“Ating Wanpela Singsing Inap Mekim Olsem”

● Juliana em i wanpela gutpela lapun sista Kristen long Filipins na em i gat sik Alsaima. Em i no luksave moa long ol pikinini bilong em yet. Tasol mi save go lukim Juliana taim mi go long hap em i stap long en.

Juliana i save slip tasol long bet na lukluk nating i go ausait long windo. I hatwok long sindaun wantaim em, long wanem, em i no tingim mi moa. Em i lukluk long mi na ai bilong em i op bikpela, tasol em i no luksave long mi. Mi askim em: “Yu save tingting yet long Jehova?” Mi stori long em long wanpela ekspiriens na tromoi sampela askim long em, tasol em i no kliagut long tok bilong mi. Mi kirap singim wanpela song. Samting i kamap nau i mekim gut bel bilong mi!

Juliana i tanim het, lukluk long mi, na kirap singsing wantaim mi! I no longtaim na mi stop long singsing, long wanem, mi no inap tingim olgeta tok bilong singsing long tokples Tagalok. Tasol Juliana i singsing i go. Em inap tingim olgeta tripela ves bilong singsing. Kwiktaim mi tokim meri i kam wantaim mi, long i go kisim buk singsing long wanpela Witnes i stap klostu. Em i kam bek hariap wantaim buk. Mi no save long namba bilong singsing, tasol mi opim buk i go long pes stret. Nau mipela i singim song olgeta! Taim mi askim Juliana sapos em inap tingim sampela narapela singsing, em i kirap long singim wanpela lav song bilong Filipins.

Mi tok: “Nogat Juliana, singim wanpela song bilong Haus Kingdom,a na i no bilong redio.” Mi kirap singim narapela song bilong buk singsing bilong mipela, na em i kirap singsing wantaim mi. Ai bilong em i lait, na em i smail bikpela.

Nau ol neiba i ron i kam long lukim dispela singsing i kam long we. Ol i sanap long windo na putim yau long singsing bilong mipela. Mi amamas tru long lukim olsem Juliana i pilim tru musik long bel bilong em! Dispela i kirapim em long tingim ol tok bilong singsing.

Dispela ekspiriens i lainim mi olsem yumi no inap save wanem samting inap kirapim tingting bilong ol lain husat i no kliagut moa long ol samting o ol i no inap toktok moa wantaim ol narapela. Ating wanpela singsing inap mekim olsem.

I no longtaim bihain long dispela, Juliana i dai. Mi tingim dispela ekspiriens taim mi harim nupela singsing bilong ol Witnes Bilong Jehova em ol i rekodim na kamapim long 2009. Yu inap askim ol Witnes long hap bilong yu long olsem wanem yu inap kisim rekoding bilong ol dispela naispela singsing.

[Futnot]