Em klostu long tulait na nau em namba 3 taim Pita i tok em i no save long Jisas. Sanhedrin i mekim pinis kot na ol memba i go nabaut. Long Fraide moning, ol i bung gen. Ating ol i mekim olsem bilong soim olsem dispela kot i stret wantaim lo. Olsem na Sanhedrin i bringim Jisas i kam sanap long ai bilong ol.

Na ol i tok: “Sapos yu Krais, orait tokim mipela.” Jisas i tok: “Maski sapos mi tokim yupela, bai yupela i no bilipim. Na tu, sapos mi givim askim long yupela, bai yupela i no bekim.” Tasol Jisas i no pret long tokaut olsem em i dispela man em Daniel 7:13 i tok profet long en. Em i tok: “Kirap long nau na i go, Pikinini bilong man bai sindaun long han sut bilong strongpela God.”—Luk 22:67-69; Matyu 26:63.

Sanhedrin i askim em gen: “Olsem na yu Pikinini bilong God, a?” Jisas i tok: “Yupela yet i tok olsem.” Ating dispela i opim rot long ol i kilim Jisas i dai, long wanem, ol i ting Jisas i tok bilas long God. Ol i tok: “Yumi no gat wok long harim sampela tok moa.” (Luk 22:70, 71; Mak 14:64) Olsem na ol i pasim han bilong Jisas na kisim em i go long Gavana bilong Rom, em Pontius Pailat.

Judas Iskariot i lukim ol i bringim Jisas i go long Pailat na em i save olsem ol bai kilim em i dai, olsem na em i bel hevi tru. Em i go bilong givim bek 30 silva koin long ol bikpris. Maski i olsem, em i no tanim bel tru na askim God long lusim rong bilong em. Judas i tokim ol bikpris olsem: “Mi mekim sin taim mi putim stretpela man long han bilong yupela.” Tasol ol i tok: “Em i no samting bilong mipela, em wari bilong yu!”—Matyu 27:4.

Judas i tromoi 30 silva koin i go insait long tempel, na em i laik kilim em yet i dai. Em i hangamapim em yet, tasol han bilong diwai em i pasim rop long en i bruk. Na em i pundaun long ston na bel bilong em i bruk.—Aposel 1:17, 18.

Em bikmoning nau na ol i kisim Jisas i go long haus bilong Pontius Pailat. Ol Juda i bringim em i go, tasol ol i no laik i go insait long haus bilong Pailat. Ol i ting sapos ol i bung wantaim ol manmeri bilong narapela lain, ol bai kamap doti long ai bilong God. Na ol bai no inap kisim kaikai long Nisan 15, em namba 1 de bilong Ol Bikpela De Bilong Bret i No Gat Yis, dispela bung i hap bilong bung bilong Pasova.

Pailat i kam ausait na askim ol: “Yupela i gat wanem tok bilong sutim long dispela man?” Ol i tok: “Sapos dispela man i no bin mekim rong, mipela i no inap bringim em i kam long yu.” Ating Pailat i pilim olsem ol manmeri i putim presa long em, olsem na em i tok: “Yupela yet i kisim em i go na kotim em long lo bilong yupela yet.” Tok bilong ol Juda i kamapim klia tingting nogut bilong ol long kilim i dai Jisas. Ol i tok: “I tambu long mipela i kilim wanpela man i dai.”—Jon 18:29-31.

Sapos ol Juda i kilim i dai Jisas long taim bilong Pasova, dispela bai kirapim kros namel long ol manmeri. Tasol ol bai no gat asua sapos ol i kirapim lain Rom long sutim tok long Jisas na kilim em i dai. Long wanem, ol Rom i gat rait long kilim man sapos em i mekim rong long sait bilong wok politik.

Ol hetman bilong lotu i no tokim Pailat olsem ol i sasim Jisas long em i tok bilas long God. Nau ol i mekim ol narapela tok giaman bilong kotim Jisas, na ol i tok: “Dispela man i wok long [1] kirapim lain bilong mipela long sakim tok na em i [2] tambuim mipela long baim takis long Sisar na [3] em i tok em yet i Krais, wanpela king.”—Luk 23:2.

Pailat i stap olsem mausman bilong Rom, olsem na em i laik skelim gen tok bilong Jisas olsem em i king. Pailat i go bek insait long haus na em i askim Jisas: “Yu king bilong ol Juda, a?” I olsem Pailat i tok, ‘Yu brukim lo bilong gavman long mekim yu yet i kamap king na yu laik birua long Sisar, a?’ Ating Jisas i laik painimaut sapos Pailat i harim pinis sampela stori bilong em, na em i askim olsem: “Yu mekim dispela tok long tingting bilong yu yet, o ol arapela i tokim yu?”—Jon 18:33, 34.

