Ol Referens Bilong Laip na Wok Autim Tok Miting Wok Buk
© 2025 Watch Tower Bible and Tract Society of Pennsylvania
JANUERI 5-11
GUTPELA SAVE I KAM LONG BAIBEL | AISAIA 17-20
“Em Samting Bai Painim Ol Man i Pait na Daunim Mipela”
“Kingdom Bilong Mi i No Bilong Dispela Graun”
16 Ol dispela senis ol i mekim i bikpela samting bikos em bai helpim ol long stap bel isi na pas gut wantaim ol narapela! Baibel i stori olsem ol manmeri i gat pasin olsem biksi i bruk na i pairap long nambis, na dispela biksi i no save stap isi. (Ais. 17:12; 57:20, 21; Rev. 13:1) Ol man i tok pait long sait bilong politik, na dispela i kirapim ol manmeri long brukim lain na mekim ol pait i no gat as bilong en, tasol yumi stap bel isi na stap wanbel. Jehova i lukim olsem ol manmeri bilong dispela graun i no stap wanbel, tasol em i amamas taim em i lukim olsem pasin wanbel i stap namel long ol manmeri bilong em.—Ritim Sefanaia 3:17.
Stap Gut Long Bilip Maski Ol Manmeri i Brukim Lain
4 Ating long hap yumi stap long en, wok politik i no strong tumas na em i isi long mekim lotu i tru. Klostu nau ol wok nogut bilong Satan bai pinis, olsem na ol man bai birua long yumi taim yumi no insait long ol wok politik na ol woa. Dispela graun i pulap long ol manmeri husat “i no laik kamap wanbel” na ol i gat “strongpela het,” olsem na pasin bilong brukim lain bai i go bikpela moa. (2 Tim. 3:3, 4) Long sampela kantri, wok politik i go bikpela moa na ol man i birua long ol bratasista bikos ol i no laik insait long ol dispela samting. Olsem wanem? Yu luksave olsem em i bikpela samting long yumi mas strongim bilip bilong yumi long nau bambai yumi ken stap gut long bilip long taim bilong traim? Sapos yumi no strongim bilip bilong yumi long nau, yumi inap insait long ol wok politik na ol pait, na dispela bai bagarapim pasin bilong yumi long sanap strong long bilip. Hau yumi inap redim yumi yet long stap gut long bilip long dispela taim nogut i gat pasin bilong brukim lain? Yumi ken skelim 4-pela bikpela samting we bai helpim yumi long mekim olsem.
ip-1 198 par. 20
Tok Kaunsel Bilong Jehova Long Ol Kantri
20 Wanem samting i kamap? Aisaia i tok: “Long apinun tru, i gat bikpela pret. Paslain long moning i kamap, ol birua i no stap moa. Dispela em samting bai painim ol man i pait na daunim mipela na em samting bai painim ol man i kam stilim ol samting bilong mipela.” (Aisaia 17:14) Planti i stilim ol samting long lain bilong Jehova, ol i mekim hatpela pasin na ol i no rispektim ol. Bikos ol i no—na i no laik—stap hap bilong ol bikpela lotu bilong dispela graun, ol man i tingim ol Kristen tru olsem em isi long ol tok giaman na strongpela pasin birua i daunim ol. Tasol lain bilong God i bilip olsem long “moning” ol pasin birua bai pinis, dispela haptaim i wok long kam kwiktaim.—2 Tesalonaika 1:6-9; 1 Pita 5:6-11.
Mekim Wok Painimaut
Sampela Bikpela Tok Bilong Buk Aisaia—Namba 1
20:2-5—Taim Aisaia i rausim klos na su bilong em na em i wokabaut nating, yu ting dispela i makim olsem em i stap as nating inap 3-pela yia? Nogat. Ating em i rausim longpela saket bilong em na em i pasim “liklik laplap tasol.”—1 Samuel 19:24
JANUERI 12-18
GUTPELA SAVE I KAM LONG BAIBEL | AISAIA 21-23
Ol Skul Yumi Kisim Long Sepna i Lusim Namba Bilong Em
God i Save Stretim Man Em i Laikim
7 Pasin bilong stretim man em i bikpela samting, olsem na yumi bai stori long 2-pela man em Jehova i stretim ol: Sepna i bin stap long taim bilong King Hesekia, na Graham em wanpela brata i stap long taim bilong yumi. Sepna i bin “lukautim olgeta samting bilong haus king”—i luk olsem em haus king bilong Hesekia—olsem na em i gat namba. (Ais. 22:15) Tasol sori tru, Sepna i gat pasin antap na em i laik kisim biknem. Em i wokim gutpela ples matmat bilong em yet, na em i save raun long ol “naispela karis”!—Ais. 22:16-18.
8 Sepna i mekim ol samting bilong kisim biknem, olsem na God i ‘pinisim em na rausim em long wok em i holim,’ na Eliakim i kisim ples bilong em. (Ais. 22:19-21) Dispela senis i kamap taim King Senakerip bilong Asiria i redi long i kam pait long Jerusalem. Bihain liklik, King Senakerip i salim ol namba wan ofisa bilong ami i go long Jerusalem wantaim bikpela lain ami. Ol i go bilong mekim ol tok bilong daunim na pretim ol Juda na bai Hesekia i larim ol i kam kisim taun. (2 Kin. 18:17-25) Taim Eliakim i go toktok wantaim ol dispela ofisa bilong ami, em i go wantaim tupela man. Wanpela bilong ol em Sepna nau em i mekim wok olsem kuskus. Dispela i soim olsem Sepna i no kros na bel nogut taim God i stretim em, em i daunim em yet na redi long mekim wok i no gat namba. Yumi kisim wanem skul long stori bilong Sepna? Yumi bai stori long 3-pela skul yumi kisim.
