Givim Baksait Long Lukim Ol Samting i No Gutpela!

“Helpim mi long givim baksait long ol samting i no gutpela. Mekim gut long mi olsem yu bin promis long mi.”​​—SNG. 119:37.

1. Pasin bilong lukim ol samting long ai em i bikpela samting olsem wanem?

PASIN bilong lukim ol samting long ai i gutpela samting tru, a? Long dispela rot, wantu yumi inap kliagut long ol samting i stap klostu long yumi​—bikpela bilong en na kala bilong en. Long rot bilong lukluk, yumi inap lukim ol i gutpela pren bilong yumi, o wanpela samting inap bagarapim yumi. Long rot bilong ai, yumi inap lukim ol naispela samting, pilim tru ol gutpela samting God i bin wokim, na kisim save olsem i gat God i stap na biknem bilong em. (Sng. 8:​3, 4; 19:​1, 2; 104:24; Ro. 1:​20) Ai bilong yumi i bikpela samting long putim save i go insait long tingting; em i gutpela rot bilong yumi long kisim save long Jehova na long strongim bilip bilong yumi.​​—Jos. 1:8; Sng. 1:​2, 3.

2. Bilong wanem yumi mas tingim gut ol samting yumi lukim? Yumi inap kisim wanem skul long tok bilong man bilong raitim song?

² Tasol tu, samting yumi lukluk long en, em inap nogutim yumi. Samting yumi lukim inap mekim bikpela samting long tingting bilong yumi, olsem em inap kirapim o strongim tru laik i stap long bel bilong yumi. Yumi stap long graun em Satan i bosim na ol man i save bihainim laik bilong ol yet tasol na mekim ol kain kain pasin nogut, olsem na planti taim yumi lukim ol samting em inap pulim yumi long mekim ol samting nogut​—maski yumi lukim dispela samting inap sotpela taim tasol. (1 Jo. 5:19) Olsem na i gat as na man bilong raitim song i askim God: “Helpim mi long givim baksait long ol samting i no gutpela. Mekim gut long mi olsem yu bin promis long mi.”​—Sng. 119:37.

Ai Inap Giamanim Yumi

3-5. Wanem ol stori long Baibel i soim olsem ai inap pulim yumi?

³ Tingim samting i bin painim namba wan meri, Iv. Satan i tok olsem ai bilong Iv bai i “op” sapos em i kaikai long pikinini bilong “diwai bilong givim gutpela save long wanem samting i gutpela na wanem samting i nogut.” Ating Iv i laik save moa long dispela tok olsem ai bilong em bai i “op.” Laik bilong em long kaikai dispela pikinini bilong diwai tambu i go strong moa taim em i “lukim dispela diwai i naispela tru na i gat ol gutpela pikinini tru bilong kaikai i stap long en.” Iv i lukluk long diwai na i laikim tru, na dispela i kirapim em long sakim tok bilong God. Man bilong em, Adam, em tu i sakim tok, na dispela i kamapim ol samting nogut tru long olgeta manmeri.​—Stt. 2:17; 3:​2-6; Ro. 5:12; Jem. 1:​14, 15.

⁴ Na tu, long taim bilong Noa, sampela ensel i larim ol samting ol i lukim i stiaim ol. Stat 6:2 i tok long ol olsem: “Ol pikinini man bilong God i lukim ol dispela meri i naispela tumas. Na ol i kisim ol meri long laik bilong ol yet na maritim ol.” Pasin bilong lukluk long ol meri na aigris long ol, dispela i kirapim bel bilong ol ensel na ol i laik mekim maritpasin wantaim ol meri bilong graun, em wanpela laik i no stret long ol ensel i kisim, na ol dispela ensel i kamapim ol pikinini em ol i man bilong pait na bagarapim man. Pasin nogut bilong ol man long dispela taim i mekim na olgeta manmeri i bagarap. Noa na famili bilong em, ol tasol i abrusim bagarap.​—Stt. 6:​4-7, 11, 12.

⁵ Planti handet yia bihain, ai bilong Akan bilong lain Israel i pulim em long stilim sampela samting long taun Jeriko, em taun ol i bin daunim pinis. God i bin tokim ol Israel long ol i mas bagarapim olgeta samting bilong dispela taun, sampela samting tasol ol i mas givim long haus mani bilong Jehova. Jehova i bin givim tok lukaut long ol Israel: “I tambu long yupela long kisim wanpela samting bilong taun.” Taim Akan i sakim tok bilong Jehova, ol manmeri bilong Israel i lus long pait long taun Ai, na planti i dai. Akan i no bin tokaut long samting em i bin stilim, inap long taim ol i painimaut pinis. Akan i tok, taim mi “lukim” ol dispela samting ‘mi mangalim tumas na mi kisim ol.’ Ai bilong em i pulim em na em i kisim bagarap wantaim “olgeta samting bilong en.” (Jos. 6:​18, 19; 7:​1-26) Bel bilong Akan i laik tru long kisim ol samting i tambu long em.

