Ol Elda, Yupela i Pilim Olsem Wanem Long Trenim Ol Narapela?

1, 2. Wanem hevi i stap long planti kongrigesen?

WASMAN sekit i redi long pinisim miting em i mekim wantaim lain elda. Taim em i lukluk long ol, em i pilim tru pasin bilong ol long wok hat, na sampela bilong ol i gat bikpela krismas na ol inap i stap olsem ol papa bilong em. Tasol em i tingting planti long wanpela samting na em i askim ol olsem, “Ol brata, yupela i bin mekim wanem ol samting bilong trenim ol narapela brata long mekim sampela wok moa insait long kongrigesen?” Long laspela visit bilong wasman sekit, em i bin kirapim ol long givim bikpela haptaim moa long trenim ol narapela. Wanpela elda i tok: “Mipela i no kirap yet long mekim dispela wok.” Ol narapela elda tu i wanbel na tromoi het.

² Sapos yu wanpela elda, ating yu bin insait long kain miting olsem. Ol wasman sekit long olgeta hap bilong graun i luksave olsem planti kongrigesen i gat bikpela nid long trenim ol brata na bai ol inap helpim wok bilong lukautim ol sipsip. Ol i ken trenim olgeta brata, em ol yangpela na ol lapun wantaim. Tasol i gat hatwok bilong en. Bilong wanem yumi tok olsem?

3. (a) Olsem wanem tok bilong Baibel i soim klia olsem em i bikpela samting long trenim ol narapela? (b) Bilong wanem yumi olgeta i mas amamas long kisim save long dispela samting? (Lukim futnot.) (c) Wanem ol samting i mekim na ol elda i hatwok long trenim ol narapela?

³ Sapos yu wanpela wasman, ating yu luksave olsem yu mas trenim yu yet.a Yu save olsem i mas i gat planti moa brata na bai ol inap helpim kongrigesen long i stap strong long bilip, na ol inap helpim long kirapim ol nupela kongrigesen. (Ritim Aisaia 60:22.) Na tu, yu save olsem Baibel i kirapim yu long “skulim ol arapela.” (Ritim 2 Timoti 2:2.) Maski i olsem, ating yu inap pilim wankain olsem ol elda yumi bin stori long ol long kirap bilong dispela stadi, na yu pilim hatwok long trenim ol narapela. Ating yu lusim sampela haptaim long mekim ol wok bilong lukautim famili, mekim wok mani, mekim wok bilong kongrigesen, na mekim ol narapela bikpela wok, na yu pilim olsem yu no gat taim moa long trenim ol narapela. Orait, bilong wanem em i bikpela samting long trenim ol narapela?

TRENIM OL NARAPELA

4. Wanem samting inap mekim na ol elda i surikim taim bilong trenim ol narapela?

⁴ Wanem samting inap mekim na sampela elda i pilim hatwok long makim sampela haptaim long trenim ol narapela? Ating sampela elda i holim kain tingting olsem: ‘Em i bikpela samting long trenim ol narapela, tasol i gat ol narapela wok bilong kongrigesen we i bikpela samting moa na mi mas mekim hariap. Maski mi surikim taim bilong trenim ol narapela, ol wok bilong kongrigesen bai wok yet long i go het.’ Em tru olsem i gat sampela wok long kongrigesen we ol elda i mas mekim hariap, tasol sapos ol i surikim taim bilong trenim ol narapela, dispela inap putim hevi long kongrigesen long sait bilong bilip.

5, 6. (a) Yumi inap kisim wanem skul long tok piksa bilong draiva na tingting bilong em long wok bilong lukautim ensin bilong kar? (b) Olsem wanem dispela tok piksa i stret long wok bilong trenim ol narapela insait long kongrigesen?

⁵ Tingim dispela tok piksa: Draiva i save olsem oltaim em i mas senisim oil long kar bambai ensin inap wok gut na kar i ron yet. Tasol em inap pilim olsem wok bilong pulimapim fiul long tenk bilong kar em i bikpela samting moa winim wok bilong senisim oil. Em tru olsem kar i no inap ron sapos em i no pulimapim fiul long kar. Em inap kisim tingting olsem, ‘Sapos mi no senisim oil, ensin bilong kar bai ron yet inap sampela haptaim.’ Tasol wanem hevi inap kamap? Sapos draiva i wok yet long surikim taim bilong stretim ensin, kar bai bagarap na i no inap ron moa. Sapos dispela hevi i kamap, em bai lusim bikpela haptaim na tromoi bikpela mani bilong stretim gen dispela kar. Yumi inap kisim wanem skul long dispela tok piksa?