9 Namba 1, Sepna i lusim namba bilong em. Stori bilong em i truim dispela tok lukaut, “pasin bilong hambak na litimapim nem bilong yu yet bai i mekim yu i pundaun na bagarap.” (Snd. 16:18) Olsem wanem? Yu bai wok strong yet long mekim pasin daun sapos yu holim bikpela wok insait long kongrigesen? Yu bai tok tenkyu long Jehova i givim yu gutpela savetingting long mekim gut ol wok bilong Kingdom? (1 Kor. 4:7) Aposel Pol i tok: “Mi tok long olgeta man wan wan i stap namel long yupela, yu no ken ting yu nambawan tru. Tasol yupela i mas wokim tingting long pasin i soim olsem yupela i gat gutpela tingting.”—Rom 12:3.
God i Save Stretim Man Em i Laikim
10 Namba 2, taim Jehova i stretim Sepna, ating em i mekim olsem bikos em i save olsem Sepna inap lusim pasin antap na kisim pasin daun. (Snd. 3:11, 12) Long nau, ol lain i lusim ol gutpela wok insait long kongrigesen bilong God inap kisim gutpela skul long stori bilong Sepna! Ol i mas sakim pasin bilong kros na bel nogut, na givim bel yet long mekim wok bilong God maski ol senis i kamap. Ol i mas tingim olsem Jehova i stretim ol bikos em i laikim ol. Sapos yumi gat pasin daun, Papa bilong yumi bai amamas long stretim yumi na helpim yumi long senisim pasin bilong yumi. (Ritim 1 Pita 5:6, 7.) Long pasin laikim, God i save stretim stretim ol pasin bilong yumi, olsem na yumi mas redi long bihainim skul yumi kisim long em.
God i Save Stretim Man Em i Laikim
11 Namba 3, pasin Jehova i bihainim bilong stretim Sepna inap skulim ol papamama na ol elda, em ol i gat wok long stretim pikinini na ol wanbilip. Ol inap kisim wanem skul? Taim Jehova i stretim man i mekim sin, dispela i soim olsem em i laikim dispela man na em i no laikim tru pasin bilong mekim sin. Sapos yu papa o mama o wanpela elda, yu gat wok long stretim narapela. Tasol yu mas bihainim pasin bilong Jehova na heitim pasin nogut em pikinini o wanbilip i mekim, na tingim ol gutpela pasin bilong em.—Jut 22, 23.
Mekim Wok Painimaut
Sampela Bikpela Tok Bilong Buk Aisaia—Namba 1
21:1—Wanem hap i kisim nem olsem “ples nating bilong solwara”? Maski Babilon i no stap klostu long solwara, em i kisim dispela nem. Bikos long olgeta yia Wara Yufretis na Wara Taigris i save tait na ron i go long dispela hap, olsem na i gat ples tais bilong “solwara.”
JANUERI 19-25
GUTPELA SAVE I KAM LONG BAIBEL | AISAIA 24-27
“Dispela Em Bai God Bilong Mipela!”
“Lukim! Dispela Em Bai God Bilong Mipela!”
21 Olsem wanem? Yu bin lukim wanpela liklik pikinini i poin long papa bilong em na amamas wantaim na tokim ol pren bilong em olsem, “Em papa bilong mi”? I gat as tru na ol man i lotuim God i mas i gat wankain tingting long Jehova. Baibel i tok profet long wanpela taim bai kamap we ol man i stap gut long God ol bai tokaut olsem: “Lukim! Dispela em God bilong mipela!” (Aisaia 25:8, 9) Taim yu kisim bikpela save moa long ol pasin bilong Jehova, bai yu pilim moa yet olsem yu gat nambawan gutpela Papa.
Skul Yumi Kisim Long Mirakel Jisas i Wokim Long Bret
14 Taim Jisas i tok givim “bret long mipela inap long dispela de,” em i tok tu long dispela taim bai kamap bihain we laik bilong God bai “kamap long graun olsem em i save kamap long heven.” (Mat. 6:9-11) Yu piksaim wanem samting taim yu tingim dispela taim? Wanpela bilong ol samting God i laik mekim long dispela graun em long kamapim gutpela kaikai. Olsem i stret wantaim tok bilong Aisaia 25:6-8, bai i gat planti gutpela kaikai em yumi bai enjoim aninit long wok bos bilong Kingdom Bilong Jehova. Buk Song 72:16 i tok: “Bai i gat planti wit samting long graun; na antap long ol maunten, ol wit samting bai pulap.” Yu luk fowed long yusim sampela bilong ol dispela wit samting long redim feiveret bret bilong yu o traim wanpela nupela resepi? Na tu, yu bai enjoim prut bilong ol gaden wain em yu yet i planim. (Ais. 65:21, 22) Na olgeta man long graun bai enjoim ol dispela naispela kaikai.
