Visitim Kasakstan

OL MANMERI bilong Kasakstan i save raun olsem ol tripman. Long bipo yet i kam inap long nau, sampela man Kasakstan i save skelim weda na bringim ol animal i go long hap we gutpela gras i gro long en. Long taim bilong san, ol i save stap long ol ples maunten we i kol. Tasol taim ais i laik pundaun, ol i save bringim ol animal i go long ol ples daun we i hat.

Sampela lain Kasakstan i stap long ol bikpela siti. Maski i olsem, ol i save bihainim yet kastam bilong ol, pasin bilong ol long kukim kaikai, na wokim ol samting long han. Ol i save amamas long raitim ol stori, ol singsing, na pilaim musik long ol instramen ol yet i wokim.

Ol manmeri bilong Kasakstan i gat wanpela kain haus sel we ol inap rausim na karim i go sanapim long narapela hap. Dispela i kamapim klia olsem ol i save lukautim gut ples ol i stap long en. Ol wasman bilong sipsip i laik tru long stap long ol haus sel. Ol lain i stap long siti, ol tu i save yusim haus sel long taim bilong ol spesel bung. Na tu, ol turis i save slip long ol dispela haus sel. Insait long ol dispela haus sel, ol meri Kasakstan i putim mat o ol laplap ol i wokim long han na ol turis na ol narapela manmeri i save go lukim.

Ol manmeri husat i stap long kantri sait, ol i save laikim tru ol hos. I gat 21 nem bilong hos long tokples Kasakstan, na wan wan bilong ol i gat narapela narapela mining bilong en. Na tu, ol i gat winim 30 narapela narapela tok bilong makim kala bilong gras bilong hos. Ol i save salim hos long bikpela pe na ol inap givim olsem nambawan presen long ol narapela. Long ol kantri sait, ol pikinini man i save lain long raidim hos taim ol i liklik yet.

Taim lain Kasakstan i redim kaikai, ol i save kukim wantaim abus na ol i no save putim spais olsem lombo o kari. Ol i laik tru long dring koumiss, em wanpela kain dring ol i wokim long milk bilong meri hos. Dispela dring i gutpela long helt bilong ol. Na tu, ol i save dring shubat, em dring ol i wokim long milk bilong kamel we i pait liklik na inap helpim tru bodi.

Ol manmeri i ken visitim brens ofis bilong ol Witnes Bilong Jehova long taun Almaty.