BEKIM OL ASKIM BILONG BAIBEL
Husat tru i bosim dispela graun?
Sapos God i bosim dispela graun, yu ting ol manmeri bai karim planti pen na hevi?
Planti man i bilip olsem God i bosim dispela graun. Tasol sapos dispela i tru, yu ting bai i gat planti pen na hevi long nau? (Lo 32:4, 5) Baibel i tok, wanpela man nogut i bosim dispela graun.—Ritim 1 Jon 5:19.
Olsem wanem wanpela man nogut i kisim strong long bosim ol man bilong graun? Long taim God i wokim Adam na Iv, wanpela ensel i bikhet long God, na tu, em i kirapim namba 1 man na meri long mekim olsem. (Stat 3:1-6) Long laik bilong ol yet, tupela i bihainim tok bilong dispela bikhet ensel, Satan, olsem na em i kamap bos bilong ol. I stret God i Gat Olgeta Strong, em wanpela tasol i mas stap Bos bilong ol man, tasol em i laik bai ol man yet i makim em long i stap Bos bilong ol, long wanem, ol i laikim em. (Lo 6:6; 30:16, 19) Tasol sori tru, Satan i giamanim klostu olgeta man na ol i makim rot nogut wankain olsem namba 1 man na meri i bin mekim.—Ritim Revelesen 12:9.
Husat bai stretim ol hevi bilong ol man?
God bai larim Satan i wok yet long bosim graun long pasin nogut? Nogat tru! Long rot bilong Jisas, God bai pinisim olgeta samting nogut Satan i kamapim.—Ritim 1 Jon 3:8.
God bai givim strong long Jisas na em bai bagarapim Satan. (Rom 16:20) Bihain, God bai bosim ol manmeri na ol bai kamap gutpela olgeta. Na ol bai stap gut na amamas olsem God i bin tingting long en long bipo.—Ritim Revelesen 21:3-5.