Fes pikinini man bilong King Sol, Jonatan, em strongpela man bilong pait. Devit i tok Jonatan i spit moa winim tarangau na strong moa winim laion. Wanpela taim Jonatan i lukim 20 soldia bilong Filistia long wanpela liklik maunten. Em i tokim man i save karim ol samting bilong em long pait: ‘Yumi bai pait long ol sapos Jehova i soim wanpela sain long yumi. Sapos ol Filistia i tokim yumi long kam antap, orait nau yumi save em taim bilong pait.’ Ol Filistia i singaut: ‘Kam antap na pait!’ So tupela i go antap long maunten na pait na winim ol soldia.

Jonatan em fes pikinini bilong Sol, olsem na em inap kamap neks king. Em i save Jehova i makim Devit long kamap neks king bilong Israel; tasol em i no jeles. Jonatan na Devit i kamap gutpela pren tru. Tupela i promis long protektim na difendim narapela narapela. Jonatan i givim longpela siot, bainat, spia, na let bilong em long Devit olsem mak bilong pasin pren bilong ol.

Taim Devit i ranawe long Sol, Jonatan i go long em na tok: ‘Sanap strong, na strongim bel. Jehova i bin makim yu long kamap king. Na papa bilong mi tu i save long dispela.’ Yu laik i gat wanpela gutpela pren olsem Jonatan?

Planti taim, klostu Jonatan i lusim laip bilong em long helpim pren bilong em. Em i save King Sol i laik kilim Devit, so em i tokim papa bilong em: ‘Yu bai mekim sin sapos yu kilim Devit; em i no mekim wanpela rong.’ Sol i belhat tru long Jonatan. Sampela yia bihain, Sol na Jonatan i dai long pait.

Bihain long Jonatan i dai, Devit i wok long painim pikinini man bilong Jonatan em Mefiboset. Taim Devit i lukim Mefiboset, em i tok: ‘Papa bilong yu em gutpela pren bilong mi, olsem na mi bai lukautim yu long laip olgeta bilong yu. Yu bai stap long haus king bilong mi na kaikai long tebol bilong mi.’ Devit i no lusim tingting long pren bilong em Jonatan.

Taim Sol i dai, Devit i kamap king. Em i gat 30 krismas. Bihain long em i stap king sampela yia, wanpela nait em i stap long rup bilong haus king bilong em na lukim wanpela naispela meri. Devit i painimaut olsem nem bilong em, Batsiba, em meri bilong wanpela soldia nem bilong em Uria. Devit i salim tok long Batsiba i kam long haus king. Tupela i slip wantaim, na meri i gat bel. Devit i laik haitim samting em i mekim. Em i tokim jeneral bilong em long putim Uria long namba 1 lain long pait na ol narapela soldia i mas surik i go bek. Bihain long Uria i dai long pait, Devit i maritim Batsiba.

Jehova i lukim olgeta samting nogut i kamap. Em bai mekim wanem? Jehova i salim profet Natan i go long Devit. Natan i tok: ‘Wanpela maniman i gat planti sipsip, na wanpela rabisman i gat wanpela liklik sipsip em i laikim tumas. Dispela maniman i kisim dispela wanpela sipsip tasol bilong dispela rabisman.’ Devit i belhat na tok: ‘Dispela maniman i mas dai!’ Natan i tokim Devit: ‘Dispela maniman, em yu tasol!’ Devit i bel hevi tru, na tokaut long Natan: ‘Mi mekim sin pinis long ai bilong Jehova.’ Sin bilong Devit i bringim bikpela hevi long em na famili bilong em. Jehova i panisim Devit, tasol em i larim Devit i stap laip bikos Devit i onest na daunim em yet.

Devit i laik wokim wanpela tempel bilong Jehova, tasol Jehova i makim pikinini man bilong em, Solomon, long wokim tempel. Devit i redim ol samting bilong Solomon na tok: ‘Tempel bilong Jehova mas gutpela stret. Solomon i yangpela yet, tasol mi bai helpim em na redim ol samting.’ Devit i givim planti mani bilong em yet long mekim dispela wok. Em i painim ol saveman bilong mekim wok. Em i bungim gol na silva, na bringim ol sida long Tair na Saidon i kam. Klostu long Devit i dai, em i givim ol plan bilong wokim tempel long Solomon. Em i tok: ‘Jehova i tokim mi long raitim dispela samting bilong yu. Jehova bai helpim yu. No ken pret. Strongim bel na mekim wok.’