Hau Pasin Laikim Bilong Jehova i Helpim Yumi
11 Piksaim long tingting laip bilong yu bai olsem wanem long Paradais long graun long bihain. Yu no inap tingting planti na wari long sik na dai. (Ais. 25:8; 33:24) Jehova bai givim yu olgeta samting i gutpela em yu laikim. Yu laik stadim wanem ol samting? Yu laik stadim ol kain kain animal? Yu laik lain long pilaim wanpela musik instramen? Yu laik lain long droim gut ol piksa? Long Paradais, yumi bai nidim ol fama na ol man i gat save long disainim na bildim ol haus. Na tu, bai yumi nidim ol man i gat save long planim kaikai na redim kaikai, wokim ol tul, na planim ol naispela plaua gaden samting na lukautim ol. (Ais. 35:1; 65:21) Yu bai stap laip oltaim, so yu bai gat olgeta taim long lain long mekim ol dispela wok na planti narapela skil tu.
12 Yumi bai amamas tru long welkamim bek ol lain i dai pinis em ol i kirap bek! (Apo. 24:15) Na tingim tu olsem yu bai amamas long kisim sampela save moa long Jehova taim yu lain long planti samting long kriesen em i bin wokim. (Sng. 104:24; Ais. 11:9) Na bikpela samting moa, yumi bai amamas long lotuim Jehova na bel i no inap kotim yumi long wanpela samting! Yu ting yu bai tromoi blesing bilong i stap laip oltaim long Paradais na bai yu ken “kisim amamas bilong sotpela taim tasol”? (Hib. 11:25) Nogat, yu no inap mekim olsem! Gutpela sindaun yumi bai kisim long bihain bai winim tru olgeta samting bilong graun em yumi mas lusim long nau. Tingim, Paradais long graun em samting yumi bilip na wet long en, tasol yumi no inap wet long en inap oltaim, nogat. Bihain, tru tru yumi bai stap laip long Paradais long graun. Dispela samting bai kamap tru bikos Jehova i laikim yumi tru na em i givim Pikinini bilong em olsem presen bilong helpim yumi!
Mekim Wok Painimaut
Nupela Edisen Bilong Nupela Taim Baibel Bilong 2013 Long Tok Inglis
Wai na ol i trensletim planti sapta olsem poem? Long namba 1 taim ol i raitim ol tok bilong ol Skripsa, ol i raitim planti hap bilong en long stail bilong raitim poem. Pasin bilong raitim poem long ol tokples bilong nau em olsem, ol i save yusim ol tok i gat wankain krai. Tasol taim ol i raitim poem long tok Hibru, ol i raitim wankain tok inap planti taim, na tu, ol i raitim ol tok i stap olsem oposit bilong tok ol i raitim pinis. Long tok Hibru, ol poem i no kolim ol tok i gat wankain krai, nogat, ol i stori long ol samting i kamap paslain na ol samting i kamap bihain.
Long olpela edisen, ol i raitim ol tok bilong Buk Jop na Buk Song long pasin bilong raitim ol singsing, na dispela i soim olsem em ol song bilong singim. Dispela stail i wankain long stail bilong ol poem long strongim wanpela tok na em isi long man inap tingim dispela tok. Long nupela edisen, ol i raitim ol tok bilong Buk Sindaun, Buk Solomon, na planti sapta bilong ol buk em ol profet i raitim long pasin bilong raitim ol singsing. Dispela i soim olsem long pastaim tru, ol i raitim tok bilong ol dispela buk long stail bilong raitim poem, na ol i raitim wankain tok inap planti taim, na tu, ol i raitim ol tok i stap olsem oposit bilong tok i stap paslain. Skelim tok bilong Aisaia 24:2. Olgeta wan wan tok bilong dispela ves i kolim tok i stap olsem oposit bilong tok i stap paslain long en, na tu, ol dispela tok i strongim poin olsem i no gat man bai abrusim kot bilong God. Taim man i luksave olsem wanpela hap bilong Baibel i bihainim stail bilong poem, em bai save olsem man i raitim Baibel em i no ripitim nating ol tok, nogat, em i bihainim stail bilong poem long kamapim klia tok bilong God.
Sampela taim ol man i no luksave kwik long stail bilong raitim stori na poem long tok Hibru, olsem na sampela Baibel i no bihainim stail bilong raitim poem. Ol trensleta i mas luksave long ol ves i stap olsem poem. Sampela ves i gat stail bilong poem long sait bilong toktok, ol tok piksa, ol sotpela tok i gat bikpela mining, na ol tok i klostu wankain bilong strongim wanpela poin.
JANUERI 26–FEBRUERI 1
GUTPELA SAVE I KAM LONG BAIBEL | AISAIA 28-29
Onarim Jehova Wantaim Maus na Bel Bilong Yu
ip-1 299 par. 23
Aisaia i Tokaut Long Jehova Bai Mekim“Narakain Samting Tru”
23 Ol hetman bilong lotu Juda i tokaut olsem ol i gat gutpela tingting long sait bilong bilip, tasol ol i lusim Jehova. Ol i skulim ol man long tingting kranki bilong ol long wanem samting i stret na wanem samting i no stret, ol i mekim olsem bilong givim eskius long ol samting ol i no bilip long en na ol pasin nogut bilong ol na ol i kirapim ol manmeri long mekim ol santing na nau God i no orait long ol. Long rot bilong “gutpela samting tru—narakain samting tru”—Jehova bai skelim ol pasin giaman bilong ol. Em i tok: “Ol dispela manmeri i kam klostu long mi long maus tasol, na ol i onarim mi long maus bilong ol, tasol bel bilong ol i stap longwe long mi; na tok bilong ol man em ol i bin kisim skul long en, dispela i as na ol i pret long mi. Olsem na mi dispela Man tasol bai mekim gen ol gutpela samting tru long ol dispela manmeri, ol narakain samting tru; na savetingting bilong ol saveman bilong ol bai pinis, na ol man bilong ol i gat gutpela tingting, pasin bilong ol long kliagut long ol samting bai pinis.” (Isaiah 29:13, 14) Savetingting ol Juda yet i kamapim na pasin bilong ol long kliagut bai pinis taim Jehova i yusim Bikpela Gavman Babilon long pinisim tru ol lotu apostet. Wankain samting i kamap long taim bilong ol aposel bihain long ol hetman bilong lotu Juda husat i tingim ol yet olsem ol i saveman i kisim ol manmeri i go longwe long God. Wankain samting bai kamap long taim bilong yumi long lotu Kristendom.—Matyu 15:8, 9; Rom 11:8.
