Karim Hevi Bilong Poroman i No Stap Gut Long Marit

MARGARITA wantaim man bilong em Raúl ol i bin mekim wok bilong Jehova fultaim inap planti yia.a Tasol taim namba wan pikinini bilong tupela i kamap, i no longtaim na Raúl i kirap isi isi long lusim Jehova. Bihain em i kirap poromanim narapela meri na ol i rausim em long kongrigesen Kristen. Margarita i tok: “Taim dispela samting i kamap, mi pilim olsem mi laik i dai. Bel bilong mi i bagarap stret, na mi no save wanem samting mi mas mekim.”

Taim Jane i marit, i no longtaim na man bilong em i no stap gut long em, tasol em i mekim long narapela kain rot. Em i kirap paitim Jane. Jane i tok: “Namba wan taim em i paitim mi, mi kirap nogut tru, na mi sem pipia stret. Dispela i kamap pasin bilong em. Long olgeta taim em i paitim mi, em i askim mi long fogivim em. Mi ting em wok bilong mi olsem wanpela Kristen long lusim rong bilong em long olgeta taim na lusim tingting long en. Na mi ting sapos mi kamapim hevi bilong mi long narapela​—na ol elda tu​—i olsem mi no stap gut long em. Dispela pasin bilong em long paitim mi na mi lusim rong bilong em, em i stap inap planti yia. Insait long dispela haptaim, mi tingting, i mas i gat sampela samting mi ken mekim na bai man bilong mi i ken laikim mi tru. Bihain em i lusim mi wantaim pikinini meri bilong mipela. Mi pilim olsem mi no bin mekim gut wok bilong mi olsem meri marit, na mi no bin wok strong long mekim ol samting bilong strongim marit bilong mipela.”

Olsem Margarita na Jane, ating yu tu yu karim hevi bilong bel i bagarap, na mani i sot, na yu stap nogut long ol samting bilong spirit, long wanem, man bilong yu i no stap gut long yu. O ating yu wanpela man marit na yu kisim bikpela bel hevi na hatwok long meri bilong yu i no bin stap gut long yu. Tru tumas, nau yumi stap long taim bilong “planti hevi nogut tru,” olsem Baibel i tok profet pinis long en. Dispela tok profet i makim olsem, long “taim bilong las de” hevi bai painim ol famili, na insait long planti famili bai no gat pasin sori liklik. Sampela bai tok ol i mekim wok bilong God, tasol ol i giaman. (2 Ti. 3:​1-5) Ol Kristen tru, ol tu i save kisim dispela kain hevi. Olsem na sapos poroman marit bilong yu i no bin stap gut long yu, wanem samting inap helpim yu long karim dispela hevi?

Tingting Bilong Jehova Long Yu

Ating pastaim bai yu hatwok long bilip olsem wanpela yu bin laikim tumas em inap bagarapim bel bilong yu olsem. Na ating bai yu kirap na putim asua bilong rong bilong em i kam long yu yet.

Tasol tingim dispela: Jisas em i nambawan olgeta, tasol wanpela em i laikim tumas na i bilip long en, em i bin kamapim em long ol birua. Jisas i bin beten na tingim gut long bel na nau em i makim 12-pela poroman bilong em, em ol aposel. Long dispela taim, 12-pela olgeta ol i gutpela wokman bilong Jehova, inap tru long Jisas i bilip long ol. Olsem na yumi save, taim Judas i “givim Jisas long ol man i birua long em,” Jisas i bel hevi stret long dispela. (Lu. 6:​12-16) Tasol Jehova i no putim asua bilong rong bilong Judas i go long Jisas, nogat.

Tru, i no gat wanpela poroman marit i gutpela olgeta. Tupela wantaim i save popaia. Wanpela man bilong raitim song em i tok stret olsem: “Sapos yu kaunim olgeta sin bilong mipela bai husat inap long winim kot bilong yu?” (Sng. 130:3) Bilong bihainim dispela pasin bilong Jehova, tupela marit wantaim i mas redi long lusim tingting long ol pasin kranki na popaia bilong poroman.​—1 Pi. 4:8.

Tasol “yumi olgeta wan wan bai yumi mas tokim God long as bilong olgeta pasin yumi bin mekim.” (Ro. 14:12) Sapos wanpela marit i kisim pasin bilong toknogutim poroman o paitim em oltaim, orait poroman i mekim dispela pasin em yet bai sanap long kot long ai bilong Jehova. Jehova i no orait liklik long pasin bilong pait na mekim tok nogut long narapela, olsem na i no gat as na man i ken mekim pasin i no soim rispek na sori long poroman bilong em. (Sng. 11:5; Ef. 5:33; Kl. 3:​6-8) Na sapos wanpela Kristen i wok long belhat oltaim na em i no tanim bel na senisim pasin bilong em, ol i mas rausim em long kongrigesen Kristen. (Ga. 5:​19-21; 2 Jo. 9, 10) Poroman marit i no ken pilim nogut sapos em i go ripot long ol elda long pasin nogut poroman bilong em i bin mekim. Tru tumas, Jehova i sori long ol marit i save kisim kain hevi olsem.

