Nius i Kam Long Olgeta Hap
Ol wokman bilong rausim ol binatang i kirap nogut taim ol man i ring na tokim ol long rausim wanpela foks i stap antap long plua namba 72 bilong wanpela bikpela bilding em ol i wok long sanapim long sentral London. Dispela foks i save “kaikai ol hap hap kaikai ol wokman i lusim.” Ol i kisim dispela foks na lusim em long wanpela hap klostu.—THE TELEGRAPH, LONDON.
Wanpela ripot bilong gavman i tok, long olgeta yia long Rasia inap olsem 14,000 meri i dai bikos man bilong ol i paitim ol.—RIA NOVOSTI, RASIA.
Long Saina wanpela kampani tasol i gat rait long prinim ol Baibel, na i kam inap long nau dispela kampani i prinim pinis 80 milion Baibel. Dispela kampani i save prinim 1 milion Baibel long olgeta mun, dispela i olsem 25 pesen bilong ol Baibel ol i save prinim long olgeta hap bilong graun.—XINHUA, SAINA.
Long New York, “2-pela long olgeta 5-pela meri i gat bel” i rausim bel. Dispela namba “i no senis tumas insait long laspela 10-pela yia.”—THE NEW YORK TIMES, AMERIKA.
Ol Bikpela Disasta Long 2010
Wanpela bikpela insurens kampani i bin rekodim 950 bikpela disasta em ol i bin kamap long olgeta hap bilong graun long 2010. Dispela i winim averes bilong ol disasta i bin kamap namel long 2000 na 2009 we ol i bin rekodim 785 bikpela disasta long ol wan wan yia. Ol 5-pela disasta we i kamapim bikpela bagarap tru em ol guria i bin kamap long Sili, Saina, na Haiti; bikpela tait wara long Pakistan; na bikpela san long Rasia, we planti tausen manmeri i dai long strong bilong san na win nogut. Long Aislan, volkeno i tromoi das i go antap na dispela i no bagarapim tumas ples, tasol dispela i bin stopim ron bilong ol balus long noten Yurop. Long Australia, inap 2-pela taim bikpela ren ais i pundaun na pe bilong ol samting ren ais i bagarapim, em inap olsem 2 bilion dola. Nius The Telegraph bilong London i tok: “Bikpela hap mani i lus na pe bilong ol samting i bagarap em insurens i no karamapim i go bikpela tu. Long yia i go pinis, inap 50 bilion dola i lus, tasol long nau inap 130 bilion dola i lus.”
Lusim Laip Bilong Kisim Mani
Yu ting ol man bai redi long lusim wanpela yia bilong laip bilong ol bambai ol inap kisim 1 milion yuro? Bilong kisim bekim, lain bilong Reader’s Digest Deutschland i askim lain Emnid long mekim wok painimaut long dispela, na ol i kisim save olsem long Jemani, 1-pela bilong olgeta 4-pela man na 1-pela bilong olgeta 6-pela meri i redi long mekim olsem. Ol yangpela i redi moa long mekim dispela samting—inap 29 pesen bilong ol lain i gat 14 i go 29 krismas na 25 pesen bilong ol lain i gat 30 i go 39 krismas i redi long lusim wanpela yia bilong laip, bilong kisim mani. Tasol ol lain em ol i gat bikpela krismas i tingim laip i dia tumas. Inap 13 pesen tasol bilong ol lain i gat 50 i go 59 krismas na 11 pesen bilong ol lain i winim 60 krismas i redi long lusim wanpela yia bilong laip, bilong kisim mani.