Yu stadi long Baibel wantaim ol Witnes Bilong Jehova na yu kisim save long tok i tru. Ol samting yu bin kisim save long en i bin helpim yu long pas gut wantaim God, na yu inap bilip na wet long kisim laip na ol blesing long Paradais long graun aninit long Kingdom Bilong God. Bilip bilong yu long Tok Bilong God i bin kamap strong moa, na long rot bilong bung wantaim kongrigesen Kristen, yu bin kisim pinis planti blesing. Yu luksave pinis long pasin Jehova i save mekim long lain bilong em long nau.—Sek. 8:23.

Taim yu redi long kisim baptais, i gutpela yu tingim ol bikpela bilip Kristen, na dispela bai helpim yu. Ol elda bilong kongrigesen bai skelim ol dispela tok wantaim yu. (Hib. 6:1-3) Mipela i laik bai Jehova i ken wok yet long blesim hatwok yu mekim bilong kisim save long em, na em i ken givim yu dispela prais em i bin tok promis long en.—Jon 17:3.

1. Bilong wanem yu laik kisim baptais?

2. Jehova em i husat?

• “Jehova, em i God tru, long heven na long graun. I no gat narapela god.”—Lo 4:39.

• “Yu, nem bilong yu, Jehova, yu wanpela tasol yu God Antap Tru na yu bosim olgeta hap bilong graun.”—Sng. 83:18.

3. Bilong wanem em i bikpela samting long yu yusim nem bilong God?

• “Yupela i mas beten olsem: ‘Papa bilong mipela long heven, nem bilong yu i mas i stap holi.’”—Mat. 6:9.

• “Olgeta manmeri i singaut long nem bilong Jehova, em bai kisim bek ol.”—Rom 10:13.

4. Wanem sampela biknem em Baibel i kolim long Jehova?

• “Jehova, Krieta bilong olgeta samting long graun, em i God bilong oltaim oltaim.”—Ais. 40:28.

• “Papa bilong mipela long heven.”—Mat. 6:9.

• “God em i pasin laikim.”—1 Jon 4:8.

5. Yu ken givim wanem samting long God Jehova?

• “Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu, na long strong olgeta bilong yu.”—Mak 12:30.

• “Yu mas lotu long Jehova, God bilong yu, na yu mas mekim wok bilong em wanpela tasol.”—Luk 4:8.

6. Bilong wanem yu laik i stap gut long Jehova?

• “Pikinini bilong mi, bihainim savetingting na mekim bel bilong mi i amamas, na bai mi inap bekim tok long man husat i save sutim tok long mi.”—Prov. 27:11.

7. Yu mas beten long husat? Na yu mas beten long nem bilong husat?

• “Tru tumas mi tokim yupela, sapos yupela i askim Papa long wanpela samting long nem bilong mi, em bai givim long yupela.”—Jon 16:23.

8. Yu ken beten long wanem ol samting?

• “Yupela i mas beten olsem: ‘Papa bilong mipela long heven, nem bilong yu i mas i stap holi. Kingdom bilong yu i mas i kam. Laik bilong yu i mas kamap long graun olsem em i save kamap long heven. Givim bret long mipela inap long dispela de; na fogivim ol rong bilong mipela olsem mipela i fogivim ol man i rongim mipela. Na no ken larim mipela i pundaun long traim, tasol kisim bek mipela long han bilong Satan.’”—Mat. 6:9-13.

• “Bilip yumi gat long em i olsem, maski wanem wanem samting yumi askim em long en na i stret wantaim laik bilong em, em bai harim yumi.”—1 Jon 5:14.

9. Wanem samting inap mekim na Jehova i no harim beten bilong wanpela?

• “Yupela bai singaut long Jehova long helpim yupela, tasol em bai i no inap bekim singaut bilong yupela . . . long wanem, yupela i save mekim ol pasin nogut.”—Mai. 3:4.

• “Ai bilong Jehova i save lukluk long ol stretpela man, na em i save putim yau long ol taim ol i beten strong long em. Tasol Jehova i no laikim ol man i save mekim pasin nogut.”—1 Pita 3:12.

10. Jisas Krais em i husat?

• “Saimon Pita i bekim tok olsem: ‘Yu dispela Krais, Pikinini bilong dispela God i stap laip.’”—Mat. 16:16.

11. Bilong wanem Jisas i kam long graun?

• “Pikinini bilong man i no kam bilong ol man i mas helpim em, nogat, em i kam bilong helpim ol man na givim laip bilong em olsem pe bilong baim bek planti manmeri.”—Mat. 20:28.

