OL KANTRI NA OL MANMERI
Visitim Indonesia
INDONESIA i gat inap olsem 17,000 ailan. Ol manmeri bilong en i gat nem olsem ol i gat pasin pren, ol i no les kwik, ol i toktok long pasin rispek, na mekim gut long ol man.
Ol Indonesia i save kaikai rais wantaim olkain kaikai ol i kukim wantaim lombo na kari samting, na ol prut. Long sampela ples, ol famili i save sindaun long mat na kaikai, ol i yusim pinga bilong holim kaikai na dipim i go insait long rais. Planti man Indonesia i tok taim ol i kaikai long dispela pasin, kaikai i swit moa.
Insait bilong prut durian i malumalum na planti i save laikim, maski dispela prut i gat strongpela smel
Ol Indonesia i save laikim tru ats, danis, na musik. Anklong em wanpela musik instramen bilong ol Indonesia we ol i katim ol mambu na lainim long freim. Ol i tiunim ol mambu na bai ol i kamapim saun taim ol i seksekim. Bilong pilaim wanpela musik, ol man bilong pilai i mas wok gut wantaim na olgeta wan wan i mas seksekim anklong bilong ol long rait taim.
Orangutan i nambawan bikpela animal i save stap long ol diwai, ol dispela animal i stap long ol bikbus bilong Sumatra na Borneo. Hevi bilong man orangutan i bikpela pinis em inap 90.7 kilogram, na longpela bilong han bilong en kirap long wanpela sait i go long narapela sait em inap 2.4 mita
Long yia 1500 C.E. samting, lotu Hindu na Buda i gat bikpela strong long Indonesia. Long yia 1600 samting, lotu Islam i kisim strong long dispela kantri. Ol manmeri bilong Yurop i kam painim ol spais long Indonesia long 1600 C.E. samting, na ol i bringim ol lotu bilong Kristendom i kam wantaim.
Long olgeta hap bilong graun ol Witnes Bilong Jehova i gat nem olsem ol i save skulim ol man long Baibel, na ol i bin mekim wok bilong ol long Indonesia kirap long 1931 na i kam. Long nau, i gat winim 22,000 Witnes long Indonesia na ol i save wok strong long helpim tu ol yaupas. I no longtaim i go pinis, winim 500 manmeri i bin bung long wanpela miting bilong ol Witnes Bilong Jehova long tokples sain, bilong tingim dai bilong Jisas Krais.
Kirap! i save kamap long 98 tokples, long tokples Indonesia tu (ol i kolim Bahasa Indonesia)