Esaya
39 Enkarhini wolowo Merodaka-baladani+ n’wana wa Baladani hosi ya Babilona+ a rhumela mapapila ni nyiko+ eka Hezekiya, endzhaku ka loko a twe leswaku a a vabya, kambe u tlhele a hlakarhela.+ 2 Kutani Hezekiya a va tsakela,+ hiloko a va komba yindlu yakwe ya xuma,+ silivhere ni nsuku ni mafurha ya balsama ni mafurha lamanene+ ni hinkwako laha a hlayiselaka swihlomo+ swakwe ni hinkwaswo leswi a swi kumeka exumeni xakwe. A ku vanga na nchumu lowu Hezekiya a nga va kombangiki wona endlwini+ yakwe ni le vulawurini byakwe hinkwabyo.+
3 Endzhaku ka sweswo Esaya lowa muprofeta a ya eka Hosi Hezekiya a ku eka yena:+ “Xana vavanuna lava va te yini, naswona a va huma kwihi loko va fika eka wena?” Hiloko Hezekiya a ku: “Va fike eka mina va huma etikweni ra le kule, eBabilona.”+ 4 Kutani a ya emahlweni a ku: “Va vone yini endlwini ya wena?”+ Hiloko Hezekiya a ku: “Xin’wana ni xin’wana lexi nga endlwini ya mina va xi vonile. A ku na nchumu lowu ndzi nga va kombangiki wona exumeni xa mina.” 5 Hiloko Esaya a ku eka Hezekiya:+ “Yingisa rito ra Yehovha wa mavuthu, 6 ‘Waswivo! Masiku ma ta, kutani hinkwaswo leswi nga endlwini ya wena ni leswi vatata wa wena va swi hlayiseke ku fika esikwini leri swi ta rhwariwa swi ya eBabilona.’+ ‘A ku nge siyiwi nchumu,’+ Yehovha u vurile. 7 ‘Kutani vana va wena van’wana lava nga ta huma eka wena, lava u nga ta va tata wa vona, kunene va ta tekiwa+ va ya va vatirhi va le hubyeni+ exigodlweni xa hosi ya Babilona.’”+
8 Hiloko Hezekiya a byela Esaya a ku: “Rito ra Yehovha leri u ri vuleke i rinene.”+ A ya emahlweni a ku: “Hikuva ku rhula ni ntiyiso+ swi ta tshama swi ri kona emasikwini ya mina.”+