Win Tru Long Sakim Satan na Ol Wok Bilong Em
“Yupela i mas daunim yupela yet na i stap aninit long God. Yupela i mas sakim Satan, na em bai i lusim yupela na ranawe.”—JEMS 4:7.
1. Man nogut Satan i bosim dispela graun na em i mekim wanem long ol man long nau?
JOP i tok stret olsem: “God i bin larim ol man bilong mekim pasin nogut i bosim dispela graun.” (Jop 9:24) Na long nau planti hevi nogut tru i kamap, winim olgeta taim bipo. Wanem as bilong dispela? Nau em i “taim bilong las de” bilong Satan na ol spirit nogut long bosim dispela graun. Satan i mekim na ‘pasin bilong ol man nogut na ol man bilong giaman i kamap nogut tru; ol i giamanim ol manmeri, na Satan i giamanim ol yet tu.’ (2 Timoti 3:1, 13) Na pasin birua, pasin i no stret, givim pen long man, pasin raskol, ol man i stap rabis, bikpela sik, hevi bilong go lapun, bel hevi—ol dispela samting na planti narapela samting tu inap putim hevi long yumi.
2. Yumi ken mekim wanem bilong sakim Satan?
2 Bikpela birua Satan em i pait strong long ol man, na em i pait strong moa long ol manmeri i lotu tru long God. Olgeta man em i ting ol inap sanap strong, em i laik pundaunim ol na bai ol i lusim God, na bai ol i bagarap wantaim em na ol narapela ensel nogut. Tasol i gat tok promis olsem: Sapos yumi sanap strong bai Satan i lusim yumi na ranawe. Olsem Jisas, ol hevi na traim inap ‘skulim yumi long bihainim tok bilong God,’ na long marimari bilong God bai yumi inap kisim laip i stap oltaim.—Hibru 5:7, 8; Jems 4:7; 1 Pita 5:8-10.
3, 4. (a) Wanem ol hevi bilong skin i bin painim Pol? (b) Pol em i wanpela elda Kristen na em i tingting tru long mekim wanem?
3 Kain kain hevi na traim i bin painim aposel Pol tu. Em i kolim ol samting i makim olsem em i wanpela wokman bilong Krais, na em i tok: “Mi winim ol long mekim wok bilong Krais. Mi winim ol tru long hatwok mi bin mekim. Planti taim ol man i bin putim mi long kalabus na ol i paitim mi . . . Planti taim klostu mi dai. Ol Juda i bin paitim mi 39 taim long wip, na dispela samting i kamap long mi inap 5-pela taim olgeta. Tripela taim mi kisim kanda. Wanpela taim ol i tromoi ston long mi. Tripela taim sip mi stap long en, em i bagarap, na wanpela nait na wanpela san mi trip i stap long solwara. Planti taim mi wokabaut i go long ol longwe ples, na mi laik lus long wara, na mi laik bagarap long han bilong ol stilman . . . Ol wantok bilong mi yet ol i laik bagarapim mi, na ol man bilong ol arapela lain tu ol i laik bagarapim mi. Klostu mi laik bagarap long taim mi stap long ol taun, na long taim mi stap long graun i no gat man. Klostu mi laik lus long solwara. Na klostu mi laik bagarap long han bilong ol giaman brata. Mi bin mekim ol kain kain wok i hat tru. Planti taim mi wok nait na mi no slip. Mi stap hangre, na mi dai long wara. . . . Planti taim kol i bagarapim mi na mi no gat saket samting bilong karamapim skin bilong mi.
4 “Na mi inap tok long planti arapela hevi tu i bin kamap long mi. Na tu, long olgeta de mi save tingting planti long pasin bilong lukautim gut olgeta [kongrigesen], na dispela i putim bikpela hevi tru long mi. Sapos strong bilong wanpela Kristen i pinis, orait mi pilim olsem strong bilong mi tu i pinis. Na sapos samting i kamap na i mekim wanpela Kristen i pundaun long sin, orait mi save kros tru long dispela samting.” (2 Korin 11:23-29) Olsem na Pol i sanap strong na karim ol hevi i painim em long skin, na em i tingting tru long strongim ol brata sista i no strong na bai ol inap holimpas bilip. Em gutpela pasin ol elda Kristen long nau i ken bihainim!