Pailat i laik kisim save long ol samting i painim Jisas, olsem na em i tok: “Mi no wanpela Juda. Lain bilong yu yet na ol bikpris i bringim yu i kam long mi. Yu bin mekim wanem?”—Jon 18:35.

Jisas i strongim bel na i kamapim klia olsem em i gat rait long mekim wok king. Gavana Pailat i kirap nogut long harim ol tok em i mekim.

Jisas i tokaut long Pailat olsem em i wanpela king. Tasol Kingdom bilong em i no inap birua long Rom. Jisas i tok: “Kingdom bilong mi i no bilong dispela graun. Sapos kingdom bilong mi i bilong dispela graun, orait ol wokman bilong mi bai pait na bai ol man i no ken putim mi long han bilong ol Juda. Tasol kingdom bilong mi i no bilong dispela graun.” (Jon 18:36) Yes, Jisas em King bilong wanpela Kingdom, tasol dispela Kingdom i no bilong dispela graun.

Pailat i askim gen Jisas: “Olsem na yu king bilong ol Juda, a?” Jisas i kamapim klia long Pailat olsem tok bilong em i stret, na em i tok: “Yu yet yu tok olsem mi wanpela king. As na mama i bin karim mi, na as na mi kam stap namel long ol manmeri bilong graun, em bilong mi ken tokaut long tok i tru. Olgeta man i stap long sait bilong tok i tru, ol i save harim maus bilong mi.”—Jon 18:37.

Pastaim, Jisas i tokim Tomas olsem: “Mi yet mi rot na tok i tru na laip.” Tasol nau Pailat tu i kisim save olsem Jisas i kam long graun bilong autim “tok i tru,” na dispela i makim tok i tru bilong Kingdom. Jisas i tingting strong long sambai long dispela tok i tru, maski em i mas lusim laip bilong em. Pailat i askim Jisas olsem: “Tok i tru em wanem samting?” Bihain long em i givim dispela askim, em i no wet long harim bekim. Pailat i pilim olsem em i save pinis long olgeta tok bilong em i ken kotim Jisas.—Jon 14:6; 18:38.

Pailat i go bek na toktok long ol manmeri i stap ausait long haus king. Ating Jisas i sanap klostu long Pailat taim em i tokim ol bikpris na ol manmeri olsem: “Mi no painim wanpela rong long dispela man.” Ol manmeri i belhat nogut tru taim ol i harim dispela tok, olsem na ol i tok strong olsem: “Em i skulim ol manmeri long olgeta hap bilong Judia, kirap long Galili na i kam inap long hia, na tok bilong em i mekim na ol manmeri i no stap isi.”—Luk 23:4, 5.

Ating Pailat i kirap nogut olsem ol Juda i givim bel tru long sapotim gavman Rom. Ol bikpris na ol bikman i wok yet long singaut, na Pailat i askim Jisas: “Ating yu no harim hamas tok ol i sutim long yu?” (Matyu 27:13) Tasol Jisas i no mekim wanpela tok. Pailat i kirap nogut long lukim olsem Jisas i stap isi maski ol manmeri i sutim kain kain tok long em.

Ol Juda i tok olsem Jisas i bin mekim wok bilong em “kirap long Galili.” Dispela tok i helpim Pailat long luksave olsem Jisas em man Galili. Olsem na dispela i opim rot na bai Pailat i no ken skelim Jisas long kot. Herot Antipas em pikinini man bilong King Herot na em i bosim Galili, em i stap long Jerusalem long dispela haptaim bilong Pasova. Olsem na Pailat i salim Jisas i go long Herot. Herot Antipas em man husat i bin tok na ol i katim nek bilong Jon Bilong Baptais. Taim Herot i harim olsem Jisas i wokim ol mirakel, em i ting Jon i kirap bek pinis.—Luk 9:7-9.

Olsem na Herot i amamas long lukim Jisas. I no olsem em i laik helpim Jisas o painimaut sapos tru tru Jisas i bin mekim wanpela rong, nogat. Herot i tingting planti na em “i laik lukim em i wokim wanpela mirakel.” (Luk 23:8) Tasol Jisas i no mekim samting em Herot i laik bai em i mas mekim. Herot i givim ol askim long Jisas, tasol em i no bekim wanpela tok. Olsem na Herot na ol soldia i belhat na ol i “rabisim Jisas.” (Luk 23:11) Ol i putim wanpela klos i nais tumas long em na ol i tok bilas long em. Bihain Herot i salim Jisas i go bek long Pailat. Pastaim, Herot na Pailat i birua long narapela narapela, tasol nau tupela i kamap gutpela pren.