• “Mi [Jisas] mas autim gutnius bilong Kingdom Bilong God long ol arapela taun tu, long wanem, em long dispela as na God i salim mi i kam.”—Luk 4:43.

12. Olsem wanem yu inap soim olsem yu tenkyu long ofa bilong Jisas?

• “Em i bin i dai bilong helpim olgeta man olsem bai ol man i stap laip ol i no ken bihainim laik bilong ol yet, nogat. Ol i mas bihainim laik bilong dispela man husat i kisim ples bilong ol na i dai na i kirap bek tu.”—2 Kor. 5:15.

13. Jisas i gat wanem namba?

• “God i givim mi namba long bosim olgeta samting long heven na long graun.”—Mat. 28:18.

• “God i givim bikpela namba moa long em na i givim em wanpela nem i winim olgeta arapela nem.”—Fili. 2:9.

14. Yu bilip olsem Gavening Bodi Bilong Ol Witnes Bilong Jehova em i “gutpela wokboi i gat savetingting” em Jisas i bin makim?

• “Husat tru em i gutpela wokboi i gat savetingting? Bosman bilong em i bin makim em long lukautim ol arapela wokboi na givim kaikai long ol long taim stret.”—Mat. 24:45.

15. Olsem wanem? Holi spirit em wanpela man?

• “Ensel i tokim em: ‘Holi spirit bai i kam i stap long yu, na strong bilong God Antap Tru bai karamapim yu. Olsem na dispela pikinini yu bai karim, ol bai kolim em holi na Pikinini Bilong God.’”—Luk 1:35.

• “Sapos yupela ol man nogut inap givim ol gutpela presen long ol pikinini bilong yupela, orait yupela i ken save tru olsem Papa long heven bai givim holi spirit long ol man i askim em!”—Luk 11:13.

16. Olsem wanem Jehova i mekim wok long holi spirit bilong em?

• “Jehova i tok tasol na olgeta samting long ples antap i kamap, na long rot bilong win bilong maus bilong em, olgeta dispela samting bilong ples antap i kamap.”—Sng. 33:6.

• “Yupela bai kisim strong taim holi spirit i kam i stap long yupela. Na yupela bai stap witnes bilong mi . . . long olgeta hap bilong graun.”—Apo. 1:8.

• “I no gat wanpela tok profet bilong Rait Holi em tingting bilong man yet i as bilong en. Nogat. Long wanem, ol tok profet i no bin kamap long laik bilong ol man yet, nogat, holi spirit i kirapim ol long autim ol tok God yet i bin givim long ol.”—2 Pita 1:20, 21.

17. Kingdom Bilong God em wanem samting?

• “God bilong heven bai kamapim wanpela kingdom we i no inap bagarap. Na dispela kingdom i no inap go long han bilong ol narapela manmeri. Em bai brukbrukim i go liklik liklik na pinisim olgeta dispela kingdom, na em wanpela tasol bai stap oltaim oltaim.”—Dan. 2:44.

18. Olsem wanem Kingdom Bilong God bai helpim yu?

• “Em bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen. Ol dispela samting bilong bipo ol i pinis olgeta.”—Rev. 21:4.

19. Olsem wanem yu save olsem ol blesing bilong Kingdom bai kamap klostu nau?

• “Ol disaipel tasol i kam long em na tok: ‘Tokim mipela, wanem taim bai ol dispela samting i kamap? Na wanem sain bai kamap bilong soim olsem yu kam i stap na pinis bilong dispela taim i kamap pinis? Jisas i bekim tok long ol olsem: ‘. . . Wanpela kantri bai pait long narapela kantri na wanpela kingdom bai pait long narapela kingdom. Na bai i gat taim bilong ol bikpela hangre na ol guria bai kamap long narapela narapela hap. Na ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.’”—Mat. 24:3, 4, 7, 14.

• “Long taim bilong las de, taim nogut bai kamap na dispela bai givim hatwok long ol man. Ol man bai laikim ol yet tasol, ol bai laikim tumas mani, ol bai apim nem bilong ol yet, ol bai i gat pasin antap, ol bai tok nogut long God na ol arapela, ol bai sakim tok bilong papamama, ol bai i no tok tenkyu, ol bai i no stap gut long narapela, ol bai i no gat pasin bilong laikim ol wanfamili, ol bai i no laik kamap wanbel, ol bai bagarapim gutnem bilong ol arapela, ol bai i no gat pasin bilong bosim bel, ol bai kamap wail olgeta, ol bai i no laikim ol gutpela pasin, ol bai birua long ol pren bilong ol, ol bai i gat strongpela het, ol bai pulap long pasin antap, ol bai i no laikim God, nogat, ol bai laikim kain kain amamas, bai i luk olsem ol i gat pasin bilong givim bel tru long God, tasol ol i no larim strong bilong dispela pasin i bosim wokabaut bilong ol; yu mas givim baksait long ol dispela kain man.”—2 Tim. 3:1-5.

