Man i Stap Rabis, Yu Ting Em Mak Olsem God i No Orait Long Em?
GOD i tokim ol Israel bilong bipo: “I no gat wanpela man bilong yupela bai i sot long ol samting.” Dispela i olsem, long wanem, Lo God i givim ol i tokim ol long samting ol i ken mekim bilong lukautim ol man i stap rabis, na long rausim ol dinau tu. (Lo 15:1-4, 7-10) Olsem na namel long ol Israel, i no gat as na man i mas i stap rabis, long wanem, Jehova i bin promis long mekim gut long ol. Tasol bilong kisim dispela blesing, ol i mas bihainim dispela Lo, em samting ol Israel i pundaun long mekim.
Tasol dispela i no makim olsem man i no gat planti samting em man God i no orait long en, na i wankain tu sapos man i gat planti samting bilong skin, dispela i no makim olsem em man God i orait long en. Planti gutpela wokboi bilong God i bin sot long ol samting bilong skin. Profet Amos i save was long ol sipsip na i lukautim ol diwai fik, em wanpela wok em i no kisim bikpela pe long en. (Amos 1:1; 7:14) Long taim bilong profet Elaija, wanpela bikpela hangre i kamap long Israel na wanpela wido i stap rabis i lukautim em long kaikai. Dispela meri inap mekim olsem, long wanem, long rot bilong mirakel, plaua na wel bilong em i no pinis. Jehova i no givim planti mani kago long Elaija o dispela wido, tasol em i lukautim ol long ol samting ol i mas i gat.—1 King 17:8-16.
Ating sampela i kamap rabisman, long wanem, wantu tasol taim nogut i painim ol. Wanpela eksiden o sik inap kamap na pasim man long mekim wok mani. Na dai inap mekim na pikinini i no gat papa, na meri i kamap wido. Tasol ol dispela samting nogut i no makim olsem God i no amamas long ol, nogat. Stori bilong Naomi na Rut i kamapim klia olsem Jehova i save lukautim ol man i sot. Maski man bilong Naomi na man bilong Rut i dai pinis na ol i sot tru long ol samting, God Jehova i blesim ol na wokim rot bilong ol i ken kisim ol samting bilong skin ol i mas i gat.—Rut 1:1-6; 2:2-12; 4:13-17.
Tru tumas, man i stap rabis, dispela i no makim olsem God i no orait long em, nogat. Ol man i stap gut long God Jehova ol i ken bilip long dispela tok bilong King Devit, olsem: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i raun askim ol arapela man long givim kaikai long ol. Nogat tru.”—Song 37:25.
[Piksa long pes 8]
Maski Naomi na Rut i stap rabis, God i givim blesing long ol, em i lukautim gut ol