Yeremiya

6 Oho n’wina vana va Benjamini, balekani exikarhi ka Yerusalema mi ya tumbela; yimbani nanga+ eTekowa.+ Yimisani xikombiso xa ndzilo eBeta-hakarimi;+ hikuva khombo ri langute ehansi ku suka en’walungwini, ku wa lokukulu.+ 2 Hakunene nhwanyana wa Siyoni u fana ni wansati la langutekaka, la kurisiweke hi swilovolovo.+ 3 Varisi va ya eka yena ni mintlhambi. Va dzima mintsonga ya vona va n’wi rhendzela.+ Un’wana ni un’wana a dyisela xiphemu xakwe.+ 4 Va hlawulekise nyimpi+ ku lwa na yena: “Pfukani, a hi tlhandlukeni ninhlikanhi!”+

“Khombo eka hina hikuva dyambu ri rhengile, hikuva mindzhuti ya madyambu yi ya yi kula!”

5 “Pfukani, a hi tlhandlukeni nivusiku, hi lovisa swihondzo swa yena swo tshama eka swona.”+

6 Hikuva Yehovha wa mavuthu u te: “Tsemani mirhi+ kutani mi yimisa rirhangu ro anama ku lwa na Yerusalema.+ I muti lowu faneleke wu tihlamulela.+ I ntshikilelo ntsena exikarhi ka yena.+ 7 Tanihi leswi xihlovo xi hlayisaka mati ya xona ma titimela, na yena u hlayise vubihi byakwe byi titimela. Eka yena ku twakala madzolonga ni ku phanga;+ vuvabyi ni khombo swi le mahlweni ka xikandza xa mina nkarhi hinkwawo. 8 Oho Yerusalema, lulamisiwa+ leswaku moya-xiviri wa mina wu nga suki eka wena wu nyenyetsekile;+ leswaku ndzi nga ku endli rhumbi, tiko leri nga riki na vaaki.”+

9 Yehovha wa mavuthu u te: “Kunene va ta khwaja masalela ya Israyele ku fana ni murhi wa vhinya.+ Tlherisa voko ra wena ku fana ni loyi a hlengeletaka madiriva emarhavini ya murhi wa vhinya.”

10 “I vamani lava ndzi nga ta vulavula na vona, ndzi va lemukisa, leswaku va twa? Waswivo! Ndleve ya vona a yi yimbanga, lerova a va swi koti ku nyikela nyingiso.+ Waswivo! Rito ra Yehovha ri hundzuke ndzhukano eka vona,+ rito rero a va ri tsakelanga.+ 11 Naswona ndzi tele hi vukarhi bya Yehovha. Ndzi karhele ku tiyisela.”+

“Byi chulule ehenhla ka n’wana exitarateni+ ni le henhla ka ntlawa lowu hlanganeke wa majaha hi nkarhi lowu fanaka; hikuva va ta khomiwa, wanuna swin’we ni nsati wakwe, wanuna la kuleke swin’we ni loyi a nga ni masiku yo tala.+ 12 Kunene tindlu ta vona ti ta va ta van’wana, masimu ni vasati va vona hi nkarhi lowu fanaka.+ Hikuva ndzi ta tshambulutela voko ra mina ehenhla ka vaaki va tiko,” ku vula Yehovha.+

13 Hikuva ku suka eka lontsongo wa vona ku ya eka lonkulu, un’wana ni un’wana u tiendlela mpindzulo wo biha;+ naswona ku suka eka muprofeta ku ya eka muprista, un’wana ni un’wana u endla hi vunwa.+ 14 Va ringeta ku tshungula ku tshoveka ka vanhu va mina hi ndlela yo vevuka,+ va ku, ‘Ku ni ku rhula! Ku ni ku rhula,’ kasi a ku na ku rhula.+ 15 Xana va khomiwe hi tingana hikwalaho ka leswi va endleke swo nyenyetsa?+ Xo sungula, a va khomiwi hi tingana nikatsongo; xa vumbirhi, a va si tshama va titwa va tsongahatekile.+ Hikokwalaho va ta wa exikarhi ka lava waka;+ va ta khunguvanyeka enkarhini lowu ndzi nga ta endla leswaku va tihlamulela,” Yehovha u vurile.

