Painim Gutpela Ples Bilong Stadi

Yu laik bai pesenel stadi bilong yu i helpim yu gut? Sapos olsem, orait yu ken traim bihainim ol dispela rot bilong stadi bambai yu ken putim gut tingting long stadi bilong yu:

• Makim wanpela gutpela ples. Sapos inap, makim wanpela hap i no gat planti samting i stap nabaut na i gat gutpela lait. Yu ken sindaun long wanpela sia klostu long tebol o yu ken makim wanpela eria ausait long haus bilong stadi.

• Painim ples we yu ken stap yu yet. Jisas i makim olsem em bai beten “long bikmoning . . . long wanpela hap i no gat man.” (Mak 1:35) Sapos i no gat rot long yu ken stap yu yet long stadi, orait i gutpela long yu toksave long famili bilong yu o ol wanhaus bilong yu long stadi sediul bilong yu na askim ol long no ken distebim yu long dispela taim.

• Putim tingting olgeta. Abrusim ol samting inap pulim nabaut tingting. Sapos yu yusim fon o tablet bilong yu long stadi, orait putim long sailent o putim long eplein mod na bai em i no ken distebim yu. Na sapos yu tingim wanpela samting yu laik mekim, orait raitim long pepa na putim i stap bilong mekim bihain. Sapos yu lukim olsem i hatwok long yu putim tingting olgeta long stadi bilong yu, orait wokabaut liklik o mekim liklik eksasais.