“Strongpela Haus i Stap Olsem Mak Bilong Woa”

IGAT wanpela bikpela haus i stap klostu long wara Motoyasu long Hiroshima siti, Japan. Long taim bilong pait long 1945 ol man i bin bagarapim dispela haus. Inap 70 yia i lus pinis, tasol bilong wanem ol i no stretim gen dispela haus?

Long 1915, ol man i pinisim wok bilong sanapim dispela haus. Dispela haus i gat 3-pela plua na ol bin yusim long soim ol samting ol man i wokim. Tasol long 8 klok samting long moning bilong Ogas 6, 1945 olgeta samting i senis. Dispela em fes taim ol i bin tromoi wanpela bom atomik long siti inap 550 mita klostu long dispela haus. Olgeta man insait long dispela haus i dai. Tasol ol pos bilong en i no bin pundaun na bagarap.

Dispela haus i sanap yet, olsem na wanpela nius bilong lain UNESCOa i tok: “Em i wanpela strongpela haus na maski ol man i tromoi bom atomik ol i no inap long bagarapim.” Long 1996, dispela haus i stap long lista bilong lain UNESCO (UNESCO World Heritage List), ol i kolim olsem Hiroshima Peace Memorial.

Ol kain haus olsem i stap long nau em ol man i lukim bilong tingim ol samting i kamap long bipo i no pasim ol woa, nogat. Planti taim ol woa i kamap, long wanem, ol man i laikim planti mani samting, ol i laik litimapim nem bilong kantri, na tu, ol man i birua long ol man bilong narapela lain na lotu. Olsem na yu ting pasin bilong pait bai i stap oltaim?

Nogat, Baibel i tok long Song 46:9 olsem: “[God] i save mekim i dai pait long olgeta hap graun. Em i save brukim olgeta banara na spia, na em i save kukim ol hap plang long paia.” Long rot bilong Kingdom Bilong God, em Krais Jisas i stap King bilong en, em bai bagarapim ol gavman bilong graun. Baibel i kolim Jisas olsem “King bilong olgeta king.”—Revelesen 11:15; 19:16.

Long dispela taim bai no gat ol samting i stap bilong ol man i ken lukim na tingim ol hevi woa i kamapim. Long Baibel long Aisaia 65:17, em i tok: “Ol man bai i no inap tingim moa ol samting i bin kamap bipo.”