Taim ol i bringim Jisas i go bek long Pailat, em i singautim ol bikpris, ol hetman bilong Juda, na ol manmeri i kam bung. Em i tok: “Mi skelim em long ai bilong yupela na mi lukim olsem dispela man i no gat asua long samting yupela i kotim em long en. Na Herot tu i lukim olsem em i no gat asua, long wanem, em i bin salim em i kam bek long yumi. Na harim! Em i no mekim wanpela samting inap long em i dai. Olsem na mi bai givim strafe long em na larim em i go.”—Luk 23:14-16.

Pailat i luksave olsem ol pris i bel nogut long Jisas na ol i putim em long han bilong Pailat, olsem na em i laik larim Jisas i go fri. Long wankain taim, meri bilong Pailat i salim tok long em olsem: “No ken mekim wanpela samting long dispela stretpela man, long wanem, mi lukim em long wanpela driman [i klia tru olsem God i givim dispela driman] na dispela driman i mekim mi i pret nogut tru.”—Matyu 27:19.

Jisas i no mekim wanpela rong, olsem na Pailat bai mekim wanem bilong larim em i go fri?

Pailat i tokim ol manmeri husat i laik bai Jisas i dai olsem: “Mi lukim olsem dispela man i no gat asua long samting yupela i kotim em long en. Na Herot tu i lukim olsem em i no gat asua.” (Luk 23:14, 15) Pailat i traim narapela rot bilong larim Jisas i go fri, na em i tok: “Yupela i gat wanpela pasin olsem, long taim bilong pasova, mi mas lusim wanpela man i go long yupela. Olsem na yupela i laik bai mi lusim dispela king bilong ol Juda i go long yupela, a?”—Jon 18:39.

Pailat i save olsem i gat wanpela man i stap kalabus, em Barabas. Em i wanpela raskolman na em i bin birua long gavman, na tu, em i kilim ol man i dai. Olsem na Pailat i askim ol manmeri: “Yupela i laik bai mi lusim husat i go long yupela, Barabas o Jisas, dispela man ol i kolim em Krais?” Ol bikpris i kirapim ol manmeri long askim Pailat long larim Barabas i go fri, na i no Jisas. Orait Pailat i askim gen: “Yupela i laik bai mi lusim husat bilong dispela tupela man i go long yupela?” Na ol manmeri i singaut olsem: “Barabas”!—Matyu 27:17, 21.

Pailat i bel hevi na em i tok: “Orait bai mi mekim wanem long Jisas, dispela man ol i kolim em Krais?” Ol manmeri i bikmaus na tok: “Nilim em long pos!” (Matyu 27:22) Jisas i no gat asua, tasol ol i strong long kilim em i dai. Olsem na Pailat i tok: “Bilong wanem? Dispela man i mekim wanem rong? Mi no painim wanpela samting inap long em i mas i dai, olsem na mi bai givim strafe long em na larim em i go.”—Luk 23:22.

Planti taim Pailat i strong long lusim Jisas i go fri, tasol ol manmeri i kros na singaut olsem: “Nilim em long pos!” (Matyu 27:23) Ol hetman bilong lotu i kirapim ol manmeri long belhat na ol i laik kilim Jisas i dai! Jisas i no raskolman, na em i no bin kilim wanpela man i dai. Inap 5-pela de i go pinis, ol manmeri i givim biknem long em olsem King taim em i go insait long Jerusalem. Ating ol disaipel bilong Jisas i stap, tasol ol i no laik mekim wanpela tok na bai ol manmeri i luksave long ol.

Pailat i lukim olsem tok bilong em i no inap senisim tingting bilong ol. Ol manmeri i wok long singaut bikpela, olsem na em i kisim wara na wasim han bilong em long ai bilong ol. Em i tokim ol: “Mi no gat asua long blut bilong dispela man. Em samting bilong yupela.” Maski i olsem, ol i no senisim tingting bilong ol. Ol i tok: “Asua bilong blut bilong em i ken i kam long mipela na ol pikinini bilong mipela.”—Matyu 27:24, 25.

Pailat i save long stretpela pasin em i mas mekim, tasol em i sakim, long wanem, em i laik amamasim ol manmeri. Olsem na em i bihainim tingting bilong ol na lusim Barabas i go fri. Em i tokim ol soldia long rausim saket bilong Jisas na wipim em.

Ol soldia i wipim Jisas nogut tru na ol i kisim em i go long haus bilong gavana. Na nau olgeta soldia i bung na mekim tok bilong rabisim em. Ol i wokim kraun long rop i gat nil na pasim long het bilong em. Na tu, ol i kisim stik pitpit na putim long rait han bilong em, na ol i pasim retpela longpela laplap long em, kain olsem laplap ol king i save werim. Ol i tok bilas long em na tok: “Gude, yu King bilong ol Juda!” (Matyu 27:28, 29) Na ol i spet long Jisas na solapim pes bilong em. Na tu, ol i kisim stik pitpit long han bilong em na paitim het bilong em, olsem na “kraun” i gat nil i givim bikpela pen long em.

