-
Bai Yu Lukim Wanem Ol Samting Long Ol Miting Kristen Bilong Mipela?Husat i Mekim Laik Bilong Jehovah Long Nau?
-
-
Lesen 5
Bai Yu Lukim Wanem Ol Samting Long Ol Miting Kristen Bilong Mipela?
Ajentina
Siera Leon
Beljam
Malesia
Planti man i no save go moa long lotu, bikos ol lotu i no bekim ol bikpela askim bilong ol man long laip o mekim gut bel bilong ol. Olsem na bilong wanem i gutpela long yu go long ol miting Kristen bilong ol Witnes Bilong Jehova? Bai yu kisim wanem ol gutpela samting long ol dispela miting?
Bai yu amamas long stap namel long ol man i gat pasin laikim na pasin bilong tingim narapela. Long taim bilong ol aposel, ol Kristen i save bung long ol kongrigesen, na ol i mekim ol miting bilong lotuim God, stadi long buk bilong God, na strongim bel bilong narapela narapela. (Hibru 10:24, 25) Pasin laikim i stap long ol dispela bung, na ol i pilim olsem ol i stap namel long ol pren tru—em ol bratasista Kristen. (2 Tesalonaika 1:3; 3 Jon 14) Mipela i bihainim wankain pasin olsem ol na kisim wankain amamas.
Gutpela samting i kamap taim man i lain long bihainim ol stiatok bilong Baibel. Ol man, ol meri, na ol pikinini i save bung wantaim bilong mekim lotu, olsem ol i bin mekim long taim bilong ol man i raitim Baibel. Ol gutpela tisa i save yusim Baibel bilong helpim mipela long kliagut long pasin bilong bihainim ol stiatok bilong Baibel long laip bilong mipela. (Lo 31:12; Nehemia 8:8) Olgeta i ken insait long bekim tok na singsing. Long dispela rot mipela inap kamapim bilip Kristen bilong mipela.—Hibru 10:23.
Pasin bilong yu long bilip long God bai kamap strong moa. Aposel Pol i bin tokim wanpela kongrigesen long taim bilong em olsem: “Mi gat bikpela laik long lukim yupela bai . . . yupela i strongim mi na mi strongim yupela, olsem bilip bilong mi i ken strongim yupela, na bilip bilong yupela i ken strongim mi.” (Rom 1:11, 12) Pasin bilong bung oltaim wantaim ol wanbilip long ol miting, i save strongim bilip bilong mipela na strongim mipela long bihainim ol stiatok bilong Baibel.
Mipela i laik invaitim yu i kam long neks kongrigesen miting bilong mipela, na yu yet i ken lukim na harim wanem ol samting i kamap long dispela miting. Mipela bai amamas tru long welkamim yu. Mipela i no save singaut long mani long ol dispela miting—olsem salim plet samting.
Ol kongrigesen bilong mipela i bihainim pasin bilong husat long mekim ol miting?
Olsem wanem yumi inap kisim helpim taim yumi go long ol miting Kristen?
-
-
Olsem Wanem Pasin Bilong Bung Wantaim Ol Wanbilip i Helpim Mipela?Husat i Mekim Laik Bilong Jehovah Long Nau?
-
-
Lesen 6
Olsem Wanem Pasin Bilong Bung Wantaim Ol Wanbilip i Helpim Mipela?
Madagaska
Nowe
Lebanon
Itali
Maski weda i no gutpela o mipela i mas wokabaut brukim bikbus, oltaim mipela i save go long ol miting Kristen. Maski i gat planti hatwok long laip na skin i les bihain long wok mani, bilong wanem ol Witnes Bilong Jehova i wok strong long bung wantaim ol wanbilip bilong ol?