Ol i Sanap Strong Maski Ol Man i Mekim Nogut Long Ol
5 Satan i mekim wanem bilong pundaunim ol man i strong long holimpas bilip? Wanpela samting em olsem het-tok i kolim: Em i save mekim nogut long ol. Tasol yumi inap sanap strong. Efesus 6:10, 11 i tok: “Yupela i mas tingting long olgeta bikpela strong bilong [Bikpela], na yupela i mas sanap strong. Yupela i mas pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim.”
6. Olsem wanem yumi save ol Witnes Bilong Jehova i “win tru”?
6 Nau long taim bilong las de, planti hevi na traim olsem i bin painim ol Witnes Bilong Jehova. Tasol ol inap mekim tok wankain olsem Pol: “Krais i bin givim bel bilong en long yumi, na maski wanem kain samting i kamap long yumi, oltaim em i save mekim yumi i win tru.” (Rom 8:37) Ol Witnes Bilong Jehova i “win tru”—ol i bin sanap strong namel long yia 1933 na 1945 taim ol Natsi i putim ol long ol banis kalabus nogut long Jemani, na Ostria, na Polan, na Yugoslavia; na ol i bin sanap strong aninit long gavman Komyunis long Isten Yurop namel long yia 1945 na 1989; na long nau tu ol i sanap strong long taim ol man i mekim nogut long ol long sampela hap bilong Afrika na Latin-Amerika.
7. Wanem ol stori i kam long Itiopia na i stori long ol brata i bin sanap strong na holimpas bilip?
7 Ol Witnes Bilong Jehova long Itiopia i bin sanap strong maski ol man i mekim nogut tru long ol namel long yia 1974 na 1991. Wanpela man i gat tingting politik em i bin holim ol brata na em i tokim wanpela brata i stap kalabus: “Sapos mipela i larim yupela i lusim kalabus, dispela bai bagarapim mipela tru; tasol sapos mipela i larim ol laion i lusim banis bilong ol animal, dispela i no ken bagarapim mipela olsem!” Ol dispela hatpela man i mekim nogut tru long ol wokboi bilong Jehova na givim bikpela pen long ol, na sampela yia bihain kot bilong apil i tok ol man i mas kilim ol i dai. Ol i putim bodi bilong wanpela brata long ples bung bilong pretim ol man na bai ol i no ken lotuim Jehova. Sampela brata i apil long tok bilong kot long ol i mas i dai na narapela kot i gutpela liklik i orait long ol i lusim kalabus. Ol i sanap strong na ol i “win tru.” Ol i stap long “God i Skulim Yumi” Kibung Distrik long biktaun Adis Ababa long kirap bilong yia 1994 na mekim sampela tok.a—Jon 16:33; skelim wantaim 1 Korin 4:9.
8. Satan i laik mekim wanem long rot bilong “pinisim wanpela lain olgeta”?
8 Wok bilong Satan i lus nating—em i no pundaunim ol dispela brata sista—ol i sanap strong. Orait, em i mekim wanem ol pasin hait bilong bagarapim yumi? Kamapim Tok Hait 12:12 i stori long taim bilong las de long nau na i tok: “Bikpela hevi i laik kamap long [graun na solwara]. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” Ol pasin nogut em i mekim long lain bilong Jehova i no pinisim ol, olsem na nau em i belhat na wok long pinisim sampela lain olgeta bambai em i ken pinisim ol wokboi bilong Jehova tu wantaim. Dispela pasin bilong pinisim wanpela lain olgeta em i kamap pinis long hap bipo yumi kolim Yugoslavia, na long Laibiria, na Barundi, na Ruanda.