Bosim Gut Bel Bilong Yumi Yet

6, 7. Ol man i mekim wok long wanem ol “tingting na pasin” bilong Satan bilong giamanim yumi? Olsem wanem ol man bilong edvetaisim ol samting i save mekim wok long dispela?

⁶ Ol samting i bin traim Iv, ol bikhet ensel, na Akan, ol dispela samting i save traim ol man long nau tu. Long olgeta “tingting na pasin” em Satan i save mekim wok long en bilong giamanim ol man, pasin bilong “aigris” i gat bikpela strong tru. (2 Ko. 2:11; 1 Jo. 2:16) Ol kampani bilong edvetaisim ol samting ol i wokim, ol i save pinis olsem ai i gat bikpela strong long stiaim laik bilong bel. Wanpela saveman bilong ol edvetaismen long Yurop i tok: “Ai i nambawan samting bilong pulim man. Planti taim samting ai i lukim i save daunim samting yumi harim o tingim, na i gat strong long pulim yumi, maski yumi save pinis olsem dispela samting i nogut.”

⁷ Olsem na ol man bilong edvetaisim ol samting i save kamapim planti piksa bilong grisim tru yumi na kirapim laik long bel bilong yumi long baim ol samting bilong ol! Wanpela man bilong mekim wok painimaut long Amerika husat i bin skelim olsem wanem ol edvetaismen i save stiaim tingting bilong ol man, em i tok, ol edvetaismen i bilong “givim save long yumi, na moa yet, ol i bilong kirapim bel bilong yumi long mekim ol samting.” Bilong salim samting, planti taim ol i soim piksa bilong ol man na meri i gat naispela skin. Olsem na em i bikpela samting long was gut long samting yumi lukluk long en na samting yumi larim i go insait long tingting na bel bilong yumi!

8. Olsem wanem Baibel i kamapim olsem yumi mas was gut long ol samting ai bilong yumi i lukim?

⁸ Pasin bilong aigris na bel i kirap inap pulim tu ol trupela Kristen. Olsem na Tok Bilong God i kirapim yumi long bosim gut bel bilong yumi long ol samting yumi lukluk long en na yumi laikim. (1 Ko. 9:​25, 27; ritim 1 Jon 2:​15-17.) Gutpela man Jop i luksave olsem samting man i lukim dispela inap kirapim laik bilong bel. Em i tok: “Mi bin mekim strongpela promis pinis olsem, mi no ken aigris long ol meri.” (Jop 31:1) Jop i nolaik tru long aigris long wanpela meri na holim em, na em i no tingting liklik long mekim maritpasin wantaim em. Jisas i kamapim strong olsem man i no ken tingting long ol pasin nogut olsem pamuk samting, em i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.”​—Mt. 5:28.

Givim Baksait Long Ol Samting i No Gutpela

9. (a) Bilong wanem yumi mas was gut taim yumi yusim Intenet? (b) Wanem samting inap kamap taim wanpela i lukim ponografi, maski em i lukim sotpela taim tasol?

⁹ Long nau, planti man i wok long “lukim” ponografi, na moa yet long Intenet. I no olsem yumi yet i mas mekim sampela wok bilong painim ol dispela Web-sait, nogat, ol i save kamap nating! Long wanem rot? Wantu wanpela edvetaismen i gat piksa nogut long en inap kamap long kompiuta bilong yumi. Na tu, i gat sampela e-meil nating i save kamap, na taim yumi opim, wanpela piksa bilong ponografi inap kamap na i hatwok long rausim hariap. Maski man i lukim piksa inap sotpela taim tasol paslain long em i rausim, dispela piksa i stap pinis long tingting bilong em na inap kamapim ol samting nogut. Em inap mekim na bel bilong man i gat tok na man i hatwok long rausim ol dispela piksa nogut long tingting bilong em. Sapos man i amamas long “lukim” ol piksa nogut, dispela i soim olsem em i gat ol laik nogut i stap long bel bilong em na em i mas kilim i dai ol dispela laik.​—Ritim Efesus 5:​3, 4, 12; Kl. 3:​5, 6.

10. Bilong wanem i no hatwok long pulim ol pikinini long lukim ponografi? Wanem samting inap kamap sapos ol i lukim ponografi?

