Tok i Tru i Go Long Ol Longwe Ples

RIPABLIK Tuva long Rasia i stap long hap saut tru long arere bilong Saibiria, na Mongolia i stap long hap bilong saut na is. Planti man long Tuva ol i sindaun long ol longwe ples na i hatwok long kisim tok bilong Kingdom i go long ol. Tasol sampela taim i go pinis, wanpela lain bilong ol narapela narapela hap bilong Tuva ol i kam long biktaun Kyzyl bilong insait long wanpela bikpela bung. Maria, em wanpela painia long Kyzyl, em i save olsem dispela lain bai kam na em i tingim olsem dispela em wanpela gutpela taim bilong em i ken autim gutnius long ol.

Maria i stori long samting i kamap: “Dispela skul mi mekim wok tisa long en, i makim wanpela bung bilong toktok long olsem wanem ol inap helpim man i save kisim ol kain kain drak na dring spak. Inap olsem 50 manmeri bilong ol longwe ples long hap bilong Tuva ol i kam long dispela bung. Insait long dispela lain i gat ol tisa, ol dokta bilong glasim tingting, ol inspekta bilong welfe bilong lukautim ol pikinini, na sampela narapela.” Long Maria, dispela bung em i gutpela rot long autim tok, tasol i gat hatwok long en tu. Em i tok: “Mi meri bilong sem, na i hatwok long mi long autim tok long kain kain taim na ples. Tasol mi beten long Jehova i ken strongim mi long daunim pret na mi ken autim tok long ol dispela man.” Olsem wanem? Em bin autim gut tok?

Maria i tok moa: “Mi painim wanpela nius Kirap! i stori long pasin bilong pret nogut tru long kain kain samting. Mi tingting olsem, ‘Ating dokta bilong glasim tingting bai laikim dispela stori,’ olsem na mi kisim nius i go long skul. Long dispela de, wanpela meri tisa i stap long dispela bung em i kam long ofis bilong mi, na mi tilim dispela nius long en. Em i amamas long kisim. Em i tok em yet i gat pasin bilong pret pret long kain kain samting. Long de bihain mi kisim buk Sampela Askim Bilong Ol Yangpela​—Ol Gutpela Bekim, Volium 1, bilong givim long em. Em i amamas long kisim dispela buk tu. Em i laikim dispela buk, na mi ting ol narapela tisa tu bai laikim dispela buk. Olsem na mi kisim wanpela boks bilong buk Sampela Askim Bilong Ol Yangpela na sampela narapela buk samting i go long skul.” I no longtaim na boks i no gat buk moa. Maria i stori long samting i bin kamap: “Sampela wanwok bilong dispela tisa mi bin tilim buk Sampela Askim Bilong Ol Yangpela long em, ol i kam long ofis bilong mi na askim: ‘Ol i tilim ol buk long wanem hap?’ ” Ol i kam stret long hap we ol buk i stap long en!

Laspela de bilong bung em Sarere. Em de Maria i no save wok, olsem na em i putim ol buk samting long sampela tebol long ofis bilong em. Em i raitim toksave long blakbot olsem: “Yes Ol Tisa! Yupela i ken kisim ol buk o nius bilong yupela yet na bilong ol pren husat i laik ritim. Ol dispela gutpela buk samting bai helpim yupela na wok bilong yupela i kamap gutpela, na em bai strongim famili bilong yupela.” Wanem samting i kamap? Em i tok: “Mi go long ofis long dispela de na klostu olgeta buk samting i go pinis. Mi hariap i go kisim sampela buk na nius moa.” Long taim dispela bung i pinis, Maria i bin tilim 380 nius, 173 buk, na 34 buklet. Taim dispela lain i go bek long ol longwe ples bilong ol we ol i sindaun na wok long en, ol i kisim ol dispela buk na nius i go wantaim ol. Maria i tok: “Mi amamas olsem ol pikinini kaikai bilong tok bilong God i go kamap long ol longwe ples long hap bilong Tuva!”​—Sav. 11:6.

[Mep long pes 32]

(Bilong save ol dispela rait i stap we long pes, lukim buk o magasin)

RASIA

RIPABLIK TUVA