20. Olsem wanem yu ken soim olsem Kingdom em i bikpela samting long yu?

• “Wok yet long painim Kingdom pastaim na stretpela pasin bilong God.”—Mat. 6:33.

• “Jisas i tokim ol disaipel bilong em: ‘Sapos wanpela man i laik bihainim mi, orait em i mas givim baksait long ol laik bilong em yet na karim diwai pos bilong em na bihainim mi oltaim.’”—Mat. 16:24.

21. Satan em i husat? Na ol spirit nogut ol i husat?

• “Yupela i kam long Papa bilong yupela, em Devil . . . Long pastaim em i man bilong kilim man i dai.”—Jon 8:44.

• “Ol i tromoi dispela traipela snek i go daun, em dispela snek bilong bipo yet, ol i kolim em Devil na Satan. Em man i save giamanim olgeta manmeri bilong graun.”—Rev. 12:9.

22. Satan i sutim wanem tok long Jehova na ol man i lotuim Jehova?

• “Na meri i bekim tok long snek olsem: ‘Mitupela i ken kaikai prut bilong ol diwai bilong gaden. Tasol God i tok long prut bilong dispela diwai i stap namel long gaden olsem, “Yutupela i no ken kaikai prut bilong en, nogat. Na yutupela i no ken tatsim prut bilong en. Sapos yutupela i mekim, bai yutupela i dai.”’ Orait na snek i tokim meri olsem: ‘Tru tumas, yutupela i no inap i dai. God i save olsem long dispela de stret yutupela i kaikai prut bilong en, ai bilong yutupela bai op, na bai yutupela i kamap wankain olsem God, na bai yutupela i save long wanem samting i gutpela na wanem samting i nogut.’”—Stt. 3:2-5.

• “Satan i bekim tok long Jehova olsem: ‘Tru, a? Tasol sapos wanpela man i laik i dai, em bai givim olgeta samting bilong em bilong seivim laip bilong em yet.’”—Jop 2:4.

23. Yu ken mekim wanem bilong soim olsem ol tok Satan i sutim i no tru?

• “Yu mas . . . givim bel olgeta [long God].”—1 Sto. 28:9.

• “I go inap long taim mi dai, mi no inap lusim pasin bilong mi long i stap gut long God!”—Jop 27:5.

24. Bilong wanem ol manmeri i save dai?

• “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.”—Rom 5:12.

25. Wanem samting i painim ol man i dai pinis?

• “Ol man i stap laip ol i save olsem ol bai dai, tasol ol man i dai pinis ol i no save long wanpela samting.”—Ekl. 9:5.

26. Wanem gutpela samting bai painim ol man i dai pinis?

• “Bai i gat kirap bek bilong ol man i dai pinis, em ol stretpela man na ol man nogut wantaim.”—Apo. 24:15.

27. Hamas manmeri bai i go long heven na mekim wok king wantaim Jisas?

• “Lukim Pikinini Sipsip i sanap antap long Maunten Saion, na 144,000 manmeri i sanap wantaim em. Nem bilong em na nem bilong Papa bilong em i stap long poret bilong ol.”—Rev. 14:1.

Taim yu stadi long Baibel, yu bin kisim save long ol samting Jehova i laik bai yu mekim na long rot bilong bihainim ol stretpela lo bilong em. Bilong bihainim ol samting yu kisim save long en, ating yu mas senisim sampela tingting bilong yu long laip na senisim sampela pasin bilong yu. Nau yu bin pasim tok long bel long bihainim ol stretpela lo bilong Jehova, olsem na yu inap mekim wok olsem wanpela wokman bilong autim gutnius.

Taim yu skelim ol askim i kamap bihain long dispela, em bai helpim yu long tingim gut ol stretpela lo bilong Jehova na i kirapim yu long tingim sampela samting yu ken mekim bilong stap wanpela wokman em i orait long en. Ol dispela tok bai helpim yu long tingim olsem em i bikpela samting long mekim ol samting na bai maus bilong bel i no gat tok na bai ol samting yumi mekim i litimapim nem bilong Jehova.—2 Kor. 1:12; 1 Tim. 1:19; 1 Pita 3:16, 21.