Tasol Jisas i sanap strong na em i no mekim wanpela samting bilong nogutim gutnem bilong em. Pailat i lukim dispela, olsem na em i laik bai ol manmeri i senisim tingting bilong ol na em i tok: “Lukim! Mi bringim em i kam ausait long yupela na bai yupela i ken save olsem mi no painim wanpela rong long em.” Ating Pailat i ting sapos em i bringim Jisas i go ausait na ol manmeri i lukim blut i ron na ol mak i stap long skin bilong em, nau ol bai senisim tingting bilong ol. Em i bringim Jisas i kam ausait na tok: “Lukim! Em dispela man!”—Jon 19:4, 5.

Ol soldia i paitim Jisas na em i kisim bagarap long bodi bilong em, tasol em i stap isi na i no bekim wanpela tok. Pailat i luksave long dispela na em i mekim ol tok long pasin i soim olsem em i rispektim Jisas na sori long em.

Ol i mekim nogut tru long Jisas na tok bilas long em, olsem na Pailat i traim kain kain rot bilong lusim em i go fri. Maski i olsem, ol bikpris na ol manmeri i no senisim tingting bilong ol. Ol i no laik bai wanpela man o wanpela samting i pasim ol long kilim Jisas i dai. Ol i singaut na tok: “Nilim em long pos! Nilim em long pos!” Pailat i tok: “Yupela yet i kisim em na nilim em long pos, mi no painim wanpela rong long em.”—Jon 19:6.

Ol Juda i sutim tok long Jisas long sait bilong wok politik, tasol Pailat i no painim wanpela rong long Jisas bilong kilim em i dai. Olsem na ol i sutim tok long sait bilong lotu olsem Jisas i tok bilas long God taim em i sanap long ai bilong Sanhedrin. Ol i tok: “Mipela i gat wanpela lo, na lo i tok olsem em i mas i dai, long wanem, em i tok em i pikinini bilong God.” (Jon 19:7) Ol i kamapim dispela tok na bai Pailat i kotim Jisas.

Pailat i go bek insait long haus na em i painim rot bilong lusim Jisas i go fri. Em i lukim olsem ol man i mekim nogut tru long Jisas, na tu, em i tingim driman bilong meri bilong em. (Matyu 27:19) Tasol nau ol Juda i kotim Jisas, long wanem, em i tok em i “pikinini bilong God.” Pailat i save olsem Jisas i bilong Galili. (Luk 23:5-7) Tasol em i askim Jisas olsem: “Yu bilong we?” (Jon 19:9) Ating Pailat i luksave olsem Jisas i bin stap wantaim God long heven long bipo yet.

Pailat i harim Jisas yet i tokaut olsem em i king bilong wanpela Kingdom i no bilong dispela graun. Tasol nau Jisas i no mekim wanpela tok, olsem na Pailat i belhat na i tok: “Yu no laik toktok long mi, a? Mi gat namba long lusim yu i go na mi gat namba long nilim yu long pos. Ating yu no save long dispela, a?”—Jon 19:10.

Jisas i tok: “Bai yu no gat namba long mekim wanpela samting long mi sapos God i no bin givim dispela namba long yu. Olsem na man i bin putim mi long han bilong yu, sin bilong em i bikpela moa.” (Jon 19:11) Tok bilong Jisas i no makim wanpela man, nogat. Tok bilong em i makim Kaiafas, ol poroman bilong em, na Judas Iskariot, ol i mekim bikpela sin winim Pailat.

Pailat i amamas long gutpela pasin bilong Jisas na tok em i kamapim. Nau Pailait i tingting planti, long wanem, em i luksave olsem Jisas i bin stap long heven paslain long em i kam long graun, olsem na em i traim narapela rot bilong lusim Jisas i go fri. Tasol ol Juda i mekim wanpela tok bilong pretim Pailat. Ol i tok: “Sapos yu lusim dispela man i go, orait yu no pren bilong Sisar. Man i tok em yet i king, em i birua long Sisar.”—Jon 19:12.

Pailat i bringim Jisas i go ausait gen, na em i sindaun long ples kot na i tokim ol manmeri olsem: “Lukim! King bilong yupela!” Tasol ol Juda i no wanbel long dispela tok. Olsem na ol i singaut na tok: “Rausim em i go! Rausim em i go! Nilim em long pos!” Na Pailat i tok: “Yupela i laik bai mi nilim king bilong yupela long pos?” Inap planti yia, ol Juda i stap aninit long hatpela wok bos bilong gavman Rom, tasol ol bikpris i tok strong olsem: “Mipela i no gat narapela king. Sisar wanpela tasol.”—Jon 19:14, 15.