I No Gat Wanpela Samting Inap Pundaunim Stretpela Man
7 Jisas i strongim bel na tokaut olsem God i no orait long ol pasin bilong lotu em ol man i bihainim long taim bilong em. Olsem, em i tokaut olsem ol Farisi em ol man bilong tupela maus bikos ol i tingim pasin bilong wasim han olsem bikpela samting moa winim pasin bilong lukautim ol papamama bilong ol. (Mat. 15:1-11) Ating ol disaipel bilong Jisas i kirap nogut long tok bilong em. So ol i askim em olsem: “Yu save olsem tok bilong yu i bagarapim bel bilong ol Farisi?” Na Jisas i bekim tok bilong ol olsem: “Olgeta diwai Papa bilong mi long heven i no bin planim long gaden, em bai kamautim. Larim ol. Ol i aipas na ol i laik soim rot. Olsem na sapos wanpela aipas i soim rot long narapela aipas, orait tupela wantaim bai pundaun long hul.” (Mat. 15:12-14) Maski ol hetman bilong lotu i belhat long ol tok Jisas i mekim, dispela i no pasim em long tokaut long tok i tru.
Stap Olsem Gest Bilong Jehova Inap Oltaim!
8 Ol manmeri em ‘long bel ol i save mekim tok tru oltaim,’ ol i no save giaman long bihainim ol lo bilong God long ai bilong ol man na long pasin hait ol i wok long brukim ol lo bilong God. (Ais. 29:13) Ol i save sakim pasin bilong hait na mekim rong. Man i save hait na mekim rong, em inap holim tupela tingting long savetingting i stap long sampela lo bilong Jehova. (Jems 1:5-8) Em inap sakim tok bilong Jehova long ol samting we em i no tingim olsem bikpela samting tumas. Na bihain, taim i no gat hevi i kamap long pasin bilong em long sakim tok, dispela inap kirapim em long brukim sampela moa lo bilong God, na dispela inap nogutim pasin bilong em long lotuim Jehova. (Ekl. 8:11) Tasol yumi laik mekim onest pasin long olgeta samting.
Mekim Wok Painimaut
it “Ariel” par. 1; it “Ariel” No. 3
Ariel
(Arʹi·el) [Ples Paia Bilong Alta Bilong God; o, Laion Bilong God].
3. Wanpela narakain nem i makim Jerusalem long Aisaia 29:1, 2, 7. Jerusalem em ples we tempel bilong God i stap na insait long en i gat alta bilong givim sakrifais. Em risen na dispela taun i stap olsem ples paia bilong alta bilong God. Na tu, em inap stap olsem ples bilong mekim lotu i klin long Jehova. Tasol Aisaia 29:1-4 i kamapim ol tok i makim olsem hevi bai kamap na em i tokaut long bagarap bai kamap long Jerusalem long taim Babilon i kam bagarapim em long 607 B.C.E., taim em i stap “ples paia bilong alta” long narapela kain wei, olsem wanpela taun blut i kapsait na paia i kukim ol samting na ples i pulap long bodi bilong ol man i dai long bikpela bagarap em paia i kamapim. Ol samting i kamapim dispela bikpela bagarap i stap long ves 9 i go 16. Tasol Aisaia 29:7, 8, i soim olsem ol kantri i kamapim kain bagrap long Jerusalem bai i no inap kamapim samting ol i laik mekim.
FEBRUERI 2-8
GUTPELA SAVE I KAM LONG BAIBEL | AISAIA 30-32
Painim Ples Hait Aninit Long Wing Bilong Jehova
Jehova Em i Ples Hait Bilong Yumi
7 Jehova em i ples hait bilong yumi, olsem na yumi kisim strong long dispela tok: “Bai em i karamapim yu gut, olsem kakaruk i karamapim ol pikinini long wing bilong en. Yu ken hait gutpela tumas aninit long wing bilong Bikpela, na bai em i was long yu. Em i no save giaman long lukautim yu. Olsem na yu ken i stap wantaim Bikpela, olsem man i hait baksait long hap plang bilong pait.” (Song 91:4) God i save lukautim yumi, olsem pisin i save flai antap long ol pikinini bilong en bilong was long ol. (Aisaia 31:5) ‘Em i karamapim yumi gut long wing bilong en.’ Long wing bilong en, pisin i save karamapim ol pikinini, na bai birua i no ken kisim ol. Olsem ol pikinini pisin, yumi save stap gut aninit long “wing” bilong Jehova, long wanem, yumi bin kam na painim ples hait insait long oganaisesen Kristen tru bilong em.—Rut 2:12; Song 5:1, 11.