¹⁰ Laik long kisim save long ol samting inap pulim ol pikinini long lukim ponografi. Sapos ol i lukim, dispela inap bagarapim tru tingting bilong ol long ol samting bilong maritpasin inap long olgeta taim bihain. Wanpela ripot i tok, samting nogut inap kamap em olsem: Tingting kranki long stretpela lo bilong maritpasin, “ol i hatwok long pas gut na laikim tru poroman; tingting kranki long ol meri; kalabus long ponografi, em dispela inap pasim ol long mekim gut ol wok bilong skul, na pas gut wantaim ol pren na famili.” Na samting i nogut moa em ol samting dispela inap mekim long marit bilong ol long bihain.

11. Stori long wanpela eksampel bilong soim olsem pasin bilong lukim ponografi i save kamapim ol samting nogut.

¹¹ Wanpela brata Kristen i tok: “Long olgeta samting mi kalabus long en paslain long mi kamap wanpela Witnes, nambawan samting mi bin hatwok tru long lusim em ponografi. Long kain kain taim ol dispela piksa nogut i save kamap long tingting bilong mi​—taim mi smelim wanpela samting, harim sampela musik, lukim samting, o taim tingting bilong mi i wokabaut nating. Long olgeta de mi mas pait strong long sakim ol dispela kain piksa.” Narapela brata, taim em i pikinini em i bin lukim ol nius ponografi bilong papa bilong em i no wanpela Witnes, taim papamama bilong em i no stap long haus. Em i tok: “Ol dispela piksa i bagarapim nogut tru tingting bilong mi taim mi yangpela! Nau yet, inap 25 yia bihain, sampela bilong ol dispela piksa i stap yet long tingting bilong mi. Maski mi traim hat tru long rausim, ol i stap yet. Dispela i mekim na bel bilong mi i gat tok, maski mi no tingting long ol.” Em i savepasin long givim baksait long ol samting i no gutpela, na long dispela rot yumi ken abrusim ol tingting i givim hevi long yumi, a? Olsem wanem man inap mekim olsem? Em i mas “kalabusim olgeta tingting . . . bilong mekim tingting bilong [em] i bihainim laik bilong Krais.”​—2 Ko. 10:5.

12, 13. Ol Kristen i mas abrusim wanem ol samting i no gutpela? Bilong wanem i olsem?

¹² Narapela “pasin nogut,” o samting i no gutpela, em yumi mas abrusim em ol amamas i save kirapim pasin bilong laikim planti mani kago o ol samting bilong ol spirit nogut, pasin bilong pait na bagarapim man, kapsaitim planti blut, na kilim man i dai. (Ritim Song 101:3.) Jehova i givim wok long papamama Kristen long skelim wanem samting ol i larim famili long lukim. Tru, long laik bilong em yet Kristen tru bai i no insait long ol samting bilong ol spirit nogut. Tasol ol papamama i mas was gut long ol muvi, TV program, vidio gem, ol komik buk na buk bilong ol pikinini em ol i stori long ol dispela samting.​—Snd. 22:5.

¹³ Maski yumi yangpela o lapun, ai bilong yumi i no ken amamas long ol vidio gem i gat pasin pait na kilim man i dai na planti blut i kapsait. (Ritim Song 11:5.)a Yumi no ken putim tingting long wanpela samting em Jehova i no laik tru long en. Tingim, Satan i laik bagarapim tingting bilong yumi. (2 Ko. 11:3) Na tu, pasin bilong lusim bikpela haptaim long lukim ol samting i olsem i orait tasol, dispela inap pasim yumi long mekim famili lotu, ritim Baibel long olgeta de, na redim ol samting bilong ol miting.​—Fl. 1:​9, 10.

Bihainim Pasin Bilong Jisas

14, 15. Olsem wanem namba 3 traim Satan i givim long Krais i narapela kain? Olsem wanem Jisas inap sakim dispela traim?

¹⁴ Sori tru, nau long dispela taim nogut, yumi no inap abrusim pasin bilong lukim ol samting i no gutpela. Dispela samting i kamap long Jisas tu. Long namba 3 traim we Satan i laik pulim Jisas long sakim laik bilong God, “Satan i kisim Jisas gen na i go long wanpela maunten i antap moa. Na Satan i soim em olgeta strongpela kantri bilong dispela graun wantaim ol gutpela samting bilong ol.” (Mt. 4:8) Bilong wanem Satan i mekim olsem? Yumi ken ting olsem Satan i laik yusim strong bilong ai long pulim Jisas. Taim Jisas i lukim ol gutpela samting bilong ol strongpela kantri, dispela inap kirapim em long kisim laik long i stap bos bilong dispela graun. Jisas i mekim wanem?