9. Olsem wanem na planti samting Satan i mekim i lus nating? Stori long sampela taim wok bilong em i lus nating.
9 Tasol planti samting Satan i mekim i popaia na nogutim em yet—ol man i gat gutpela bel ol i lukim wok nogut bilong em na nau ol i save, Kingdom bilong God tasol inap helpim ol, em ol Witnes Bilong Jehova i wok strong long autim tok bilong en. (Matyu 12:21) Tru tumas, planti manmeri i laik harim tok i tru ol i wok long kam aninit long Kingdom! Olsem: Long Bosnia na Hetsagovina i gat bikpela pait, tasol long taim bilong Memorial, long Mas 26, 1994, inap 1,307 i bung bilong tingim i dai bilong Jisas; em bikpela lain, winim bilong 1993 inap 291 manmeri. Bikpela lain i bung long Sarayevo (414), na Senisa (223), na Tusla (339), na Banya Luka (255), na ol narapela taun tu. Long Kroesia, em kantri i stap klostu, 8,326 ol i bung; em bikpela lain tru, winim olgeta taim bipo. Maski ol narapela man i pait, ol Witnes bilong Jehova long ol dispela kantri i no larim dispela samting i pasim ol—ol i bihainim tok na “tokaut long pen na i dai bilong Bikpela, inap long taim em i kam bek.”—1 Korin 11:26.
Long Ruanda, em Kantri i Gat Pait
10 Long yia 1993, i gat 2,080 manmeri i autim tok bilong Kingdom long Ruanda, tasol i gat 4,075 ol i go long “God i Skulim Yumi” Kibung Distrik, na 230 i kisim baptais. Long dispela taim stret, 142 nupela baptais i raitim pepa bilong mekim wok painia haptaim. Long 1994 ol brata i mekim planti Baibel-stadi moa—7,655. Satan i no amamas long dispela! Maski planti manmeri long Ruanda i tok ol i Kristen, narapela lain bilong kantri i kirap long kilim i dai narapela lain. Nius bilong Vatiken (L’Osservatore Romano) i tok: “Dispela em i pasin bilong pinisim wanpela lain olgeta, na sori tumas, planti Katolik i mekim dispela pasin.” Ol i kilim i dai inap 500,000 man meri pikinini, na 2 milion samting ol i no gat haus o ol i mas ranawe i go long narapela kantri. Ol Witnes Bilong Jehova ol i holimpas pasin Kristen na ol i no insait long pait. Ol i bin wok strong long stap wantaim. Ol man i bin kilim i dai planti handet brata sista bilong yumi. Kirap long Ogas 1994, long wanpela kongrigesen i gat 65 pablisa, 13 i bin dai, tasol namba bilong ol man i kam long ol miting i go antap olsem 170. Taim ol manmeri bilong ol narapela kantri i kirap long salim kaikai samting bilong helpim ol ranaweman, ol samting ol Witnes i salim i kamap pastaim. Yumi beten askim God long helpim ol brata sista i stap yet.—Rom 12:12; 2 Tesalonaika 3:1, 2; Hibru 10:23-25.
10, 11. (a) Wanem samting i bin kamap long Ruanda em ol i tok em i kantri Kristen? (b) Ol gutpela misineri i tok wanem?
11 Namel long ol dispela pasin nogut tripela misineri i bin stap long Ruanda ol i abrusim bagarap. Ol i tok: “Mipela i save kain hevi olsem o hevi nogut moa yet i save painim ol brata bilong yumi long olgeta hap, na mipela i save em hap bilong mak bilong las taim bilong dispela taim nogut. Tasol taim kain hevi olsem i painim yu yet, yu pilim tru samting i save kamap na yu save, laip em i gutpela samting. Nau mipela i pilim moa yet tok bilong sampela ves long Baibel, na mipela i wetim taim bilong ‘ol man bai i no inap tingim moa ol samting i bin kamap bipo.’ Mipela i laik wok strong yet long wok bilong Jehova.”
