Long graun bilong Us, i gat wanpela man i stap husat i save lotuim Jehova. Nem bilong em Jop. Em maniman tru na em i gat bikpela famili. Em i gat gutpela pasin, na i save helpim ol rabisman, ol meri man bilong ol i dai pinis, na ol pikinini i no gat papamama. Em i save mekim stretpela pasin, olsem na yu ting em i no gat ol hevi?

Jop i no save long dispela, tasol Satan, dispela Devil i wok long lukluk long em. Jehova i tokim Satan: ‘Yu lukim wokman bilong mi Jop? I no gat wanpela man long graun i olsem em. Em i save harim tok bilong mi na mekim stretpela pasin.’ Satan i bekim tok: ‘Em tru Jop i save bihainim tok bilong yu. Yu save lukautim em na blesim em. Yu givim em graun na ol animal. Tasol sapos yu rausim olgeta samting, em bai stop long lotuim yu.’ Jehova i tok: ‘Yu ken traim Jop. Tasol yu no ken kilim em.’ Wai na Jehova i larim Satan i traim Jop? Jehova i save olsem Jop i no inap pundaun.

Satan i kirap long givim kain kain hevi bilong traim Jop. Fes, em i salim ol man ol i kolim ol Sabea, long stilim ol bulmakau na donki bilong Jop. Bihain paia i kukim na bagarapim olgeta sipsip bilong Jop. Narapela lain man, em ol Kaldia, i stilim ol kamel bilong em. Ol i kilim ol wokman i save lukautim ol dispela animal. Bihain, bikpela bagarap nogut tru i kamap. Olgeta pikinini bilong Jop i dai, taim haus em ol i bin mekim pati long en i pundaun antap long ol. Bel bilong Jop i bagarap tru, tasol em i no stop long lotuim Jehova.

Satan i laik bai Jop i karim pen na hevi moa yet, so em i mekim ol sua i kamap long olgeta hap bilong bodi bilong Jop. Jop i pilim bikpela pen tru. Em i no save wai na ol dispela samting i kamap long em. Maski i olsem, Jop i lotuim yet Jehova. God i lukim olgeta dispela samting, na em i amamas tru long Jop.

Orait Satan i salim 3-pela man i kam bilong traim Jop. Ol i tokim em: ‘Ating yu bin mekim sin na traim long haitim na God i panisim yu.’ Jop i tok: ‘Mi no mekim wanpela rong.’ Tasol em i kirap long ting Jehova i as bilong ol dispela hevi, na em i tok God i no mekim pasin i fea long em.

Wanpela yangpela man, nem bilong em Elihu, i stap isi na putim yau long toktok bilong ol. Nau em i kirap na tok: ‘Tok yupela olgeta i mekim i no stret. Jehova i nambawan na i antap tru na yumi no inap save tru long em. Em i no inap mekim pasin nogut. Em i save lukim olgeta samting na helpim ol man i gat hevi.’

Orait Jehova i toktok long Jop. Em i tok: ‘Taim mi wokim skai na graun, yu stap we? Wai na yu tok mi no mekim pasin i fea? Yu toktok, tasol yu no kliagut long wai ol samting i kamap?’ Jop i tokaut olsem em i popaia, na tok: ‘Mi popaia pinis. Mi harim tok long yu, tasol nau mi save tru long yu. Taim yu laik mekim wanpela samting, no gat wanpela inap pasim yu. Mi sori long tok mi bin mekim.’

Taim ol hevi i pinis, Jehova i mekim Jop i helti gen na i givim em planti samting moa winim bipo. Jop i stap laip longpela taim na i stap amamas. Jehova i blesim Jop bikos em i harim tok bilong God maski ol hevi i bin painim em. Olsem wanem? Bai yu bihainim pasin bilong Jop na lotuim yet Jehova, maski ol hevi i painim yu?

Long Isip, ol i save olsem famili bilong Jekop em ol Israel. Bihain long Jekop na Josep i dai, wanpela nupela Fero i kirap bosim Isip. Em i pret olsem lain Israel i wok long kamap strong moa winim ol Isip. So dispela Fero i mekim ol Israel i wok sleiv. Em i fosim ol long wokim ol brik na wok hat tru long ol gaden. Tasol taim ol Isip i fosim ol long wok hat moa, namba bilong ol Israel i wok long i go bikpela moa. Fero i no laikim dispela, olsem na em i givim tok long kilim i dai olgeta nupela bebi boi bilong ol Israel. Yu inap piksaim long tingting, pret bilong ol Israel long dispela samting?

Wanpela meri Israel nem bilong em Jokebet, em i gat wanpela naispela bebi boi. Bilong lukautim em, mama i putim em insait long wanpela basket na haitim em namel long ol pitpit bilong Wara Nail. Sista bilong bebi, Miriam, i stap klostu na was long wanem samting bai kamap.

Pikinini meri bilong Fero i kam long waswas long wara na em i lukim basket. Insait long basket em i lukim wanpela bebi i krai i stap, na em i sori long bebi. Miriam i askim: ‘Yu laik mi go singautim wanpela meri long lukautim bebi?’ Taim pikinini meri bilong Fero i tok yes, Miriam i go kisim mama bilong em yet, Jokebet. Pikinini meri bilong Fero i tokim em: ‘Kisim dispela bebi, lukautim na givim susu long em na bai mi baim yu.’

Taim dispela pikinini i go bikpela liklik, Jokebet i bringim em i go long pikinini meri bilong Fero, na em i givim nem Moses long bebi na mekim bikpela long em olsem pikinini tru bilong em. Moses i kamap bikpela olsem wanpela prins na em inap kisim olgeta samting em i laikim. Tasol Moses i no lusim tingting long Jehova. Em i save olsem em i wanpela Israel, em i no wanpela Isip. Na em i mekim disisen long lotuim Jehova.

Long taim Moses i gat 40 krismas, em tingting long helpim lain bilong em. Taim Moses i lukim man Isip i paitim wanpela sleiv bilong Israel, em i paitim nogut tru dispela Isip na em i dai. Moses i haitim bodi bilong dispela man long wesan. Taim Fero i painimaut dispela, em i laik kilim i dai Moses. Tasol Moses i ranawe i go long graun bilong Midia. Jehova i lukautim em long dispela hap.