Nau yu laik kisim baptais na yu laik stap daun long wok bos bilong Jehova na stap insait long oganaisesen bilong em. Ol askim na ol skripsa bai helpim yu long skelim olsem yu kliagut long pasin bilong daun long wok bos em Jehova i makim insait long kongrigesen, famili, na wok politik bilong dispela graun. Yu bai pilim tru rot Jehova i stretim bilong skulim lain bilong em na strongim bilip bilong ol. Dispela i makim olsem yu mas go long ol miting bilong kongrigesen na bekim tok.

Na tu, dispela hap bai stori long olsem wanem em i bikpela samting long insait long wok bilong autim tok bilong Kingdom, helpim ol narapela long kisim save long Jehova, na ol samting em i mekim bilong helpim ol man. (Mat. 24:14; 28:19, 20) Na dispela bai helpim yu long luksave olsem dediket na baptais bilong yu long God Jehova i bikpela samting. Yu ken bilip tru olsem Jehova i amamas tru long yu pilim tru bikpela pasin helpim em i soim long yu.

1. Lo Kristen i tok wanem long marit? Baibel i kamapim wanem wanpela as tasol bilong katim marit olsem divos?

• “Ating yupela i no ritim tok olsem man husat i bin wokim ol long pastaim tru, em i bin wokim ol i kamap man na meri? Na ating yupela i no bin ritim tok bilong em olsem: ‘Long dispela as man bai lusim papa na mama bilong em na pas wantaim meri bilong em, na tupela bai kamap wanpela bodi’? Tupela i no stap olsem tupela moa, ol i kamap wanpela bodi tasol. Olsem na samting God i pasim pinis, man i no ken katim. . . . Man i katim marit na maritim narapela meri, orait dispela man i mekim pasin adaltri.”—Mat. 19:4-6, 9.

2. Ol man na meri i stap wantaim olsem ol marit, bilong wanem ol i mas stretim gut marit? Sapos yu marit, marit bilong yu i rejista long gavman o yu bihainim stret pasin bilong ples long marit?

• “Yu mas wok yet long kirapim tingting bilong ol long ol i mas daun long ol gavman na long ol man i gat namba na ol i mas bihainim tok bilong ol.”—Tai. 3:1.

• “Olgeta manmeri i mas tingim marit olsem samting i dia tumas. Marit i mas i stap klin, long wanem, God bai kotim ol manmeri i mekim pasin pamuk na pasin adaltri.”—Hib. 13:4.

3. Wanem wok bilong yu insait long famili?

• “Pikinini man bilong mi, putim yau long tok bilong papa bilong yu long stretim yu, na no ken givim baksait long tok bilong mama bilong yu.”—Prov. 1:8.

• “Maritman em i stap het bilong meri bilong em, olsem Krais i stap het bilong kongrigesen. . . . Ol maritman, yupela i mas laikim yet ol meri bilong yupela olsem Krais tu i laikim kongrigesen.”—Efe. 5:23, 25.

• “Ol papa, yupela i no ken sikirapim bel bilong ol pikinini bilong yupela, nogat. Oltaim yupela i mas mekim bikpela long ol na trenim ol olsem Jehova i makim, na putim tingting bilong em long bel bilong ol.”—Efe. 6:4.

• “Yupela ol pikinini, yupela i mas bihainim tok bilong papamama bilong yupela long olgeta samting, long wanem, Bikpela i save laikim dispela kain pasin.”—Kol. 3:20.

• “Yupela maritmeri, yupela i mas daun long ol man bilong yupela.”—1 Pita 3:1.

4. Bilong wanem yumi mas tingim tru laip?

• “[God] yet i givim laip na win na olgeta samting long olgeta manmeri. . . . Long rot bilong em yumi gat laip na yumi inap wokabaut na stap.”—Apo. 17:25, 28.

5. Bilong wanem yumi no ken kilim i dai narapela? Na bilong wanem yumi no ken kilim i dai bebi i stap yet long bel bilong mama?

• “Sapos sampela man i pait na wanpela bilong ol i paitim meri i gat bel na . . . sapos meri o bebi i dai, orait yupela i mas givim laip bilong senisim laip i lus.”—Kis. 21:22, 23.

• “Ai bilong yu i lukim mi taim mi stap blut yet; taim olgeta wan wan hap bilong bodi bilong mi i no kamap yet, yu raitim pinis olgeta hap bilong bodi bilong mi long buk bilong yu, na olgeta wan wan hap i kamap long taim stret bilong en.”—Sng. 139:16.

• “Jehova i nolaik tru . . . ol han i save kapsaitim blut bilong ol man i no gat asua.”—Prov. 6:16, 17.

6. Wanem lo bilong Jehova long blut?

• “Sakim yet . . . blut na no ken kaikai ol animal ol i pasim nek bilong ol na kilim ol i dai.”—Apo. 15:29.