Jehova Bai Helpim Yu Long Taim Bilong Hevi
13 Samting yumi mas mekim. Sakim pasin bilong stap yu yet. Taim yumi no bung wantaim ol narapela, dispela inap mekim yumi tingting long yumi yet tasol na ol hevi yumi wok long karim. Na dispela inap stiaim yumi long mekim ol disisen i no stret. (Prov. 18:1) Em tru olsem sampela taim yumi mas stap yumi yet, na moa yet taim yumi karim wanpela hevi. Tasol sapos yumi stap wanpis na yumi no bung wantaim ol narapela inap longpela taim tru, yumi inap sakim rot em Jehova i yusim bilong sapotim yumi. So maski em i hatwok tru long mekim olsem long taim bilong hevi, kisim helpim long ol wanfamili bilong yu, ol pren bilong yu, na ol elda. Tingim ol olsem helpim em Jehova i givim bilong sapotim yu.—Prov. 17:17; Ais. 32:1, 2.
‘Em Bai Helpim Yupela Long Stap Strong Yet’
19 Olsem wanem yu ken strongim bilip bilong yu long ol samting bai kamap bihain? Olsem, sapos yu bilip na wet long stap laip oltaim long graun, orait ritim ol stori Baibel i mekim long Paradais na tingim tingim long bel. (Ais. 25:8; 32:16-18) Piksaim long tingting laip bai olsem wanem long nupela taim. Piksaim yu yet long Paradais. Yu lukim husat? Yu harim wanem ol saun? Yu pilim olsem wanem? Bilong kirapim laik bilong yu long piksaim ol samting long tingting, lukim ol piksa bilong Paradais i stap long ol pablikesen bilong yumi o watsim ol musik vidio olsem The New World to Come, Just Around the Corner, o Imagine the Time. Sapos oltaim yumi piksaim long tingting nupela taim, yumi bai tingim olsem ol hevi bilong yumi ol i bilong “sotpela taim na ol i no bikpela tumas.” (2 Kor. 4:17) Jehova i opim rot long yu inap bilip na wet long ol gutpela samting i kamap bihain, na dispela i ken strongim yu.
Mekim Wok Painimaut
it “Bret” par. 6
Bret
Tok Piksa. Ol i yusim dispela tok “bret,” long Baibel bilong tok piksa long planti samting. Olsem, Josua na Kalep i tokim lain Israel i kam bung olsem ol manmeri bilong Kenan “i olsem bret long yumi,” ating dispela i makim olsem em isi long ol bai daunim ol na samting i painim ol bai strongim lain Israel. (Nam 14:9) God i no orait long ol na bikpela bel sori i kamap olsem i stap long Buk Song 80:5, em i stori long Wasman Bilong Israel, Jehova: “Yu mekim aiwara bilong ol i kamap olsem bret bilong ol.” Na tu, em i tok long Jehova olsem em i givim lain bilong em “bikpela hevi olsem bret yu kaikai na em bai larim ol narapela i daunim yu olsem wara yu dring,” i klia tru olsem em i makim samting bai painim ol taim ol i stap kalabus na dispela bai kamap planti taim long ol olsem bret na wara.—Ai 30:20.
FEBRUERI 9-15
GUTPELA SAVE I KAM LONG BAIBEL | AISAIA 33-35
“Em Tasol i Save Mekim Yupela i Stap Gut”
Jehova Bai Helpim Yu Long Taim Bilong Hevi
7 Hatwok bilong en. Taim yumi karim wanpela bikpela hevi, filings, tingting, na pasin bilong yumi bai senis senis na bai yumi no inap stap isi. Yumi inap pilim olsem ol tingting na filings bilong yumi i sakim yumi i go i kam wankain olsem ol weiv long solwara i sakim wanpela sip i go i kam. Ana em yumi stori pinis long em, em i tok bel na tingting bilong em i no stap isi bihain long Luis i dai. Em i tok: “Sampela taim mi save bel hevi nogut tru na mi save sori long mi yet. Na mi save belhat tu olsem em i lusim mi.” Na tu, Ana i pilim olsem em i stap wanpis, na em i no amamas long mekim ol disisen long ol samting em pastaim Luis i save mekim disisen long ol. Sampela taim, em i pilim olsem em i stap long solwara na i gat bikpela win na ren. Olsem wanem Jehova i save helpim yumi taim ol kain tingting na filings olsem i daunim yumi tru?
8 Hau Jehova i helpim yumi. Em i tok promis olsem em bai mekim yumi stap gut. (Ritim Aisaia 33:6.) Taim wanpela sip i ron long solwara na bikpela win i sakim strong dispela sip long wanpela sait i go long narapela sait, dispela inap kamapim bikpela hevi. Bilong sip i ken stap isi na win i no ken sakim em i go i kam, em i gat ol spesel pul long sait sait bilong en we i save kam ausait aninit long wara. Ol dispela pul i helpim sip bambai strongpela win na ren i no ken sakim sip i go i kam, na bai ol pasindia long sip i stap seif na ol i no kisim bagarap. Tasol ol dispela pul i save wok gut taim sip i wok long ron i go na em i no stap tasol long wanpela hap. Olsem tasol, Jehova bai strongim yumi taim yumi stap gut long em na mekim yet wok bilong em taim yumi bungim ol bikpela hevi.