Em i gutpela bilong helpim mipela. Long ol lain em mipela i save bung wantaim long kongrigesen, Pol i tok: ‘Yupela wan wan i mas tingim ol arapela.’ (Hibru 10:24) Dispela hap tok i makim olsem mipela i mas save gut long narapela narapela. Olsem na tok bilong Pol i kirapim mipela long tingim tru ol narapela. Taim mipela i kisim save long ol narapela insait long kongrigesen, mipela i painimaut olsem sampela bilong ol i winim ol wankain hevi olsem bilong mipela, na ol i ken helpim mipela long winim ol dispela hevi.
Em i strongim pasin bilong pas gut wantaim ol pren. Long ol miting bilong mipela, mipela i save bung wantaim ol bratasista em ol i gutpela pren bilong mipela. Long ol narapela taim, mipela i save bung wantaim bilong kisim amamas. Ol dispela bung i helpim mipela olsem wanem? Mipela i lain long tingim moa yet narapela narapela, na dispela i helpim mipela long pas gut tru wantaim. Na taim hevi i painim ol bratasista bilong mipela, mipela i redi long helpim ol, bikos pasin pren i stap pinis namel long mipela. (Sindaun 17:17) Taim mipela i bung wantaim ol bratasista insait long kongrigesen, mipela i soim olsem mipela i tingim tru narapela narapela.—1 Korin 12:25, 26.
Mipela i laik kirapim yu long poroman wantaim ol man husat i mekim laik bilong God. Bai yu painim ol kain poroman olsem namel long ol Witnes Bilong Jehova. Plis no ken larim wanpela samting i stopim yu long bung wantaim mipela.
Bilong wanem pasin bilong bung wantaim long ol miting i helpim mipela?
Yu laik bung wantaim kongrigesen bilong mipela long wanem taim
-
-
Ol Miting Bilong Mipela i Wanem Kain?Husat i Mekim Laik Bilong Jehovah Long Nau?
-
-
Lesen 7
Ol Miting Bilong Mipela i Wanem Kain?
Nu Silan
Japan
Yuganda
Lituenia
Long ol miting Kristen bilong bipo, ol i save mekim singsing, beten, na ritim buk bilong God na stori long en—na i no gat kain kain bilaspasin long en. (1 Korin 14:26) Bai yu lukim wankain samting long ol miting bilong mipela.
Baibel i as bilong ol tok na i helpim ol man. Long ol wiken, ol kongrigesen i save bung bilong harim wanpela 30 minit tok bilong Baibel long olsem wanem ol tok bilong Baibel i stret long i stap bilong yumi, na i stret long dispela taim nau yumi stap long en. I gutpela long olgeta husat i kam long miting i opim Baibel bilong ol yet na lukim ol skripsa brata i ritim. Bihain long dispela tok, i gat 1 aua “Wastaua” Stadi we mipela i skelim 1-pela atikol long Wastaua bilong stadi, na olgeta long odiens i ken insait long en long rot bilong bekim tok. Dispela i helpim mipela long bihainim ol tok bilong Baibel long laip bilong mipela. Mipela i mekim stadi long wankain Wastaua long winim 110,000 kongrigesen i stap long olgeta hap bilong graun.
Mipela i kisim helpim bilong mekim gut moa wok tisa. Mipela i save bung long wanpela nait namel long wik o long wiken bilong mekim miting i gat 3-pela hap. Namba 1 hap em 30 minit Baibel Stadi Bilong Kongrigesen, i gat ol askim na ol bekim we i helpim mipela long kliagut moa long ol stiatok na ol tok profet bilong Baibel. Bihain long en i gat 30 minit Skul Tiokratik Bilong Autim Tok. Long fes tok bilong dispela miting, mipela i toktok long 1-pela hap bilong Baibel em kongrigesen i bin ritim pinis long haus. Bihain long en, ol sumatin insait long skul ol i givim ol sotpela tok. Wanpela brata i skelim tok ol i mekim na em i helpim ol long pasin bilong rit gut moa na mekim gut ol tok. (1 Timoti 4:13) Namba 3 hap em 30 minit Miting Bilong Wok Autim Tok, long rot bilong ol tok, ol soim, na ol intaviu, mipela i lainim pasin bilong skulim ol man long Baibel.