⁶ Ol elda i save lukautim planti wok long kongrigesen, em ol wok we ol i mas mekim kwiktaim. Sapos ol i no mekim olsem, dispela inap putim hevi long kongrigesen. Long tok piksa, oltaim draiva i mas pulimapim fiul long kar, na olsem tasol, ol elda i mas “skelim gut wanem ol samting i bikpela samting moa.” (Fili. 1:10) Tasol sampela elda i bisi tru long mekim ol narapela bikpela wok na ol i no tingim wok bilong trenim ol narapela, i olsem ol i no lukautim ensin bilong kar. Sapos ol elda i surikim yet taim bilong trenim ol narapela, kongrigesen bai sot long ol brata husat i winim mak bilong mekim ol wok.

7. Yumi mas holim wanem tingting long ol elda husat i givim taim bilong ol long trenim ol narapela?

⁷ Dispela i soim klia olsem yumi no ken luk daun long wok bilong trenim ol narapela. Taim ol elda i putim tingting i go long ol samting bai kamap bihain, na ol i givim taim bilong ol long trenim ol narapela brata, ol dispela elda bai i stap olsem ol gutpela bosboi na blesing long kongrigesen. (Ritim 1 Pita 4:10.) Olsem wanem bai dispela i helpim kongrigesen?

GUTPELA WOK

8. (a) Ol elda i mas holim wanem tingting na dispela bai kirapim ol long trenim ol narapela? (b) Ol elda husat i mekim wok long ol hap i sot long ol wokman, ol i gat wanem bikpela wok em ol i mas mekim kwiktaim? (Lukim blok, “Wanpela Bikpela Wok.”)

⁸ Ol elda husat i gat bikpela save long mekim wok insait long kongrigesen, ol i mas daunim ol yet na luksave olsem taim krismas bilong ol i go bikpela, ol bai i no gat strong moa long mekim planti wok. (Mai. 6:8) Na tu, ol i mas tingim gut olsem “taim nogut i save painim yumi olgeta,” olsem na senis inap kamap kwiktaim na ol i no gat strong moa long mekim ol wok bilong kongrigesen. (Sav. 9:11, 12; Jems 4:13, 14) Ol elda husat i tingim tru ol sipsip bilong Jehova, planti taim ol i wok bung wantaim ol yangpela brata na stori long ol ekspiriens ol i bin kisim long ol yia ol i mekim wok elda.—Ritim Song 71:17, 18.

9. Bilong wanem em i bikpela samting long ol elda i mas trenim ol narapela?

⁹ Taim ol elda i trenim ol narapela, olsem wanem ol i stap olsem ol blesing long kongrigesen? Ol i strongim kongrigesen. Taim ol elda i trenim ol narapela, dispela bai redim planti moa brata long helpim kongrigesen long i stap strong na i stap wanbel long nau, na tu, long taim bilong traipela hevi tru. (Ese. 38:10-12; Mai. 5:5, 6) Olsem na yupela ol elda, mipela i laik kirapim yupela long mekim dispela samting: Long nau yupela i mas makim haptaim bilong trenim ol narapela long olgeta taim.

10. Ol elda i ken mekim wanem na bai ol i gat taim long trenim ol narapela?

¹⁰ Em tru olsem yupela i lusim bikpela haptaim long mekim ol bikpela wok bilong kongrigesen, na dispela inap mekim na yupela i pilim olsem yupela i no gat taim moa. Olsem na yupela i ken yusim sampela bilong ol dispela haptaim long trenim ol narapela. (Sav. 3:1) Long dispela rot, yupela i yusim taim bilong yupela long mekim gutpela wok.

REDIM TINGTING NA BEL

11. (a) Taim ol elda long ol narapela narapela hap i kamapim tingting bilong ol long pasin bilong trenim ol narapela, dispela i kamapim klia wanem samting? (b) Olsem Sindaun 15:22 i tok, bilong wanem em i gutpela long skelim tingting bilong ol narapela elda?

