Moses na Aron i go bilong tokim Fero long tok bilong God: ‘Sapos yu no larim ol manmeri bilong mi i go, bai mi salim ol lang i kam long dispela graun.’ Bikpela lain lang i go insait long ol haus bilong ol Isip, ol maniman na ol rabisman wantaim. Olgeta hap i pulap long ol lang. Tasol long graun bilong Gosen, em hap ol Israel i stap long en, i no gat ol lang long dispela hap. Kirap long dispela namba 4 bikpela hevi, ol bikpela hevi i bagarapim tasol ol Isip. Fero i tok: ‘Askim Jehova long rausim ol dispela lang i go. Ol manmeri bilong yu i ken i go.’ Tasol taim Jehova i rausim ol dispela lang i go, Fero i senisim tingting bilong em. Yu ting Fero bai kisim skul long ol samting i kamap?

Jehova i tok: ‘Sapos Fero i no larim ol manmeri bilong mi i go, ol animal bilong ol Isip bai kisim sik na i dai.’ Long neks de, ol animal i stat long dai. Tasol ol animal bilong ol Israel i no dai. Maski i olsem, Fero i het strong, na em i no larim ol i go.

Bihain Jehova i tokim Moses long go bek long Fero na tromoi sit bilong paia i go antap long win. Sit bilong paia i kamap das na i pulap long win na i pundaun long ol Isip. Dispela das i kamapim ol bikpela sua i pen nogut tru, long ol man bilong Isip na ol animal bilong ol. Tasol Fero i het strong yet na i no larim ol Israel i go.

Jehova i tokim Moses long tokim Fero: ‘Yu bikhet yet na yu no laik larim ol manmeri bilong mi i go? Tumora bikpela ren ais bai i kam daun long dispela hap.’ Neks de, Jehova i salim ren ais, tanda, na paia. Em bikpela ren ais tru lain Isip i no bin lukim bipo. Olgeta diwai na kaikai long gaden i bagarap, tasol dispela i no kamap long Gosen. Fero i tok: ‘Askim Jehova long pinisim dispela! Na bai yupela i ken i go.’ Tasol bihain long ren ais na ren i pinis, Fero i senisim tingting.

Bihain Moses i tok: ‘Nau ol grasopa bai kaikai ol samting em ren ais i no bagarapim.’ Planti milion grasopa i kaikai olgeta samting i stap long ol diwai na ol gaden. Fero i tok: ‘Askim Jehova long rausim ol dispela grasopa i go.’ Tasol maski Jehova i rausim pinis ol grasopa, Fero i het strong yet.

Jehova i tokim Moses: ‘Apim han bilong yu i go antap long skai.’ Kwiktaim skai i kamap tudak olgeta. Insait long 3-pela de, ol Isip i no inap lukim wanpela samting o wanpela man. Ol Israel tasol i gat lait long ol haus bilong ol.

Fero i tokim Moses: ‘Yu na ol manmeri bilong yu ken i go. Tasol larim ol animal bilong yupela i stap.’ Moses i tok: ‘Mipela i mas kisim ol animal bilong mipela i go na bai mipela i ken givim ofa long God bilong mipela.’ Fero i belhat nogut tru. Em i singaut: ‘Klia long mi! Sapos mi lukim yu gen, bai mi kilim yu.’

Moses i promisim Fero olsem em bai i no inap lukim em gen. Tasol paslain long Moses i go, em i tokim Fero: ‘Long biknait, olgeta fesbon long kantri Isip, stat long pikinini man bilong Fero i go long ol pikinini man bilong ol sleiv, olgeta bai i dai.’

Jehova i tokim ol Israel long redim wanpela spesel kaikai. Em i tok: ‘Kilim wanpela sipsip o meme i gat wanpela krismas, na putim sampela blut bilong en long pos bilong dua. Kukim mit bilong en long paia, na kaikai wantaim bret i no gat yis. Pasim ol klos na ol sendol bilong yupela, na redi long i go. Long dispela nait mi bai kisim bek yupela.’ Yu inap piksaim amamas bilong ol Israel?

Long biknait, ensel bilong Jehova i go long olgeta haus long Isip. Ol haus i no gat blut long pos bilong dua, ol fesbon bilong ol i dai. Tasol ensel i abrusim ol haus i gat blut long pos bilong dua. Olgeta famili bilong Isip, maniman na rabisman, ol pikinini bilong ol i dai. Tasol no gat wanpela pikinini bilong ol Israel i dai.

Pikinini bilong Fero tu i dai. Fero i belhat nogut tru. Kwiktaim em i tokim Moses na Aron: ‘Lusim mipela. Lusim mipela na go. Go na lotuim God bilong yupela. Kisim ol animal bilong yupela na go!’

Em i ful mun, ol Israel i wokabaut lusim Isip na i go, ol i oganaisim ol long ol famili na traib. I gat 600,000 man Israel na planti meri na pikinini. Na tu, planti narapela manmeri i go wantaim ol na bai ol inap lotuim Jehova. Nau ol Israel i kamap fri!

Bilong tingim hau Jehova i bin seivim ol, ol i save mekim dispela wankain spesel kaikai long olgeta yia. Ol i kolim Pasova.