HEVI BILONG PRAIS I GO ANTAP
Ekseptim Ol Samting i Kamap
Taim prais bilong ol samting i wok long go antap isi isi, ating i hatwok long yumi luksave, moa yet, sapos pe bilong yumi tu i wok long go antap. Tasol sapos prais bilong ol samting i go antap kwiktaim na pe bilong yumi i stap wankain, yumi inap tingting planti na wari, moa yet, sapos yumi gat famili long lukautim.
Yumi no inap stopim prais bilong ol samting i wok long go antap. Tasol sapos yumi ekseptim ol samting i kamap, ating dispela bai helpim yumi.
WAI EM I BIKPELA SAMTING
Ol man husat i gat stretpela tingting long prais bilong ol samting i wok long go antap, ating em i isi long . . .
stap isi. Taim yumi stap isi, tingting bilong yumi i klia na yumi mekim ol gutpela disisen.
yusim mani long ol samting ol i nidim stret, i no long ol samting ol i no nidim. Eksampel, taim yumi kisim bil bilong pawa na wara, kwiktaim yumi mas baim.
abrusim pasin bilong tok pait wantaim famili long mani.
luksave long ol rot bilong karim dispela hevi, na tu, skelim gut ol samting em yumi nidim tru na yumi no tromoi nating mani.
SAMTING YU KEN MEKIM
Redi long mekim senis. Nau long dispela taim we prais bilong ol samting i wok long go antap, sapos inap, em i gutpela long no ken baim ol samting yu no nidim. Sampela man i traim long enjoim gutpela laip stail tasol em hatwok tru, bikos ol i spendim bikpela mani winim mani ol i gat, dispela i kain olsem ol i wok long swim i go agensim strongpela tait bilong riva i spit i kam! Olsem na dispela i pinisim strong bilong ol. Tru tumas, sapos yu gat famili, ating bai yu tingting planti long hau bai yu lukautim ol long ol samting ol i nidim! Tasol tingim: Famili bilong yu i mas luksave olsem yu laikim ol, yu laik spendim taim long mekim ol samting wantaim ol, na tingim ol moa winim ol narapela samting.
Ol man i traim long enjoim gutpela laip stail, i kain olsem ol i wok long swim i go agensim strongpela tait bilong riva i spit i kam