As na Mipela i No Rausim Bel

VICTORIA, em yumi bin stori long em long namba wan stori, em i tokim boipren bilong em, Bill, olsem em i no inap rausim bel. Victoria i tok: “Mi pilim olsem i gat wanpela laip i stap insait long mi. Mi luksave olsem sapos mi stap yet wantaim Bill, em i no inap helpim mi taim pikinini i stap yet long bel, olsem na mi lusim em.”

Tasol bihain Bill i senisim tingting na askim Victoria long maritim em. I hatwok tru long lukautim nupela pikinini man bilong tupela. Victoria i tok: “Mipela i no gat planti samting, mipela i no gat ka, no gat mani, na liklik klos tasol. Bill i mekim wok mani, tasol em i kisim liklik pe tasol, na mipela i stap long liklik haus i no gat ol gutpela samting long en, tasol mipela i no givap.”

Ol narapela tu i bin bungim ol bikpela hevi, long wanem, ol i no bin tingting long kamapim pikinini. Tasol ol tu i no bin rausim pikinini i stap long bel. Wanem samting i bin strongim tingting bilong ol long karim hevi na lukautim pikinini em ol i no bin tingting long kamapim? Samting i helpim ol em olsem, ol i bin bihainim ol gutpela savetok bilong Baibel.

No Ken Hariap​—⁠Tingting Gut Pastaim

Baibel i tok: “Ol man bilong wok ol i save tingting gut na mekim wok, olsem na wok bilong ol i kamap gutpela na ol i gat planti samting. Tasol sapos ol man i hariap tumas long mekim wok, bai wok bilong ol i no kamap gutpela na ol bai i sot long ol samting.”​—⁠Sindaun 21:⁠5.

Connie em i mama bilong tripela pikinini man, na wanpela bilong ol i gat bagarap long bodi, olsem na Connie i no laik kamapim narapela pikinini gen. Em i tok: “Mi no laik lukautim wanpela moa pikinini. Olsem na mipela i tingting long rausim dispela pikinini i stap long bel.” Tasol paslain long em i hariap long mekim disisen, em i toktok wantaim Kay, wanpela wanwok bilong em. Kay i helpim em long luksave olsem pikinini i stap long bel, em i gat laip, na dispela i senisim tingting bilong Connie.

Tasol Connie i mas i gat wanpela bilong helpim em long wokim tingting long ol samting em bai mekim. Connie i gat wanpela anti i stap long hap em i stap long en, olsem na Kay i tokim em long salim tok long dispela anti. Taim tok i go kamap long dispela anti, em i amamas long helpim Connie. Na tu, man bilong Connie i kisim sampela wok moa, na ol i senisim haus na i go sindaun long haus we i no gat wok long tromoi bikpela mani long en. Long dispela rot ol i redi long lukautim nupela pikinini bilong ol.

Na tu, Kay i helpim Connie long painim sampela grup em ol i save helpim ol lain i karim ol pikinini em ol i no bin tingting long kamapim. Planti kantri i gat ol kain grup olsem bilong helpim ol nupela mama i sot long helpim. Atres na telefon namba samting bilong ol kain grup olsem i stap long Intenet o long telefon buk long ol pablik laibreri. Tru, man i mas lusim bikpela taim na strong long painim rot bilong kisim helpim, tasol gutpela samting i save kamap taim ‘ol man bilong wok ol i tingting gut na mekim wok.’

Tingim Olsem Dispela Em Laip Bilong Man

Baibel i tok: “Ol saveman i save lukim gut rot ol i bihainim, tasol ol longlong man i olsem ol man i wokabaut long tudak.”​—⁠Saveman 2:⁠14.

Meri i gat gutpela tingting, em i no save pasim ai na “wokabaut long tudak,” nogat. Em i save “lukim gut rot,” olsem tingim na skelim gut ol samting. Dispela i save helpim em long skelim gut ol hevi inap kamap long pasin em i mekim. Meri i no gat gutpela tingting, em i no laik save long samting tru i wok long kamap insait long bel bilong em. Tasol meri i gat gutpela tingting, pasin sori i save kirapim em long mekim ol samting bilong lukautim gut pikinini i stap long bel.

Wanpela yangpela meri, Stephanie, em i gat bel inap tupela mun na em i laik rausim bel. Tasol long rot bilong wanpela masin, Stephanie i lukim piksa bilong bebi i stap long bel. Stephanie i tok: “Mi krai nogut tru. Mi tingting olsem: Wai na mi laik kilim i dai samting i gat laip?”

