King bilong Siria, Ben-hadat, i wok long pait long Israel. Tasol olgeta taim profet Elisa i givim tok lukaut long king bilong Israel, so em inap ranawe. So Ben-hadat i tingting long kidnepim Elisa. Em i painimaut olsem Elisa i stap long taun Dotan, na em i salim ami bilong Siria long holimpasim em.

Ol Siria i kam long Dotan long nait. Long neks moning, wokman bilong Elisa i go ausait na lukim bikpela lain ami i banisim taun. Em i pret na singaut: ‘Elisa, bai yumi mekim wanem?’ Elisa i tokim em: ‘I gat bikpela lain moa i stap wantaim yumi winim lain i stap wantaim ol.’ Long dispela taim stret, Jehova i opim ai bilong wokman bilong Elisa na em i lukim ol maunten i raunim taun i pulap long ol hos na ol karis bilong pait i lait olsem paia.

Taim ol soldia bilong Siria i laik holimpasim Elisa, em i beten: ‘Jehova, plis mekim ai bilong ol i tudak.’ Bihain, ol soldia inap lukluk, tasol ol i no save ol i stap long wanem hap. Elisa i tokim ol soldia: ‘Em i no taun yupela i laik go long en. Bihainim mi, bai mi kisim yupela i go long man yupela i wok long painim.’ Ol i bihainim Elisa i go olgeta long Samaria, em hap king bilong Israel i stap.

Taim ol Siria i kamap, ol i luksave long hap ol i stap long en. King bilong Israel i askim Elisa: ‘Ating mi mas kilim ol i dai, a?’ Olsem wanem? Elisa i ting nau rot i op long bekim pasin bilong dispela lain i laik kilim em? Nogat. Elisa i tok: ‘No ken kilim ol. Givim kaikai long ol na salim ol i go.’ So king i mekim bikpela kaikai na salim ol i go bek long ples bilong ol.

Jesebel i gat pikinini meri nem bilong em Atalia, em i meri nogut olsem mama bilong em. Atalia i maritim king bilong Juda. Taim man bilong em i dai, pikinini man bilong em i mekim wok king. Tasol taim pikinini man bilong em i dai, Atalia i mekim em yet i kamap kwin bilong Juda. Bihain, em i traim long bagarapim lain famili bilong king, em i kilim i dai ol man husat inap kamap king na kisim ples bilong em, na em i kilim tu ol tumbuna pikinini man bilong em yet. Olgeta lain i pret long em.

Hetpris Jehoiada na meri bilong em, Jehoseba, i save samting Atalia i mekim i nogut tru. Ol i redi long lusim laip bilong ol na bai ol i haitim wanpela tumbuna pikinini man bilong Atalia, wanpela bebi nem bilong em Jehoas. Ol i mekim bikpela long em long tempel.

Taim Jehoas i gat 7-pela krismas, Jehoiada i bungim olgeta hetman na Livai na tokim ol: ‘Was long dua bilong tempel, na no ken larim wanpela i kam insait.’ Na Jehoiada i mekim Jehoas i kamap king bilong Juda na putim kraun long het bilong em. Ol Juda i singaut: ‘King i ken stap longpela taim!’

Kwin Atalia i harim nois bilong bikpela lain na em i hariap i go long tempel. Taim em i lukim nupela king, em i singaut: “Yupela i laik daunim mi! Yupela i laik daunim mi!” Ol hetman i holimpasim dispela kwin nogut, kisim em i go, na kilim em i dai. Tasol olsem wanem long ol manmeri i bihainim pasin nogut bilong em?

Jehoiada i helpim ol Juda long mekim wanpela kontrak wantaim Jehova na ol i promis long lotuim Em wanpela tasol. Jehoiada i tokim ol long brukim tempel bilong Bal na smesim ol imis i go liklik liklik. Em i makim ol pris na ol Livai long mekim wok long tempel so ol manmeri i ken lotu gen long dispela hap. Em i makim ol man bilong lukautim geit bilong tempel na bai ol man i no klin i no ken i go insait. Bihain Jehoiada na ol hetman i kisim Jehoas i go long haus king na putim em long sia king. Ol manmeri bilong Juda i amamas. Ol inap lotuim Jehova, nau ol i no aninit moa long kwin nogut Atalia na lotu bilong Bal. Yu lukim hau pasin bilong Jehoiada long strongim bel i helpim planti manmeri?