Visitim Kirgistan

KIRGISTAN i stap long hap bilong Sentral Esia, na ol kantri olsem Kasakstan, Usbekistan, Tajikistan, na Saina i stap raunim em. Klostu 90 pesen bilong dispela kantri em ol ples maunten, na ais i save karamapim het bilong ol maunten. Kirgistan i gat nem long bikpela maunten em Tian Shan, longpela bilong en inap 7,439 mita antap long mak bilong solwara. Bikbus i karamapim klostu 4 pesen bilong dispela kantri. Olsem na Kirgistan em wanpela bilong ol ples long graun olgeta we i gat bikpela bikbus bilong diwai galip.

Ol manmeri bilong Kirgistan i gat pasin bilong rispektim na lukautim ol man. Long Kirgistan, ol man i save tok “yu” long taim ol i toktok long man i gat bikpela krismas, taim ol i laik givim sia long man i kalap long PMV, na long taim ol i givim nambawan sia long man long tebol.

Planti famili i gat tripela o moa pikinini. Laspela pikinini man i save stap wantaim papamama na lukautim ol i go inap long taim ol i lapun. Em i mekim olsem maski em i marit pinis.

Kirap long taim ol pikinini meri i liklik yet, ol i skulim ol long pasin bilong mekim gut wok na bai ol i kamap ol gutpela meri marit. Long taim ol i gat 15 krismas samting, ol inap long mekim olgeta wok bilong haus. Ol famili i save bungim ol betsit, klos, na ol kapet ol i wokim long han na bai pikinini meri bilong ol i ken givim ol dispela samting bilong baim man. Na man bilong marit i save givim mani na ol animal bilong baim meri.

Long bung bilong baim man o meri na long taim bilong planim daiman, ol i save kilim wanpela sipsip o hos. Na ol i katim mit bilong dispela animal i go long planti hap, na givim long ol man ol i makim. Taim ol i serim kaikai, ol i tingim krismas na biknem bilong ol man ol i bin singautim. Bihain ol i save skelim wanpela kaikai tru bilong ol em beshbarmak, em kaikai ol i save kaikai long han. Pasin bilong ol long rispektim ol man i save bosim olgeta samting long kalsa bilong ol.