SKUL i helpim yu long wanem ol gutpela samting? Em bai helpim yu long kisim gutpela tingting, na Baibel i tok ‘gutpela tingting i save helpim yumi long taim nogut.’ (Saveman 7:12) Em i helpim yu olsem wanem? Tingim olsem yu wokabaut long wanpela ples nogut tru. Bai yu mekim wanem? Yu laik wokabaut yu yet o yu laik wokabaut wantaim sampela pren em ol inap long lukautim yu? Long skul, yu gat ol gutpela pren husat i save sambai long yu. Yumi ken tok ol dispela pren i kain olsem ol dispela pasin:

• Pasin bilong wokim gut tingting. Skul inap helpim yu long kisim ol pasin em Baibel i kolim olsem “gutpela tingting na pasin bilong skelim gut ol samting.” (Sindaun 3:21, Contemporary English Version) Taim yu wok long kisim ol dispela pasin em bai helpim yu long stretim ol hevi bilong yu yet na yu no wet long ol narapela i helpim yu.

• Stap gut wantaim ol narapela. Baibel i kirapim ol Kristen long kisim ol pasin olsem i no les kwik na bosim bel. (Galesia 5:22, 23) Pasin bilong bung wantaim kain kain lain long skul i opim rot long yu inap kisim ol dispela pasin, na pasin bilong karim hevi, rispek, na pilim hevi bilong narapela—ol dispela pasin bai helpim yu gut long taim yu kamap bikpela.

• Lain long mekim wok. Skul inap lainim yu long gutpela pasin bilong mekim wok, na dispela bai helpim yu long kisim wanpela wok na stap gut long en. Na tu, taim yu wok long kisim save long ol samting, dispela bai helpim yu long save gut long ol pasin bilong yu yet na wanem samting i bikpela samting long yu. (Sindaun 14:15) Long dispela rot, yu inap long sanap strong na redi long sapotim ol samting yu bilip long en.—1 Pita 3:15.

Bikpela samting: Yu mas kisim skul, tasol sapos yu tingim tingim ol samting yu no laikim long skul, dispela i no inap helpim yu. I gutpela yu skelim ol dispela tok i stap antap, na dispela bai helpim yu long mekim olsem. Ating yu inap tingim sampela samting moa!

Kirap nau long mekim. Tingim ol bikpela samting yu inap mekim bilong kisim gutpela skul.

TINGIM olsem yu wokabaut i go insait long stua bilong baim wanpela liklik samting, tasol ol samting long stua i stap nabaut nabaut. Ating bai yu lusim bikpela haptaim long painim painim dispela samting. Yu ting em bai isi long painim hariap sapos ol i putim gut ol samting long ples stret bilong ol na i gat ol sain i stap ples klia? Long ol samting bilong skul tu, yu ken bihainim wankain pasin. Bai yu mekim olsem wanem?

Wokim wanpela sediul.

Zachary, wanpela yangpela man bilong Amerika, i gat 18 krismas, em i tok: “Wanpela taim mi lusim tingting olgeta long mekim homwok bilong mi na sampela wok bilong haus, long wanem, mi bin go wiken wantaim pren bilong mi. Long Mande mi askim tisa sapos mi inap givim homwok bilong mi bihain. Nau mi wokim wanpela lista bilong helpim mi long tingim ol samting em mi mas mekim pastaim.”

Pasin bilong raitim ol samting i bin helpim tu Celestine, wanpela yangpela meri long Papua Niugini. Em i tingim taim em i bin stap long skul na em i tok: “Mi gat sediul bilong mekim olgeta wok bilong mi, na tu, ol homwok, ol eksem, na ol narapela samting. Dispela i bin helpim mi long makim ol samting i mas i stap namba 1 na mi save pinisim homwok bilong mi long taim stret.”

Tok bilong helpim yu: Raitim lista long ol samting yu mas mekim, long notbuk o mobail fon.

No ken surikim taim.

Em i isi long tok, “Bihain bai mi mekim.” I gutpela long mekim hariap ol samting, moa yet em ol homwok.

Tok bilong helpim yu: Namba 1 samting yu mas mekim taim yu kamap long haus em homwok bilong yu, na bihain yu ken lukim TV o mekim ol samting bilong amamas.

Putim gut ol samting.