Narapela yangpela meri, Denise, em i kisim bel taim em i no marit yet, na em tu i pilim olsem pikinini long bel em samting i gat laip. Taim boipren bilong em i givim mani long em na tokim em long i go rausim bel, Denise i tok: “Rausim bel? Mi no inap tru long mekim dispela samting!” Olsem na em i no kilim i dai bebi bilong em.

Pasin Bilong Pret Long Man Inap Mekim Wanem?

Sapos ol narapela i strong long meri i mas rausim bel, orait ol meri husat i bin tingting long rausim bel ol i mas tingim gut dispela savetok bilong Baibel: “Sapos man i pret long ol arapela man, pret bilong en i olsem wanpela umben em i taitim pinis na i pasim em yet. Tasol sapos man i bilip strong long Bikpela, bai em i stap gut.”​—⁠Sindaun 29:⁠25.

Monica i gat 17 krismas na em bai i go long bisnis skul, tasol long dispela taim stret boipren bilong em i givim bel long em. Mama bilong em i wanpela wido na em i gat 5-pela pikinini, na em i bel hevi tru. Em i laik bai pikinini meri i kisim gut skul bambai em i no ken i stap rabis. Olsem na mama i strong long Monica i mas rausim bel. Monica i tok: “Taim dokta i askim mi sapos mi laik rausim pikinini i stap long bel, mi tokim em, ‘Nogat!’ ”

Mama i kros tru taim em i lukim olsem Monica i no tingim rot bilong em long kisim gutpela sindaun long bihain, na tu, em i no laik lukautim wanpela moa pikinini, olsem na mama i fosim Monica long lusim haus. Monica i go stap wantaim wanpela anti. Bihain long sampela wik, bel bilong mama i kol na em i orait long Monica i ken i go bek long haus na karim pikinini. Mama bilong Monica i helpim em long lukautim pikinini, Leon, na em i kirap laikim tumas dispela pikinini.

Wanpela maritmeri, Robin, em i bungim hevi i kam long narapela rot. Robin i tok: “Mi bin kisim bel, na paslain long dokta i sekim olsem mi gat bel o nogat, em i givim mi marasin bilong stretim sik bilong kidni. Em i tokim mi olsem mi bai karim pikinini, tasol pikinini bai i gat bikpela sik bilong kru.” Olsem na dokta i tokim em long rausim pikinini i stap long bel. Robin i tok: “Mi stori gut long em long tok bilong Baibel long laip. Mi tokim em olsem mi no inap rausim pikinini i stap long bel.”

I gat as na dokta i gat dispela tingting, tasol long dispela taim yet i no gat samting inap bagarapim laip bilong Robin.a Robin i tok: “Taim mi karim pikinini meri bilong mi na ol i skelim em, ol i painimaut olsem em i gat liklik sik tasol bilong kru. Tasol em inap mekim gut ol samting. Nau em i gat 15 krismas, na pasin bilong em long rit i wok long kamap gutpela moa. Mi laikim em tumas, na planti taim long olgeta wan wan de mi save tok tenkyu long Jehova.”

Pas Gut Wantaim God​—⁠Dispela i Gat Strong

Baibel i tok: “God em i pren tru bilong ol manmeri i save stap aninit long em.”​—⁠Song 25:⁠14.

Planti meri husat i no laik rausim bel, ol i bin tingim God, olsem em i gat wanem tingting long dispela samting. Namba wan samting ol i tingting long en em pasin bilong pas gut wantaim God, na mekim ol samting i amamasim em. Dispela tingting i bin stiaim Victoria, em yumi bin stori long em long pastaim. Em i tok: “Mi gat strongpela bilip olsem God em man bilong givim laip, na mi no gat rait long tekewe laip em i bin givim.”

Victoria i kirap givim bel tru long stadi long Baibel, na dispela i strongim pasin bilong em long pas gut wantaim God. Em i tok: “Taim mi mekim disisen long lukautim laip bilong pikinini bilong mi, mi pilim olsem mi go klostu moa long God na mi laik amamasim em long olgeta samting mi mekim long i stap bilong mi. Taim mi beten long em i ken stiaim mi, olgeta narapela samting i kamap gut.”

