Buk Bilong Baibel Namba 63​—⁠2 Jon

Man Bilong Raitim: Aposel  Jon

Ples Em i Bin Raitim: Efesus, o hap klostu

Raitim Pinis: 98 C.E. samting

NAMBA 2 pas Jon i raitim em i sotpela pas​—⁠ating Jon i raitim long wanpela hap pepa tasol​—⁠tasol ol tok bilong en i bikpela samting. Jon i raitim dispela pas long “yu meri wantaim ol pikinini bilong yu.” Long dispela taim bipo, nem “Kyria” (olsem “meri” long tok Grik) em i nem tru bilong sampela meri, olsem na sampela saveman bilong Baibel i ting pas i go long wanpela meri tru em i gat dispela nem. Tasol sampela i ting Jon i raitim pas long wanpela kongrigesen Kristen na kolim olsem ‘meri God i bin makim bilong em yet.’ Ating Jon i mekim olsem bilong paulim tingting bilong ol man i mekim nogut long ol Kristen. Sapos olsem, orait long laspela ves, “ol pikinini bilong susa bilong yu” ol i salim tok gude, em ol wan wan bratasista bilong narapela kongrigesen. Olsem na namba 2 pas i no bilong olgeta Kristen olsem namba wan pas; ating Jon i raitim long wanpela Kristen o wanpela kongrigesen tasol.​—⁠Ves 1.

² I no gat as bilong ting olsem Jon i no bin raitim dispela pas. Man i raitim pas i kolim em yet olsem “hetman bilong sios” [olsem “dispela lapun man,” NW ] na dispela tok i makim stret aposel Jon, long wanem, em i wanpela “bikman bilong sios” (Ga. 2:⁠9), na long dispela taim em i lapun tru na ol narapela aposel i dai pinis. Olgeta Kristen i save gut long Jon, olsem na long dispela tok tasol ol man i ritim pas ol inap save Jon i raitim. Narapela samting i makim olsem Jon i raitim dispela pas em i olsem: Pasin bilong raitim i wankain olsem bilong Namba Wan Jon na long Gutnius Jon i Raitim. I olsem Jon i bin raitim namba 2 pas long Efesus o long hap klostu long yia 98 C.E. samting, wankain olsem namba wan pas. Wanpela buk (Cyclopedia bilong McClintock na Strong) i stori long Namba 2 na Namba 3 Jon na buk i tok: “Sampela tok bilong dispela tupela pas i wankain, olsem na yumi ken ting man i raitim bihain liklik long Namba Wan Pas em i bin raitim long Efesus. Dispela tupela pas i stori long pasin sampela i bin mekim, na lo bilong en i stap long Namba Wan Pas.”a Yumi ken save namba 2 pas em i hap tru bilong Baibel, long wanem, Airenius (bilong yia 140-​203 C.E. samting) i kamapim sampela tok bilong en, na narapela man bilong dispela taim, em Klemen bilong Aleksandria, em i bilip olsem dispela pas em i hap tru bilong Baibel.b Na dispela 3-pela pas bilong Jon i stap long lista bilong olpela rait ol i kolim Muratorian Fragment.

³ Wankain samting i kirapim Jon long raitim namba wan na namba 2 pas, olsem: I gat ol tisa giaman i wok strong long bagarapim bilip bilong ol Kristen. Jon i laik helpim ol man i kaunim pas na bai ol inap luksave long ol dispela tisa giaman, na bai ol i klia long ol, na ol i ken wokabaut long bihainim tok i tru na narapela i laikim tru narapela.

HELPIM YUMI OLSEM WANEM?

⁵ Long taim bilong Jon na long taim bilong yumi tu, i gat sampela man ol i no laik holim strong ol tok stret bilong Krais, em ol i klia tru na i no hatwok long kisimgut ol dispela tok. Ol i laikim narapela kain tok i kirapim ol long ting ol i samting tru, em ol tok i litimapim nem bilong ol na bai ol i kisim biknem olsem ol man i gat save bilong dispela graun, na ol i orait long bagarapim bilip bilong ol Kristen na brukim kongrigesen bambai ol i ken helpim ol yet. Jon i laik tru bai kongrigesen i stap wanbel wantaim, em dispela pasin i save kamap taim narapela i laikim tru narapela na ol i bihainim tok i tru na pas gut wantaim Papa na Pikinini. Long nau tu yumi mas tingting strong long helpim kongrigesen long i stap wanbel, olsem na yumi no ken poromanim ol man i lusim lotu i tru na ol i go bihainim narapela tok i kalapim tok bilong Baibel em spirit holi i bin kamapim, na yumi no ken givim gude long ol tu. Sapos yumi wok long bihainim ol lo bilong God, na yumi amamas tru long poroman wantaim ol Kristen tru, yumi ken bilip tru olsem, “long pasin bilong tok tru na long pasin bilong laikim tru ol arapela, God Papa wantaim Jisas Krais, em Pikinini bilong Papa, bai i mekim pasin bilong marimari na sori na bel isi i kamap strong long laip bilong yumi.” (Ves 3) Tru tumas, namba 2 pas bilong Jon i kamapim klia blesing ol Kristen i kisim taim ol i stap wanbel.

[Ol Futnot]