Josep em wanpela bilong ol yangpela pikinini bilong Jekop. Ol bikpela brata bilong Josep i lukim olsem em i feiveret pikinini bilong papa. Yu ting ol i pilim olsem wanem long dispela? Ol i jeles long Josep na heitim em. Taim Josep i kisim ol narakain driman, em i tokim ol brata bilong em long dispela. Ol i ting ol dispela driman i makim olsem wanpela taim bai kamap na ol bai brukim skru long em. Nau ol i heitim em moa yet!

Wanpela taim ol brata bilong Josep i lukautim ol sipsip klostu long taun bilong Sekem. Jekop i salim Josep i go bilong painimaut sapos ol brata bilong em i stap orait. Ol i lukim Josep i kam longwe yet na ol i toktok namel long ol yet: ‘Man bilong driman i kam. Yumi kilim em i dai!’ Ol i holimpasim em na tromoi em i go insait long wanpela hul i daun tru. Tasol Juda, wanpela bilong ol brata bilong em i tok: ‘No ken kilim em! Yumi salim em olsem wanpela sleiv.’ So ol i salim Josep long 20 mani silva long ol bisnisman bilong lain Midia husat i laik i go long Isip.

Bihain ol brata bilong Josep i kisim saket bilong em na ol i putim long blut bilong meme, na salim dispela saket i go long papa na tok: ‘Em saket bilong pikinini bilong yu?’ So Jekop i ting wanpela wel animal i mas kilim i dai Josep. Bel bilong em i hevi tru. No gat wanpela inap mekim isi bel bilong em.

Long Isip, ol i salim Josep olsem sleiv long wanpela ofisa i gat namba, nem bilong em Potifar. Tasol Jehova i stap wantaim Josep. Potifar i lukim olsem Josep i save mekim gut wok bilong em na em inap trastim Josep. I no longtaim, Potifar i larim Josep long bosim olgeta samting bilong em.

Meri bilong Potifar i lukim olsem Josep i luk nais na strongpela man. Long olgeta de, em i askim Josep long slip wantaim em. Josep bai mekim wanem? Em i sakim meri na tok: ‘Nogat! Dispela i no stret. Bosman bilong mi i trastim mi, na yu meri bilong em. Sapos mi slip wantaim yu, mi bai mekim sin long ai bilong God!’

Wanpela de, meri bilong Potifar i fosim Josep long slip wantaim em. Meri i holimpasim saket bilong Josep tasol em i ranawe. Taim Potifar i kam bek long haus, meri i tokim em olsem Josep i traim long pulim em long slip wantaim em. Meri i mekim tok giaman. Potifar i belhat nogut tru na em i putim Josep long kalabus. Tasol Jehova i no lusim tingting long Josep.

Taim Josep i stap long kalabus, Fero, king bilong Isip, i kisim ol driman we i no gat man inap kamapim insait bilong en. Wanpela wokman bilong Fero i tokim em olsem Josep inap tokim em long mining bilong ol dispela driman. Kwiktaim Fero i salim tok long Josep i kam.

Fero i askim em: ‘Yu inap eksplenim ol driman bilong mi?’ Josep i tokim Fero: ‘Isip bai i gat planti kaikai tru long sevenpela yia, na bihain bai i gat sevenpela yia bilong bikpela hangre. Makim wanpela man i gat gutpela tingting na bai em inap long bungim ol kaikai na bai ol manmeri bilong yu i no ken dai long taim bilong bikpela hangre.’ Fero i bekim tok: ‘Mi makim yu! Yu bai stap nambatu man long Isip i gat bikpela strong!’ Hau na Josep i save long mining bilong driman bilong Fero? Jehova i bin helpim Josep.

Insait long sevenpela yia, Josep i bungim kaikai. Bihain bikpela hangre i kamap long olgeta hap bilong graun, olsem Josep i bin tok. Ol manmeri i kam long olgeta hap long baim kaikai long Josep. Papa bilong em, Jekop, i harim olsem i gat kaikai long Isip, olsem na em i salim tenpela pikinini man bilong em i go long dispela hap long baim sampela kaikai.

Ol pikinini bilong Jekop i go long Josep, kwiktaim Josep i luksave long ol. Tasol ol brata bilong em i no save olsem em Josep. Ol i brukim skru long em, olsem em i bin driman taim em i yangpela. Josep i laik save sapos ol brata bilong em i holim yet pasin bilong heitim narapela. So em i tokim ol: ‘Yupela ol man bilong spai. Yupela i laik painimaut long wanem hap bilong kantri bilong mipela i no gat strong.’ Ol i tok: ‘Nogat! Mipela 12-pela brata bilong Kenan. Wanpela brata bilong mipela i dai, na laspela brata bilong mipela i stap wantaim papa.’ Josep i tok: ‘Bringim laspela brata bilong yupela i kam long mi, na bai mi bilipim yupela.’ So ol i go bek long ples long papa bilong ol.

Taim kaikai bilong ol i pinis, Jekop i salim ol i go bek long Isip. Nau ol i kisim Benjamin, laspela brata bilong ol i go wantaim ol. Bilong traim ol, Josep i haitim silva kap bilong em long beg bilong Benjamin i gat wit samting na bai em i sutim tok long ol olsem ol i stil. Taim ol wokman i painim kap long beg bilong Benjamin, ol brata bilong em i kirap nogut. Ol i strong long Josep i ken panisim ol na larim Benjamin i go.

Nau Josep i save olsem ol brata bilong em i senis. Josep i no inap haitim sori bilong em. Em i krai na tok: ‘Mi brata bilong yupela Josep. Papa bilong mi i stap laip yet?’ Ol brata bilong em i kirap nogut. Em i tokim ol: ‘Yupela i no ken bel hevi long pasin yupela i mekim long mi. God i salim mi i kam long hia long seivim laip bilong yupela. Hariap na bringim papa i kam long hia.’

Ol i go long haus na tokim papa long dispela gutpela nius na bringim em i go long Isip. Planti yia i bin lus na nau Josep na papa bilong em i stap wantaim gen.