Taim yu kam long ol miting bilong mipela, bai yu amamas tru long ol nambawan gutpela skul bilong Baibel yu wok long kisim.—Aisaia 54:13.
Bai yu harim wanem ol tok long ol miting bilong ol Witnes Bilong Jehova?
Yu gat laik long i go long wanem miting bilong mipela?
-
-
Bilong Wanem Mipela i Save Bilas Gut na Go Long Ol Miting?Husat i Mekim Laik Bilong Jehovah Long Nau?
-
-
Lesen 8
Bilong Wanem Mipela i Save Bilas Gut na Go Long Ol Miting?
Aislan
Meksiko
Gini-Bisau
Filipins
Long ol piksa i stap long dispela buklet, yu luksave long pasin bilong ol Witnes Bilong Jehova long bilas gut taim ol i go long ol kongrigesen miting bilong ol? Bilong wanem mipela i save tingim gut klos na bilas bilong mipela?
Bilong soim rispek long God bilong mipela. Tru, God i no save tingim lukluk bilong man. (1 Samuel 16:7) Tasol taim mipela i bung bilong lotuim em, mipela i laik soim rispek long em na long ol wanbilip bilong mipela. Sapos yumi go sanap long ai bilong wanpela king o praim minista, bai yumi bilas gut bilong soim rispek long namba bilong ol. Na olsem tasol, taim mipela i bilas gut na go long ol miting, mipela i soim rispek long “Jas bilong olgeta graun,” em God Jehova, na long ples mipela i bung bilong lotuim em.—Stat 18:25.
Bilong kamapim klia olsem mipela i bihainim ol tok bilong Baibel. Baibel i kirapim ol Kristen long bilas “long pasin i soim rispek na gutpela tingting.” (1 Timoti 2:9, 10) Bilas long “pasin i soim rispek” i makim olsem mipela i no laik werim ol klos i pulim ai na tingting bilong ol narapela, kirapim bel bilong ol, o i no haitim gut skin. Na tu, “gutpela tingting” i helpim mipela na mipela i no baim ol klos i bikpela tumas o i narapela kain. Maski i olsem, mipela inap makim yet wanem kain ol klos na stail mipela i laik werim we i stret wantaim ol dispela stiatok. Taim mipela i bilas gut na werim klos i stret, dispela i “litimapim tok bilong Seivia bilong yumi” na “givim glori long God.” (Taitus 2:10; 1 Pita 2:12) Taim mipela i bilas gut na go long ol miting, dispela i stiaim tingting ol arapela i gat long pasin bilong lotuim Jehova.
Maski sapos yu no gat gutpela klos, yu welkam yet long kam long ol miting long Haus Kingdom. Bilong werim ol klos i stret na i klin, i no olsem yumi mas werim ol klos i stail tru o i gat bikpela pe.
Olsem wanem pasin bilong bilas gut taim mipela i lotuim God i bikpela samting?
Wanem ol stiatok i stiaim mipela long makim ol klos na bilas?
-
-
Olsem Wanem Yumi Inap Redi Gut Long Ol Miting?Husat i Mekim Laik Bilong Jehovah Long Nau?
-
-
Lesen 9
Olsem Wanem Yumi Inap Redi Gut Long Ol Miting?
Kambodia
Yukren
Sapos yu wok long stadi long Baibel wantaim wanpela Witnes Bilong Jehova, ating paslain long stadi, yu save redim hap bilong buk yu bai stadi long en. Bilong miting bilong kongrigesen i ken helpim yu gut, i gutpela long yu mekim wankain, na redim ol miting pastaim. Sapos yumi bihainim gutpela sediul bilong redim ol miting, orait dispela bai kamapim gutpela samting.