7. Bilong wanem yumi mas laikim ol bratasista Kristen bilong yumi?

• “Mi givim nupela lo long yupela, olsem narapela i mas laikim narapela. Yupela i mas laikim narapela narapela olsem mi bin laikim yupela. Sapos pasin laikim i stap namel long yupela, orait olgeta bai save olsem yupela i disaipel bilong mi.”—Jon 13:34, 35.

8. Man i gat sik we inap kalap long narapela o sik inap kilim i dai man: (a) Bilong wanem em i no ken kirap na go holimpas ol arapela o givim kis long ol? (b) Bilong wanem em i no ken tingting nogut sapos sampela i no laik singautim em i go long haus bilong ol? (c) Sapos pasin em man i bin insait long en long bipo inap mekim na em i gat kain sik inap kalap long narapela, bilong wanem em i mas i gat laik long kisim blut tes paslain long em i kirap poromanim wanpela em i tingting long maritim? (d) Man i gat sik we inap kalap long narapela, bilong wanem em i mas toksave long kodineta bilong lain elda paslain long em i kisim baptais?

• “Yupela i no ken larim wanpela dinau bilong yupela i stap. . . . ‘Yu mas laikim ol arapela man olsem yu laikim yu yet.’ Man i gat pasin laikim em i no save mekim pasin nogut long narapela.”—Rom 13:8-10.

• “Yupela i no ken tingim laik bilong yupela yet tasol, nogat, yupela i mas tingim tu laik bilong ol arapela.”—Fili. 2:4.

9. Bilong wanem Jehova i laik bai yumi lusim rong bilong ol arapela?

• “Yupela i mas wok yet long karim hevi narapela i putim long yupela na amamas long fogivim narapela, na mekim olsem maski sapos i gat as na wanpela i gat tok long narapela. Jehova i amamas long fogivim yupela, olsem na yupela tu i mas mekim wankain pasin.”—Kol. 3:13.

10. Sapos wanpela brata i paulim mani o bagarapim gutnem bilong yu, orait yu mas mekim wanem?

• “Sapos brata bilong yu i mekim sin, orait yu mas i go na kamapim rong bilong em namel long yutupela yet. Sapos em i harim tok bilong yu, orait yu bai kisim bek brata bilong yu. Tasol sapos em i no harim tok, kisim wanpela o tupela narapela i go wantaim yu olsem witnes. Tok bilong tupela o tripela witnes bai mekim olgeta samting i stap ples klia. Sapos em i no harim tok bilong ol, orait tokim kongrigesen. Na sapos em i no harim tok bilong kongrigesen, orait long ai bilong yu em i mas stap olsem man bilong narapela lain o olsem wanpela takisman.”—Mat. 18:15-17.

11. Jehova i gat wanem tingting long ol dispela sin?

▪ Pasin pamuk

▪ Pasin bilong lotuim ol imis

▪ Ol man i slip wantaim ol man na ol meri i slip wantaim ol meri

▪ Pasin bilong stil

▪ Pasin bilong pilai laki

▪ Pasin bilong dring spak

• “Ol man i no save bihainim stretpela pasin bai i no inap i go insait long Kingdom Bilong God. Ating yupela i no save long dispela, a? No ken giamanim yupela yet. Ol man i save mekim pasin pamuk, lotuim ol imis, mekim pasin adaltri, na ol man i orait long ol man i mekim pasin sem long ol, na ol man i slip wantaim ol man, na ol stilman, ol gridi man, ol spakman, ol man bilong toknogutim ol arapela, na ol man bilong pulim ol samting bilong ol arapela, olgeta dispela kain man bai i no inap i go insait long Kingdom Bilong God.”—1 Kor. 6:9, 10.

12. Long sait bilong olgeta kain pasin pamuk, yu tingting strong long mekim wanem?

• “Yupela i mas ranawe long pasin pamuk!”—1 Kor. 6:18.

13. Bilong wanem yumi mas abrusim olgeta kain drak i save paulim tingting?

• “Givim bodi bilong yupela olsem sakrifais i stap laip, na i stap holi, na God i orait long en. Dispela em wanpela wok bilong God yupela i mekim wantaim gutpela tingting. Na yupela i no ken wokabaut moa long wankain pasin olsem ol man bilong dispela taim i save bihainim. Nogat. Yupela i mas kisim nupela tingting na bai pasin bilong yupela i senis. Olsem bai yupela i ken save tru long laik bilong God, em dispela laik em i gutpela, na em i orait, na i gutpela olgeta.”—Rom 12:1, 2.

