Strong Bilong Gutpela Tok

“Sapos man i tingting planti na bel hevi tru, na man i mekim gutpela tok long em, orait em bai i belgut tru.”​—⁠Sindaun 12:​25, Baibel Knox.

HEVI i save painim ol Kristen nau long taim bilong “planti hevi nogut tru,” na sampela taim ol i tingting planti.​—⁠2 Timoti 3:⁠1.

Taim ol i gat hevi na gutpela pren i mekim gutpela tok long ol, dispela i mekim gut tru long ol! Baibel i tok: “Ol gutpela pren i save laikim yumi long olgeta taim . . . [na] helpim yumi long taim bilong hevi.” (Sindaun 17:17) Gutpela man Jop i gat nem long mekim gutpela pasin pren olsem. Elifas i tok: “Taim man i les na i no gat strong moa na em i pundaun, tok bilong yu i helpim em long i sanap strong.”​—⁠Jop 4:⁠4, Baibel Today’s English Version.

Tasol taim Jop yet i gat hevi, Elifas na ol poroman bilong em i no mekim gutpela tok long Jop. Ol i tok, em i bin mekim rong na haitim na nau em i kisim hevi. (Jop 4:⁠8) Wanpela Baibel (The Interpreter’s Bible) i stori olsem: “Jop i sot long man bilong sori long em, tasol ol i kolim nating planti tok bilong lotu na bilong stretpela pasin i olsem ‘i tru’ olgeta na i gutpela olgeta.” Bel bilong Jop i bagarap tru long ol tok bilong Elifas na ol poroman bilong em na Jop i tok: “Tok bilong yupela i givim bikpela pen long mi na i bagarapim mi tru. Wanem taim bai yupela i lusim dispela kain tok?”​—⁠Jop 19:⁠2.

Yumi mas tingting gut na yumi no ken tru mekim tok nogut na givim bikpela pen long ol narapela wokboi bilong God. (Lukim Lo 24:15.) Baibel i tok: “Toktok bilong yu inap helpim man i stap gut o bagarapim em. Yu gat bikpela wok long dispela na yu mas karim hevi bilong en.”​—⁠Sindaun 18:​21, Baibel TEV.

Yumi save, tok i gat strong, olsem na yumi mas bihainim pasin bilong Pol. Taim em i stap long Masedonia, em i “givim planti tok long ol Kristen, bilong strongim bel bilong ol.”​—⁠Aposel 20:⁠2.