Makim taim na ples bilong mekim stadi. Tingting bilong yu i save wok gut long wanem taim? Long moning paslain long yu kirap mekim ol wok bilong yu o long nait taim ol pikinini i slip pinis? Maski yu no inap stadi longpela taim, makim haptaim yu inap lusim bilong mekim stadi, na no ken larim wanpela samting i distebim yu. Painim wanpela hap i no gat nois, na ofim ol samting i save pulim tingting, olsem redio, TV, na mobail fon. Pasin bilong beten paslain long stadi bai helpim yu long putim tingting olgeta long Tok Bilong God, na yu no tingting planti long ol hevi bilong dispela de.—Filipai 4:6, 7.
Makim ol bekim, na redi long bekim tok. Pastaim, traim long kliagut long bikpela tok bilong hap bilong miting yu laik redim. Tingim het tok bilong atikol o sapta, skelim olsem wanem ol liklik het tok i sapotim as tok bilong stadi, na skelim gut ol piksa na ol riviu askim i kamapim klia ol bikpela poin. Ritim olgeta wan wan paragraf, na painim bekim bilong ol askim bilong ol paragraf. Ritim ol skripsa em ol i no raitim tok bilong en, na skelim olsem wanem ol i strongim tok bilong paragraf. (Aposel 17:11) Taim yu painim bekim, makim long pen sampela wed o hap tok we inap helpim yu long tingim bekim. Na long taim bilong miting, sapos yu laik, yu ken apim han na mekim sotpela bekim long toktok bilong yu yet.
Taim yu skelim ol narapela narapela tok i kamap long ol miting long olgeta wik, save bilong yu long tok bilong Baibel bai i go bikpela.—Matyu 13:51, 52.
Yu inap bihainim wanem sediul bilong redim ol miting?
Olsem wanem yu inap redi long bekim tok long miting?
-
-
Famili Lotu Em Wanem Samting?Husat i Mekim Laik Bilong Jehovah Long Nau?
-
-
Lesen 10
Famili Lotu Em Wanem Samting?
Saut Korea
Brasil
Australia
Gini
Kirap long bipo yet, Jehova i laik bai olgeta famili i mas bung wantaim bilong strongim pasin bilong ol long pas gut wantaim God na ol wanfamili. (Lo 6:6, 7) Olsem na ol Witnes Bilong Jehova i makim taim long olgeta wik bilong famili i ken lotu wantaim—ol i amamas na toktok long ol samting i helpim ol long pas gut wantaim God. Maski sapos yu stap wanpis, yu ken yusim dispela haptaim long stadi long tok bilong God long Baibel, long samting yu laik kisim save long en.
Em taim bilong go klostu moa long Jehova. “Yupela i mas i go klostu long God, na em bai kam klostu long yupela.” (Jems 4:8) Long rot bilong Tok Bilong God, bai yumi save gut moa long Jehova taim yumi kisim save long pasin bilong em na ol wok em i mekim. Wanpela isi wei long kirapim famili lotu bilong yupela, em long lusim haptaim long ritim Baibel wantaim, ating yupela i ken bihainim sediul bilong Skul Tiokratik Bilong Autim Tok. Olgeta wan wan long famili i ken ritim sampela hap bilong Baibel ritim, na bihain olgeta i ken stori long skul ol i bin kisim.
Em taim bilong pas gut moa wantaim ol wanfamili. Pasin bilong stadi long Baibel olsem famili i save strongim ol maritman na maritmeri, ol papamama na ol pikinini, long pas gut wantaim. Em taim we olgeta long famili i ken stap amamas na bel isi wantaim; famili lotu em samting ol i wetim long olgeta wik. Papamama i ken tingim krismas bilong ol pikinini na toktok long ol samting i helpim ol pikinini, ating ol i ken yusim sampela tok bilong Wastaua na Kirap! o Web-sait bilong yumi, jw.org. Yupela i ken toktok long wanpela hevi em ol pikinini bilong yupela i bungim long skul na olsem wanem ol inap karim dispela hevi. Ating bai yupela i amamas long lainim ol singsing em ol bai mekim long ol miting, na kisim koldring na bisket samting bihain long famili lotu.