14. Wanem sampela wok bilong ol spirit nogut em God i tambuim?

• “Yupela no ken mekim wok olsem man i save givim save long ol samting i stap hait, mejikman, na posinman, na yupela i no ken lukluk long ol mak bilong kisim save long ol samting bai kamap bihain, na yupela i no ken mekim marila, o go lukim man i save toktok wantaim ol daiman o man i save tokaut long ol samting bai kamap bihain, o man i save painimaut tingting bilong ol man i dai pinis.”—Lo 18:10, 11.

15. Sapos man i mekim bikpela sin, na em i laik bai Jehova i ken orait long em, orait kwiktaim em i mas mekim wanem samting?

• “Mi autim sin bilong mi long yu; mi no haitim rong bilong mi. Mi tok olsem: ‘Bai mi autim ol sin bilong mi long Jehova.’”—Sng. 32:5.

• “I gat wanpela namel long yupela i sik? Orait em i mas singautim ol hetman bilong kongrigesen i kam, na ol i ken beten long em na long nem bilong Jehova ol i ken welim em long oil. Beten bilong man i bilip bai mekim sikman i kamap orait, na Jehova bai helpim em long kamap strong. Na tu, sapos em i bin mekim sin, orait God bai fogivim em.”—Jems 5:13-15.

16. Sapos yu save olsem wanpela wanbilip i mekim bikpela rong, yu mas mekim wanem?

• “Sapos wanpela man i bin lukim narapela man i mekim rong o em i kisim save olsem narapela i bin mekim rong, orait em i wanpela witnes bilong samting i bin kamap. Bihain, taim em i harim singaut i kamap long pablik long man i mas kam na tokaut long kot, tasol em i no ripotim, orait em i mekim sin. Na em bai kisim panismen long rong em i mekim.”—Wkp. 5:1.

17. Sapos ol i mekim toksave long kongrigesen olsem wanpela i no stap moa olsem wanpela Witnes Bilong Jehova, orait yumi mas mekim wanem?

• “Lusim pasin bilong poroman wantaim wanpela man yupela i save kolim brata, husat i save mekim pasin pamuk, o gridi, o lotuim imis, o toknogutim narapela, o spak, o pulim ol samting bilong ol arapela. Yupela i no ken kaikai wantaim kain man olsem.”—1 Kor. 5:11.

• “Sapos wanpela man i kam long yupela na em i no bringim dispela tok i kam, orait no ken kisim em i go insait long haus bilong yupela o tok gude long em.”—2 Jon 10.

18. Bilong wanem yu mas i stap pren bilong lain i laikim Jehova?

• “Man i wokabaut wantaim ol man i gat savetingting, em bai gat savetingting, tasol man i poroman wantaim ol longlong man, trabel bai painim em.”—Prov. 13:20.

• “Man i wokabaut wantaim ol man i gat savetingting, em bai gat savetingting, tasol man i poroman wantaim ol longlong man, trabel bai painim em.”—1 Kor. 15:33.

19. Bilong wanem ol Witnes Bilong Jehova i no insait long wok politik?

• “Ol i no bilong dispela graun, olsem mi tu mi no bilong dispela graun.”—Jon 17:16.

20. Bilong wanem yu mas bihainim lo bilong gavman?

• “Olgeta man i mas aninit long ol gavman. Long wanem, bai i no gat wanpela gavman i stap sapos God i no larim em i stap. Olgeta gavman i stap, God yet i putim ol na ol i stap.”—Rom 13:1.

21. Sapos lo bilong gavman i pait wantaim lo bilong God, yu bai mekim wanem?

• “Mipela i mas bihainim tok bilong God tasol, na mipela i no ken bihainim tok bilong ol man.”—Apo. 5:29.

22. Taim yu laik kisim wok mani, wanem ol skripsa inap helpim yu na yu no insait long pasin bilong dispela graun?

• “Wanpela kantri i no inap apim bainat na pait long narapela kantri, na bai ol i no skul moa long pait.”—Mai. 4:3.

• “Ol manmeri bilong mi, yupela i mas lusim dispela ples [o Bikpela Babilon] na kam ausait sapos yupela i no laik poroman wantaim em long ol sin bilong em, na sapos yupela i no laik kisim hap bilong ol pe nogut bilong em.”—Rev. 18:4.

23. Yu bai makim wanem kain ol amamas yu laik kisim, na yu bai sakim wanem kain ol amamas?

• “Jehova i save . . . heitim tru ol man i laikim pasin bilong pait na bagarapim man.—Sng. 11:5.

• “Yupela i mas heitim tru pasin nogut, na pas tru long gutpela pasin.”—Rom 12:9.