Taim wanpela marit i mekim pasin pamuk, em i mekim sin long poroman bilong em husat i no gat rong, na em i mekim sin long Jehova. (Mt. 19:​4-9; Hi. 13:4) Sapos poroman i no gat rong em i bin wok strong long bihainim ol stiatok bilong Baibel long i stap bilong em, em i no ken ting em i gat asua long poroman i bin mekim pasin pamuk na i no stap gut long em.

Jehova i save yu pilim olsem wanem. Em i tok piksa long em yet i olsem man bilong wanpela meri, em lain Israel, na Baibel i gat planti tok i kamapim bel hevi em i bin kisim long taim ol Israel i no stap gut long em na i mekim pasin pamuk bilong spirit. (Ais. 54:​5, 6; Jer. 3:​1, 6-10) Yu ken bilip olsem, Jehova i lukim ol aiwara bilong yu i kapsait sapos poroman marit bilong yu i no stap gut long yu. (Mal. 2:​13, 14) Em i save yu mas i gat sampela bilong mekim gut bel bilong yu na strongim yu.

Rot Bilong Jehova Long Mekim Gut Bel Bilong Yu

Wanpela rot bilong Jehova long mekim gut bel bilong yu, em long rot bilong kongrigesen Kristen. Jane i bin kisim dispela kain helpim. Em i tok: “Wasman sekit i bin kam lukim kongrigesen long taim we bel bilong mi i bagarap stret. Em i save bel na tingting bilong mi i bagarap tru taim man bilong mi i wokim ol pepa bilong katim marit. Em i helpim mi long tingim gut as bilong ol skripsa olsem 1 Korin 7:15. Ol ves bilong Baibel na ol gutpela tok em i givim long mi i helpim mi long daunim tingting olsem mi gat asua, na em i mekim bel na tingting bilong mi i stap isi.b

Margarita, em yumi stori pinis long em, em i kisim save tu olsem Jehova i save helpim yumi long rot bilong kongrigesen Kristen. Em i tok: “Taim mi lukim olsem man bilong mi i no laik tanim bel, mi kisim ol pikinini na mipela i go sindaun long narapela taun. Taim mipela i kamap pinis, mi painim tupela rum mi inap rentim. Long de antap, mi wok long rausim ol klos long ol sutkes na mi bel hevi stret, na nau mi harim wanpela i paitim dua. Mi ting em i mama bilong haus, em i save sindaun klostu long mi. Mi kirap nogut, long wanem, em sista i bin mekim Baibel stadi long mama bilong mi na i helpim famili bilong mipela long kisim save long tok i tru. Em i no ting em bai bungim mi​—em i kam long dispela haus, long wanem, em i save stadi wantaim mama bilong haus. Nau bel bilong mi i pilim gutpela liklik na aiwara bilong mi i kam daun. Mi toksave long em long hevi bilong mi, na mitupela i krai wantaim. Kwiktaim em i stretim rot bilong mipela i ken i go long miting long dispela de. Kongrigesen i mekim gut long mipela, na ol elda i stretim rot bilong helpim mi long lukautim famili long ol samting bilong spirit.”

Ol Narapela i Ken Helpim

Ol bratasista insait long kongrigesen Kristen ol inap givim helpim long kain taim olsem. Olsem: Nau Margarita i mas painim wok mani. Wanpela famili long kongrigesen i tok ol bai lukautim ol pikinini taim ol i kam bek long skul long apinun.

Margarita i tok: “Mi save tenkyu tru taim ol bratasista i tok long go wantaim mi na ol pikinini bilong mi long autim tok.” Taim kongrigesen i mekim olsem, ol i “helpim ol arapela long karim hevi bilong ol,” na long dispela pasin ol i inapim tru “lo bilong Krais.”​—Ga. 6:2.

Ol man husat i karim bikpela hevi long rong ol narapela i mekim, ol i tenkyu tru long dispela kain helpim ol i kisim. Man bilong Monique i bin lusim em wantaim 4-pela pikinini na Monique i mas mekim bikpela long ol, na man i gat bikpela dinau olsem 15,000 dola em Monique yet i mas bekim. Em i tok: “Ol bratasista bilong spirit i bin mekim gutpela pasin tru long mi. Mi ting mi no inap winim dispela hevi sapos ol i no bin sambai long mi na helpim mi. Mi pilim olsem Jehova i bin givim mi ol nambawan gutpela brata, em ol i bin givim ol yet long helpim ol pikinini bilong mi. Mi amamas tru long lukim ol pikinini i kamap strong long ol samting bilong spirit long dispela helpim ol i bin kisim. Taim mi mas kisim sampela tingting o tok long ol samting mi mas mekim, ol elda i bin helpim mi. Na taim mi mas i gat sampela bilong toktok wantaim ol, ol i bin putim yau long tok bilong mi.”​—Mk. 10:​29, 30.