¹¹ Sampela elda i bin helpim ol narapela brata long kamap strong long bilip, na ol i stori long pasin ol i bihainim long trenim ol narapela brata.b Maski ol elda i bihainim narapela narapela pasin bilong trenim ol narapela, ol i givim wankain skultok. Dispela i kamapim klia wanem samting? Dispela skul i kam long Baibel i stret long olgeta man i kisim trening na ol i stap long “olgeta kongrigesen long olgeta hap”—wankain olsem long taim bilong aposel Pol. (1 Kor. 4:17) Long dispela stadi na long neks stadi, yumi bai skelim sampela tingting em ol dispela elda i kamapim.—Snd. 15:22.

12. Elda i mas mekim wanem? Bilong wanem?

¹² Elda i mas mekim sampela samting paslain long em i trenim narapela brata. Man bilong wokim gaden i mas stretim graun paslain long em i planim sid, na olsem tasol elda i mas redim gut bel na tingting bilong brata paslain long em i skulim brata. Ol elda i ken bihainim pasin em wanpela profet long bipo i bin mekim. Orait, dispela profet i bin mekim wanem?

13-15. (a) God i tokim profet Samuel long mekim wanem wok? (b) Olsem wanem Samuel i inapim wok bilong em? (Lukim piksa long kirap bilong stadi.) (c) Bilong wanem ol elda long nau i mas tingim gut stori bilong profet Samuel?

¹³ Winim 3 tausen yia i go pinis, Jehova i tokim profet Samuel olsem: “Tumora long kain taim olsem, bai mi salim wanpela man bilong lain Benjamin i kam. Na yu mas kapsaitim wel long em bilong makim em i kamap king bilong ol Israel, ol manmeri bilong mi.” (1 Sml. 9:15, 16) Samuel i luksave olsem em i no inap moa long mekim wok olsem man i go pas long lain Israel, na Jehova i tokim em long makim narapela man long kisim ples bilong em. Ating Samuel i tingting olsem, ‘Hau bai mi redim dispela man long mekim wok bilong em?’ Orait, em i kirap plenim ol samting em bai mekim.

¹⁴ Long de bihain, taim Samuel i lukim Sol, Jehova i tokim em olsem: “Em nau, asde mi bin tokim yu long dispela man tasol.” Orait, Samuel i bihainim plen bilong em. Em i singautim Sol i go kaikai wantaim em long bikpela rum bilong kaikai. Samuel i tokim Sol na wokman bilong em long sindaun long ol nambawan gutpela sia long tebol na em i katim gutpela mit tru na i givim long tupela, na em i tok: “Kisim dispela hap mit mipela i bin putim i stap bilong yu tasol, na yu kaikai. Mi wetim yu inap long nau, olsem na yu mas kaikai.” Bihain, Samuel na Sol i wokabaut i go long haus bilong profet Samuel, na ol i wok long stori taim ol i wokabaut i go. Ol i amamas long gutpela kaikai ol i bin kisim na nau ol inap wokabaut wantaim na stori gut, olsem na Samuel i laik yusim gut dispela haptaim. Em apinun na Samuel i tokim Sol long i go sindaun wantaim em antap long rup bilong haus. Samuel i “toktok wantaim Sol” i go inap long biknait na ol i slip. Long neks de, Samuel i kapsaitim hap wel long het bilong Sol na makim em long kamap king. Samuel i givim kis long Sol na i tokim Sol long ol samting em i mas mekim. Bihain long dispela, em i salim Sol i go—Sol i redi nau long mekim nupela wok bilong em.—1 Sml. 9:17-27; 10:1.

¹⁵ Pasin bilong makim man long kamap king bilong wanpela lain, dispela i no wankain long pasin bilong trenim ol brata long kamap elda o kongrigesen sevan. Tasol ol elda long nau inap kisim sampela gutpela skul long pasin bilong Samuel. Yumi ken skelim 2-pela skultok.

GUTPELA TISA NA GUTPELA PREN

16. (a) Samuel i pilim olsem wanem taim lain Israel i askim em long makim wanpela man long kamap king bilong ol? (b) Samuel i holim wanem tingting taim em i makim Sol long kamap king?