Ol Juda i putim bikpela presa long Pailat, olsem na em i harim tok bilong ol na givim Jisas i go bilong ol i ken kilim em i dai. Ol soldia i rausim retpela laplap long em na putim klos bilong em yet i go bek. Na nau ol i givim pos long Jisas em ol bai nilim em long en, na ol i bihainim em na wokabaut i go.

Kirap long bikmoning bilong Fonde na i kam inap long Fraide moning bilong Nisan 14, Jisas i karim bikpela pen na em i no slip. Pos Jisas i karim i hevi tru na strong bilong em i wok long pinis. Olsem na ol soldia i fosim wanpela man i wokabaut klostu long ol, em Saimon bilong Sairini long Afrika, long kisim pos long Jisas na karim i go long ples we ol bai kilim i dai Jisas. Planti manmeri i bihainim ol i go, na sampela i bel sori tru na paitim skin bilong ol yet, na ol i krai long lukim Jisas i karim hevi.

Jisas i lukim ol meri i krai na em i tok: “Ol pikinini meri bilong Jerusalem, yupela i no ken krai moa long mi. Nogat. Yupela i mas krai long yupela yet na long ol pikinini bilong yupela. Long wanem, taim bai kamap na ol manmeri bai tok, ‘Ol meri em ol i no inap karim pikinini, na ol meri i no bin karim pikinini na ol meri i no bin susuim pikinini, ol i ken amamas!’ Long dispela taim ol bai tokim ol maunten olsem, ‘Pundaun antap long mipela!’ na ol bai tokim ol liklik maunten, ‘Karamapim mipela!’ Sapos nau ol i mekim ol dispela samting taim diwai i gat wara, orait wanem samting bai kamap taim diwai i drai pinis?”—Luk 23:28-31.

Jisas i tok lain Juda i olsem diwai i gat wara, long wanem, em i stap yet na sampela Juda i bilip long em. Tasol bihain diwai i drai pinis, dispela i makim olsem taim Jisas i dai na ol disaipel bilong em i lusim lotu i tru, nau ol hevi bai painim lain Juda. Ol manmeri bai krai nogut tru long taim God i larim ami bilong Rom i bagarapim lain Juda!

Ol i kisim Jisas i go ausait long wanpela hap klostu long taun, na ol bai nilim em long pos arere long 2-pela raskolman. Nem bilong dispela ples em Golgota, mining bilong en Bun Bilong Het. Maski sapos ol manmeri i “sanap longwe liklik,” ol inap lukim dispela ples.—Mak 15:40.

Ol soldia i rausim klos bilong Jisas na 2-pela raskolman. Na ol i miksim wain wantaim drak mer na marasin i gat pait, na ol i givim long 3-pela. I luk olsem ol meri long Jerusalem i bin redim ol dispela samting, na ol Rom i save givim long ol man ol i laik kilim i dai bambai ol i no ken pilim pen. Jisas i pilim bikpela pen, tasol taim em i teistim dispela wain, em i no laik dring, long wanem, em i laik stap gut long God i go inap long em i dai.

Ol i nilim Jisas long pos. (Mak 15:25) Ol soldia i nilim 2-pela han na lek bilong em, na nil i brukim skin na mit na dispela i givim bikpela pen tru long em. Taim ol i sanapim pos, Jisas i pilim bikpela pen moa yet, long wanem, bodi bilong em i hevi na nil i brukim skin na givim bikpela pen tru long em. Tasol Jisas i no mekim wanpela tok bilong kros long ol soldia. Em i beten na tok: “Papa, fogivim ol, ol i no save long samting ol i mekim.”—Luk 23:34.

Em pasin bilong ol Rom long putim rait antap long pos bilong toksave long rong em raskolman i bin mekim. Olsem na Pailat i putim rait olsem: “Jisas bilong Nasaret, King bilong ol Juda.” Ol i raitim dispela toksave long tok Hibru, Latin, na Grik, olsem na olgeta manmeri inap long ritim. Dispela i soim olsem Pailat i no amamas long ol Juda husat i strong long kilim Jisas i dai. Ol bikpris i belhat na tok: “No ken raitim olsem ‘King bilong ol Juda,’ yu mas raitim olsem em yet i tok, ‘Mi King bilong ol Juda.’” Tasol Pailat i no laik harim tok bilong ol manmeri, olsem na em i tok: “Tok mi bin raitim em mi raitim pinis.”—Jon 19:19-22.

