamas long yu kisim bek mi. . . . Man i trastim Jehova, gutpela pasin laikim bilong em bai lukautim em.” (Sng. 32:7, 10) Long taim bilong ol man i raitim Baibel, i gat ol strongpela banis i raunim ol siti na i lukautim ol manmeri long ol birua bilong ol. Olsem tasol, gutpela pasin laikim bilong Jehova i olsem wanpela strongpela banis i lukautim yumi long ol samting we inap bagarapim pasin pren bilong yumi wantaim Em. Gutpela pasin laikim bilong Jehova i kirapim yumi long go klostu long em.—Jer. 31:3.
Mekim Wok Painimaut
“Husat i Save Long Tingting Bilong Bikpela?”
19 Yumi bin kisim wanem skul long “tingting bilong [“Jehova,” NW]”? Yumi mas larim Tok Bilong God i givim stretpela save long yumi long tingting bilong Jehova. Yumi no ken tru kirapim Jehova long bihainim tingting bilong yumi long mekim ol samting, na yumi no ken skelim em long ol lo yumi yet i putim. Jop i tok: “Sapos God em i man tasol, orait mitupela inap i go long kot na stretim tok bilong mitupela.” (Jop 9:32) Olsem Jop, taim yumi kirap long kliagut long tingting bilong Jehova, bel bilong yumi tu bai kirapim yumi long tok: “Olgeta samting God i mekim ol i kamap, na yumi save lukim na pilim long en, em i soim yumi liklik hap tasol bilong bikpela strong bilong God. Na dispela i winim save bilong yumi. Olsem na sapos God i kamapim olgeta strong bilong en long yumi, bai yumi no inap tru long mekim wanpela tok. Nogat tru.”—Jop 26:14.
20 Taim yumi ritim Baibel, yumi mas mekim wanem sapos yumi hatwok long kliagut long sampela tok bilong en, na moa yet sapos ves i toktok long tingting bilong Jehova? Sapos yumi bin mekim wok painimaut long dispela, tasol yumi no kisim gutpela bekim, orait yumi ken ting olsem dispela i traim pasin bilong yumi long trastim Jehova. Tingim, long sampela taim sampela tok i givim rot long yumi long kamapim bilip bilong yumi long ol pasin bilong Jehova. Long pasin daun yumi mas tokaut olsem yumi no inap kliagut long olgeta samting em i save mekim. (Sav. 11:5) Olsem na yumi bai wanbel long tok aposel Pol i mekim, olsem: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en. Yumi no inap tru long bihainim olgeta rot bilong en. Olsem tok i stap long buk bilong God, ‘Husat i save pinis long tingting bilong Bikpela? Husat i bin givim tingting long em?’ Na ‘husat i bin givim samting long God pastaim na bai God i mas bekim samting long em?’ Nogat tru. God yet i mekim kamap olgeta samting, na em i as bilong olgeta samting. Na olgeta samting i bilong em wanpela tasol. Yumi mas litimapim nem bilong em oltaim oltaim. I tru.”—Ro. 11:33-36.
OKTOBA 30–NOVEMBA 5
GUTPELA SAVE I KAM LONG BAIBEL | JOP 11-12
“Tripela Rot Bilong Kisim Savetingting na Dispela Bai Helpim Yu”
Jop i Litimapim Nem Bilong Jehova
17 Wanem samting i bin helpim Jop long stap gut long God? Paslain long ol hevi i painim Jop, em i bin kisim pasin bilong pas gut wantaim Jehova. Maski i luk olsem Jop i no save olsem Satan i bin sutim tok long Jehova, Jop i strong long stap gut long God. Em i tok: “I go inap long taim mi dai mi no ken lusim pasin bilong mi long stap gut long God!” (Jop 27:5, NW) Jop i mekim wanem bilong kisim dispela pasin bilong pas gut wantaim God? Ating em i bin tingim gut ol tok em i harim long ol samting God i bin mekim long Abraham, Aisak, na Jekop, em ol wanblut bilong em. Na long rot bilong lukluk long ol samting God i bin wokim, em inap save long planti pasin bilong Jehova.—Ritim Jop 12:7-9, 13, 16.
Oltaim Jehova i Stap Wantaim Yumi
10 Kamap gutpela pren bilong ol wanbilip Kristen. Kisim ol pren insait long kongrigesen em yu inap lain long ol, maski krismas o bekgraun bilong yupela i no wankain. Baibel i tokim yumi olsem “ol lapun i gat savetingting.” (Jop 12:12) Na ol lapun inap kisim skul tu long ol yangpela insait long kongrigesen. Devit em i yangpela moa long Jonatan, tasol dispela i no pasim tupela long kamap gutpela pren. (1 Sml. 18:1) Devit na Jonatan i helpim narapela narapela long lotuim Jehova maski ol i karim ol bikpela hevi. (1 Sml. 23:16-18) Wanpela sista nem bilong em Irina, em wanpela tasol long famili i Witnes, em i tok: “Ol bratasista inap kamap olsem papa na mama bilong yumi na ol brata na sista bilong yumi long sait bilong bilip. Jehova inap yusim ol long helpim yumi.”
