Bihain long Adam na Iv i lusim gaden Iden, ol i gat planti pikinini. Fes pikinini bilong ol, Kein, em i kamap fama, na seken pikinini, Abel, em i kamap man bilong lukautim ol sipsip.

Wanpela de Kein na Abel i mekim ol ofa long Jehova. Yu save ofa em wanem samting? Em wanpela kain spesel presen. Jehova i amamas long ofa bilong Abel, tasol em i no amamas long ofa bilong Kein. Dispela i mekim na Kein i belhat tru. Jehova i tok lukaut long Kein olsem belhat bilong em inap kirapim em long mekim samting nogut. Tasol Kein i no bihainim tok.

Kein i tokim Abel: ‘Kam wantaim mi long bus.’ Taim tupela yet i stap long bus, Kein i paitim brata bilong em na i kilim em i dai. Jehova bai mekim wanem? Jehova i panisim Kein na i salim em i go stap longwe long famili bilong em. Kein i no inap kam bek gen.

Yumi inap kisim wanem skul? Sapos ol samting i no kamap olsem yumi laikim, yumi inap stat long belhat. Sapos belhat i go bikpela long bel—o sapos sampela i luksave olsem yumi belhat na ol i givim tok lukaut long yumi—kwiktaim yumi mas senisim na kontrolim filings bilong yumi paslain long belhat i kontrolim yumi.

Abel i laikim Jehova na mekim ol samting i stret, olsem na oltaim Jehova bai tingim em. God bai kirapim bek Abel taim Em i mekim graun i kamap ples paradais.

I no longtaim, planti man i kamap long graun. Planti bilong ol i man nogut. Sampela ensel long heven tu i kamap ol ensel nogut. Ol i lusim ples bilong ol long heven na kam daun long graun. Yu save wai na ol i mekim olsem? Bai ol inap kisim bodi olsem bilong ol man na maritim ol meri.

Ol ensel na ol meri i kamapim ol pikinini man. Ol dispela pikinini i gro na kamap ol strongpela man tru na ol buli. Ol i mekim nogut long ol man. Jehova i no inap larim ol dispela pasin i stap yet. Olsem na em i tingting long bagarapim ol man nogut long bikpela tait wara.

Tasol wanpela gutpela man i stap. Em i laikim Jehova. Nem bilong em Noa. Em i gat meri na tripela pikinini man, Siem, Ham, na Jafet, na ol wan wan pikinini man i gat meri. Jehova i tokim Noa long wokim wanpela bikpela sip na bai em na famili bilong em inap abrusim bagarap long Bikpela Tait. Dispela sip i olsem wanpela bikpela boks na inap flot long wara. Na tu, Jehova i tokim Noa long bringim planti animal i go insait long sip na bai ol inap abrusim bagarap.

Kwiktaim Noa i kirap long wokim sip. Noa na famili bilong em i wokim sip insait long klostu 50 yia. Ol i wokim sip wankain stret olsem Jehova i tokim ol. Long seim taim, Noa i givim tok lukaut long ol man long Bikpela Tait. Tasol no gat wanpela  man i harim tok bilong em.

Nau em taim bilong go insait long sip. Yumi painimaut wanem samting bai kamap.