Ol pris i belhat nogut tru na ol i mekim gen wankain tok giaman ol i bin kamapim taim Sanhedrin i mekim kot long Jisas. Ol manmeri i wokabaut long rot i harim dispela tok giaman, na ol i seksekim het bilong ol na tok bilas olsem: “Goan! Yu dispela man husat i tok long tromoi tempel i go daun na sanapim gen long 3-pela de. Helpim yu yet na lusim dispela diwai pos na kam daun.” Na tu, ol bikpris na ol saveman bilong lo i toktok namel long ol yet olsem: “Dispela Krais, King bilong Israel, larim em i lusim diwai pos na kam daun. Sapos mipela i lukim dispela samting, orait bai mipela i bilip.” (Mak 15:29-32) Na tupela raskolman ol i nilim long pos long sait sait bilong Jisas, ol tu i sutim tok long em maski em i no gat asua long wanpela samting.

Fopela soldia bilong Rom tu i tok bilas long Jisas. Ating ol i dringim wain i miks wantaim marasin i gat pait, olsem na ol i apim wain i go long Jisas, ol i save em i no inap putim han i go na kisim. Ol Rom i lukim rait antap long pos bilong Jisas, na ol i tok bilas olsem: “Sapos yu King bilong ol Juda, orait kisim bek yu yet.” (Luk 23:36, 37) Tingim! Jisas i soim klia olsem em yet i rot, tok i tru, na laip, tasol nau ol man i tok bilas na mekim nogut tru long em. Tasol Jisas i strongim bel na karim dispela hevi, em i no mekim wanpela tok nogut long ol Juda husat i lukluk i stap, long ol soldia bilong Rom i tok bilas long em, na long 2-pela raskolman husat i hangamap long pos long sait sait bilong em.

Fopela soldia i kisim saket na laplap bilong Jisas na tilim i go long 4-pela hap. Ol i pilai satu bilong makim husat bai kisim wanem klos. Tasol “siot bilong [Jisas] i no gat ol join, ol i bin lumim long antap i go daun.” Ol soldia i tok: “Yumi no ken brukim dispela siot, yumi mas pilai satu bilong makim husat bai kisim.” Long dispela rot, ol i truim tok profet olsem: “Ol i tilim saket bilong mi namel long ol yet, na ol i pilai satu long klos bilong mi.”—Jon 19:23, 24; Song 22:18.

Bihain liklik, wanpela bilong dispela 2-pela raskolman i luksave olsem tru tru Jisas em i king. Em i krosim narapela raskolman na i tok: “Yu kisim wankain strafe olsem em na yu no pret liklik long God, a? Na strafe yumi kisim i stret, long wanem, yumi kisim pe inap stret long ol samting yumi bin mekim. Tasol dispela man i no bin mekim wanpela rong.” Orait em i tokim Jisas: “Tingim mi taim yu kamap King.”—Luk 23:40-42.

Jisas i tok: “Mi tok tru long yu tude, Yu bai stap wantaim mi long Paradais.” (Luk 23:43) Tok promis Jisas i mekim long dispela man i no wankain long tok promis em i mekim long ol aposel, olsem ol bai sindaun long ol sia king wantaim em long Kingdom. (Matyu 19:28; Luk 22:29, 30) Ating dispela raskolman bilong Juda i bin harim stori olsem, pastaim Jehova i bin mekim graun i kamap Paradais bambai Adam na Iv na lain pikinini bilong ol i ken i stap long en. Maski em bai dai, em i bilip na wet long kisim laip long Paradais long graun.

Nau em “namba 6 aua,” em taim bilong belo. Narapela kain “tudak i karamapim olgeta hap, na tudak i stap i go inap long namba 9 aua,” em 3 klok long apinun. (Mak 15:33) Mun i no pasim ai bilong san na ples i tudak, nogat. Kain samting i save kamap long taim bilong nupela mun. Tasol nau em Pasova na em taim bilong ful mun. Na tudak i stap sampela aua moa winim ol minit we mun i save pasim ai bilong san. Olsem na dispela i soim olsem God yet i kamapim dispela tudak!

Tingim, ating lain i tok bilas long Jisas i gat wanem tingting taim dispela samting i kamap? Long taim ples i stap tudak, 4-pela meri i kam klostu long diwai pos Jisas i hangamap long en. Ol dispela meri em mama bilong Jisas, Salome, Maria Makdala, na Maria em mama bilong namba 2 Jems.

Maria i krai i stap “klostu long diwai pos,” na aposel Jon i stap wantaim em. Em i lukim pikinini bilong em i karim bikpela pen na hangamap long diwai pos. Dispela i mekim na em i pilim olsem ol birua i kisim “longpela bainat” na sutim em. (Luk 2:35; Jon 19:25) Maski Jisas i pilim bikpela pen, em i tingim mama bilong em. Olsem na em i tanim na lukluk long Jon na tokim mama bilong em: “Meri, lukim! Em pikinini bilong yu!” Bihain em i lukluk long Jon na tok: “Lukim! Em mama bilong yu!”—Jon 19:26, 27.