Olsem wanem? Wanpela taim yu bin go long skul na yu luksave olsem yu lusim notbuk, pen, o ol buk bilong yu? Olsem wanem yu ken abrusim dispela hevi? Aung Myo Myat, wanpela yangpela man long Mianma, em i tok: “Mi save redim beg na putim ol samting long en paslain tru.”

Tok bilong helpim yu: Stretim gut skul beg na putim gut ol samting long en na bai yu no hatwok long painim.

Bikpela samting: Pasin bilong stretim gut ol samting bai helpim yu na yu no kisim presa long lusim tingting long ol samting, yu no leit, na yu gat taim long mekim ol narapela samting em yu mas mekim.

Kirap nau long mekim. Tingim wanpela samting em yu mas stretim rot bilong mekim. Papa, mama o wanpela pren, ol i ken tingim sampela rot bilong helpim yu.

HUSAT inap helpim yu long mekim gut ol skul wok bilong yu?

Famili.

Bruna, wanpela yangpela meri long Brasil, i gat 18 krismas, em i tok: “Taim mi nidim helpim long mekim homwok, papa bilong mi i save eksplenim dispela samting na kamapim ol askim bilong stiaim mi. Tasol em i larim mi yet long painim bekim bilong ol askim bilong mi.”a

Tok bilong helpim yu: Pastaim, askim papa o mama bilong yu, olsem taim em i bin stap long skul, em i bin mekim gut dispela sabjek nau yu gat hatwok long en, o nogat. Sapos em i bin mekim gut, orait i gutpela long em i helpim yu.

Ol tisa.

Planti tisa i save amamas long ol sumatin husat i gat laik long mekim gut ol skul wok, na ol i amamas long helpim ol.

Tok bilong helpim yu: Tokim tisa bilong yu olsem, “Mi hatwok long mekim ol sabjek long dispela klas, tasol mi laik mekim gut. Yu gat wanem tingting?”

Ol man bilong helpim yu.

I gutpela sapos wanpela pren bilong famili, em man yu trastim em, i ken helpim yu. Dispela pasin inap helpim yu long tupela rot: Namba 1, yu bai kisim helpim em yu nidim; namba 2, yu bai lain long kisim helpim long ol narapela, moa yet long taim yu nidim—dispela pasin bai helpim yu long taim yu kamap bikpela. Planti taim pasin bilong mekim wok bung i save kamapim gutpela samting, winim wok wanpela man tasol i mekim.—Sindaun 15:22.

Tok bilong helpim yu: Askim papamama long husat i gutpela man bilong helpim yu.

Bikpela samting: I no gat rong long askim wanpela long helpim yu!

Kirap nau long mekim. Raitim nem bilong 2-pela o 3-pela man i stap gutpela piksa bilong yu—em ol man yu rispek long ol. Olsem wanem? Wanpela bilong ol inap helpim yu long ol skul wok bilong yu?

GOD i givim bodi long yu na i stret yu mas lukautim gut. (Song 139:14) Yumi ken tok piksa olsem: Sapos yu gat wanpela kar, tasol yu no gat taim bilong lukautim ol samting long en. Kar bai stap liklik taim tasol na em bai bagarap. Wankain samting inap kamap long bodi bilong yu. Bai yu mekim wanem bilong “lukautim”?

Malolo.

Sapos yu no save slip gut, skin bilong yu bai taiet na i les, tingting i no wok gut, na yu inap kisim sik dipresen. Tasol sapos yu malolo gut dispela inap givim bikpela strong long bodi. Na tu, dispela inap helpim bodi long gro hariap, helpim tingting long wok gut, givim strong long bodi, na tingting na bel bilong yu bai stap isi. Malolo i gutpela samting bilong helpim bodi, tasol yu mas subim yu yet long malolo!

Tok bilong helpim yu: Sapos inap, i gutpela long go slip long wankain taim long olgeta nait.

Gutpela kaikai.

Ol yangpela pikinini i save gro hariap. Taim krismas bilong ol pikinini i namel long 10 na 17, bodi bilong planti pikinini man i kamap hevi moa winim bilong pastaim. Ol pikinini meri tu i save gro hariap. Bodi bilong ol pikinini i wok long gro, olsem na ol i mas kisim ol gutpela kaikai bilong helpim na givim strong long bodi. Yu mas kisim ol gutpela kaikai em bodi i nidim.

Tok bilong helpim yu: Yu mas kaikai long olgeta moning. Taim yu kaikai gut paslain long yu go long skul, dispela bai helpim yu long putim gut yau na tingting bilong yu bai wok gut.

