Buk Bilong Baibel Namba 64—3 Jon
Man Bilong Raitim: Aposel Jon
Ples Em i Bin Raitim: Efesus, o hap klostu
Raitim Pinis: 98 C.E. samting
JON i raitim dispela pas i go long Gaius, em gutpela Kristen Jon i laikim tumas. Long taim bilong ol aposel, planti man i gat dispela nem Gaius. Dispela nem i kamap 4-pela taim long ol narapela hap bilong Ol Skripsa Grik na i makim narapela narapela man, inap 3-pela o 4-pela. (Ap. 19:29; 20:4; Ro. 16:23; 1 Ko. 1:14) I no gat wanpela tok o rait samting i makim stret olsem dispela Gaius em Jon i raitim pas long em, em i wanpela bilong ol dispela man. Tasol yumi save dispela Gaius em i bilong wanpela kongrigesen Kristen, na em i gutpela pren bilong Jon, na Jon i raitim pas long em yet, olsem na oltaim Jon i tok “yu”; em i no tok “yupela.”
2 Pasin bilong tok gude long kirap na long pinis bilong pas i wankain olsem long Namba 2 Jon, na man bilong raitim i tok gen olsem em i “hetman bilong sios,” olsem na yumi ken save tru, aposel Jon i raitim dispela pas. (2 Jo. 1) Stori na tok bilong dispela pas i wankain olsem bilong namba wan na namba tu pas, olsem na yumi ken ting olsem Jon i raitim long Efesus, o long hap klostu, long yia 98 C.E. samting, olsem tupela narapela pas hia. Dispela pas i sotpela, olsem na i no planti Kristen bilong raitim buk long pastaim ol i kamapim tok bilong en—wan wan tasol. Tasol dispela pas wantaim Namba 2 Jon i stap long ol olpela lista bilong ol buk bilong Baibel.
3 Long dispela pas Jon i tokim Gaius, em i pilim tru gutpela pasin em i mekim bilong helpim na lukautim ol brata Kristen i raun mekim wok bilong God, na em i kolim sampela hevi em hambakman Diotrefes i kamapim. Yumi ken ting dispela Demitrius em Jon i stori long en, em i man bilong kisim dispela pas i kam long Gaius. Olsem na Jon i salim em i kam na Gaius i gat wok long kisim em na lukautim em, na ol tok bilong pas bai kirapim Gaius long mekim olsem. Yumi no save gut long Gaius na Diotrefes na Demitrius; liklik stori bilong 3-pela i stap long dispela pas tasol. Tasol dispela pas i helpim yumi long save long pasin bilong ol Kristen bilong pastaim, em ol i stap olsem ol brata brata na ol i pas gut wantaim, maski ol i bilong narapela narapela lain. Ol i save kisim na mekim gut long ol brata i raun ‘mekim wok bilong Jisas,’ maski ol yet i no save long ol dispela brata.—Ves 7.
HELPIM YUMI OLSEM WANEM?
5 Aposel Jon i stap gutpela piksa bilong ol wasman bilong kongrigesen—em i wok strong tru long lukautim ol brata na helpim ol long sakim ol samting i laik bagarapim ol. Kongrigesen i mekim gutpela pasin, olsem narapela i laikim tru narapela na ol i save kisim ol brata i go long haus bilong ol, na ol i gat wok long holim strong dispela pasin bambai ol brata bilong kongrigesen yet na ol brata i kam lukim ol, em bipo ol i “no save long ol,” ol i ken wok wantaim na stap olsem ol “wanwok” bilong autim tok i tru. (Ves 5, 8) Tasol Diotrefes i hambak, em pasin Jehova i no laikim tru; em i no harim tok bilong ol man God i givim namba long ol long bosim kongrigesen, na em i mekim olkain tok nogut long aposel Jon. (Snd. 6:16, 17) Na em i laik pasim ol brata long mekim gutpela pasin Kristen na kisim ol narapela brata i go long haus bilong ol. Olsem na Jon i tokaut strong long dispela pasin nogut, na em i wok long kirapim ol Kristen long laikim tru ol narapela insait long kongrigesen na mekim gut long ol. Long nau tu yumi mas wok strong long mekim pasin daun, na bihainim tok i tru, na laikim tru ol narapela olsem God i mekim na helpim ol. Dispela i stret wantaim lo Jon i kolim, olsem: “Man i mekim gutpela pasin, em i man bilong God. Tasol man i mekim pasin nogut, em i no bin lukim God.”—3 Jo. 11.