• “Yupela i mas wok yet long tingim ol dispela samting, olsem: Ol samting i tru, ol bikpela samting, ol samting i stretpela, ol samting i klin, ol samting i kirapim pasin laikim, ol samting i gat gutnem, ol samting i gutpela, na ol samting i stret long ol man i litimapim.”—Fili. 4:8.

24. Bilong wanem ol Witnes Bilong Jehova i no save bung wantaim ol narapela lotu bilong mekim lotu?

• “Yupela i no inap kaikai long ‘tebol bilong Jehova’ na long tebol bilong ol spirit nogut wantaim.”—1 Kor. 10:21.

• “Jehova i tok: . . . ‘stap longwe long ol, na no ken tatsim samting i no klin; na bai mi kisim yupela.”’—2 Kor. 6:17.

25. Wanem ol stiatok inap helpim yu long skelim sapos yu inap insait long wanpela bung o nogat?

• “Ol i bung wantaim ol arapela lain manmeri na ol i bihainim ol pasin bilong ol. Na ol i wok long lotuim ol imis bilong ol dispela lain, na ol dispela samting i mekim ol i pundaun.”—Sng. 106:35, 36.

• “Ol man i dai pinis ol i no save long wanpela samting.”—Ekl. 9:5.

• “Ol i no bilong dispela graun, olsem mi tu mi no bilong dispela graun.”—Jon 17:16.

• “Yupela i wokabaut inap pinis long pasin bilong ol manmeri bilong graun, em ol pasin olsem, pasin bikhet na i no sem, na i no bosim liklik olgeta kain laik bilong bodi, dring planti tumas strongpela dring, mekim ol pati i gat planti pairap, pasin bilong dring spak, na ol pasin nogut tru bilong lotuim ol imis.”—1 Pita 4:3.

26. Olsem wanem ol stori bilong Baibel i helpim yu long wokim disisen olsem yu bai selebretim betde o nogat?

• “Long de namba 3, em betde bilong Fero na em i wokim bikpela kaikai bilong ol wokman bilong em. Na em i rausim bosman bilong lukautim wain na bosman bilong wokim bret long kalabus. Na em i bringim tupela i kam long ai bilong ol wokman bilong em. Na Fero i givim bek wok bilong bosman bilong lukautim wain . . . Tasol Fero i hangamapim bosman bilong wokim bret long wanpela pos.”—Stt 40:20-22.

• “Taim ol i mekim betde pati bilong Herot, pikinini meri bilong Herodias i kam danis na em i amamasim tru Herot. Olsem na Herot i mekim tok tru antap na promis long givim em wanem samting em i askim long en. Na meri i bihainim tok bilong mama bilong em na tok: ‘Givim mi het bilong Jon Bilong Baptais long wanpela plet.’ Na em i salim ol i go na ol i katim nek bilong Jon long haus kalabus.”—Mat. 14:6-8, 10.

27. Bilong wanem yu laik bihainim tok ol elda i givim bilong stiaim yumi?

• “Yupela i mas bihainim tok bilong ol man i go pas long yupela na stap aninit long ol. Oltaim ol i was long yupela, na bihain ol i mas tokim God long dispela wok ol i bin mekim. Yupela i mas stap aninit long ol, bai ol i ken mekim dispela wok wantaim amamas na ol i no ken bel hevi. Sapos ol i bel hevi, dispela inap bagarapim yupela.”—Hib. 13:17

28. Bilong wanem em i bikpela samting long yu na famili bilong yu i makim haptaim bilong ritim na stadi long Baibel?

“Dispela man i save amamas long lo bilong Jehova, na em i save ritim isi isi dispela lo long san na long nait. Dispela man i olsem diwai ol i planim klostu long wara, em i save karim kaikai long taim stret bilong em, na ol lip bilong em i no save drai. Na olgeta samting em i mekim i save kamap gutpela.”—Sng. 1:2, 3.

29. Bilong wanem yu save go long ol miting na insait long bekim tok?

• “Bai mi tokaut long nem bilong yu long ol brata bilong mi; bai mi litimapim nem bilong yu namel long ol lain manmeri i bung.”—Sng. 22:22.

• “Yumi wan wan i mas tingim narapela narapela, na kirapim ol long mekim pasin laikim na mekim ol gutpela wok. Yumi no ken lusim pasin bilong bung wantaim, olsem sampela i save mekim, nogat. Yumi mas strongim bel bilong narapela narapela na mekim moa yet taim yumi lukim dispela de i kam klostu.”—Hibru 10:24, 25.