Ating mama bilong Jisas i bin stap wido, olsem na Jisas i tokim Jon em aposel em i laikim tumas long lukautim em. Jisas i save olsem ol brata tru bilong em, em ol narapela pikinini bilong Maria, ol i no bilip yet long em. Olsem na em i stretim rot bilong lukautim Mama long bilip na haus na kaikai samting. Em i stap gutpela eksampel yumi ken bihainim!

Klostu long taim tudak i laik pinis, Jisas i tok: “Nek bilong mi i drai.” Na dispela i inapim tok i stap long Rait Holi. (Jon 19:28; Song 22:15) Ating Jisas i pilim olsem Papa i no sambai moa long em, na em i mas kamapim klia olsem em bai i stap gut yet long Papa i go inap long taim em i dai. Olsem na Krais i singaut long tokples Aram long nek bilong ol Galili na em i tok: “‘Eli, Eli, lama sabaktani?’ mining bilong en: ‘God bilong mi, God bilong mi, bilong wanem yu lusim mi?’” Sampela lain i sanap klostu long em i no klia long tok em i mekim, olsem na ol i tok: “Harim! Em i singautim Elaija.” Wanpela bilong ol i ran i go na putim spans long wain ol i miksim wantaim marasin i pait, na pasim spans long stik pitpit na givim long Jisas. Tasol ol narapela i tok: “Larim em! Yumi lukim, Elaija bai kam na kisim em i kam daun o nogat.”—Mak 15:34-36.

Bihain Jisas i singaut na tok: “Em pinis nau!” (Jon 19:30) Yes, em i pinisim olgeta wok em Papa i salim em i kam bilong mekim long graun. Nau Jisas i mekim laspela tok olsem: “Papa mi putim strong bilong laip bilong mi i go long han bilong yu.” (Luk 23:46) Jisas i putim laip bilong em long han bilong Jehova, long wanem, em i bilip olsem God bai kirapim em bek. Krais i no holim 2-pela tingting long God, nogat, em i bilip tru long God, olsem na em i daunim het na em i dai.

Long dispela taim stret, bikpela guria i kamap na i mekim ol traipela ston i bruk. Guria i strong tru na i mekim ol matmat ausait long Jerusalem i op na i tromoi bodi bilong ol daiman i kam ausait. Ol manmeri i wokabaut i lukim ol dispela samting i kamap, na ol i go insait long “taun holi” na tokim ol narapela long ol samting ol i bin lukim.—Matyu 12:11; 27:51-53.

Taim Jisas i dai, longpela keten namel long Rum Holi na Rum Holi Tru long tempel bilong God i bruk long 2-pela hap, kirap long antap na i go daun olgeta. Dispela samting i kamapim klia belhat bilong God long ol man husat i kilim Pikinini bilong em, na tu, em i soim klia olsem rot i op nau long ol man inap kisim laip long heven.—Hibru 9:2, 3; 10:19, 20.

Olsem na yumi ken ting ol manmeri i pret nogut tru. Ofisa bilong ol soldia husat i kilim Jisas i tok: “Tru tumas, dispela man em i Pikinini Bilong God.” (Mak 15:39) I luk olsem dispela ofisa i stap tu taim Pailat i laik painimaut sapos tru tru Jisas em i Pikinini Bilong God. Nau em i bilip olsem Jisas em i stretpela man, na tru tumas em i Pikinini Bilong God.

Ol arapela i tingting planti taim ol i lukim ol dispela samting i kamap, na ol i “paitim bros bilong ol” bilong soim olsem ol i bel hevi tru na sem long pasin ol i mekim. (Luk 23:48) Namel long ol lain i sanap longwe liklik na lukim ol birua i kilim i dai Jisas, em ol disaipel meri. Ol tu i pilim tru ol dispela samting i kamap.

Em Fraide apinun bilong Nisan 14, na san i wok long i go daun. Taim san i go daun pinis, Sabat bilong Nisan 15 bai kirap. Jisas i dai pinis, tasol 2-pela raskolman i stap laip yet. Lo i tok, sapos ol i hangamapim man long pos na em i dai, “orait i tambu long larim bodi bilong en i hangamap i stap inap long moningtaim.” Mobeta ol i “planim bodi bilong dispela man long de em i dai.”—Lo 21:22, 23.