Dispela spesel taim long olgeta wik we yupela famili i bung wantaim bilong lotuim Jehova, bai helpim olgeta long amamas long stadi long Baibel, na Jehova bai blesim hatwok bilong yupela.—Song 1:1-3.
Bilong wanem mipela i save makim taim bilong mekim famili lotu?
Papamama i ken mekim wanem na bai olgeta long famili i amamas long mekim famili lotu?
-
-
Bilong Wanem Mipela i Save Go Long Ol Bikpela Kibung?Husat i Mekim Laik Bilong Jehovah Long Nau?
-
-
Lesen 11
Bilong Wanem Mipela i Save Go Long Ol Bikpela Kibung?
Meksiko
Jemani
Botswana
Nikaragua
Itali
Bilong wanem ol manmeri long dispela piksa i amamas tru? Ol i stap long wanpela kibung bilong mipela. God i bin tokim ol wokboi bilong em long bipo long bung wantaim inap 3-pela taim long olgeta yia, na olsem tasol mipela tu i save amamas long bung wantaim long ol bikpela kibung. (Lo 16:16) Long olgeta yia, mipela i gat 3-pela bikpela bung: 2-pela wan de kibung sekit, na 3-pela de rijinel kibung. Olsem wanem ol dispela kibung i save helpim mipela?
Ol kibung i save strongim lain brata Kristen bilong mipela. Lain Israel i bin amamas long litimapim nem bilong Jehova “namel long ol manmeri i bung bilong lotu,” na mipela tu i save amamas long lotuim Jehova long ol spesel bung. (Song 26:12; 111:1) Ol dispela bung i opim rot long mipela inap bungim ol Witnes bilong ol narapela kongrigesen na ol narapela kantri tu. Mipela i save bringim lans, na long belo mipela i kaikai wantaim long ples kibung, dispela i save strongim gutpela pasin pren i stap long ol dispela bung bilong lotu. (Aposel 2:42) Long ol dispela kibung, mipela i pilim pasin laikim we i save bungim mipela “olgeta wanbilip” i stap long olgeta hap.—1 Pita 2:17.
Ol kibung i helpim mipela long pas gut moa wantaim God. Lain Israel i kisim helpim long rot bilong “save gut” long buk bilong God, em ol pris i skulim ol long en. (Nehemia 8:8, 12) Mipela tu i amamas long skul mipela i kisim long Baibel long ol kibung bilong mipela. Olgeta wan wan kibung i gat as tok bilong en i kam long Baibel. Long rot bilong ol gutpela tok na soim, mipela i lain long pasin bilong bihainim laik bilong God long laip bilong mipela. Mipela i kisim strong taim mipela i harim ekspiriens bilong ol bratasista husat i bihainim pasin Kristen, maski i hatwok long mekim olsem long dispela taim nogut. Long ol rijinel kibung i gat ol drama, na ol i save helpim mipela long pilim tru ol stori bilong Baibel na kisim skul long en. Long ol kibung, ol lain husat i dediket pinis long God, ol i ken kisim baptais.
Bilong wanem ol kibung i taim bilong amamas?
Sapos yu go long wanpela kibung, olsem wanem dispela inap helpim yu?
-
-
Olsem Wanem Mipela i Stretim Wok Bilong Autim Tok Bilong Kingdom?Husat i Mekim Laik Bilong Jehovah Long Nau?
-
-
Lesen 12
Olsem Wanem Mipela i Stretim Wok Bilong Autim Tok Bilong Kingdom?
Spen
Belarus
Hong Kong
Peru
Paslain liklik long Jisas i dai, em i tok: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.” (Matyu 24:14) Tasol olsem wanem ol inap autim tok long olgeta hap? Long rot bilong bihainim pasin Jisas i soim taim em i stap hia long graun.—Luk 8:1.