Ol Yangpela i Sanap Strong
12 Jisas i makim olsem ol man i bihainim tok i tru na famili bilong ol i sakim ol, ol bai “kisim 100 moa.” (Mak 10:29, 30) Dispela samting i bin painim Entellia, em yangpela meri long noten Afrika i gat 10-pela krismas. Kirap long namba wan taim em i harim nem bilong God—Jehova—em i laikim tru. Em i stadi wantaim ol Witnes Bilong Jehova na wokabaut inap 90 minit bilong i go long miting na 90 minit bilong go bek long haus. Em i mekim olsem, maski famili i birua long em na planti taim ol i lokim dua na taim em i kam bek em i no inap i go insait long haus. Taim em i gat 13 krismas em i kirap long go long ol haus na autim tok, na famili i birua moa yet long em. Wanpela taim, sampela famili bilong em i pasim han lek bilong em na putim em i stap long bikpela san inap 7-pela aua, na wan wan taim ol i kapsaitim wara i doti long em. Ol i paitim em nogut tru na bagarapim wanpela ai bilong em, na bihain ol i rausim em long haus. Tasol em i kisim wok long haus sik na bihain em i kamap nes. Taim em i gat 20 krismas em i kisim baptais na kirap stret long mekim wok painia haptaim. Em i sanap strong na bihain famili bilong em i pilim dispela pasin bilong em na ol i amamas long em i kam bek, na 9-pela ol i kirap long stadi long Baibel.
12, 13. (a) Wanpela yangpela i mekim wanem na em i sanap strong na holimpas bilip? (b) Wanem samting inap strongim ol yangpela long lain bilong yumi long nau?
13 Tok bilong Song 116 i strongim Entellia; em i save kaunim kaunim Song ves 1 i go 4: “Bikpela i save harim singaut bilong mi. Olsem na mi laikim em tumas. Tru tumas, em i save harim beten bilong mi. Em i save harim olgeta singaut bilong mi. Olsem na olgeta taim mi stap laip bai mi beten long em. Dai i olsem rop i pasim mi. Mi tingting long ples bilong ol man i dai pinis, na dispela i mekim mi i pret nogut tru na mi wari moa yet. Olsem na mi singaut long Bikpela na mi tok olsem, ‘Bikpela, mi singaut bai yu kisim bek mi, nogut mi dai.’ ” Jehova i save harim kain beten olsem!
14. Ol Witnes long Polan i bin karim wanem bikpela hevi na sanap strong?
14 Olsem long taim bilong Jisas, planti taim Satan i kirapim sampela lain i strong tumas long lotu na ol i mekim pasin birua, tasol wok bilong Satan i lus nating. Dispela hevi i bin painim ol brata long Polan, tasol ol i sanap strong na holimpas bilip. (Lukim yiabuk bilong ol Witnes Bilong Jehova bilong 1994, tok Inglis.) Traim i bin painim ol yangpela Witnes tu. Long yia 1946 ol birua i tokim wanpela yangpela meri i gat 15 krismas, ‘Mekim mak Katolik bilong kruse. Sapos nogat, bai mipela kilim yu i dai!’ Em i sanap strong, olsem na ol i pulim em i go long bikbus, na givim pen nogut tru long em, na sutim em long gan na kilim em i dai.—Skelim wantaim Matyu 4:9, 10.
Sampela Trik Moa Bilong Satan
15 As tingting nogut bilong Satan i olsem: Bosim o bagarapim! Sapos em i no inap bosim olgeta man, em i laik bagarapim ol. Em i save mekim wok long planti samting nogut. Olsem na aposel Pol i toksave olsem: “Yumi no save pait long ol manmeri. Nogat. Yumi pait long ol strongpela spirit na ol gavman na ol kain kain samting i gat strong, ol i save bosim graun long dispela taim bilong tudak. Yumi pait long olgeta spirit nogut i stap antap. Olsem na yupela i mas kisim olgeta klos pait God i save givim yupela, na long taim nogut yupela bai inap sanap strong long pait. Na long taim pait i pinis, yupela bai i sanap strong i stap yet.” (Efesus 6:12, 13) Pasin bilong laikim tumas mani kago, amamas nogut na tok bilong grisim yumi, kain musik Satan i as bilong en, laik long i stap wankain olsem ol wanskul, mekim nabaut long ol drak, spak—ol dispela pasin inap bagarapim yumi. Olsem na aposel i tok moa olsem: “Yupela i mas kisim tu pasin bilong bilip, na holim strong olsem hap plang, bai yupela inap long mekim i dai olgeta spia paia dispela man nogut Satan i save sutim i kam long yupela.”—Efesus 6:16.
15, 16. (a) Wanem as tingting nogut bilong Satan? Olsem wanem yumi ken sanap strong na sakim em? (b) I gat wanem samting bilong helpim ol yangpela long lain bilong yumi na ol i no ken pundaun?
