Risimu Ra Solomoni

8 “Mawaku loko a wu ri makwerhu,+ u an’we mavele ya manana!+ Loko a ndzo ku kuma ehandle, a ndzi ta ku ntswontswa.+ Vanhu a va nga ta ndzi langutela ehansi. 2 A ndzi ta famba na wena, a ndzi ta ku tisa endlwini ya manana,+ loyi a a tshamela ku ndzi dyondzisa. A ndzi ta ku nyika vhinyo leyi cheriweke murhi wo nun’hwela,+ mati lamantshwa ya mihandzu ya magrenada. 3 Voko rakwe ra ximatsi a ri ta va ehansi ka nhloko ya mina; ni voko rakwe ra xinene—a ri ta ndzi angarha.+

4 “Ndzi mi hlambanyisile, N’wina vanhwanyana va Yerusalema, leswaku mi nga tshuki mi ringeta ku hlohlotela kumbe ku pfuxa rirhandzu eka mina kukondza na mina ndzi titwa ndzi swi rhandza.”+

5 “I mani wansati+ loyi a humaka emananga,+ a khegele murhandziwa wakwe?”+

“Ndzi ku pfuxile ehansi ka muapula. Mana wa wena a a lun’wa kwalaho. Loyi a a ku veleka kwalaho a a ri ni ku lun’wa ka ku veleka.+

6 “Ndzi veke ndzi va mfungho embilwini+ ya wena, ndzi va mfungho evokweni ra wena; hikuva rirhandzu ri ni matimba ku fana ni rifu,+ ku tinyiketela loku hlawulekeke+ a ku tsekatseki, ku fana ni Sheol. Ku hisa ka kona ku fana ni ku hisa ka ndzilo, langavi ra Yah.+ 7 Mati yo tala a ma swi koti ku tima rirhandzu,+ hambi ku ri milambu a yi nge ri khukhuli.+ Loko munhu o hanana hi swilo swakwe hinkwaswo swa nkoka swa le ndlwini yakwe hikwalaho ka rirhandzu, vanhu va ta n’wi langutela ehansi.”

8 “Hi ni makwerhu wa xisati+ lontsongo la nga riki na mavele. Xana hi ta n’wi endlela yini makwerhu wa xisati siku leri va nga ta n’wi kombela?”

9 “Loko o va rirhangu,+ hi ta n’wi akela xihlungwa xa silivhere; kambe loko o va nyangwa,+ hi ta n’wi siva hi pulanga ra mukedari.”

10 “Mina ndzi rirhangu, naswona mavele ya mina ma fana ni swihondzo.+ Kutani ematihlweni yakwe ndzi fana ni loyi a kumaka ku rhula.

11 “A ku ri ni nsimu ya vhinya+ leyi Solomoni a a ri na yona eBali-hamoni. Nsimu ya vhinya u yi nyikele eka vahlayisi.+ Ha un’we a a tisa mihandzu ya yona, swiphemu swa silivhere leswi ringanaka 1 000.

12 “Nsimu ya mina ya vhinya, leyi nga ya mina, yi le hansi ka mina. Leta 1 000 i ta wena, Wena Solomoni, leta 200 i ta lava va hlayisaka mihandzu ya tona.”

13 “Oho n’wina mi tshamaka emintangeni,+ lava mi tirhisanaka na vona va yingisa rito rakwe. Ndzi twiseni rona.”+

14 “Baleka, murhandziwa wanga, u tiendla u fana ni mhala kumbe rhole ra timbavala ehenhla ka tintshava ta mirhi yo nun’hwela.”+