Narapela king bilong Babilon em Darius bilong Midia. Darius i luksave olsem Daniel i narapela kain. Olsem na em i makim Daniel long bosim ol bikman long dispela kantri. Ol dispela man i jeles long Daniel na ol i laik kilim em i dai. Ol i save olsem Daniel i save beten long Jehova 3-pela taim long olgeta de, olsem na ol i tokim Darius: ‘O king, i mas i gat lo olsem olgeta i mas beten long yu wanpela tasol. Man i sakim lo ol i mas tromoi em i go long hul i pulap long ol laion.’ Darius i wanbel long dispela tingting, na em i sainim dispela lo.

Taim Daniel i harim tok bilong nupela lo, kwiktaim em i go long haus bilong em. Long fran bilong windo i op i stap, em i brukim skru na beten long Jehova. Ol dispela jeles man i spit i go insait long haus na lukim em i beten i stap. Ol i ran i go long Darius na tok: ‘Daniel i sakim tok bilong yu. Em i save beten long God 3-pela taim long olgeta de.’ Darius i laikim Daniel na em i no laik bai em i dai. Long de olgeta em i tingting long rot bilong seivim Daniel. Tasol king tu i no inap senisim wanpela lo em i sainim pinis. Em i tokim ol wokman long tromoi Daniel long hul i gat ol laion i redi long kaikai man.

Long dispela nait, Darius i wari long Daniel na em i no inap slip. Long moning, em i ran i go long dispela hul na i singautim Daniel: ‘God bilong yu i bin kisim bek yu?’

Darius i harim wanpela nek. Em nek bilong Daniel! Em i singaut long Darius: ‘Ensel bilong Jehova i pasim maus bilong ol laion. Ol laion i no bagarapim mi.’ Darius i amamas tru! Em i tokim ol long pulim Daniel i kam aut long hul. I no gat wanpela mak long skin bilong Daniel. Bihain king i givim oda: ‘Tromoi ol man husat i bin sutim tok long Daniel i go insait long dispela hul.’ Taim ol i tromoi ol i go insait long hul, ol laion i brukbrukim bodi bilong ol.

Darius i tokim ol manmeri bilong em: ‘Olgeta man i mas pret na rispek long God bilong Daniel. Em i kisim bek Daniel long ol laion.’

Yu save beten long Jehova long olgeta de, wankain olsem Daniel?

Esta em meri Juda na em i stap long taun Susan long Persia. Planti yia i go pinis, Nebukatnesar i kisim famili bilong em long Jerusalem i kam long dispela hap. Kasen bilong em Mordekai, em wokman bilong King Ahasuerus bilong Persia, em i mekim bikpela long Esta.

King Ahasuerus i laikim nupela kwin. Ol wokman bilong em i bringim ol naispela meri long olgeta hap bilong kantri i kam, na Esta tu. Namel long olgeta meri, king i makim Esta long kamap kwin. Mordekai i tokim Esta long no ken tokaut olsem em i meri Juda.

Haman em man i gat pasin antap, em i stap bos bilong olgeta bikman. Em i laik bai olgeta man i brukim skru long em. Modekai i no laik mekim olsem, so Haman i belhat tru na i laik kilim em i dai. Taim Haman i painimaut olsem Mordekai i bilong lain Juda, em i wokim plen long kilim i dai olgeta Juda long dispela kantri. Em i tokim king: ‘Ol Juda i lain nogut; yu mas rausim ol.’ Ahasuerus i tok: ‘Wanem samting yu laik mekim, mekim tasol,’ na em i givim strong long Haman long kamapim wanpela lo. Haman i putim wanpela lo olsem ol manmeri i mas kilim i dai olgeta Juda long de namba 13 bilong mun Adar. Na Jehova i lukim olgeta dispela samting.

Esta i no save long dispela lo. So Mordekai i salim kopi bilong lo i go long Esta na tokim em: ‘Go na toktok long king.’ Esta i tok: ‘Sapos wanpela man i go long laik bilong em long lukim king na king i no singautim em, ol bai kilim em i dai. King i no bin singautim mi inap 30 de! Tasol mi bai go. Sapos em i makim mi long stik king bilong em, bai mi stap laip. Sapos no gat, mi bai i dai.’

Esta i go long haus bilong king. Taim king i lukim Esta, em i holim stik king bilong em na makim Esta. Em i go na king i askim em: ‘Yu laikim wanem samting, Esta?’ Esta i tok: ‘Mi laik singautim yu na Haman long kam long wanpela bikpela kaikai.’ Long dispela bikpela kaikai, Esta i singautim tupela long namba 2 bikpela kaikai. Long dispela namba 2 bikpela kaikai, king i askim gen Esta: ‘Yu laikim wanem samting?’ Em i tok: ‘Wanpela man i laik kilim mi na lain bilong mi i dai. Plis seivim mipela.’ King i askim: ‘Husat dispela man i laik kilim yu i dai?’ Esta i tok: ‘Dispela man nogut Haman.’ Ahasuerus i belhat nogut tru na em i tokim ol long kilim i dai Haman long dispela taim stret.

Tasol i no gat wanpela man inap rausim lo Haman i putim, king tu i no inap. So king i makim Mordekai long bosim ol bikman na givim namba long em long kamapim nupela lo. Mordekai i kamapim wanpela lo olsem ol Juda inap difendim ol yet taim ol narapela i laik mekim nogut long ol. Long de namba 13 bilong mun Adar, ol Juda i daunim ol birua bilong ol. Kirap long dispela taim, ol i save mekim bikpela kaikai long olgeta yia bilong tingim dispela.