Wanpela nait, King Nebukatnesar i kisim narakain driman. Em i tingting planti long dispela driman so em i no inap slip. Em i singautim ol man bilong mekim mejik na tokim ol: ‘Kamapim mining bilong driman bilong mi.’ Ol i tok: ‘O king, tokim mipela long driman bilong yu.’ Tasol Nebukatnesar i tokim ol: ‘Nogat! Yupela tokim mi long driman bilong mi, sapos nogat, mi bai kilim yupela.’ Ol i tokim em gen: ‘Tokim mipela long samting yu driman, na bihain mipela bai eksplenim mining bilong en.’ King i tok: ‘Yupela olgeta i laik trikim mi. Tokim mi long driman bilong mi!’ Ol i tokim king: ‘I no gat wanpela man inap mekim dispela samting. Samting yu askim i hat moa yet.’

Nebukatnesar i belhat nogut tru na em i tok long ol i mas kilim i dai olgeta saveman long kantri. Ol i mas kilim tu Daniel, Satrak, Mesak, na Abetnego. Daniel i askim king long givim haptaim long em. Bihain em na ol pren bilong em i beten long Jehova na askim em long helpim ol. Jehova i mekim wanem?

Long rot bilong visen, Jehova i soim Daniel long driman bilong Nebukatnesar na kamapim mining bilong en. Long neks de, Daniel i go long wokman bilong king na tok: ‘No ken kilim i dai ol saveman. Mi ken kamapim mining bilong driman bilong king.’ Wokman i kisim Daniel i go long Nebukatnesar. Daniel i tokim king: ‘God i kamapim long yu samting bai kamap bihain. Dispela em driman bilong yu: Yu lukim wanpela traipela imis, het bilong dispela imis em gol, bros na tupela han em silva, bel na tupela tais em kopa, tupela lek em ain, na tupela fut bilong en em hap ain na hap graun. Bihain wanpela ston i lusim maunten na i kam paitim tupela fut bilong imis. Dispela imis i bruk i go liklik liklik na win i karim i go. Dispela ston i kamap wanpela traipela maunten, na i karamapim olgeta hap bilong graun.’

Bihain Daniel i tok: ‘Dispela em samting driman bilong yu i makim: Kingdom bilong yu em het gol. Silva i makim wanpela kingdom bai kamap bihain long yu. Na bihain bai i gat wanpela kingdom olsem kopa, em bai bosim olgeta hap bilong graun. Neks kingdom bai i strong olsem ain. Na bihain long dispela, bai i gat wanpela kingdom i bruk, sampela hap bilong en bai i strong olsem ain na sampela hap bai i no strong olsem graun. Dispela ston i kamap maunten, em Kingdom Bilong God. Dispela Kingdom bai bagarapim olgeta kingdom na em bai stap oltaim oltaim.’

Nebukatnesar i putim pes i go daun long graun long ai bilong Daniel. Em i tok: ‘God bilong yu i kamapim klia dispela driman long yu. I no gat wanpela God olsem em.’ Olsem na Nebukatnesar i no kilim Daniel, em i makim Daniel long bosim olgeta saveman na olgeta provins bilong Babilon. Yu inap lukim hau Jehova i bekim beten bilong Daniel?

Bihain liklik long King Nebukatnesar i driman long dispela imis, em i wokim wanpela traipela imis long gol. Em i sanapim dispela imis long wanpela hap bilong Dura na singautim ol bikman bilong dispela ples, na tu, Satrak, Mesak, na Abetnego, long kam bung long fran bilong imis. King i givim oda: ‘Taim yupela i harim saun bilong ol trampet, harp, na ol begpaip, orait nildaun long imis! Husat man i no nildaun, ol bai tromoi em i go insait long bikpela paia i hat nogut tru.’ Dispela 3-pela Hibru bai nildaun long dispela imis, o ol bai lotuim Jehova wanpela tasol?

Bihain king i givim oda na ol i pilaim musik. Olgeta man i nildaun na lotuim dispela imis, tasol Satrak, Mesak, na Abetnego i no mekim olsem. Sampela man i luksave na ol i tokim king: ‘Dispela 3-pela Hibru i no laik lotuim imis bilong yu.’ Nebukatnesar i salim tok long ol: ‘Mi bai givim yupela wanpela moa sans na yupela i mas lotuim dispela imis. Sapos yupela i no mekim, bai mi tromoi yupela i go insait long bikpela paia. I no gat wanpela god inap seivim yupela long mi.’ Ol i tok: ‘Mipela i no nidim narapela sans. God bilong mipela inap seivim mipela. Sapos em i no mekim olsem, O king, mipela i no inap lotuim dispela imis.’

Nebukatnesar i belhat nogut tru. Em i tokim ol wokman: ‘Hatim dispela bikpela paia i hat nogut tru, inap 7-pela taim moa, winim bilong pastaim!’ Bihain em i givim oda long ol soldia: ‘Pasim ol dispela man, na tromoi ol i go insait!’ Dispela bikpela paia i hat nogut tru, olsem na taim ol soldia i go klostu, wantu ol i dai. Dispela 3-pela Hibru i pundaun i go insait long paia. Tasol taim Nebukatnesar i lukluk i go insait, em i lukim olsem i gat 4-pela man i wokabaut insait long bikpela paia na i no 3-pela man. Em i pret na askim ol wokman: ‘Yumi bin tromoi 3-pela man i go insait long paia, a? Mi lukim 4-pela man, wanpela i luk olsem ensel!’

Nebukatnesar i go klostu long bikpela paia na singaut: ‘Kam ausait, yupela ol wokman bilong God Antap Tru!’ Olgeta i kirap nogut long lukim Satrak, Mesak, na Abetnego i wokabaut i kam ausait long bikpela paia na ol i no kisim bagarap. Paia i no kukim skin, gras, na ol klos bilong ol, na tu, i no gat smel bilong paia long ol.

Nebukatnesar i tok: ‘God bilong Satrak, Mesak, na Abetnego i gat bikpela strong. Em i salim ensel bilong em na seivim ol. I no gat wanpela god olsem God bilong ol.’

Olsem dispela 3-pela Hibru, yu tingting strong long stap gut long Jehova maski wanem samting i kamap?