Risimu Ra Solomoni
2 “Mina ndzo va safroni+ ya le rivaleni ra le ribuweni,+ khon’wa ra le timbaleni ta le hansi.”+
2 “Ku fana ni khon’wa exikarhi ka mfava wa mitwa, u tano nhwanyana wa mina la nga nakulorhi exikarhi ka vanhwanyana.”+
3 “Ku fana ni muapula+ exikarhi ka mirhi ya khwati, u tano murhandziwa wanga exikarhi ka majaha.+ Ndzhuti wakwe ndza tshwa hi ku wu navela, kutani loko ndzi tshame ehansi, mbhandzu wakwe wu endliwe wu tsokombela emalakeni ya mina. 4 U ndzi tise endlwini ya vhinyo,+ ni mujeko+ wakwe lowu a wu ri ehenhla ka mina a ku ri rirhandzu.+ 5 Ndzi phyuphyiseni hi mukhusu wa madiriva,+ ndzi nyikeni maapula ndzi dya; hikuva ndzi vabyisiwa hi rirhandzu.+ 6 Voko rakwe ra ximatsi ri le hansi ka nhloko ya mina; ni voko rakwe ra xinene—ra ndzi angarha.+ 7 Ndzi mi hlambanyisile,+ N’wina vanhwanyana va Yerusalema, hi timhala+ ta matswele kumbe timbavala,+ leswaku mi nga tshuki mi ringeta ku hlohlotela kumbe ku pfuxa rirhandzu eka mina kukondza na mina ndzi titwa ndzi swi rhandza.+
8 “Mpfumawulo wa murhandziwa wanga!+ Waswivo! Loyi wa ta,+ u tlula ehenhla ka tintshava, u tlula ehenhla ka switsunga. 9 Murhandziwa wanga u fana ni mhala+ kumbe marhole ya timbavala. Waswivo! Loyi u yime endzhaku ka khumbi, a honolela emafasitereni, a hlometela hi swo siva fasitere.+ 10 Murhandziwa wanga u ndzi hlamurile, a ku, ‘Pfuka, wena nhwanyana la nga nakulorhi, wena la sasekeke wa mina,+ u humela ehandle.+ 11 Hikuva waswivo, nguva ya mpfula+ yi hundzile, maboboma ya mpfula ma herile, ma fambile. 12 Tiko ri rhumbukile,+ nkarhi wa ku tshena+ mirhi ya vhinya wu fikile, naswona rito ra gugurhwana+ ri twiwile etikweni ra hina. 13 Loko ku ri nkuwa,+ wu ni muvala lowu wupfeke wa makuwa ya wona yo sungula;+ ni mirhi ya vhinya yi baleka swiluva, yi humese nun’hwelo wa yona. Pfuka, tana, Wena nhwanyana la nga nakulorhi,+ la sasekeke wa mina, u humela ehandle. 14 Oho tuva+ ranga leri nga emabakweni ya ribye, endhawini leyi tumbeleke ya ndlela leyi nga xiganga, ndzi kombe xivumbeko xa wena,+ ndzi twise rito ra wena, hikuva rito ra wena ra tsakisa ni xivumbeko xa wena xa languteka.’”+
15 “Hi khomeleni tinhlati,+ tinhlati letitsongo leti onhaka masimu ya vhinya, tanihi leswi masimu ya hina ya vhinya ma balekaka swiluva.”+
16 “Murhandziwa wanga i wa mina, na mina ndzi wa yena.+ U risa+ exikarhi ka makhon’wa.+ 17 Ku fikela loko ku va ni rimoyana ra siku ni mindzhuti yi balekile, hundzuluka, Wena murhandziwa wanga; fana ni mhala+ kumbe marhole ya timbavala lama nga ehenhla ka tintshava leti avaneke.