Long taim bilong bikpela san, Jehova i tokim Elaija: ‘Go long Sarefat. Wanpela wido long dispela hap bai givim yu kaikai.’ Long geit bilong taun, Elaija i lukim wanpela wido meri i stap rabis i bungim paiawut. Em i askim wido long givim em kap wara. Taim wido i go long kisim wara, Elaija i singaut long em: ‘Plis, bringim liklik hap bret tu i kam.’ Tasol wido i tok: ‘Mi no gat bret long givim yu. Mi gat liklik hap plaua na liklik oil bilong redim kaikai bilong mi na pikinini man bilong mi.’ Elaija i tokim em: ‘Jehova i bin promis olsem sapos yu wokim sampela bret bilong mi, plaua na oil bilong yu bai stap yet inap long taim ren i pundaun gen.’

So wido i go long haus na wokim bret bilong profet bilong Jehova. Olsem Jehova i bin promis, long taim bilong bikpela san wido na pikinini bilong em i gat kaikai. Na sospen plaua na oil bilong em i pulap yet.

Bihain wanpela bikpela hevi i kamap. Liklik boi bilong wido i sik na em i dai. Wido i askim Elaija long helpim em. Elaija i kisim liklik boi long han bilong mama na karim em i go long rum antap long haus. Elaija i slipim liklik boi long bet na i beten: ‘Jehova, plis givim laip gen long dispela pikinini.’ Yu save wai na dispela bai narakain samting long Jehova i mekim? Bikos yumi save, bipo i no gat wanpela man i bin kirap bek. Na dispela wido na pikinini bilong em i no bilong lain Israel.

Dispela boi i kisim laip gen na i kirap long pulim win! Elaija i tokim wido: ‘Lukim! Pikinini bilong yu i stap laip.’ Wido i amamas tru na em i tokim Elaija: ‘Tru tumas, yu wokman bilong God. Mi save bikos oltaim yu mekim tasol ol tok Jehova i tokim yu long mekim.’

Long windo bilong haus bilong King Ahap long Jesril, king inap lukim gaden wain bilong wanpela man nem bilong em Nabot. Ahap i laikim dispela gaden wain, na em i laik baim long Nabot. Tasol Nabot i no laik salim, bikos Lo Bilong Jehova i tambuim man long salim graun em i bin kisim long papa na tumbuna papa. Yu ting Ahap i rispektim Nabot bikos em i mekim samting i stret? Nogat. Ahap i belhat nogut tru. Em i bel hevi tru na em i no lusim betrum bilong em, na em i no laik kaikai.

Meri bilong Ahap, em kwin nogut Jesebel, i tokim em: ‘Yu king bilong Israel. Yu ken kisim wanem wanem samting yu laikim. Bai mi kisim dispela graun na givim yu.’ Jesebel i salim pas long ol hetman bilong taun na tokim ol long sutim tok long Nabot olsem em i bin tok nogut long God na ol i mas stonim em na kilim em i dai. Ol hetman i mekim samting Jesebel i tokim ol long en, na bihain Jesebel i tokim Ahap: ‘Nabot i dai pinis. Dispela gaden wain i bilong yu.’

Jesebel i kilim i dai Nabot na ol narapela man i no gat asua. Em i kilim i dai planti man i laikim Jehova. Jesebel i save lotuim ol imis na mekim ol narapela pasin nogut. Jehova i lukim olgeta pasin nogut Jesebel i bin mekim. Em bai mekim wanem long Jesebel?

Bihain long Ahap i dai, pikinini man bilong em Jehoram i kamap king. Jehova i salim wanpela man nem bilong em Jehu long panismen Jesebel na famili bilong em.

Jehu i ran long karis bilong em i go long Jesril, em ples Jesebel i stap. Jehoram i kam long karis bilong bungim Jehu na askim em: ‘I gat bel isi i stap namel long yumitupela?’ Jehu i tok: ‘I no gat bel isi bai stap sapos mama bilong yu, Jesebel, i wok yet long mekim ol pasin nogut. Jehoram i laik tanim karis na ranawe. Tasol Jehu i sutim Jehoram long banara na em i dai.

Bihain Jehu i go long haus kwin bilong Jesebel. Taim Jesebel i harim olsem Jehu bai kam, em i peintim ai na putim lip-stik, stailim gras bilong em, na wet i stap klostu long windo long rum antap. Taim Jehu i kamap, Jesebel i tok bilas na gritim Jehu. Jehu i singaut long ol wokman bilong Jesebel i sanap klostu long em: “Tromoi dispela meri i kam daun!” Ol i pusim Jesebel i go aut long windo, na em i pundaun i go daun long graun na dai.

Bihain long dispela, Jehu i kilim i dai 70 pikinini man bilong Ahap na rausim lotu bilong Bal long kantri. Yu inap lukim olsem Jehova i save long olgeta samting na long taim stret, em bai panismen ol man i mekim ol pasin nogut?