Tru, gutpela pren bai save wanem taim i no gutpela long toktok long as bilong hevi i bin painim em. (Sav. 3:7) Margarita i tok: “Planti taim mi amamas long toktok wantaim ol sista bilong nupela kongrigesen long wok bilong autim tok, o ol Baibel stadi bilong mipela, o ol pikinini bilong mipela​—tasol mi no laik toktok long ol hevi bilong mi. Mi tenkyu long ol i larim mi i putim ol samting bilong bipo long baksait na ol i helpim mi long kisim nupela sindaun.”

Daunim Tingting Bilong Bekim Nogut

Sampela taim ating yu no pilim olsem yu gat asua long ol rong bilong poroman marit bilong yu​—ating yu bel nogut long bikpela hevi yu bin kisim long ol rong em i bin mekim. Sapos yu larim dispela bel nogut i go bikpela, nogut dispela i daunim strongpela tingting bilong yu long i stap gut long Jehova. Olsem: Ating bai yu wok long painim rot bilong bekim nogut long poroman i no bin stap gut long yu.

Sapos yu save i gat dispela kain tingting i stap long bel bilong yu, i gutpela yu ken tingim pasin bilong Josua na Kalep. Ol dispela man bilong i stap gut long God ol i bin i go lukstil insait long Graun Bilong Promis, na ol inap kisim bagarap long dispela wok. Ol narapela man bilong lukstil ol i no gat bilip, na ol i mekim na ol manmeri i no bihainim moa tok bilong Jehova. Na sampela Israel ol i laik tromoi ston long Josua na Kalep taim tupela i laik kirapim lain Israel long i stap gut long Jehova. (Nam. 13:25–14:10) Dispela pasin bilong ol Israel i mekim na Josua wantaim Kalep i mas wokabaut long ples wesan nating inap 40 yia, na i no long rong bilong ol yet, nogat​—long rong bilong ol narapela.

Yumi ken ting Josua na Kalep ol i bel hevi long dispela samting, tasol ol i no larim rong bilong ol brata bilong ol i mekim ol i bel nogut. Ol i tingting strong long i stap gut long wok bilong Jehova. Taim ol i wokabaut inap 40 yia pinis long ples nating, tupela wantaim lain Livai ol i kisim gutpela pe​—ol tasol bilong dispela lain i bin lusim Isip, ol i stap laip yet na Jehova i larim ol i go insait long Graun Bilong Promis.​—Nam. 14:​28-30; Jos. 14:​6-12.

Pasin bilong poroman i no bin stap gut long yu em inap mekim na bel hevi bilong yu i stap longpela taim. Ating marit bilong yu i pinis, tasol bihain long en bel bilong yu i bagarap yet na yu gat bikpela hevi long mani. Tasol nogut yu larim ol dispela hevi i paulim tingting bilong yu​—tingim Jehova, em i save gut long samting em bai mekim long ol man i sakim ol lo bilong em long laik bilong ol yet, olsem yumi lukim long samting i bin painim ol Israel i no bin stap gut long em long ples wesan nating.​—Hi. 10:​30, 31; 13:4.

Yu Inap Winim Dispela Hevi

No ken larim ol tingting i save bagarapim bel i daunim yu. Putim ol tingting bilong Jehova i go long tingting bilong yu. Jane i tok: “Mi wok long harim ol tok bilong Wastaua na Kirap! long teprekoda bilong mi na dispela i bin helpim mi long karim hevi bilong mi. Ol miting tu i bin strongim tru bel bilong mi. Na taim mi insait long ol tok bilong miting, dispela i helpim mi na mi no wok long tingim ol hevi bilong mi. Wok bilong autim tok em tu i helpim mi olsem. Mi wok long helpim ol narapela long bilip long Jehova, na long dispela rot mi wok long strongim bilip bilong mi yet. Na taim mi lukautim ol Baibel sumatin bilong mi, dispela i helpim mi long putim tingting i go long ol bikpela samting.”

Monique i tok: “Mi save go oltaim long miting na mi mekim wok autim tok inap tru long skel bilong mi, na long dispela rot mi inap stap strong na karim hevi. Ol pikinini bilong mi i wok long pas gut wantaim na ol i pas gut long kongrigesen tu. Dispela hevi i bin painim mi i helpim mi long luksave long ol pasin kranki bilong mi yet. Hevi i bin traim mi, tasol Jehova i helpim mi na mi inap karim.”

Yu tu inap karim ol kain hevi olsem. Maski yu bin kisim bikpela bel hevi long poroman i no bin stap gut long yu, wok strong long bihainim tok bilong aposel Pol, em i tok: “Yumi no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru.”​—Ga. 6:9.

[Ol Futnot]

[Piksa long pes 31]

Ol marit em poroman i bin lusim ol, ol i amamas long ol bratasista i save helpim ol long wok autim tok