Ol Israel i lusim Maunten Sainai na wokabaut i go long ples nating bilong Paran long hap ol i kolim Kades. Long dispela hap Jehova i tokim Moses: ‘Salim 12-pela man, wanpela long wan wan traib, long spai long Kenan, dispela graun bai mi givim long ol Israel.’ So Moses i makim 12-pela man na tokim ol: ‘Go long Kenan, na painimaut sapos graun i gutpela long planim kaikai. Lukim sapos ol i strongpela lain o nogat, na sapos ol i stap long ol haus sel o long ol taun.’ Dispela 12-pela spai, i makim tu Josua na Kalep, i go long Kenan.

Bihain long 40 de, ol spai i kam bek, ol i bringim i kam ol fik, pomigranet, na ol greip. Ol i tok: ‘Graun i gutpela, tasol ol i strongpela lain na ol taun i gat ol strongpela banis.’ Na Kalep i tok: ‘Yumi inap winim ol long pait. Yumi go kwiktaim!’ Yu save wai na Kalep i tok olsem? Bikos em na Josua i trastim Jehova. Tasol tenpela narapela spai i tok: ‘Nogat! Ol manmeri i traipela longpela man! Yumi bai olsem ol grasopa i sanap klostu long ol.’

Ol Israel i bel hevi. Ol i kirap long komplein na tok long narapela narapela: ‘Yumi makim narapela hetman na go bek long Isip. Wai na yumi mas go long dispela ples na ol bai kilim yumi?’ Josua na Kalep i tok: ‘No ken sakim tok bilong Jehova, na no ken pret. Jehova bai protektim yumi.’ Tasol ol Israel i no inap harim tok. Na tu, ol i laik kilim i dai Josua na Kalep!

Jehova i mekim wanem? Em i tokim Moses: ‘Mi mekim olgeta samting bilong helpim ol Israel, tasol ol i no bihainim tok bilong mi. So ol bai stap long dispela ples drai nating inap 40 yia, na ol bai dai long hia. Josua na Kalep na ol pikinini bilong ol tasol bai stap long graun mi promis long givim long ol Israel.’

Sampela taim bihain, taim ol Israel i stap long ples nating, Kora, Datan, Abiram, na 250 narapela man i bikhet long Moses. Ol i tokim Moses: ‘Mipela inap pinis long yutupela! Wai na yu mas stap hetman bilong mipela na Aron i stap hetpris? Jehova i stap wantaim yumi olgeta, i no yu na Aron tasol.’ Jehova i no amamas. Em i tingim dispela pasin olsem ol i bikhet long em!

Moses i tokim Kora na lain bilong em: ‘Kam long haus lotu sel long tumora, na bringim ol plet bilong karim paia na putim paura bilong kamapim smok i gat gutpela smel. Jehova bai soim yumi em i bin makim husat.’

Long neks de, Kora na 250 man i go long bungim Moses long haus lotu sel. Na ol i kukim paura bilong kamapim smok i gat gutpela smel olsem ol i pris. Jehova i tokim Moses na Aron: ‘Stap longwe long Kora na lain bilong em.’

Maski Kora i go long Moses long haus lotu sel, Datan, Abiram, na ol famili bilong ol i no laik go. Jehova i tokim ol Israel long stap longwe long haus sel bilong Kora, Datan, na Abiram. Kwiktaim ol Israel i muv i go longwe. Datan, Abiram, na famili bilong ol i sanap ausait long ol haus sel bilong ol. Wantu graun i op na i daunim ol! Long haus lotu sel, wanpela paia i kam daun na kukim Kora na 250 lain bilong em.

Jehova i tokim Moses: ‘Kisim wanpela stik long hetman bilong wan wan traib, na raitim nem bilong em long en. Tasol long stik bilong traib bilong Livai, raitim nem bilong Aron. Putim ol stik insait long haus lotu sel, na plaua bai gro long stik bilong man mi makim.’

Long neks de, Moses i bringim olgeta stik i kamaut na soim long ol hetman. Ol plaua i gro long stik bilong Aron, na i gat ol almon i mau pinis. Long dispela rot, Jehova i tokaut olsem em i makim Aron long kamap hetpris.