Amamas Yet Taim Yu Sanap Strong na Karim Ol Hevi
10 Rot bilong stretim: Askim Jehova long givim yu savetingting. Sapos yumi laik karim hevi na stap amamas yet, pastaim yumi mas beten askim Jehova long givim yumi savetingting yumi nidim bilong mekim ol gutpela disisen. (Ritim Jems 1:5.) Yumi ken mekim wanem sapos yumi pilim olsem Jehova i no bekim hariap beten bilong yumi? Jems i tok yumi mas “wok yet long askim” God. Jehova i no inap kros sapos yumi wok yet long askim em long givim yumi savetingting. Em i no inap belhat long yumi. Papa bilong yumi long heven i save “amamas long givim” yumi savetingting taim yumi beten na askim em long givim yumi savetingting bilong karim ol hevi. (Sng. 25:12, 13) Em i lukim ol hevi yumi karim, em i pilim tru bel hevi bilong yumi, na em i redi long helpim yumi. Tru trumas, dispela i ken mekim yumi amamas! Tasol long wanem rot Jehova i save givim yumi savetingting?
11 Jehova i save givim yumi savetingting long rot bilong Baibel. (Prov. 2:6) Bilong kisim dispela savetingting, yumi mas stadi long Baibel na ol buk na nius em tok bilong ol i kam long Baibel. Yumi mas kisim save, na i no dispela tasol, yumi mas mekim sampela samting moa. Yumi mas larim savetingting bilong God i stiaim yumi taim yumi bihainim ol tok yumi stadi long en. Jems i tok: “Yupela i mas kamap ol man bilong bihainim tok, na no ken kamap man bilong harim nating tasol.” (Jems 1:22) Taim yumi bihainim ol tok bilong God, yumi bai kisim moa yet pasin bilong stap bel isi, wokim gut tingting, na pasin marimari. (Jems 3:17) Ol dispela pasin i helpim yumi long karim wanem wanem ol hevi i painim yumi na yumi holimpas yet amamas bilong yumi.
ip-1 352-355 par. 21-22
“I No Gat Wanpela Man i Stap Long Dispela Ples Bai Tok: ‘Mi Sik’”
21 Tasol tok profet bilong Aisaia bai kamap tru long nau. Lain bilong Jehova long nau i amamas olsem ol i pas gut wantaim em. Ol i stap fri long ol bilip olsem man i dai pinis i gat spirit i no save dai, God Triwan, na helpaia. Ol i kisim tok long stretpela pasin, olsem na ol i stap fri long ol pasin i no klin na dispela helpim ol long mekim ol gutpela disisen. Na long rot bilong pe bilong baim bek man em Jisas Krais i givim, ol inap stap klin long ai bilong God na ol i amamas olsem maus bilong bel bilong ol i stap klin. (Kolosi 1:13, 14; 1 Pita 2:24; 1 Jon 4:10) Taim ol i pas gut wantaim God, dispela i helpim ol tu long sait bilong helt. Olsem, sakim pasin pamuk na pasin bilong smok tabak, dispela i lukautim ol Kristen long ol sik bilong pamuk na sampela kain sik kensa.—1 Korin 6:18; 2 Korin 7:1.
22 Na tu, i gat bikpela truim bilong tok bilong Aisaia 33:24 bihain long Armagedon, long nupela taim God bai kamapim. Aninit long wok bos bilong Kingdom Bilong Mesaia, ol manmeri bai i gat gutpela helt, na tu ol bai pas gut wantaim God. (Revelesen 21:3, 4) Bihain tasol long dispela graun Satan i bosim i bagarap, ol mirakel Jisas i mekim long taim em i stap long graun bai kamap long olgeta hap. Aipas bai lukluk gen, yaupas bai harim toktok, lek nogut bai wokabaut gen! (Aisaia 35:5, 6) Dispela bai opim rot long olgeta manmeri i abrusim bagarap long taim bilong traipela hevi tru long insait long bikpela wok bilong mekim dispela ples i kamap paradais.
Mekim Wok Painimaut
Wokabaut Yet Long “Bikrot Bilong Pasin Holi”
8 Sampela inap ting olsem, ‘Em gutpela long save long dispela, tasol hau ol samting i bin painim ol Juda long bipo tru i ken helpim yumi long nau?’ Samting i bin painim ol i ken helpim yumi, long wanem, i olsem yumi wokabaut long “Bikrot Bilong Pasin Holi.” Maski yumi insait long ol Kristen em God i bin makim o yumi bilong “ol arapela sipsip,” yumi mas wokabaut yet long “Bikrot Bilong Pasin Holi” we i bringim yumi i go long paradais bilong bilip long nau, na em bai bringim yumi i go kisim ol blesing aninit long Kingdom long bihain. (Jon 10:16) Kirap long 1919 C.E. na i kam inap long nau, planti milion man, meri, na ol pikinini i lusim Bikpela Babilon, em olgeta lotu giaman, na ol i kirap wokabaut long dispela bikrot. Yu tu wanpela bilong ol. Dispela bikrot i bin op sampela handret yia i go pinis, tasol wok bilong redim dispela bikrot i kirap planti handret yia paslain.
FEBRUERI 16-22
GUTPELA SAVE I KAM LONG BAIBEL | AISAIA 36-37
“No Ken Pret Long Ol Dispela Tok Yu Harim”
it “Hesekia” No. 1 par. 14
Hesekia
Senakerip i No Daunim Jerusalem. Senakerip i truim samting Hesekaia i ting bai kamap, Senakerip i tingting strong long go pait long Jerusalem. Taim Senakerip na ami bilong em i banisim strongpela taun Lakis, em i salim hap ami bilong em i go wantaim ol kepten bilong ami long tokim lain long Jerusalem olsem ol i mas kamap wanbel gen wantaim em. Man i stap olsem mausman bilong ol em Rabsake (dispela i no nem bilong em, tasol em biknem em i kisim long ami), i save mekim gut tok Hibru. Long strongpela nek em i tok bilas long Hesekaia na Jehova, em i tok hambak olsem Jehova bai i no inap kisim bek Jerusalem wankain olsem ol god bilong ol narapela kantri i no bin seivim kantri bilong ol man i lotuim ol long han bilong king bilong Asiria.—2Ki 18:13-35; 2St 32:9-15; Ai 36:2-20.