16 Long nau yumi mas holim strong moa yet pasin bilong bilip, long wanem, Satan i kamapim ol narapela kain musik na i pulap long graun. Sampela musik i olsem samting tru bilong pasin bilong lotu long Satan. Wanpela ripot bilong namba wan ofis bilong polis long Distrik San Diego (Amerika) i tok: “Ol i bung hia bilong wokim musik na ben i kirapim 15,000 yangpela long kolim kolim tok ‘Natas’—em olsem tok Satan, tasol ol i kolim laspela leta pastaim na i kam.” Sampela man i tok, pasin bilong lotu long Satan i olsem hul em sampela yangpela i pundaun insait long en, long wanem, “ol i paul nabaut na bel kros na no gat helpim.” Tasol yupela ol yangpela long lain Kristen tru i no ken pundaun olsem! Jehova i givim ol klos pait long yupela na yupela inap sakim spia bilong Satan em i sutim i kam long yupela.—Song 16:8, 9.
17. Wanem samting inap helpim yumi long daunim bikpela bel hevi?
17 Satan i wokim ol spia paia bilong em bilong bagarapim bel bilong yumi. Long rot bilong ol hevi i painim yumi, olsem sik bilong skin o bel hevi, birua bilong yumi inap mekim na bai sampela i pilim olsem ol i samting nating tasol na ol i no inap mekim wanpela gutpela wok. Ating ol i no inap lusim planti aua long mekim wok bilong God olsem bipo, o ol i lusim sampela miting na ol i bel hevi long dispela. Taim bel bilong ol i stap nogut olsem, gutpela pasin sori bilong ol elda na ol narapela long kongrigesen inap mekim gut bel bilong ol. Ol i no ken lusim tingting olsem Jehova i save laikim tru ol gutpela wokboi bilong em. (1 Jon 4:16, 19) Song 55:22 i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.”
18. Wanem sampela “trik” bilong Satan i givim hevi long sampela?
18 Long dispela taim narapela kain “trik na giaman” bilong Satan i kamap. Long sampela kantri planti manmeri i bikpela pinis ol i kisim tingting olsem taim ol i liklik yet sampela lain bilong lotuim Satan ol i bin mekim pasin sem nogut tru long ol. Wanem as bilong dispela kain tingting? Ol saveman bilong graun i skelim na ol i no wanbel. Sampela i ting, ol dispela manmeri i tingim samting i bin kamap tru, tasol sampela i ting ol i tingting nabaut tasol, o wanpela man olsem dokta i tok em inap stretim tingting em i bin givim dispela tingting long ol. Na sampela i ting, em wanpela kain tingting giaman i kamap, olsem tingting i paul nabaut, long wanem, wanpela samting i bin mekim ol i pret taim ol i liklik yet.
19. (a) Wanem kain tingting i givim hevi long Jop? (b) Ol elda i ken mekim wanem kain pasin olsem Elihu i bin mekim?
19 “Kain kain tingting” i bin kamap long Jop na mekim em i pret na tingting planti. Satan i givim ol dispela tingting long em long rot bilong Elifas na Sofar. (Jop 4:13-18; 20:2, 3) Olsem na Jop i “bel hevi” na em i “mekim planti toktok nabaut” long ol dispela tingting i “pretim” em. (Jop 6:2-4; 30:15, 16) Elihu i laik tru long helpim Jop, olsem na em i stap isi na harim ol tok Jop i mekim, na em i helpim Jop long kisim gutpela tingting bilong Jehova long ol samting. Olsem tasol long nau, ol elda i save sori long ol manmeri i gat kain hevi olsem, na ol i no save putim sampela “hevi” moa long ol. Ol i save mekim pasin olsem Elihu—ol i stap isi na putim yau na givim gutpela tok bilong Baibel long ol, olsem ol i putim wel long skin bilong ol. (Jop 33:1-3, 7; Jems 5:13-15) Olsem na sapos bel bilong wanpela i bagarap, long wanem, em i tingting planti long samting nogut i bin kamap tru long em o em i ting dispela i bin kamap, o em i pret olsem Jop long “olkain driman” samting em i lukim, orait insait long kongrigesen em inap kisim save long sampela tok bilong Baibel bilong mekim isi bel bilong em.—Jop 7:14; Jems 4:7.