11 Sapos yu gat pasin bilong sem, em bai hatwok long yu kisim ol nupela pren. Ratna em wanpela sista husat i gat pasin bilong sem na em i kisim save long tok i tru maski ol narapela i birua long em. Em i tok: “Mi luksave olsem mi nidim helpim bilong ol bratasista bilong mi insait long kongrigesen.” Yu inap pilim hatwok long kamapim bel na tingting bilong yu long ol narapela, tasol taim yu mekim olsem yu inap kamap gutpela pren bilong ol. Ol pren bilong yu i laik strongim yu na sapotim yu, tasol bilong ol i ken mekim olsem yu, yet i mas tokim ol long ol samting yu nidim helpim long en.
12 Wanpela gutpela rot bilong kisim ol gutpela pren em long autim tok wantaim ol wanbilip Kristen. Carol, em yumi stori pinis long em, em i tok: “Mi kisim planti gutpela pren taim mi spendim taim wantaim ol sista long wok autim tok na mekim ol narapela wok lotu. Insait long ol yia i go pinis Jehova i helpim mi long rot bilong ol dispela pren.” Yu inap kisim helpim taim yu kamap pren bilong ol wanbilip Kristen. Jehova i save yusim kain ol gutpela pren long daunim ol bel hevi bilong yu, olsem bel hevi bilong stap wanpis.—Prov. 17:17.
it-2 1190 par. 2
Savetingting
Savetingting bilong God. Savetingting i kam long Jehova God i gutpela tru bikos em “wanpela tasol i gat savetingting.” (Ro 16:27; Re 7:12) Save i poroman wantaim tok tru, na bikos Jehova em Krieta, na em i stap “oltaim oltaim” (Sg 90:1, 2), em i save long olgeta samting long yunives, hau ol i kamap na ol samting i stap long en, kirap long taim ol i kamap i kam inap long nau. Ol lo i bosim ol samting, ol saikol, na ol samting ol man i yusim long mekim wok painimaut na wokim ol samting—na sapos i no gat ol dispela samting ol bai no inap kamapim wanpela samting—em ol samting Em i wokim. (Jop 38:34-38; Sg 104:24; Pr 3:19; Jer 10:12, 13) I klia tru olsem ol stretpela lo bilong God i bikpela samting long mekim ol gutpela disisen na man inap stap gut. (Lo 32:4-6.) I no gat wanpela samting i winim save bilong em. (Ai 40:13, 14) Maski em i larim ol samting i kamap we i no stret wantaim ol stretpela lo bilong em na ol i kamap gut insait long sotpela haptaim, em yet bai kamapim ol samting we bai kamap bihain, na ol samting em i tok long kamapim ‘bai kamap tru.’—Ai 55:8-11; 46:9-11.
Mekim Wok Painimaut
Toktok Gut Wantaim Ol Tineja
▪ ‘Mi luksave long tingting tru bilong em?’ Jop 12:11 i tok: “Maus bilong yumi i save traim kaikai bilong painimaut kaikai i gutpela o i nogut. Olsem tasol yau bilong yumi i save harim ol toktok na yumi save skelim gut dispela tok.” Nau em i bikpela samting moa yet long yu mas “skelim gut” ol tok em pikinini i kamapim. Planti taim toktok bilong ol tineja inap givim tingting olsem samting ol i tok long en em i tru long olgeta taim. Olsem: Pikinini inap tok, “Oltaim yu save mekim pasin long mi olsem mi liklik mangi!” o “I no gat wanpela taim yu putim yau long tok bilong mi!” Yu no ken tingting tumas long ol dispela hap tok olsem “oltaim” na “i no gat wanpela taim.” Mobeta yu luksave olsem pikinini i toktok nating na em i no tingim mining tru bilong ol dispela tok. Olsem: Dispela hap tok, “Oltaim yu save mekim pasin long mi olsem mi liklik mangi” inap makim olsem, “Mi pilim olsem yu no trastim mi.” Na dispela hap tok, “I no gat wanpela taim yu putim yau long tok bilong mi” inap makim olsem, “Mi laik tokim yu long tingting tru bilong mi.” Traim long luksave long tingting tru i stap long bel bilong pikinini.