¹⁶ Amamas, no ken les. Taim Samuel i harim olsem lain Israel i laikim wanpela king, em i pilim olsem ol manmeri bilong em i bel hevi long em na ol i sakim em. (1 Sml. 8:4-8) Em i les olgeta long mekim samting ol manmeri i tokim em long mekim, olsem na inap 3-pela taim Jehova i tokim em long bihainim tok bilong ol manmeri. (1 Sml. 8:7, 9, 22) Maski i olsem, Samuel i no bel kros o bel hevi long man husat bai kisim ples bilong em. Taim Jehova i tokim profet Samuel long makim Sol, pasin laikim i kirapim em na em i amamas long makim Sol, na i no olsem em i les wantaim na mekim dispela wok.

17. (a) Olsem wanem ol elda long nau i soim olsem ol i holim wankain tingting olsem Samuel? (b) Ol elda i save pilim olsem wanem taim ol brata i bihainim gut trening ol i kisim?

¹⁷ Olsem Samuel, ol elda long nau i holim stretpela tingting taim ol i trenim ol narapela brata. (1 Pita 5:2) Ol dispela elda i no holim tingting kranki olsem ol dispela brata bai kisim ples bilong ol long mekim ol wok insait long kongrigesen. Ol gutpela tisa i no save tingim ol sumatin olsem ol birua, nogat, ol i tingim ol olsem “ol wanwok”—olsem ol gutpela blesing bilong kongrigesen. (2 Kor. 1:24; Hib. 13:16) Taim ol elda i lukim olsem ol brata i yusim save ol i kisim long helpim kongrigesen, dispela i save givim bikpela amamas tru long ol elda!—Apo. 20:35.

18, 19. (a) Elda inap mekim wanem bilong redim tingting na bel bilong brata em i laik trenim? (b) Bilong wanem em i bikpela samting long elda i mas mekim olsem?

¹⁸ Stap olsem tisa na pren. Long namba 1 taim Samuel i bungim Sol, Samuel inap rausim jak wel na kapsaitim kwik long het bilong Sol bilong makim olsem em i kamap king na salim em i go—dispela bai soim olsem God i makim em long kamap king, tasol em i no redi yet long mekim dispela wok. Tasol Samuel i lusim bikpela haptaim long redim bel na tingting bilong Sol. Bihain long ol i kaikai, wokabaut wantaim, stori gut, na kisim malolo, Samuel i pilim olsem nau em taim stret bilong makim Sol long kamap king.

¹⁹ Long nau tu, paslain long tisa i kirap long skulim sumatin, em i mas lusim sampela haptaim long mekim ol samting bilong kamap pren bilong sumatin na tingting na bel bilong sumatin i ken i stap isi. Long wan wan ples, i gat narapela narapela pasin ol elda inap bihainim long kamapim pasin pren namel long ol na ol brata ol i laik trenim. Maski yu stap long wanem hap na yu gat planti wok long mekim olsem elda, tasol yu lusim sampela haptaim long trenim brata, i olsem yu tokim brata: “Mi tingim yu tru.” (Ritim Rom 12:10.) Long olgeta hap bilong graun, brata i kisim trening bai pilim tru pasin bilong elda i trenim em.

20, 21. (a) Gutpela tisa bai bihainim wanem kain pasin? (b) Long neks stadi, yumi bai skelim wanem samting?

²⁰ Yupela ol elda, tingim olsem: Gutpela tisa i save skulim man na laikim tu man em i skulim. (Skelim Jon 5:20.) Sumatin inap luksave kwik long pasin bilong tisa long skulim em, na dispela inap stiaim em taim em i wok long kisim trening, olsem em bai bihainim skul em i kisim, o nogat. Olsem na yupela ol elda, taim yupela i trenim ol narapela brata, yupela i mas i stap olsem tisa na pren bilong ol.—Snd. 17:17; Jon 15:15.

²¹ Taim elda i redim pinis tingting na bel bilong brata em i laik trenim, em i mas givim trening we bai helpim brata. Elda inap bihainim wanem ol rot long trenim brata? Yumi bai skelim dispela samting long neks stadi.