Liklik Sid Ekon i Kamap Traipela Diwai Ok
● Wanpela liklik sid ekon, i luk olsem liklik kiau insait long liklik kap, em i no pas moa long diwai na i pundaun i go daun long graun. Ol skwirel i haitim ol sid long graun na lusim, na bihain sid i kru. Bihain, em i kamap traipela diwai ok, nambawan strongpela diwai long bikbus bilong Briten.
Ol stori bilong bipo na ol stori nating i apim nem bilong diwai ok, em dispela diwai inap i stap winim 1,000 yia. Longpela bilong sampela em inap 40 mita! Namel bilong ol olpela diwai ok i traipela tru na ol han bilong en i longpela. Long Briten i gat tupela kain diwai ok, tasol long olgeta hap bilong graun i gat 450 kain kain diwai ok. Sid bilong ol i kamapim klia ol i wanem kain diwai ok.
Kain kain animal i save kam sindaun long diwai ok, winim ol narapela diwai long Briten. Planti kain kain binatang tu i save stap long en. Planti katapila i save kaikai ol lip bilong diwai ok i kamap long taim bilong san. Tasol dispela diwai i save lukautim em yet. Ol olpela lip i save kamapim wara i pait, na ol binatang i no laik kaikai.
Ol animal na binatang i stap long olgeta hap bilong diwai ok. Ol kain kain binatang i stap long diwai, i pulim planti pisin na spaida i kam. Ol binatang bitel i save wokim hul long strongpela skin bilong diwai na go aninit long en. Ol pisin bilong nait na ol blakbokis i save stap insait long hul bilong diwai. Ol liklik animal olsem ol rat, rabit, mumut na ol foks i save hait long ol rop bilong diwai.
Diwai ok i gat wei bilong en long pinisim ol lip na sid ekon i pundaun pinis. Long olgeta yia, inap 250 tausen lip bilong bikpela diwai i save pundaun. Ol fangi na baktiria i save mekim ol lip i sting na i givim gutpela gris i go bek long graun. Long sampela yia, wanpela diwai ok i kamapim 50,000 sid ekon. Ol pisin na animal i save bungim o kaikai klostu olgeta sid. Ol liklik binatang na bitel i kaikai na pinisim ol diwai i dai pinis, na fangi i kaikai skin bilong diwai.
Timba bilong diwai ok i strong tru na i save stap longpela taim. Inap longpela taim ol man i bin yusim dispela timba bilong wokim ol haus na mekim ol naispela tebol na sia samting. Em i gutpela bilong wokim ol dram bilong mekim bia na wain long en. Ol strongpela sip ol i wokim long diwai ok i bin helpim Nevi Bilong Briten long winim ol narapela nevi.
Ol man i save laikim yet timba bilong diwai ok. Na dispela diwai i bikpela samting long bus bilong Briten, na ol man i apim nem bilong en, long wanem, em i strongpela diwai i save stap longpela taim. Liklik sid ekon i kamap traipela diwai ok—dispela tu i wanpela gutpela samting God i bin wokim!
[Piksa long pes 23]
Diwai ok inap i stap winim 1,000 yia na i go antap inap 40 mita na patpela bilong en inap 12 mita na 30 sentimita
[Piksa Kredit Lain long pes 23]
Tree: © John Martin/Alamy; acorn: © David Chapman/Alamy