30. Wanem nambawan wok em Jisas i tokim yumi long mekim?

• “Olsem na yupela i mas i go na kamapim ol disaipel long olgeta lain man, na baptaisim ol . . . Skulim ol long bihainim olgeta samting mi tokim yupela long mekim.”—Mat. 28:19, 20.

31. Jehova i save amamas long wanem kain pasin bilong givim kontribiusen bilong helpim wok bilong Kingdom o bilong helpim ol bratasista?

• “Onarim Jehova na givim em ol gutpela samting tru bilong yu.”—Prov. 3:9.

• “Olgeta wan wan i ken givim samting ol i pasim tok long bel long givim. Ol i no ken bel hevi na givim na narapela i no ken fosim ol long givim bikos God i save laikim tumas man husat i amamas long givim samting.”—2 Kor. 9:7.

32. Ol Kristen bai bungim wanem ol hevi?

• “Ol man em ol arapela i mekim nogut long ol bikos ol i bihainim stretpela pasin, ol i ken amamas, long wanem, Kingdom bilong heven em i bilong ol. Sapos nem bilong mi i stap long yupela na ol man i krosim yupela na mekim nogut long yupela na giaman na sutim kain kain tok nogut long yupela, orait yupela i ken amamas. Yupela i ken belgut na amamas tru, long wanem, pe bilong yupela long heven bai i bikpela tru. Ol man i bin mekim ol wankain pasin long ol profet i bin stap paslain long yupela.”—Mat. 5:10-12.

33. Bilong wanem em i wanpela gutpela blesing tru long kisim baptais olsem wanpela Witnes Bilong Jehova?

• “Ol tok bilong yu i mekim mi i amamas na belgut, Jehova God, bosman bilong bikpela lain ami, nem bilong yu i stap long mi.—Jer. 15:16.

Ol man i save kisim baptais long ol kibung bilong ol Witnes Bilong Jehova. Long pinis bilong tok bilong baptais, brata i mekim tok bai tokim ol man i laik kisim baptais long sanap na bekim dispela tupela askim long strongpela nek:

1. Yu hevi long ol sin yu bin mekim na yu tanim bel na dediket pinis long Jehova na bilip long samting em i mekim bilong kisim bek ol manmeri long rot bilong Jisas Krais?

2. Yu kliagut olsem taim yu baptais pinis, dispela samting i makim olsem nau yu wanpela Witnes Bilong Jehova na yu insait long oganaisesen bilong Jehova?

Taim ol man i laik kisim baptais i tok yes long ol dispela askim, i olsem ol i “tokaut . . . long ai bilong ol manmeri” olsem ol i bilip long pe bilong baim bek ol man na ol i bin dediket tru long Jehova. (Rom 10:9, 10) I gutpela ol man i laik kisim baptais i beten na tingting gut pastaim long ol dispela askim na bai strongpela bilip bilong ol i as bilong tok ol i kamapim.

Yu bin dediket pinis long Jehova long rot bilong beten na tok promis long lotuim em wanpela tasol na mekim laik bilong em i stap namba 1 samting long laip bilong yu?

Yu bilip tru olsem i stret yu mas kisim baptais nau?

Wanem kain klos i stret long werim na kisim baptais? (1 Tim. 2:9, 10; Jon 15:19; Fili. 1:10)

Yumi mas bilas long “pasin i soim rispek na gutpela tingting” na bai yumi kamapim klia olsem yumi “lotuim God.” Olsem na ol lain i laik kisim baptais i no inap werim ol samting i no haitim gut skin na ol klos i gat sampela rait o edvetaismen o piksa long en. Ol i mas werim ol klos i gutpela, klin, na i stret long werim na kisim baptais.

Man i mas bihainim wanem kain pasin taim em i kisim baptais? (Luk 3:21, 22)

Baptais bilong Jisas i stap olsem piksa bilong baptais Kristen long nau. Jisas i save olsem baptais em i bikpela samting, na tingting na pasin bilong em i kamapim klia dispela samting. Olsem na ples bilong kisim baptais i no ples bilong tok pani, o swim, o mekim narapela samting i daunim dispela bung i bikpela samting. Na nupela Kristen i no ken mekim pasin i olsem em i bin win long wanpela bikpela resis samting. Baptais em i taim bilong amamas, tasol yumi mas kamapim amamas long gutpela pasin rispek.

Olsem wanem pasin bilong go oltaim long ol miting na bung wantaim kongrigesen inap helpim yu long truim dediket bilong yu?

Taim yu baptais pinis, bilong wanem em i bikpela samting long yu mas bihainim yet gutpela sediul bilong mekim stadi bilong yu yet na autim tok oltaim?