Yu save long sampela Witnes Bilong Jehova? Ating sampela bilong mipela i neiba bilong yu, o wanwok, o wanskul bilong yu. O ating mipela i bin toktok wantaim yu long Baibel. Mipela i wanem kain lain tru, na bilong wanem mipela i save autim bilip bilong mipela long ol narapela?

Mipela i wankain olsem yu. Mipela i bilong kain kain ples na sindaun. Bipo sampela bilong mipela i bilong narapela lotu, na sampela i no bin bilip long God. Tasol paslain long mipela i kamap Witnes, mipela olgeta i bin skelim gut ol tok bilong Baibel. (Aposel 17:11) Mipela i wanbel long ol samting mipela i lainim, na mipela i wokim disisen olsem mipela i laik lotuim God Jehova.

Mipela i stadi long Baibel na dispela i helpim mipela. Olsem olgeta man, ol hevi i save painim mipela tu na mipela i gat ol pasin kranki. Tasol taim mipela i bihainim ol stiatok bilong Baibel, mipela i luksave olsem dispela i helpim sindaun bilong mipela long kamap gutpela moa. (Song 128:​1, 2) Dispela i wanpela as na mipela i save tokim ol narapela long ol gutpela samting mipela i bin lainim long Baibel.

Mipela i save bihainim ol pasin God i laikim. Ol dispela pasin em Baibel i skulim mipela long en, i helpim mipela long stap gut na rispektim ol narapela, na tu, mekim onest pasin na pasin helpim. Ol stiatok bilong Baibel i helpim mipela long mekim gut wok insait long komiuniti, na strongim ol famili long stap wanbel na bihainim stretpela pasin. Mipela i bilip olsem “God i save mekim wankain pasin long olgeta man,” olsem na mipela i tingim ol wanlotu bilong mipela olsem wanpela famili i stap long olgeta hap na i stap wanbel long bilip. Pasin bilong bel nogut long narapela skin kala na wok politik i no brukim mipela. Tru, mipela i no winim ol narapela man, tasol olsem wanpela lain, mipela i stap narapela kain.​—​Aposel 4:13; 10:​34, 35.

• Olsem wanem ol Witnes Bilong Jehova i wankain olsem ol narapela man?

• Ol Witnes Bilong Jehova i lainim wanem ol pasin taim ol i stadi long Baibel?

Planti man i ting dispela nem ol Witnes Bilong Jehova, em i nem bilong wanpela nupela lotu. Tasol winim 2,700 yia i go pinis, Baibel i kolim ol wokman bilong God tru olsem ol “witnes” bilong em. (Aisaia 43:​10-12) I kam inap long 1931, mipela i bin holim nem olsem ol Sumatin Bilong Baibel. Tasol bilong wanem mipela i kisim nem ol Witnes Bilong Jehova?

Dispela nem i kamapim klia God bilong mipela. Ol olpela rait i kamapim olsem nem bilong God, em Jehova, i stap planti tausen taim long Baibel. Long planti Baibel, ol man i rausim dispela nem na ol i putim ol biknem, olsem Bikpela o God. Tasol God tru i tokim Moses olsem nem bilong em, em Jehova, o Yahweh olsem sampela Baibel i tok, na em i tok: “Em i nem bilong mi oltaim oltaim.” (Kisim Bek 3:​15, futnot) Long dispela rot, em i kamapim klia olsem em i narapela kain long olgeta god giaman. Mipela i amamas tru long holim nem holi bilong God.

Dispela nem i kamapim klia wok bilong mipela. Kirap long taim bilong stretpela man Abel na i kam, planti manmeri i bin tokaut long bilip bilong ol long Jehova. Insait long planti handret yia, Noa, Abraham, Sera, Moses, Devit, na ol narapela i bung wantaim dispela “bikpela lain manmeri ol i olsem bikpela klaut.” (Hibru 11:4–12:​1) Wankain olsem wanpela witnes i sanap long kot bilong sambai long wanpela man i no gat asua, mipela tu i wok strong long tokaut long God bilong mipela na helpim ol man long kisim stretpela save long em.

Mipela i bihainim pasin bilong Jisas. Baibel i tok, Jisas em i “man [bilong] holimpas wok bilong autim tok na mekim tok tru tasol.” (Revelesen 3:14) Jisas yet i tok em i bin ‘kamapim nem bilong God’ na “tokaut long tok i tru” na helpim ol man long kisim stretpela save long God. (Jon 17:6; 18:37) Olsem na ol disaipel tru bilong Krais i mas holim nem bilong Jehova na tokaut long en. Em samting mipela ol Witnes Bilong Jehova i wok strong long mekim.

• Bilong wanem ol Sumatin Bilong Baibel i kisim nem ol Witnes Bilong Jehova?

• Kirap long wanem taim Jehova i gat ol witnes bilong em long graun?

• Husat em i nambawan gutpela Witnes Bilong Jehova?

