Yu Redi Long “Kisim Graun Olgeta”?

REDI LONG MEKIM GRAUN I KAMAP PARADAIS

Taim Jehova i tokim ol manmeri long i “go sindaun long olgeta hap bilong graun na bosim olgeta samting i stap long en,” tok bilong em i makim olsem graun olgeta bai kamap wanpela ples Paradais. (Stt. 1:28) Ol man em ol bai kisim graun na stap laip oltaim long en, ol i mas bihainim dispela tok. Taim ol i kisim graun, graun bai i no stap yet olsem wanpela Paradais na gaden Iden i no stap moa. So bihain stret long Armagedon, yumi bai i gat planti wok bilong klinim ol hap bilong graun em nau ol i bagarap i stap. Dispela em bai wanpela bikpela wok tru!

Dispela i mekim na yumi tingim wok em lain Israel i mas mekim taim ol i lusim Babilon na i kam bek. I no gat wanpela man i bin sindaun long graun bilong ol inap 70 yia. Tasol Aisaia i tok profet olsem Jehova bai blesim ol, na ol bai mekim dispela graun i kamap naispela gen. Tok profet i kamapim olsem: “Em bai mekim ol ples nating bilong en i kamap olsem Iden na ol ples wesan nating bilong en i kamap olsem gaden bilong Jehova.” (Ais. 51:3) Ol Israel i mekim olsem. Olsem tasol, Jehova bai blesim ol man em ol i kisim graun na ol bai mekim dispela graun i kamap wanpela Paradais. Na long nau tu, yu ken soim olsem yu laik insait long dispela wok.

Wanpela rot yu ken mekim olsem em long klinim gut haus na eria bilong yu na putim gut ol samting. Yu ken mekim olsem maski ol neiba bilong yu i no stap klin. Na tu, yu ken helpim wok bilong klinim na stretim Haus Kingdom na Haus Kibung long hap bilong yu. Sapos i orait long sindaun bilong yu, yu ken aplai tu na insait long wok bilong disasta rilif long hap bilong yu. Long dispela rot, yu soim olsem yu redi long helpim wok sapos i gat nid. Askim yu yet, ‘Mi ken lain long sampela save bilong mekim wok we mi inap yusim long bihain sapos Jehova i larim mi kisim graun?’

REDI LONG HELPIM OL MAN I KIRAP BEK

Bihain stret long Jisas i kirapim bek pikinini meri bilong Jairus, em i tokim ol long givim sampela kaikai long dispela pikinini. (Mak 5:42, 43) Ating em i no hatwok long givim kaikai long dispela pikinini meri i gat 12-pela krismas. Tasol tingim, bai i gat bikpela wok tru bilong mekim taim Jisas i truim tok promis bilong em olsem “olgeta man i stap long matmat ol bai harim nek bilong Pikinini na kam ausait.” (Jon 5:28, 29) Baibel i no stori planti long wanem samting yumi bai mekim, tasol yumi ken tingim olsem ol man i kirap bek bai nidim helpim long sait bilong kaikai, ples slip, na klos. Yu ting long nau yet yu ken soim olsem yu redi long helpim wok? Hia em sampela askim bilong tingim.

Taim ol i mekim toksave olsem wasman sekit bai visitim kongrigesen bilong yu, yu save redi long singautim em long kaikai wantaim yu? Taim ol spesel fultaim sevan i kisim nupela asainmen long go bek long fil o taim wanpela wasman sekit i pinisim wok sekit bilong em, yu ting yu ken redi long helpim em long painim wanpela ples slip? Sapos wanpela rijinel o spesel kibung bai kamap long hap bilong yu, yu ting yu ken volantia long wok paslain o bihain long kibung o redi long welkamim ol deleget?

REDI LONG SKULIM OL MAN I KIRAP BEK

Olsem Aposel 24:15 i kamapim, yumi save olsem planti bilion manmeri bai kirap bek. Planti bilong ol em ol manmeri husat i no bin gat rot long kisim save long Jehova. Dispela rot bai op long ol bihain long ol i kirap bek.a Ol gutpela wokman bilong God bai mekim dispela wok bilong skulim ol man. (Ais. 11:9) Charlotte, em i bin autim tok long Yurop, Saut Amerika, na Afrika, em i luk fowed long mekim dispela wok. Em i amamas na i tok: “Mi luk fowed long skulim ol manmeri i kirap bek. Taim mi ritim stori bilong wanpela husat i bin stap long bipo, mi save tingting: ‘Sapos dispela man i bin save long Jehova, ating laip bilong em bai narapela kain tru.’ Mi luk fowed long tokim ol man i kirap bek long Jehova na hau laip bilong ol bai gutpela tru taim ol i mekim wok bilong em.”

Ol gutpela wokman bilong Jehova em ol i bin stap paslain long Jisas i kam long graun, ol tu bai i gat planti samting bilong kisim skul long en. Tingim gutpela blesing na amamas yumi bai kisim taim yumi eksplenim long Daniel truim bilong ol tok profet em i bin raitim, tasol em i no bin kliagut long en. (Dan. 12:8) Na tingim hau yumi bai helpim Rut na Naomi long kisim save olsem famili bilong ol i hap bilong lain famili em Mesaia i kamap long en. Man! Bai yumi amamas tru long insait long dispela wok bilong skulim ol man i kamap long olgeta hap bilong graun, we i no gat wanpela samting nogut bilong nau i stap na i pulim yumi!

Yu ken mekim wanem long nau bilong soim olsem yu redi long insait long dispela bikpela wok? Wanpela rot em long kamap gutpela moa long wok tisa bilong yu na oltaim insait long wok bilong skulim ol man i kamap nau long olgeta hap bilong graun. (Mat. 24:14) Maski krismas bilong yu o ol narapela samting i pasim yu long mekim bikpela wok moa long nau, yu givim bel yet na dispela i soim olsem yu redi long skulim ol manmeri i kirap bek.

Em i bikpela samting long tingim ol dispela bikpela askim olsem, Tru tru yu luk fowed long kisim graun olgeta? Yu amamas long insait long wok bilong mekim graun i kamap Paradais, na tu, long helpim ol man i kirap bek na long skulim ol? Yu ken soim olsem yu redi long stap oltaim long graun long rot bilong insait long ol wok i wankain long ol wok yu bai mekim taim yu kisim graun olgeta!