HEVI BILONG PRAIS I GO ANTAP

Tingim Samting Yu Gat Em Inap

Ol man husat i ting ol samting ol i gat pinis em inap long ol, ol i amamas long laip bilong ol. Taim sindaun bilong ol i senis, ol i senisim tu laip stail bilong ol na bai ol i no ken spendim bikpela mani winim pe ol i save kisim.

WAI EM I BIKPELA SAMTING

Wanpela dokta bilong tingting, em Jessica Koehler, i tok olsem ol man husat i ting ol samting ol i gat pinis em inap long ol, ol i amamas long laip bilong ol. Em i painimaut tu olsem ol dispela man i no save mangalim samting bilong ol narapela. So yumi no kirap nogut olsem ol manmeri husat i amamas long liklik samting ol i gat, ol i save stap amamas na ol i no pilim presa tumas. Tru tumas, sampela bilong ol manmeri husat i stap amamas tru ol i no gat planti samting bilong skin. Dispela em i tru long ol man husat i tingim tru ol samting we i bikpela moa, em amamas ol i kisim taim ol i mekim ol samting wantaim famili na ol pren bilong ol, dispela kain amamas yumi no inap baim long mani.

“Sapos yumi gat kaikai na laplap samting, orait yumi ken ting ol dispela samting em inap long yumi.”—1 Timoti 6:8.

SAMTING YU KEN MEKIM

No ken skelim laip bilong yu wantaim ol narapela. Sapos yu skelim laip bilong yu wantaim ol man i gat planti samting, yu no amamas long ol samting yu gat pinis, na bai yu mangalim gutpela sindaun bilong ol. Na tu, taim yu skelim yu yet wantaim narapela ating yu no inap luksave long olgeta samting. Sampela man i gat planti samting, ating tru tru ol i gat bikpela dinau. Nicole i stap long Senegal, em i tok: “Mi no nidim planti samting bilong stap amamas. Sapos mi tingim olsem ol samting mi gat em inap long mi, mi inap stap amamas maski ol narapela i gat planti samting moa winim mi.”

Traim dispela: No ken watsim tumas ol edvetaismen o lukim ol samting ol i putim long sosel midia we i soim mani kago o gutpela sindaun bilong ol narapela.

“Maski man i gat planti samting, em i no kisim laip long ol dispela samting em i holim.”—Luk 12:15.

Amamas long ol samting yu gat pinis. Ol manmeri husat i amamas long ol samting ol i gat pinis ol i ting olsem ol dispela samting em inap long ol, na ol i no pilim olsem ol i nidim planti samting moa. Roberton bilong Haiti, em i tok: “Sampela taim mi save tingim ol gutpela pasin ol narapela i mekim long mi na famili bilong mi. Na mi save tok tenkyu long ol long gutpela pasin ol i mekim long mipela. Mi skulim tu pikinini man bilong mi husat i gat 8-pela krismas, long tok tenkyu long olgeta samting em i kisim.”

Traim dispela: Long olgeta de, yu ken raitim long wanpela nout buk ol samting em yu amamas na tenkyu long en. Olsem, ating yu gat gutpela helt, famili em yupela i pas gut wantaim, ol pren tru, o naispela sanset.

“Taim bel bilong man i stap amamas, olgeta de i olsem de bilong bikpela kaikai long em.”—Provep 15:15.

Sampela taim, yumi olgeta i save wok hat na bai yumi amamas long ol samting yumi gat pinis. Tasol hatwok bilong yumi inap kamapim gutpela samting. Taim yumi makim olsem ol samting yumi gat pinis em inap long yumi, i olsem yumi laik stap amamas—em narapela pasin we yumi no inap baim long mani.