16 Yehovha u te: “Yimani mi nga fambi etindleleni, mi vona, mi vutisa tindlela ta khale swinene, laha sweswi ku nga ni ndlela leyinene;+ mi famba ha yona,+ mi humurisa mimoya-xiviri ya n’wina.”+ Kambe va hambete va ku: “A hi nge fambi.”+ 17 “N’wina ndzi mi vekele varindzi,+ ‘Yingisani mpfumawulo wa nanga!’”+ Kambe va hambete va ku: “A hi nge wu yingisi.”+ 18 “Hikokwalaho twanani, N’wina matiko! Mi tiva, N’wina ntshungu, leswi nga ta va exikarhi ka vona. 19 Yingisa, Wena misava! Ndzi tisa khombo eka vanhu lava,+ ri va mihandzu ya miehleketo ya vona,+ hikuva a va ma yingisanga marito ya mina; naswona nawu wa mina—va hambete va wu bakanya.”+

20 “Xana swi vula yini eka mina leswi mi tisaka murhi wa risuna wa le Xeba+ ni rihlanga lerinene ra le tikweni ra le kule? Magandzelo ya n’wina hinkwawo yo hisiwa a ma tsakisi,+ ni switlhavelo swa n’wina a swi ndzi tsakisanga.”+ 21 Hikokwalaho Yehovha u te: “Maswivo, ndzi vekela vanhu lava swikhunguvanyiso,+ kunene swi ta va khunguvanyisa, vatatana ni vana; muakelani ni nakulobye—va ta lova.”+

22 Yehovha u te: “Waswivo! Vanhu va ta, va huma etikweni ra le n’walungwini, naswona ku ni tiko lerikulu leri nga ta pfuxiwa ku suka eswiphen’wini swa le kule swinene swa misava.+ 23 Va ta khoma vurha ni tlhari.+ Va ni tihanyi, naswona a va nge vi na ntwela-vusiwana. Rito ra vona ri ta pfuma kukota lwandle,+ va ta gada tihanci.+ Va fole hi ku landzelana ku fana ni wanuna wa nyimpi ku lwa na wena, Wena nhwanyana wa Siyoni.”+

24 Hi xi twile xiviko xa vona. Mavoko ya hina ma hele matimba.+ Hi khomiwe hi maxangu, switlhavi swa ku veleka swo fana ni swa wansati la velekaka.+ 25 U nga humi u ya emasin’wini, naswona u nga fambi endleleni; hikuva ku ni tlhari ra nala, ku ni ku chava matlhelo hinkwawo.+ 26 Oho nhwanyana wa vanhu va mina, tikhame nguvu yo khwaxa,+ u vumbuluka enkumeni.+ Ku rila ka wena a ku fane ni ka n’wana la nga swakwe, ku kalakala ka mbitsi;+ hikuva la phangaka u ta hi tela hi xitshuketa.+

27 “Ndzi ku endle u va loyi a kambelaka nsimbi exikarhi ka vanhu va mina, loyi a lavisisaka hi rixaladza; u ta lemuka kutani u kambela ndlela ya vona.+ 28 Hinkwavo i vanhu vo sihalala swinene,+ va famba-famba va lumbeta+—koporo ni nsimbi. Hinkwavo va onha.+ 29 Swihuhuto+ swi vavuriwile. Endzilweni wa vona ku huma ntsopfu.+ Munhu u hambete a tengisa swinene hi ndlela ya hava, lavo biha a va hambanisiwanga.+ 30 Kunene vanhu va ta va vula silivhere leyi bakanyiweke,+ hikuva Yehovha u va bakanyile.”+