20. Ol Kristen i gat hevi, olsem wanem yumi ken helpim ol long i stap strong long spirit?
20 Long dispela taim Kristen i ken save tru, Satan i as bilong ol dispela kain tingting i pretim man. Sapos dispela kain tingting i givim hevi long sampela long kongrigesen ol i mas save, Satan i wok long pundaunim ol na bai ol i no strong moa long spirit. Yumi mas isi long ol na wok long helpim ol long ol tok bilong Baibel. Na ol yet i mas beten na larim ol wasman bilong kongrigesen i helpim ol, na bai ol inap kisim dispela bikpela strong em i strong bilong God. (Aisaia 32:2; 2 Korin 4:7, 8) Long dispela rot bai ol inap sanap strong, na ol tingting nogut i wok long kamap long ol, ol i no ken larim dispela i bagarapim bel isi bilong kongrigesen. (Jems 3:17, 18) Tru tumas, bai ol inap sakim Satan; bai ol inap mekim pasin wankain olsem Jisas, em i tokim Satan: “Yu klia!”—Matyu 4:10; Jems 4:7.
21 Yumi save Satan i laik paulim tingting bilong yumi, olsem aposel Pol i tok long 2 Korin 11:3: “Mi ting long dispela snek i save tumas long pasin bilong giaman, na bipo tru em i bin giamanim Iv, na mi pret, nogut wankain samting i kamap long yupela. Nogut tingting bilong yupela i paul, na yupela i lusim pasin bilong i stap klin na tingting long Krais tasol.” Long nau ol man i stap longwe long God na ol i mekim ol pasin nogut tasol, olsem ol “traipela man” i hap spirit na hap man long taim bilong Noa, em ol i man nogut bilong pait na ol i kirapim ol narapela long mekim kain pasin olsem. (Stat 6:4, 12, 13; Luk 17:26) Olsem na yumi no kirap nogut long Satan i mekim ol pasin bilong trik na giaman bilong kamapim belhat bilong em, na em i mekim moa yet long lain bilong God.—1 Pita 5:8; KTH 12:17.
22. Taim Satan i no inap putim hevi moa long yumi, bai yumi inap kisim wanem ol blesing?
22 Long ol laspela sapta bilong buk Jop, i no gat liklik tok long Satan. Jop i sanap strong na dispela i daunim pinis tok nogut bilong Satan, em i tok ol man i no inap i stap gut long God. Olsem tasol ‘bikpela lain’ i sanap strong na holimpas bilip na klostu nau bai ol i winim ‘taim bilong bikpela hevi,’ na bai Satan i kalabus long hul i no gat as. Ol manmeri bilong bipo, olsem Jop, em ol i bilip na stap gut long God, bai ol i insait long dispela lain na kisim ol blesing bilong Paradais, i winim tru ol blesing bilong Jop!—KTH 7:9-17; 20:1-3, 11-13; Jop 14:13.
[Ol Futnot]
a Lukim yiabuk bilong ol Witnes Bilong Jehova bilong 1992, tok Inglis, pes 177.
Ol Askim Olsem Rivyu
◻ Jop na Jisas na Pol i winim wanem ol hevi na sanap strong na ol i stap gutpela piksa?
◻ Ol man bilong sanap strong i bin sakim Satan olsem wanem?
◻ Olsem wanem ol yangpela inap sakim ol trik bilong Satan?
◻ Yumi ken mekim wanem bilong sakim ol trik na giaman bilong Satan?
5. Wanem samting inap helpim yumi long sanap strong long taim ol man i mekim nogut long yumi?
21. Baibel i tok wanem long ol trik bilong Satan na bai yumi ken was gut?
[Piksa long pes 7]
Long Itiopia, Meswat na Yoalan i mekim wok painia olsem papa bilong ol i bin mekim, em ol birua i bin kilim em i dai
[Piksa long pes 7]
Entellia, em wanpela yangpela i sanap strong long noten Afrika