Baibel i tok profet olsem bihain long dai bilong Krais, ol giaman tisa bai kamap namel long ol Kristen bilong pastaim, na paulim tok i tru bilong Baibel. (Aposel 20:​29, 30) Bihain, dispela samting i bin kamap tru. Ol i bungim ol tok bilong Jisas wantaim ol tingting bilong ol lotu haiden, na lotu Kristen giaman i kamap. (2 Timoti 4:​3, 4) Olsem wanem yumi ken save tru olsem yumi gat stretpela save long tok bilong Baibel long nau?

Taim i kamap long Jehova i kamapim klia tok i tru. Jehova i tok profet olsem long taim bilong las de, ‘ol manmeri i gat gutpela save na tingting, ol bai i save long’ tok i tru. (Daniel 12:​9, 10) Long 1870, wanpela liklik grup i wok long painim tok i tru, ol i luksave olsem Baibel i no as bilong planti bilip bilong ol lotu. Olsem na ol i kirap skelim ol tok bilong Baibel bilong kisimgut ol tok bilong en, na Jehova i helpim ol long kisim save.

Ol man i gat gutpela bel i skelim gut tok bilong Baibel. Ol Sumatin Bilong Baibel long bipo, ol i bihainim wanpela kain pasin bilong stadi em mipela i save bihainim yet long nau. Ol i skelim gut olgeta wan wan bikpela tok bilong Baibel. Taim ol i ritim wanpela skripsa em ol i no kliagut long en, ol i save skelim ol narapela skripsa bilong painim mining bilong en. Taim ol i lukim olsem tok bilong ol dispela skripsa i stret wantaim ol narapela tok bilong Baibel, ol i tokaut long tingting bilong ol na raitim long notbuk. Taim ol i larim Baibel yet i kamapim mining bilong ol tok bilong en, ol i kisim stretpela save long nem bilong God na Kingdom bilong em, samting em i tingting pinis long mekim long ol man na long dispela graun, ol man i dai pinis i stap olsem wanem, na long kirap bek. Pasin bilong ol long painim stretpela save i helpim ol long lusim ol bilip giaman na pasin bilong ol lotu giaman.​—​Jon 8:​31, 32.

Long 1879, ol Sumatin Bilong Baibel i luksave olsem em i taim bilong tokaut long tok i tru long olgeta man. Olsem na long 1879, ol i kirap wokim nius Wastaua i Tokaut Long Kingdom Bilong Jehova, em mipela i save wokim yet long nau. Long nau, mipela i save autim tok i tru bilong Baibel long ol man long 239 kantri na long winim 700 tokples. Olsem na stretpela save i kamap bikpela tru, winim olgeta taim bipo!

• Bihain long dai bilong Krais, wanem samting i kamap long tok i tru bilong Baibel?

• Wanem samting i bin helpim mipela long kisim stretpela save long tok i tru bilong Baibel?

Inap planti yia, mipela ol Witnes Bilong Jehova i bin yusim, prinim, na tilim ol narapela narapela Baibel. Tasol bihain mipela i luksave olsem mipela i mas tanim tok bilong Baibel we inap helpim olgeta man long “kisim stretpela save long tok i tru,” dispela em laik bilong God. (1 Timoti 2:​3, 4) Olsem na long 1950, mipela i kirap long tanim sampela hap bilong Baibel na wokim Baibel New World Translation. Mipela i bin tanim stret ol tok bilong dispela Baibel i go long winim 120 tokples, na long Tok Pisin tu.

I mas i gat wanpela Baibel em tok bilong en i no hatwok long kisimgut. Isi isi ol tokples i wok long senis, na planti Baibel i gat ol tok we i hatwok long kliagut long en o ol tok em ol man i no save yusim moa. Na tu, ol man i bin painim sampela olpela manuskrip we ol tok bilong en i stret moa na i klostu wankain long ol olpela rait bilong pastaim tru, na dispela i helpim ol long kliagut long tok Hibru, tok Arameik, na tok Grik em ol i bin raitim Baibel long en.

I mas i gat wanpela Baibel em ol i tanim stret ol tok bilong God. Lain i tanim Baibel i no ken skruim sampela tok long en o senisim ol tok bilong en, ol i mas tanim stret ol tok olsem i stap long Baibel bilong pastaim. Tasol long planti Baibel, nem bilong God, em Jehova, i no stap.

I mas i gat wanpela Baibel i givim biknem long Man i kamapim ol tok bilong en. (2 Samuel 23:​2) Long Baibel New World Translation, ol i putim nem bilong Jehova long ples stret bilong en we i bin i stap inap 7,000 taim long ol olpela rait bilong Baibel, olsem piksa daunbilo i soim. (Revelesen 4:11) Inap planti yia mipela i bin mekim gut wok painimaut na tanim tok bilong dispela Baibel, na ol man i amamas long ritim, bikos em i kamapim klia tingting bilong God. Maski yu gat Baibel New World Translation long tokples bilong yu o nogat, mipela i laik kirapim yu long ritim Tok Bilong Jehova long olgeta de.​—​Josua 1:8; Song 1:​2, 3.

• Bilong wanem mipela i mekim disisen long wokim Baibel New World Translation?

• Sapos man i laik kisim save long laik bilong God, em i mas mekim wanem long olgeta de?