Fraide apinun em Redi De, dispela i makim olsem ol bai redim kaikai na pinisim ol bikpela wok paslain long Sabat i kirap. Na taim san i go daun, “spesel Sabat” bai kirap. (Jon 19:31) Ol i kolim “spesel Sabat,” long wanem, Nisan 15 em fes de bilong 7-pela de bilong Ol Bikpela De Bilong Bret i No Gat Yis, oltaim dispela de em fes de bilong Sabat. (Wok Pris 23:5, 6) Long dispela taim, fes de i kirap stret long namba 7 de bilong Sabat bilong olgeta wik.

Olsem na ol Juda i askim Pailat long mekim sampela samting bambai Jisas na 2-pela raskolman i dai hariap. Ol i laik bai ol soldia i brukim lek bilong ol. Long dispela rot, 3-pela i no inap apim bodi bilong ol long pulim win. Ol soldia i go na brukim lek bilong 2-pela raskolman. Tasol Jisas i dai pinis, olsem na ol i no brukim ol lek bilong em. Dispela i truim tok bilong Song 34:20, em i tok: “Bikpela i save lukautim em olgeta, na i no gat wanpela bun bilong en i bruk.”

Ol soldia i laik save sapos tru tru Jisas i dai, olsem na wanpela soldia i kisim spia na sutim sait bilong em, na spia i go kisim hap em lewa i stap long en. “Wantu blut na wara i kapsait.” (Jon 19:34) Dispela i truim tok bilong narapela skripsa olsem: “Bai ol i lukluk long mi, dispela man ol i bin sutim i dai.”—Sekaraia 12:10.

Josep bilong Arimatea em “maniman” na memba bilong Sanhedrin na ol man i save rispektim em, em tu i stap taim ol i kilim Jisas. (Matyu 27:57) Ol man i tingim em olsem “gutpela na stretpela man,” na em i “wetim Kingdom bilong God.” Em i “disaipel bilong Jisas, tasol em i haitim dispela, long wanem, em i pret long ol Juda,” na em i no sapotim disisen bilong Sanhedrin taim ol i mekim kot long Jisas. (Mak 15:43; Luk 23:50; Jon 19:38) Josep i strongim bel na askim Pailat long larim em i kisim bodi bilong Jisas. Pailat i singautim kepten bilong ami, na kepten i tokaut olsem Jisas i dai pinis. Olsem na Pailat i tok orait long Josep i kisim bodi bilong Jisas.

Josep i baim gutpela klinpela laplap na i rausim bodi bilong Jisas long pos. Em i karamapim bodi na redim bilong putim long matmat. Nikodemus, “em dispela man pastaim em i bin kam long Jisas long nait,” em tu i helpim long redim bodi bilong Jisas. (Jon 19:39) Em i bringim bandel i gat mer na aloe long en na i gat bikpela pe, na hevi bilong en inap olsem 33 kilogram. Ol i bihainim kastam bilong ol Juda na ol i pasim bodi bilong Jisas long laplap wantaim ol dispela spais i gat naispela smel.

Josep i kisim bodi bilong Jisas na putim long nupela matmat em yet i bin katim insait long traipela ston. Bihain, em i rolim ston i go pasim ai bilong matmat na em i go. Em i mekim kwik ol dispela samting paslain long Sabat i kirap. Ating Maria Makdala na Maria mama bilong namba 2 Jems, ol i helpim long redim bodi bilong Jisas. Olsem na ol i hariap i go long haus bilong “redim ol lip samting i gat gutpela smel na sampela sanda” bilong putim long bodi bilong Jisas bihain long Sabat.—Luk 23:56.

Long neks de, em de Sabat, ol bikpris na ol Farisi i go long Pailat na tok: “Mipela i tingim tok dispela man bilong giaman i bin mekim taim em i stap laip yet, em i bin tok olsem ‘Bihain long 3-pela de mi bai kirap bek.’ Olsem na yu mas tokim ol man long was gut long dispela matmat i go inap long namba 3 de na bai ol disaipel bilong en i no ken kam na stilim bodi na tokim ol manmeri olsem, ‘Em i kirap bek pinis long dai!’ Dispela tok giaman bai i nogut moa winim tok giaman bilong pastaim.” Pailat i tokim ol: “Yupela kisim ol gad i go wantaim yupela bilong was gut long matmat. Go na mekim ol samting yupela inap mekim bilong was long en.”—Matyu 27:63-65.

Long Sande long bikmoning, Maria Makdala, Maria mama bilong Jems, na ol narapela meri i bringim ol spais i gat naispela smel bilong i go putim long bodi bilong Jisas. Ol i toktok namel long ol yet olsem: “Husat bai helpim yumi na rolim dispela ston i stap long ai bilong matmat?” (Mak 16:3) Tasol wanpela guria i bin kamap. Na tu, ensel bilong God i rausim ston i pasim matmat na ol gad i no stap, na i luk olsem matmat i stap nating!