“Long Olgeta De Mi Lain Long Laikim Moa Yet Wok Kolpota”

Long 1886, ol i kisim 100 kopi bilong buk Millennial Dawn, Volium 1, i stap long Baibel Haus long Allegheny, Pennsylvania, Amerika, na salim i go long Chicago, Illinois. Charles Taze Russell i tingting long tilim ol dispela nupela buk long ol bukstua. Wanpela bikpela kampani long Amerika i save salim ol lotu buk, i wanbel long kisim buk Millennial Dawn bilong salim. Tasol 2-pela wik bihain, kampani i salim olgeta buk i go bek long Baibel Haus.

Wanpela evanjelis i gat nem i no amamas long lukim buk Dawn i stap wantaim ol buk bilong em yet long stua. Em i tok sapos ol i no rausim dispela buk long stua, em yet na ol arapela evanjelis i gat nem, bai kisim ol buk bilong ol na putim long narapela stua. Kampani i no laik, tasol ol i salim buk Dawn i go bek. Na tu, ol niuspepa i bin edvetaisim dispela buk, tasol ol birua i tokim ol niuspepa long rausim ol edvetaismen. Olsem na hau bai ol man husat i painim tok i tru inap kisim dispela buk?

Lain ol i kolim olsem kolpota bai tilim.a Long 1881, Zion’s Watch Tower i singaut long 1,000 man husat inap kisim wok bilong tilim ol buk bilong Baibel fultaim. Maski lain kolpota inap olsem sampela handret tasol, ol i bin tilim ol buk bilong tok i tru i go long planti hap. I kam inap long 1897, ol i bin tilim klostu 1 milion buk Dawn, na ol kolpota i bin insait tru long dispela wok. Planti bilong ol i kisim ol samting bilong skin long rot bilong liklik mani ol i kisim taim ol i tilim nius Watch Tower we ol man inap kisim long posofis boks bilong ol, olsem sabskripsen.

Husat ol dispela strongpela kolpota? Sampela i kirap mekim dispela wok taim ol i tineja, sampela i gat bikpela krismas moa. Planti ol i stap singel o em ol marit husat i no gat pikinini, na planti famili tu i mekim dispela wok. Ol kolpota oltaim i wok de olgeta, na ol kolpota haptaim i wok 1-pela o 2-pela aua long olgeta de. I no olgeta i mekim wok kolpota, long wanem, sampela i gat hevi long sik o ol narapela samting i pasim ol. Tasol long wanpela kibung long 1906, ol lain husat inap mekim dispela wok, i kisim tok olsem ol i no gat wok long kisim “bikpela skul, planti save, o mekim tok olsem ensel.”

Long klostu olgeta hap bilong graun, ol man nating i inapim wanpela bikpela wok tru. Wanpela brata i tingim olsem insait long 7-pela yia em i bin tilim 15,000 buk. Em i tok: “Mi no kamap kolpota bai mi ken salim ol buk, nogat. Mi laik tokaut long ol man long Jehova na tok i tru.” Long olgeta hap ol kolpota i go long en, ol man i harim tok i tru na ol grup bilong ol sumatin bilong Baibel i wok long kamap planti moa.

Ol pris pasto i tok bilas long ol kolpota, ol i kolim ol olsem ol man nating bilong salim ol buk. Watch Tower bilong 1892 i tok: “No gat planti man i tingim ol kolpota olsem ol i mausman tru bilong Bikpela. Ol i no luksave olsem pasin daun bilong ol kolpota na pasin bilong ol long lusim ol samting bilong ol yet i bikpela samting tru long ai bilong Bikpela.” Tru tumas, laip bilong kolpota i gat hatwok bilong en. Ol strongpela su na ol baisikol tasol i helpim ol long raun. Taim ol man i no gat mani, ol kolpota i kisim kaikai olsem senis bilong buk. Taim de i pinis, ol kolpota i taiet, tasol ol i amamas na go bek long haus sel bilong ol o rum ol i rentim. Bihain ol kolpota i yusim haus kar ol yet i wokim, dispela i seivim bikpela taim na mani bilong ol.b

Stat long kibung bilong Intenesenel Baibel Stiudens Asosiesen ol i mekim long 1893 long Chicago, ol i gat ol hap bilong program i bilong ol kolpota. Long ol dispela hap ol i kamapim ol ekspiriens, ol pasin bilong mekim wok autim tok, na ol skultok. Wanpela taim Brata Russell i bin tokim lain i wok strong long autim tok long kaikai gut long moning, dring milk long 10 o klok samting, na sapos san i strong, ol i mas kisim aiskrim.

Ol kolpota i laik painim wanwok bilong autim tok wantaim, ol i pasim yelopela string. Ol nupela kolpota i bung na wok wantaim ol longtaim kolpota. Wanpela nupela kolpota i bin pret na tokim wanpela meri, “Ating yu no laikim dispela buk, laka?” Dispela i soim olsem ol i nidim sampela trening. Gutpela tru dispela meri i bin laikim buk na bihain em i kamap sista.

Wanpela brata i gat tupela tingting, ‘Mi mas holim yet gutpela wok mani na givim 1,000 dola (U.S.) long olgeta yia bilong helpim wok, o mi mas mekim wok kolpota?’ Ol i bin tokim em olsem, God bai orait long tupela samting wantaim, tasol sapos em i givim taim bilong em long Bikpela, em bai kisim ol bikpela blesing moa. Mary Hinds i tok long wok kolpota olsem, “em nambawan rot bilong helpim tru bikpela lain manmeri.” Na meri bilong pret, Alberta Crosby, i tok, “Long olgeta de mi lain long laikim moa yet wok kolpota.”

Long nau, ol tumbuna tru bilong ol kolpota na ol tumbuna bilong ol long sait bilong lotu ol i holim strong yet pasin bilong bilip bilong ol kolpota. Sapos yu no gat wanpela kolpota o painia long lain famili bilong yu, orait traim mekim dispela wok i kamap olsem wanpela wok i stap insait long famili bilong yu. Yu tu bai lain long laikim moa yet wok autim tok fultaim.

[Ol Futnot]

[Rait long pes 32]

Ol i no gat wok long kisim “bikpela skul, planti save, o mekim tok olsem ensel.”

[Piksa long pes 31]

Kolpota A.W. Osei long Ghana, klostu long 1930.

[Ol Piksa long pes 32]

Antap: Kolpota Edith Keen na Gertrude Moris long Inglan, klostu long 1918; daunbilo: Stanley Cossaboom na Henry Nonkes long Amerika, wantaim ol emti boks bilong ol buk ol i bin tilim