ip-1 387 par. 10
Gutpela Samting i Kamap Long Pasin Bilong King Long Bilip
10 Bihain Rabsake i tokim ol Juda olsem lain ami bilong ol i nogat strong. Na em i mekim dispela tok bikhet: “Bai [mi] givim 2,000 hos long yupela na bai yumi lukim sapos yupela inap painim ol man bilong sindaun long ol dispela hos o nogat.” (Aisaia 36:8) Tasol tru tru, yu ting namba bilong ol man ol Juda i trenim bilong ron long hos i bikpela samting? Nogat, strongpela ami bilong ol Juda i no inap kisim bek ol Juda. Provep 21:31 i kamapim klia dispela: “Ol i redim pinis ol hos long de bilong mekim pait, tasol Jehova wanpela tasol i ken kisim bek ol man.” Bihain Rabsake i tok blesing bilong Jehova i stap wantaim ol Asiria, i no ol Juda. Olsem na em i tok, ol Asiria inap i go insait long teritori bilong ol Juda.—Aisaia 36:9, 10.
ip-1 388 par. 13-14
Gutpela Samting i Kamap Long Pasin Bilong King Long Bilip
13 Long taim Rabsake i go bilong pait na i mekim ol tok bilong kirapim kros, em i kamapim narapela tok gen. Em i tok lukaut long ol Juda long no ken bilipim tok bilong Hesekaia sapos em i tok: “Jehova bai kisim bek yumi.” Rabsake i tokim ol Juda olsem ol god bilong ol Samaria i no bin pasim ol Asiria long daunim 10-pela traib. Na wanem ol god bilong ol narapela kantri em ol Asiria i daunim? Em i tok: “We stap ol god bilong Hamat na Arpat? Na we stap ol god bilong Sefarvaim? Ol i bin kisim bek Samaria long han bilong mi tu o nogat?”—Aisaia 36:18-20.
14 Em tru olsem Rabsake, em man i save lotuim ol giaman god, i no save olsem i gat samting i no wankain namel long ol apostet bilong Samaria na Jerusalem aninit long wok bos bilong Hesekia. Ol giaman god bilong Samaria i nogat strong long seivim 10-pela traib kingdom. (2 King 17:7, 17, 18) Tasol Jerusalem i stap aninit long wok bos bilong Hesekia i givim baksait long ol giaman god na i lotuim gen Jehova. Maski i olsem, 3-pela mausman bilong lain Juda i no tokim Rabsake long dispela. “Ol i stap isi na ol i no bekim wanpela tok long em, long wanem, king i bin tokim ol olsem, ‘Yupela i no ken bekim tok bilong em.’” (Aisaia 36:21) Eliakim, Sepna, na Joa i go bek long Hesekia na tokim em long ol tok Rabsake i mekim.—Aisaia 36:22.
Mekim Wok Painimaut
it “Hap Ain Long Maus Bilong Hos” par. 4
Hap Ain Long Maus Bilong Hos
Jehova i tokim King Senakerip bilong Asiria: “Mi bai putim huk bilong mi insait long nus bilong yu na bai mi kisim hap ain i save stap long maus bilong hos na pasim long maus bilong yu, na mi bai pulim yu i go bek long dispela rot yu bin kam long en.” (2Ki 19:28; Ai 37:29) I no long laik bilong em, tasol long han bilong Jehova, Senakerip i no go pait long Jerusalem, nogat, em i go bek long Ninive, na bihain tupela pikinini man bilong em yet i kilim em i dai long bainat. (2Ki 19:32-37; Ai 37:33-38) Jehova i putim hap ain long maus bilong ol birua bilong em i makim wankain pasin we ol animal i larim ol narapela i kontrolim ol bikos long hap ain long maus bilong ol.—Ai 30:28.
FEBRUERI 23–MAS 1
GUTPELA SAVE I KAM LONG BAIBEL | AISAIA 38-40
“Olsem Wanpela Wasman Bilong Sipsip, Em Bai Lukautim Gut Ol Sipsip Bilong Em”
Baibel i Kamapim Klia Man i As Bilong Ol Tok Bilong En
3 Ritim Aisaia 40:8. Tok Bilong God i bin stiaim rot bilong ol bilipman na meri inap planti tausen yia. Olsem wanem dispela samting i kamap? Em gutpela askim, long wanem, long bipo tru ol i bin raitim ol tok bilong Baibel long ol samting we inap bagarap, olsem na i no gat wanpela bilong ol dispela rait bilong bipo i stap yet i kam inap long nau. Tasol Jehova i kirapim ol man long raitim planti kopi bilong dispela Ol Rait Holi. Ol dispela man bilong raitim ol kopi ol i no gutpela olgeta, tasol ol i was gut tru na raitim gut ol kopi. Wanpela saveman i tok long Ol Skripsa Hibru olsem: “I no gat wanpela buk bilong bipo em ol i bin raitim stret olgeta tok bilong en na ol wankain tok i stap i kam inap long nau.” So maski bikpela haptaim i lus, ol samting ol i yusim i save bagarap hariap, na ol man i no gutpela olgeta i bin raitim ol kopi bilong en, yumi ken bilip tru olsem ol tok yumi ritim long Baibel i kamapim tingting bilong Jehova, em Man i As bilong ol tok bilong en.