Eksasais.

Baibel i tok “pasin bilong eksasais i gutpela bilong helpim bodi.” (1 Timoti 4:8, Contemporary English Version) Eksasais inap strongim ol masol na bun, strongim bodi, helpim skin na i no pat tumas, helpim tingting long wok gut, strongim immune system, daunim presa, na i mekim yu pilim gutpela. Yu inap kisim amamas long mekim, long wanem, yu ken mekim ol samting yu laikim!

Bikpela samting: Gutpela slip, gutpela kaikai, na gutpela eksasais bai helpim bodi bilong yu long stap helti. Na dispela bai helpim yu na yu inap mekim gut ol skul wok bilong yu.a

Kirap nau long mekim. Wokim wanpela sediul bilong eksasais. Insait long wanpela mun, skelim wanem taim yu save slip na wanem kain kaikai yu save kisim, na senisim sampela samting sapos yu mas mekim olsem.

“Taim mi wokabaut, mi pilim olsem mi kisim bikpela strong—maski pastaim skin i les taim mi kirap long wokabaut.”—Jason, Nu Silan.

“Long tingting bilong mi, God i wokim kaikai bilong helpim bodi bilong yumi, na mi laik putim ol gutpela kaikai insait long bodi bilong mi!”—Jill, Amerika.

“Mi save ron tripela taim long wik, na mi kikim baisikol o wokabaut tupela taim long wik. Eksasais i save givim bikpela strong long mi na i daunim presa.”—Grace, Australia.

MAN i go long skul tasol em i no gat wanpela mak bilong winim, em i kain olsem wanpela man i ran long resis we i no gat pinis bilong en. Baibel i tok: “Yu mas save long wanem hap yu laik go long en.” (Sindaun 4:26, Contemporary English Version) Sapos yu putim mak bilong winim, dispela bai helpim yu long putim tingting olgeta long dispela samting na taim yu laik kisim wanpela wok em bai i no hatwok long yu. Olsem wanem yu ken putim mak long winim?

Askim yu yet, ‘Bai mi mekim wanem wok bilong lukautim mi yet?’ No ken westim taim long bekim dispela askim. Traim long bekim hariap. Bilong wanem yu mas mekim olsem? Tingim olsem: Sapos yu laik raun long wanpela hap, pastaim yu mas makim wanpela ples yu laik go long en. Nau yu lukim mep na skelim wanem gutpela rot bilong i go long dispela hap. Yu inap kisim wankain tingting tu long skul. Tingting long wanem wok yu laik mekim, na makim ol kos em bai helpim yu long kisim dispela wok.

Was gut: Planti yangpela i laik mekim tasol wok em ol i laikim tru—olsem kamap saveman bilong musik—na ol i no gat tingting long mekim ol narapela wok. Wanem gutpela rot bilong helpim yu?

1. Tingim samting yu inap long mekim. Olsem, yu save amamas long mekim ol wok bilong helpim ol narapela? Yu save long wok mekenik, bungim namba, samting bilong mani, stretim ol samting i bagarap?

2. Skelim wanem wok yu inap mekim. Wanem wok i stret long save bilong yu? Toktok wantaim ol narapela long ol tingting bilong yu, na no ken tingting tasol long wok em yu laikim. Tingim ol samting inap kamap. Olsem: Yu ting yu inap muv sapos dispela wok yu laikim em i stap long narapela hap? Trening yu laik kisim, dispela bai givim bikpela dinau long yu?

3. Skelim ol samting em rot i op long mekim. Taim yu save pinis long wok yu laik mekim, skelim olsem dispela wok i stap long hap bilong yu o nogat. Yu save long wanpela wokman i gat namba? Sapos olsem, kampani bilong ol i save givim trening tu long ol man? Olsem wanem? Yu inap kisim trening long vokesenel skul?

Tok bilong helpim yu: Toktok wantaim papamama, ol tisa, na ol pren i bikpela pinis. Sekim tu ol niuspepa na Web-sait.

Bikpela samting: Sapos yu gat ol mak bilong winim, dispela bai stiaim yu long skul gut na i gat as na yu mekim olsem.

Kirap nau long mekim. Taim yu stap yet long skul, i gutpela long tingim dispela 3-pela poin. Raitim ol mak yu laik winim, na toktok wantaim papamama long dispela samting.