¹⁵ Jisas i no tingting long dispela samting Satan i laik givim long em. Em i no larim bel bilong em i tingim ol laik nogut. Na em i no skelim em bai kisim o nogat. Kwiktaim em i sakim. Em i tok: “Satan, yu klia.” (Mt. 4:10) Jisas i tingim pasin bilong em long pas gut wantaim Jehova na tok em i bekim i stret wantaim as na em i kam long graun​—em long mekim laik bilong God. (Hi. 10:7) Long dispela rot, Jisas i daunim traim Satan i putim long em.

16. Pasin bilong Jisas long sakim ol traim bilong Satan inap skulim yumi long wanem ol samting?

¹⁶ Pasin bilong Jisas inap skulim yumi long planti samting. Namba wan, Satan inap traim olgeta man. (Mt. 24:24) Namba 2, samting yumi lukim long ai inap strongim laik bilong bel bilong yumi long mekim gutpela pasin o pasin nogut. Namba 3, Satan bai mekim wok long pasin bilong “aigris” bilong pulim yumi. (1 Pi. 5:8) Na namba 4, yumi tu inap sakim Satan, na moa yet taim yumi sakim em kwiktaim.​—Jem. 4:7; 1 Pi. 2:21.

Ai Bilong Yu i Mas “Gutpela”

17. Bilong wanem yumi no bihainim savepasin sapos yumi wet inap samting i no gutpela i traim yumi na nau yumi mekim disisen long samting yumi bai mekim?

¹⁷ Taim yumi dediket long Jehova, yumi tok promis olsem yumi bai givim baksait long ol samting i no gutpela. Yumi tok promis long mekim laik bilong God, na yumi inap mekim wankain tok olsem man bilong raitim song, em i tok: “Mi surik long bihainim pasin nogut, long wanem, mi laik bihainim tok bilong yu tasol.” (Sng. 119:101) Yumi no bihainim savepasin sapos yumi wet inap long wanpela samting i no gutpela i kamap long yumi na nau yumi mekim disisen long samting yumi laik mekim. Yumi kisim save pinis long ol samting Baibel i no orait long en. Yumi save long ol trik bilong Satan. Long wanem taim Satan i traim Jisas long tanim ol ston i kamap bret? Bihain long taim Jisas i no bin kaikai inap 40 san na 40 nait na “em i hangre.” (Mt. 4:​1-4) Satan inap save long wanem taim yumi no strong na i isi moa long pundaunim yumi long traim. Olsem na nau em taim bilong tingim gut ol samting inap kamap. No ken surikim taim! Sapos long olgeta de yumi tingim olsem yumi dediket pinis long Jehova, bai yumi tingting strong long givim baksait long ol samting i no gutpela.​—Snd. 1:5; 19:20.

18, 19. (a) Stori long ai i “gutpela” na ai i “nogut.” (b) Bilong wanem em i bikpela samting long yumi wok yet long tingim ol samting i gutpela? Filipai 4:8 i givim wanem skultok long yumi long dispela samting?

¹⁸ Long olgeta de i gat kain kain samting i luk gutpela long ai na i laik pulim yumi, na ol dispela samting i wok long kamap planti moa. Olsem na yumi amamas tru long tok bilong Jisas olsem ai bilong yumi i mas i stap “gutpela.” (Mt. 6:​22, 23) Ai i “gutpela” em i save tingim wanpela samting tasol​—em long mekim laik bilong God. Tasol ai i “nogut,” em i gat strongpela laik long kisim ol samting i no gutpela.

¹⁹ Tingim, long rot bilong ai yumi save putim ol samting long tingting bilong yumi, na samting i stap long tingting dispela i save kirapim bel bilong yumi. Olsem na em i bikpela samting long yumi wok yet long tingim ol samting i gutpela. (Ritim Filipai 4:8.) Tru tumas, yumi laik wok yet long mekim wankain tok olsem man bilong raitim song, em i tok: “Helpim mi long givim baksait long ol samting i no gutpela.” Taim yumi mekim ol samting i stret wantaim dispela tok, yumi ken bilip tru olsem Jehova bai ‘mekim gut long yumi olsem em i bin promis long yumi.’​—Sng. 119:37; Hi. 10:36.

[Ol Futnot]

Yumi Mas Tingim Wanem Samting . . .

• bilong ai, tingting, na bel?

• long ol samting nogut i save kamap long pasin bilong lukim ponografi?

• long ai bilong yumi i mas “gutpela”?

[Ol Piksa long pes 23]

Ol Kristen i no ken lukluk long wanem ol samting i no gutpela?