4 Jehova em i As bilong “olgeta gutpela presen na olgeta presen i nambawan tru.” (Jems 1:17) Baibel em nambawan gutpela presen tru Jehova i bin givim long yumi. Taim wanpela i givim presen long yumi, dispela i kamapim klia olsem em i save gut long yumi na em i save long ol samting yumi nidim. Dispela em i wankain tu long Man i givim Baibel long yumi. Taim yumi skelim gut dispela presen, yumi save gut moa long Jehova. Yumi lainim olsem em i save gut long yumi na em i save long ol samting yumi nidim. Long dispela atikol, yumi bai stori long hau Baibel i kamapim klia 3-pela pasin bilong Jehova em savetingting, stretpela pasin, na pasin laikim bilong em. Pastaim, yumi ken stori long ol rot em Baibel i kamapim klia savetingting bilong God.
Strong Bilong Lukautim Ol Man—“God Em i Ples Hait Bilong Yumi”
7 Taim Jehova i tok em i olsem wasman bilong sipsip, em i strongim yumi long bilip olsem em i gat laik tru long lukautim yumi. (Esekiel 34:11-16) Tingim tok Aisaia 40:11 i mekim long Jehova, em Sapta 2 bilong dispela buk i stori long en. Em i tok: “Olsem wanpela wasman bilong sipsip, em bai lukautim gut ol sipsip bilong em. Em bai bungim ol pikinini sipsip long han bilong em, na em bai karim ol long bros bilong em.” Olsem wanem liklik sipsip inap i stap long “bros” bilong wasman—olsem insait long klos bilong em klostu long bros? Ating sipsip i kam klostu long wasman na subim lek bilong em liklik. Tasol wasman yet i mas lindaun na apim pikinini sipsip long pasin isi na putim em gut long bros bilong em. Dispela i makim gut laik bilong Bikpela Wasman bilong yumi long banisim na lukautim yumi!
“Bikpela i Save Strongim Ol Man i No Gat Strong”
4 Ritim Aisaia 40:26. I no gat man inap kaunim ol sta long ples antap. Ol saientis i ting olsem Milkiwe galaksi i gat 4 handret bilion sta. Jehova i givim nem long wan wan bilong ol. Yumi kisim wanem skul long dispela? Jehova i tingim tru ol samting em i wokim, olsem na em bai tingim tru yumi ol man husat i laikim em na mekim wok bilong em! (Sng. 19:1, 3, 14) Papa bilong yumi i save gut tru long yumi wan wan. ‘Em i kaunim pinis olgeta gras long het bilong yumi.’ (Mat. 10:30) Man bilong raitim song i tok: “Bikpela i save was gut long ol manmeri i bihainim tok bilong em.” (Sng. 37:18) Em i tingim tru ol hevi i painim yu, na em bai helpim yu long sanap strong na karim hevi.
5 Ritim Aisaia 40:28. Jehova i gat olgeta strong. Tingim strong bilong san. Saveman David Bodanis i tok: “Strong san i kamapim insait long wan wan seken em inap olsem planti bilion atomik bom i pairap.” Narapela saveman i mekim wok painimaut na i tok olsem: “Strong bilong san insait long wan wan seken inap mekim wok bilong helpim ol man insait long 2 handret tausen yia”! Yumi ken bilip tru olsem Man i givim strong long san inap strongim yumi long karim ol hevi i painim yumi.
6 Ritim Aisaia 40:29. Taim yumi mekim wok bilong Jehova, dispela i givim bikpela amamas long yumi. Jisas i tokim ol disaipel: “Karim hap plang bilong mi.” Na em i tok moa: “Yupela bai kisim nupela strong. Hap plang bilong mi i gutpela na samting mi askim yupela long karim i no hevi.” (Mat. 11:28-30) Dispela tok em i tru olgeta! Sampela taim yumi pilim olsem yumi taiet long go long miting o autim tok. Tasol taim yumi kam bek long haus, yumi pilim olsem yumi kisim nupela strong, na dispela i helpim yumi long karim ol hevi i painim yumi. Tru tumas, hap plang bilong Jisas i gutpela!
Mekim Wok Painimaut
ip-1 400 par. 7
“Mekim Isi Bel Bilong Ol Manmeri Bilong Mi”
7 Truim bilong dispela tok profet i kamap long taim ol i wokim gen Jerusalem long 550 B.C.E. samting. Tasol i gat narapela truim bilong dispela tok profet long taim bilong ol aposel. Jon Bilong Baptais em nek bilong wanpela man long “ples nating i wok long singaut,” na dispela i truim tok bilong Aisaia 40:3. (Luk 3:1-6) Spirit holi i kirapim Jon long truim tok bilong Aisaia. (Jon 1:19-23) Kirap long 29 C.E., Jon i redim rot bilong Jisas Krais. Tokaut Jon i mekim long pastaim i kirapim ol manmeri long putim tingitng i go long Mesaia, na dispela i helpim ol long harim tok bilong em na bihainim em. (Luk 1:13-17, 76) Long rot bilong Jisas, Jehova inap opim rot long lain husat i hevi long ol popaia bilong ol long ol inap stap fri, em samting Kingdom Bilong God tasol bai kamapim—kisim bek ol long kalabus bilong sin na dai. (Jon 1:29; 8:32) Tok bilong Aisaia i gat bikpela truim bilong en long taim God i kisim bek lain Israel bilong em long Bikpela Babilon long 1919 na long kamapim gen lotu i tru.