Pasin bilong pas gut wantaim God, em Man i as bilong laip, dispela bai kirapim yumi long rispek moa yet long laip i stap long bel bilong mama. (Song 36:⁠9) Na tu, sapos meri i kisim bel taim em i no bin tingting long kamapim pikinini, orait God inap givim “strong” long meri na famili bilong em bambai ol inap karim ol hevi i kamap. (2 Korin 4:⁠7) Ol lain husat i bin rispektim tingting bilong God long laip, ol i pilim olsem wanem long disisen ol i bin mekim?

Ol i No Bel Hevi

Ol dispela papamama i no bel hevi o pilim olsem bel i kotim ol, nogat. Bihain, ol i tingim “ol pikinini” olsem gutpela blesing, i no samting bilong givim hevi! (Song 127:⁠3) Connie, em yumi bin stori long em long pastaim, em i bin kisim dispela tingting tupela aua tasol bihain long em i karim bebi! Em i amamas na ringim wanwok bilong em, Kay, na tokim em olsem em i amamas nogut tru olsem em i gat wanpela pikinini meri bilong mekim bikpela long en. Connie i amamas na i tok moa olsem: “Tru tumas, God i save mekim gut long ol man i mekim samting i amamasim em.”

Bilong wanem i gutpela long mekim samting i stret wantaim tingting bilong God long laip? Long wanem, God em i As bilong laip, na em i putim ol lo bilong em long Baibel ‘bai yumi ken stap gut.’​—⁠Lo 10:⁠13.

Victoria na Bill, em stori bilong tupela i stap long kirap bilong namba wan stori na long hia tu, ol i no laik rausim bel na dispela disisen i senisim i stap bilong ol. Ol i stori olsem: “Mipela i save kisim ol drak, na ating mipela bai dai pinis sapos mipela i bin mekim yet dispela pasin. Tasol taim mipela i rispektim laip bilong bebi bilong mipela i stap yet long bel, dispela i kirapim mipela long tingim laip bilong mipela yet. Ol Witnes Bilong Jehova i helpim mipela na mipela i senisim pasin bilong mipela.”

Long nau, pikinini man bilong tupela, Lance, i gat 34 krismas na em i bin marit inap 12-pela yia pinis. Lance i tok: “Kirap long taim mi pikinini yet, papamama i bin skulim mi long mekim ol disisen i stret wantaim ol tok bilong Baibel. Dispela i bin helpim mi, na meri na pikinini bilong mi, na i givim bikpela amamas moa long mipela.” Papa bilong Lance, long pastaim em i bin tokim Victoria long rausim dispela pikinini i stap long bel, em i tok, “Bel bilong mipela i save guria taim mipela i luksave olsem klostu tru mipela i bin pinisim laip bilong naispela pikinini man bilong mipela.”

Tingim gen Monica, em i no laik rausim bel maski mama bilong em i strong long em i mekim olsem. Em i tok: “Tupela wik bihain long mi karim pikinini man bilong mi, ol Witnes Bilong Jehova i bungim mi na mi kisim save long olsem wanem mi inap mekim ol samting i stret wantaim ol lo bilong God. Mi kirap skulim pikinini bilong mi, Leon, long pasin bilong bihainim tok bilong God, na em tu i kisim pasin bilong laikim tru God. Long nau Leon i mekim wok lotu olsem wasman raun bilong ol Witnes Bilong Jehova.”

Leon i tingim samting Mama i bin mekim na em i tok: “Mama i bin laikim mi tru na em i larim mi long i stap laip maski ol narapela i putim hevi long em, na dispela i mekim na mi laik yusim gut laip bilong mi bilong soim God olsem mi tenkyu tru long dispela gutpela presen.”

Planti husat i bin kisim save long tingting bilong God long laip, ol i no bel hevi long ol i lukautim gut laip bilong pikinini em nau ol i laikim tumas. Bel bilong ol i save pulap tru long tenkyu taim ol i tok, “Mipela i no bin rausim pikinini i stap long bel!”

[Futnot]

[Piksa long pes 7]

Stephanie i lukim piksa bilong bebi i stap 2-pela mun long bel na dispela i helpim em long wokim disisen

(Mipela i putim blupela mak)

[Piksa long pes 8]

Victoria na Lance

[Piksa long pes 8, 9]

Victoria na Bill long nau, wantaim Lance na famili bilong em

[Piksa long pes 9]

Monica na pikinini bilong em, Leon, ol i tenkyu tru olsem 36 yia i go pinis em i no bin rausim pikinini i stap long bel