Mipela i laik bungim ol man long haus bilong ol. Jisas i skulim ol disaipel bilong em long autim gutnius long ol haus. (Matyu 10:11-13; Aposel 5:42; 20:20) Jisas i makim ol teritori we ol dispela disaipel bai autim tok long en. (Matyu 10:5, 6; 2 Korin 10:13) Long nau tu, mipela i stretim gut wok autim tok bilong mipela, na olgeta kongrigesen i kisim teritori bilong autim tok long en. Dispela i helpim mipela long bihainim tok bilong Jisas long “autim tok long ol manmeri na stori gut tru” long ol.—Aposel 10:42.
Mipela i laik bungim ol man long olgeta hap ol i stap long en. Jisas i stap gutpela eksampel tu long pasin bilong autim tok long ol man long ol pablik ples, olsem long nambis o long hulwara bilong komiuniti. (Mak 4:1; Jon 4:5-15) Mipela tu i save toktok wantaim ol man long Baibel long olgeta kain hap—long ol rot, ol ples bisnis, ol pak, o long telefon. Taim rot i op, mipela i save autim tok tu long ol neiba, ol wanwok, ol klasmeit, na ol wanblut. Long dispela rot, planti milion manmeri long olgeta hap inap harim gutnius long “Bikpela i save kisim bek ol manmeri.”—Song 96:2.
Olsem wanem? Yu inap tingim wanpela man em yu laik serim gutnius bilong Kingdom Bilong God wantaim em na bai gutpela samting inap painim em long bihain? Orait, no ken pasim maus, kirap nau long autim dispela gutpela tok long ol narapela!
Wanem dispela “gutnius” mipela i mas autim?
Ol Witnes Bilong Jehova i mekim wanem bilong bihainim eksampel bilong Jisas long autim tok?
-
-
Painia Em Wanem Samting?Husat i Mekim Laik Bilong Jehovah Long Nau?
-
-
Lesen 13
Painia Em Wanem Samting?
Kanada
Autim tok long ol haus
Baibel stadi
Mekim stadi bilong em yet
Jisas i olsem wanpela painia, God i bin salim em i kam daun long graun long mekim wok we i opim rot long God i ken kisim bek ol man. (Matyu 20:28) Long nau, ol disaipel bilong Jisas i bihainim pasin bilong em na ol i lusim bikpela haptaim long “kamapim ol disaipel.” (Matyu 28:19, 20) Sampela ol inap insait long mekim wok em mipela i save kolim olsem wok painia.
Painia i save autim tok fultaim. Olgeta Witnes Bilong Jehova i insait long wok bilong autim gutnius olsem pablisa. Tasol sampela i stretim sindaun bilong ol na bai ol inap mekim wok painia oltaim, ol i save lusim 70 aua long olgeta mun long mekim wok autim tok. Bilong mekim olsem, planti i kisim pat-taim wok mani. Na sampela inap mekim wok painia salim long ol hap we i sot long ol man bilong autim gutnius. Ol i save lusim 130 aua bilong autim tok long olgeta mun. Ol painia i amamas maski ol i no gat planti samting bilong skin, ol i bilip olsem Jehova bai lukautim ol long ol samting ol i nidim. (Matyu 6:31-33; 1 Timoti 6:6-8) Ol arapela husat i no inap mekim wok painia oltaim, ol i mekim wok painia haptaim taim rot i op. Ol i lusim 30 o 50 aua long autim tok long wanpela mun.
Pasin bilong laikim God na ol man, i kirapim painia long mekim wok. Olsem Jisas, mipela i luksave olsem ol man i gat bikpela laik long save long God na ol samting em i tingting pinis long mekim. (Mak 6:34) Mipela i gat dispela save we inap helpim ol man long nau long bilip na wetim gutpela samting bai kamap bihain. Pasin laikim i kirapim painia long givim taim na strong bilong em long helpim ol narapela long kisim save long gutnius. (Matyu 22:39; 1 Tesalonaika 2:8) Dispela i save strongim bilip bilong painia, em i go klostu moa long God, na em i kisim bikpela amamas.—Aposel 20:35.
Wok painia em wanem samting?
Wanem samting i kirapim sampela long mekim wok painia oltaim?
-
-
Ol i Redim Wanem Ol Skul Bilong Ol Painia?Husat i Mekim Laik Bilong Jehovah Long Nau?
-
-
Lesen 14
Ol i Redim Wanem Ol Skul Bilong Ol Painia?
Amerika
Skul Gileat, Patterson, New York
Panama
Ol Witnes Bilong Jehova i gat nem long wokim kain kain skul bilong Baibel. Ol i redim ol spesel skul bilong ol lain husat i lusim bikpela haptaim bilong ol long autim tok bilong Kingdom na bai ol i ken “inapim tru wok bilong God.”—2 Timoti 4:5.
Skul Bilong Wok Painia. Taim painia oltaim i inapim fes yia bilong em long fultaim sevis, ol bai makim em long insait long wanpela skul we bai kamap inap 6-pela de. Ating skul bai kamap long wanpela Haus Kingdom i stap klostu. Wok bilong dispela skul em bilong helpim painia long i go klostu moa long Jehova, mekim gut moa wok autim tok, na stap gut yet long wok bilong God.
Skul Bilong Ol Kingdom Evanselis. Dispela skul em bilong 2-pela mun. Em bilong givim trening long ol painia i save gut long wok na ol i orait long lusim ples na bai ol i ken helpim wok long narapela hap. I olsem ol i tok, “Salim mi” bikos ol i laik bihainim pasin bilong nambawan Evanselis husat i bin mekim wok long graun, em Jisas Krais. (Aisaia 6:8; Jon 7:29) Taim ol i go stap long narapela hap, dispela inap makim olsem ol i no inap holim planti samting bilong skin. Ating kalsa, weda, na kaikai bai narapela kain olgeta long ol samting ol i lain pinis long en. Ating ol bai gat wok long lainim tu narapela tokples. Ol singel brata na ol singel sista na ol marit, em krismas bilong ol i namel long 23 i go 65, ol inap insait long dispela skul. Dispela skul bai helpim ol long kisim moa yet ol pasin Kristen we inap helpim ol long mekim gut asainmen bilong ol, na opim rot long Jehova na oganaisesen bilong em long givim sampela wok moa long ol.
Wastaua Baibel Skul Bilong Gileat. Long tok Hibru, “Gileat” i makim “Hip Witnes.” Skul Gileat i kirap long 1943, na i kam inap nau winim 8,000 i bin gretiuet long dispela skul. Ol i salim ol i go olsem ol misineri bilong mekim wok witnes “long olgeta hap,” na wok i kamap gut tru. (Aposel 13:47) Taim ol fes sumatin i gretiuet na i go long Peru, i no gat ol kongrigesen long dispela kantri. Nau winim 1,000 kongrigesen i stap. Taim ol misineri bilong yumi i kirap mekim wok long Japan, namba bilong ol Witnes long dispela kantri i no winim 10-pela. Nau namba bilong ol Witnes long Japan i winim 200,000. Dispela skul i bilong 5-pela mun na ol i stadi gut tru long Baibel. Ol painia salim, ol misineri, ol lain i wok long ol brens ofis, na ol wasman sekit inap kisim invatesen long i go long dispela skul. Ol i kisim gutpela trening bilong strongim na helpim wok i kamap gutpela moa long olgeta hap.
Wanem wok bilong Skul Bilong Wok Painia?
Husat inap insait long Skul Bilong Ol Manmeri i Autim Gutnius Bilong Kingdom?
-